1 Stori 5 - Nobonob Baibel

Ruben buɗub

¹ Ruben, nug am Israel bekka naanaeg. Nug nid danab naanaeg, amge nug kobol dubuttid ele he, nug mameg wau amge waunab iitta, nug nug ele niipiɗ amunu, ⌊Jakop nug⌋ nid danab naanaegnu binag nuhigppa dayom aɗitta awa, nug bekka Josep bekoɗ matom. Amu diig amunu, Jakop bekka naanaeg, Ruben, nug nid danab naanaeg, amge nug onig nid danab naanaeg abenppa ii daatte.

² Judanu amu, Juda buɗub ag ɠagattagnab bena oippig, Juda awakkud, amakkud laa oh eɗattak; king nug buɗubppa ele beum, amge Josep buɗub ag nid naanaegnu binag aon oippig; Juda iitta.

³ Amu Ruben, Israel nid naanaeg, nug bekkod am Hanok, Palu, Hesron, Karmi ele.

⁴ Joel buɗub am inam. Joel bekka am Semaia. Semaia bekka am Gog. Gog bekka am Simei.

⁵ Simei bekka am Maika. Maika bekka am Reaia. Reiaia bekka am Bal.

⁶ Bal bekka am Bera. Bera nug am Ruben buɗub dilag ikki danab laa dayeye amu, Asiria dilag king Tiklat Pileser nug Bera aɗa, awa ukka, wan laappa me, appa nug diia ukka laih me dayak danab dayom.

⁷ Amu Joel ele tiilag laippu, ag baelkad anen anen digmakppanu uɗiak onilkad bukppa yaappig, amu onilkad am iikku: Jeiel, nug anuqak dayom, Sekaraia,

⁸ Bela, Bela mameg Asas, Asas mameg Sema, amu Sema mameg Joel. Danab amu ag Aroer appa, yawalti uɗitteppanu daaeg ukke ukke, Nebo, Balmeon batakppa ele daappig.

⁹ Ag anam daanna amu, ag kaɗag uɗitteppanu gona daaeg ukke ukke, atu taɗak laa Yupretis le daugppa daatte, atu taɗak amu daug laih batakppa ele daappig. Ag wan amu ohppa daan oippignu diig am, ag ahilag doɗ Gileat wanppa huana apatppig.

¹⁰ Amu Saul nug Israel dilag king dayeye, Ruben buɗub amu ag Hagri danab ele ban hena, ag Hagri danab eɗadna, ag wan ahilag ele aon daappig. Hagri danab ag wan atu Gileat wanppanu kaɗag uɗitteppanu oippigppa amu, Ruben buɗub ag wan amu, peh lag, keeke ahilag ele aon, aguppa daan oippig.

Gad buɗub

¹¹ Gad buɗub ag Basan appa Ruben wan heqo laih daaeg ukke ukke, Saleka batak

¹² daappig, amu ag oolagppanu Joel, nug Basan wanppa okkai dayom, amu nug dimugppa am Sapam. Aria, okkai aɗit laa am Janai, Sapat ele.

¹³ Danab amu, laa ag ele tiilag laippu amu, ag baelkad anen anen dilag okkai daappig am inam: Maikel, Mesulam, Seba, Jorai, Jakan, Sia, am Eber ele. Amu oh am eblaih aɗit ele.

¹⁴ Amu oh ag Abihail buɗub. Abihail mameg am Huri. Huri mameg am Jaroa. Jaroa mameg am Gileat. Gileat mameg am Maikel. Maikel mameg am Jesisai. Jesisai mameg am Jahdo. Jahdo mameg am Bus.

¹⁵ Ahi nug ag baelkadppa dilag okkai dayom. Ahi am Abdiel bekka. Abdiel nug Guni bekka.

¹⁶ Gad danab ag Gileat wanppa, Basan wanppa, aab naunau appa daappigppa, amu wan maha laa onig Saron, gikkiɗah dayomppa ele daappig.

¹⁷ Danab uɗat amu heppig ele ag Jotam Juda dilag king dayeye, Jeroboam Israel dilag king dayom, ag haen amuppa Gad buɗub onilag bukppa yaappig.

¹⁸ Ruben buɗub, Gad buɗub, amu Israel dilag huu okkai Manase mahaib, amun danab amu, huu ewam amunu danab ag beɗulag ɠagattag ele, ag qep elab, lat, guppiɗ ele aɗan, ban hekkulagnu ihuhuak aon malan, ban hekkulagnu elele daappig amu, ahilag ebqak am 44,760.

¹⁹ Danab amu ag Hagri danab, Jetur danab, Napis danab, Nodap danab ele ban heppig.

²⁰ Ag ban henana, ag Kayak unuqidppig amunu, Nug ehanatte, ag Hagri danab, ahilag ehanattak ele eɗadppig. Ruben danab, Gad danab, amu Israel dilag huu okkai Manase huu mahaib amunu danab, danab amu ag Kayaknu oolagppa genab dooppig amunu, ag Nug unuqitteg, Nug ag ehanattom.

²¹ Ruben, Gad, Israel dilag huu Manase mahaib, amu dilag daup ag Hagri danab aɗi eɗadna, ahilkad kamel 50,000, ahilkad sipsip 250,000, ahilkad donki 2,000 ele diippig. Ag amu diin, ag Hagri danab ah 100,000 aɗaladna, diin goppig.

²² Kayak Nug Ruben, Gad, Israel dilag huu okkai Manase mahaib dilag daup amu ehanattom amunu, ag Hagri danab eɗadna diippig, amge ag ban henana, kuɗum ele aqappig. Ag danab amu eɗadna, ahilkad wan aona, amuppa daaeg ukke ukke, Asiria uɗin eɗadna, diin gona wan laappa maatteg, ag appa diia ukka laih me dayak danab ah daappig, haen amuppa ag wan amuppa dayaknu batappig.

Israel dilag huu okkai Manase mahaib buɗub

²³ Israel dilag huu okkai Manase mahaib, amunu danab ah, ag Jodan le laih daappig, ag am ebqak kuɗumnab. Ag Basan wanppa daaeg ukka ukka, laih yawalti uɗitteppanu qauko Hermon, Balhermon, Senir ele batappig.

²⁴ Ahilkad danab okkai, ag baelkadppa dilag ikki daappig, amuam Eper, Isi, Eliel, Asriel, Jeremaia, Hodawia, am Jahdiel ele. Danab amu oh ag am ban hak danab, oolagppa ɠagattag doyak ele. Ag onilkad ele. Ag baelkadppa dilag ikki daappig.

²⁵ Amge Israel dilag huu okkai Ruben, Gad, Manase mahaib, ag ag mamelkad aɗi dilag Kayak ag ippuanattom bia Nug dim lamidkkulagnu oo metta ii uuak kobol ii dim lamidna, ag kayak hambuppuak noolagppa digmena dup nona binalag meppig. Kayak hambuppuak amu ag am Kanan danab ah, Kayak he, Israel ag eɗadna, heeg nauhppig ele, kayak amuam danab ah amu dilag kayak.

²⁶ Israel dilag huu okkai Ruben, Gad, Manase mahaib ele ag eheɗ amu heeg, Kayak, Nug Israel dilag Kayak, Nug he, Asiria dilag king Pul, nug onig laa am Tiklat Pileser, nug Asiria dilag king, nug aha, Israel dilag huu okkai Ruben, Gad, Manase mahaib ele eɗatta, appanu wan laappa diia ukka maatte, appa ag diia ukka laih me dayak danab ah daappig. Wan nug diia ukke daappig ele am Hala, Habor, Hara, amu le Gosan guguittak ele. Nug diia ukka, amuppa maatte daaeg uɗie, gemu ⌊nai imu yaak haenppa⌋ ele, ag appa ana daatteb.