1 Stori 29 - Nobonob Baibel

Keeke danab ah ag Yawenu mettid lag hekkulagnu Yawe medappig

¹ Amu King Dawit nug danab oh qagmen daappig amelagppa aum. “Da bekkal Solomon, Kayak Nug nug da abenal awa, king daakkunu tituanom amu, nug nid bau daatte. Nug deɗ laa uɗat laa imubia laa ii heum, amge uɗat nug hekkun daatte am uɗat naɗinab. Aɗinu? Lag enanagnab imuam danab laanu iitta. Mettid lag imuam Yawe Kayaknu lag.

² Da amu dabmein, wagai mein, dahil Kayaknu mettid lag haknu keeke elele daakkunu bappaidmi. Da keeke golppa haknu gol qagmein, keeke silwappa haknu silwa qagmein, keeke brasppa haknu bras qagmein, keeke aenppa haknu aen qagmein, keeke adppa haknu ad ele qagmein, Yawe mettami. Da amu qagmein, da men daden nob okkainab ele, amuam men oniks, men turkois, men kaala iɗu iɗu ele, amu men amubia laala ele, aria men laa onig mabel, da amu oh ele qagmein, Yawe mettami. Da keeke amu oh huanak qagmein, Yawe mettami.

³ Amge da amu aakkuib Kayak ii medapa. Iitta. Ig Kayak, Nug dahil Kayak, ig nuhig mettid lag hekkunignu ool huanaknab daatte amunu, da dahilnab gol, silwa laa ele danab uɗat amu hekkulag, ag amuppa Kayaknu mettid lag nuhignu tituanak daakku, ag lag amu hekkulagnu Kayak medattem.

^4-5 Gol silwa eleppa danab uɗat amu haknu doyak okkai ele ag gol, silwa amu aon, ag gilil neekkak enanag daaglagnu gililppa qataqekkulagnu, ag keeke laala golppa o silwappa ele hekkulagnu da gol, silwa amu ele Yawe medattem. Da gol Nug medattem am gol enanag, Opir wanppanu. Da gol amu 100,000 kilogram, amu silwa babaitta epeɗia awak 240,000 kilogram Yawe medattem. Da amu hettem amu, aun laa ele nug keeke Yawe medakkunu oo hette amu, nug metaɗ!” awa aum.

⁶ Dawit nug anam a amu, Israel baelkadppan ikki danab, Israel dilag huu okkai dilag okkai, ban daup 1,000 dilag ikkilkad, ban daup 100 dilag ikkilkad, danab okkai ag danab kingnu uɗat heppig gumappig ele amu, ag oo qak iitta ele keeke Yawe medappig.

⁷ Ag Kayaknu mettid lag hekkulagnu keeke Kayak medappig. Ag inam medappig; 170,000 kilogram gol, 345,000 kilogram silwa, 610,000 kilogram bras, amu 3,450,000 kilogram aen ele.

⁸ Amu aun nug men daden nob okkainab ele, ag amu aon, danab uɗat amu gumappig ele eppelagppa meeg, ag Yawenu mettid lagnu en maknu oo, ag oo amuppa meppig. Ag appa meeg, Gerson buɗubppan danab Jehiel, nug gumom.

⁹ Okkai danab ag oo qak iitta ele, ag meulag ohppa ele Yawe keeke amu medappig amunu, danab ah ag ahilkad okkai ag oo qak iitta ele keeke Yawe medappig anidna, ag oolag gamag ahom. King Dawit nug ele oo gamag huanak ahom.

Dawit Nug Yawe unuqitta, binag meum

¹⁰ Amu Dawit nug amu antta, nug danab qagmeppig noolagppa Yawe binag metta inam aum. “O Yawe, ig na binan humattem. Na ig memetanig Israelnu Kayak, na hanhan alet daattem.

¹¹ O Yawe, habppanu keeke oh, wanppan keeke oh ele am nahipadib daatteb amunu, na onin, ɠagattag ele. Na ebehin ele, na binag amahlak oppiaawak ele. Na dagom onig ɠagattag ele. Na ɠagattag okkai naɗi ele daattem. Gumak uɗat oh am nahipib, na laa oh eɗattak, oh ikkilag daattem.

¹² Danab ag en okkai, binalag okkai ele amu, ag keeke amu na eppenppa aoppig oitteb. Na keeke oh ikki daattem. Na eppenppa ɠagattag, binag okkai awak ele daattep. Danab oh binag okkai, ɠagattag ele mattaknu amu, amuam na eppenppa aɗattem.

¹³ Amu, O Kayak ihinig, ig na amenppa, ‘Ena hen mekkame,’ atata, na binan amahlak oppiaawak ele dayeye, ig binan okkai medattem.

¹⁴ Amge da am aun? Dahilad danab ah ele ag am aun? Ig am aun amunu, ig keeke okkai imu oo qak iitta na mettagnignu elele? Aɗinu? Keeke oh am na eppenppanu uɗitte, amu ig keeke mettamut ele, ig keeke amu tatam na eppenppanu aot, eɗut mettamut.

¹⁵ Laa amu, ig nahip neekkakppa wan laihnu danab ah; wan imunu aab diig danab ah iitta daattem. Ig mamenkad aɗi ele anamib. Ig wanppa oittem amu, ig haen elabnab ii oittem. Haen tutuib oit, ig mauhta gottem.

¹⁶ O Yawe, ihinig Kayak, na keeke okkai imu ig nahip mettid lag, na onin oppiaawak aguppa daakkunu, ig lag amu hekkunignu iikku mettamut amu, keeke amu oh am na eppenppanu aomut. Am nahip keekeib.

¹⁷ O Kayak dahil, da doottem, na danab oolagppa attem attem daatte, ag oolag italttem. Amu na danab nug nuhig dabmak oiyak ele am tutukkuib anidna, na amunu ootppa ena doottem. Anam amu, keeke imu oh da na mettami amu, da oo qak iitta ele, da dabmak genab dim lamitten mettami. Laa amu, da danab nahipad ag ina daatteb amu, ag oo qak iitta ele keeke medappig, da amu ele antten, gamag ahak okkai doottem.

¹⁸ O Yawe, ig mamenkad aɗi, Abraham, Aisak, Israel ele dilag Kayak, na heppe, nahipad danab ah ag hanhan, alet ele oolag enappa, oo qak iitta eleppa keeke na mettaglagnu, na heppe, ag nahipib dabmena oo metta ii uuak kobol dim lamidkkulagnu dabmak aɗan oiglagnu oɗ medattem.

¹⁹ Amu na ele heppe, da bekkal Solomon nug meu ohppa nahip haknunab anak, nahip nai, amu nahip ɗo nai ele dim lamidkkunu, nug lag enanagnab nahipnu, da lag amunu keeke qagmein bappaidmi daatte amu, nug lag amu buua malakkunu dabmak aɗa oikkunu oɗ medattem.” Dawit nug anam unuqittom.

²⁰ Dawit nug anam unuqitta, nug eɗua danab qagmeppig ele amelagppa aum. “Ag Yawe, ahilag Kayak, ag Nug binag meig!” awa aum. Nug anam a, danab oh ag Yawe, ag mamelkad aɗi dilag Kayak, ag Nug binag meppig. Ag amu hewona, ag Nug noobppa, Dawit noobppa ele gatelag qaun ona, gomelna autna aona, ag iɗulag wanppa mena daappig.

Solomon nug king abenabppa ta dayom

²¹ Amu wagɗe deɗ amuppa ⌊Dawit, danab okkai qagmeppig ele oh⌋ ag manaknu ofa kuɗum Kayak medappig. Ag makau dawai 1,000, sipsip dawai 1,000, sipsip gaiɗ 1,000 ele manadna, Yawe medappig. Ag manadnana, ag wain gokkaɗaknu ofa, Kayak Nug hekkulagnu aum bia ag heppig. Ag amu henana, ag doɗ kuɗum laa ele, Israel ehanadkkulagnu manan, Yawe medappig.

²² Amu deɗ amuppa danab ag Yawe noobppa daanna, ag gamag ahak okkai doon, ag ee, le ele lappig. Amu ag deɗ amuppa ele Dawit bekka Solomon, nug king daakkunu baula anana, ag Yawe noobppa goɗen gokkaɗakppa tituanppig. Laa ele ag Sadok nug mana mettak danab daakkunu goɗen nug igippa gokkaɗppig.

²³ Ag amu heppig amunu, Solomon nug Israel dilag sia kingppa dayaya, Yawenu danab ah gumadkkunu dayom. Nug mameg Dawit sia king amuppa daye, Solomon nug ou daya, sia king amuppa dayom. Nug king dayaya, kingnu uɗat heehe, keeke oh ena be, Israel oh ag nug oɗe dim lamidppig.

²⁴ Ban daup ikki oh, ban danab ɠagattag oh, King Dawit bekkod laa oh ele ag oh genab Solomon waappa daaglagnu madippig.

²⁵ Solomon king abenabppa ba daye, Yawe he, Israel danab ah oh ag Solomon binag okkainab medappig. Israel dilag king laa Solomon ii nak haenppa nug binag okkai amubia laa iitta.

Dawit nug mauhom

²⁶ Jesi bekka Dawit nug Israel oh dilag king dayom.

²⁷ Nug king daye ukke ukke, nug maɗ 40 king daya, nug mauhom. Nug Hebron appa maɗ eblaih aɗit ele king daya, Jerusalem appa nug maɗ 33 king dayom.

²⁸ Nug anam king daye ukke mauhom amu, nug kainonab dayaya mauhom. Nug haen elab bau daya oiyaya mauhom. Nug en okkai ele, binag ele okkai ele. Nug mauhkkun heehe, nug bekka Solomon nug ou daya, king abennabppa ta dayom.

²⁹ Amu Dawit nug digma king daye ukke, nug mauhom batak nug aɗi aɗi heum, nuhigppa aɗi aɗi beum amu, kaya amu oh am propet danab Samuel nug buk laappa yom. Propet danab Natan nug ele buk laappa yom, amu propet Gad nug ele bukppa yom.

³⁰ Nai amuppa amu, ag Dawit nug king dayomnu, ag nuhig ɠagattagnu, aɗi aɗi kobol nuhigppa beumnu, aɗi aɗi kobol Israel dilagppa, wan laappa ele beumnu amu, ag amu ohnu yaappig.