1 Stori 28 - Nobonob Baibel

Dawit nug Yawenu mettid lagnu dottog Solomon mettom

¹ Amu deɗ laa Dawit nug Israel dilag danab okkai oh ag Jerusalem uɗin qagmekkulagnu onilagppa eum. Nug ameg ameg imu onilagppa eum; Israel dilag huu okkai dilag okkai, danab ag king ehanidppig dilag okkai, ban daup 1,000 dilag ikkilkad, ban daup 100 dilag ikkilkad, laa ag king, nug bekkod ele dilag en, doɗ gumak uɗat gumappig ele, ahilag ikki danab, danab ag Dawitnu lag enanagnab gumak uɗat heppig ele, ahilag ikki danab, ban danab ɠagattag, amu daup oh ag oolagppa ɠagattag doyak ele.

² Nug ag onilagppa e uɗin, qagmen daaegeg, King Dawit nug hibaitta dayaya, nug ag amelagppa aum. “O lailad, dahilad danab, ag dahil nai doyeg! Da oolppa lag laa, Yawenu Tituanak Nainu Kunup kontrak inak ele aguppa daakkunu, Yawe, ihinig Kayak, Nug ele aguppa daakkunu buukkulnu ool okkainab dayom. Da lag amu hekkulnu dottog hein, keeke ele qagmemi.

³ Da anam dabmein hemi, amge Kayak Nug da amu hekkulnu aib anan, Nug aum. ‘Na am ban danab, na danab kuɗum aqe mauhppig amunu, na dahil lag ii buumna,’ awa aum.

⁴ Nug da amu hekkulnu aib aum, amge Yawe, Israel dilag Kayak, Nug da, da baeladppa ele ig hanhan king daagnignu ooppa ena doya, Nug tituanikka he, da iikku king daattem. Aɗinu? Nug Israel dilag huu okkai Juda ag Israel oolagppa noob awa ukkak danab daaglagnu tituanatta, Nug da mamel baegppa ele tituanikka, ag oolagppan Nug dahilnu oo ena daye, da king daakkulnu tituaniɗa he, da king daattem.

⁵ Anam ha, Yawe Nug da bekkalad kuɗum meɗom, amge Solomon Nug da dimulppa king abenab awa, king daakkunu Nug tituanom. Nug Yawenu danab ah, am Israel danab ah, nug ahilag king daakku.

⁶ Nug Solomon tituana, nug da amelppa aum. ‘Na bekkat Solomon, nugib dahil lag, dahil lag amunu haɗap keeke ele hekku. Aɗinu? Da nug da bekkal daakkunu tituanmi, amu da nug mameg daakkul.

⁷ Nug dahil ɗo, dahil haknunab anak ele tutukku dim lamidkku, gemu ag hetteb bia, nug anam hekku dayeb amu, laa nug gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku,’ awa aum.

⁸ Anam amunu, gemu da Yawe, ihinig Kayak, Nug dahil nai doyeye, Israel laa oh, ahilag neekkakppa ele, da haknunab nai imu ag madattem. Ag wan ena imu aon, imuppa daan oiglagnu, ag wan imu ag aulag daakkunu, ag aulag amu ag buɗulkad madappeg, hanhan ahilag daakkunu, ag Yawe, ahilag Kayak, ag nuhig haknunab nai oh dim lamitteg!

⁹ Amu Solomon da bekkal, da na amenppa attem. Yawe Nug danab dilag dabmak unuqagppa daatte mattia anidtte, Nug danab nug diig aɗinunab keeke hette ele dootte amunu, na, na mamenad dilag Kayak, Nugib am Kayak dabmena doon, na meut ohppa, nahip dabmak ohppa ele Nug waappa daan, Nug oɗe dim lamitte! Na Yawe anidna dim lamidkkutnu Nug madikkut dayeb, Nug heeb, na Nug anidkkut. Amge na Nug dimettan, uuidkkut dayeb amu, Nug ele na geɗitteb, na anam daappe ukkeb, gogppa teeb batakkut.

¹⁰ ⌊Amu Solomon, da bekkal,⌋ na daut human doye! Aɗinu? Yawe Nug na nuhig mettid lag nuhignu tituanak daakkunu hekkutnu tituanittom amunu, na ɠagattag daan, uɗat amu he!” Dawit nug anam aum.

¹¹ Dawit nug anam mattia mala, nug Yawenu mettid lag dottog Solomon mettom. Dottog amuppa lag amu, lag amunu odppa ukkaknu oo laa, veranda bia, lag amunu lag laala, lag amunu keeke maknu oo, lag amunu oo attan daaglag, lag amunu Oo Gun Ele, amu lag amunu Oo Gunnab Ele, amu ohnu dottog dayom. Oo Gunnab Ele, amuppa mana mettak danab ag eheɗ haknu nob nau doɗ tiigppa iitta mekkunu heeb elele mettaknu uɗat heppig.

¹² Kayak Ouɗi Nug aɗi aɗi dabmak Dawit mettom amu, Dawit nug amunu dottog mettom. Dottog amuam Yawenu mettid lagnu haɗap, oo Nug laug heqo laih laih talilittak daatteb, en maknu oo anen anen, keeke danab ag Kayaknu tituanna medatteb, en amu maknu oo anen anen ele amu, keeke amu oh dottolkad dottog amuppa dayom.

¹³ Dawit nug amu Solomon metta, nug Yawenu mettid lag, appa mana mettak danab obatak atten atten ag ganeb uɗat hekkulag, nug Lewi buɗubppan mana mettak danab iitta, ag obatak atten atten ag ganeb uɗat hekkulag, lag amuppa aɗi aɗi uɗat hekkulag, ag lag amuppa uɗat hekkulagnu keeke ele attem atognokkulag amu, Dawit nug amu oh Solomon ippunittom.

¹⁴ Nug Solomon amegppa amunu mattia mala, nug Yawenu mettid lagnu keeke, mana mettak danab ag amuppa ahilag uɗat hekkulag amu, nug keeke amu anen anen haknu, nug gol, o silwa uug ganeppa keeke amu haknu Solomon amegppa aum.

¹⁵ Amuam Dawit nug lam maknu balal golppa hak, lam aguppa daatteb ele hattaknu amu, gol uug ganeppa amu anen anen haknu, aria lam maknu balal silwappa hak, lam aguppa daatteb ele hattaknu amu, silwa uug ganeppa amu anen anen haknu Solomon amegppa aum. Lam laa nuhig uɗat attem daakku amu, diig amuppa ag balal, o lam amu gol o silwappa hekkulag.

¹⁶ Dawit nug amunu Solomon amegppa awowa, nug balal laalappa bret Kayaknu tituana mettak daatte aguppa hanhan maknu daatte amu, gol uug ganeppa amu anen anen haknu, aria balal silwappa hak ele anamibnu Solomon amegppa aum.

¹⁷ Nug anam awowa, nug huɗup, tiig amuppanu awa tauɗeb ukkaknu tappiɗ, hinai ele, keeke amu oh am gol ena dubuttid iitta eleppa hak amu, nug gol uug ganeppa amu anen anen haknu Solomon amegppa ana, nug tappiɗ golppa hak amu, nug gol uug ganeppa amu anen anennu haknu ele ana, nug tappiɗ silwappa hak amu, nug silwa uug ganeppa amu anen anen haknu ele nug amegppa aum.

¹⁸ Am Dawit nug amu oh Solomon amegppa ana mala, nug kalu muttuɗig enanag ileb baknu qaɗabnu, nug gol babaitta epeɗia awak amu uug ganeppa amu haknu Solomon amegppa aum. Amu engel okkai-kerubim aɗit, Yawenu karis bia daattep amu, aa dottolah Yawenu Tituanak Nainu Kunup kontrak inak ele, aa appa daayya, haulah taiettak daayya, kunup amu attan daattep amu, Dawit nug aa golppa haknu dottog Solomon mettom.

¹⁹ Dawit nug amu oh Solomon ippunitta, nug aum. “Yawe Nug da aɗaile, da Nug oɗeppanu nai awen yaami amu, nai amu oh amuppa daatte. Nug nai amu da meɗa he, da nuhig lag haknu dottog oh doyen malami,” awa aum.

²⁰ Amu Dawit nai imu ele Solomon amegppa aum. “Na ɠagattag daan, ootppa ele ɠagattag doon, uɗat amu he! Yawe Kayak, dahil Kayak, Nug na ele daattep amunu, na aib baɗame. Na dabmak qe nak ele aib doome. Na lag amu, danab ah ag appa Yawe noobppa dup nona Nug binag mekkulagnu daakkunu, amu lag amunu keeke ele babaittak daakkunu, na lag amu heppe ukka ukka, gogppa tekkunu, Nug ii uuidma; Nug ehanidkkunu dabmak ii paɗama.

²¹ Lewi buɗubppan mana mettak danab, Lewi buɗubppan mana mettak danab iitta ele, ag Kayaknu mettid lagppa uɗat hekkulagnu babaittak daatteb. Danab ag uɗat digdig amu hekkulagnu doyak okkai ele ag na ehanidkkulagnu daatteb. Danab okkai, danab ah ele ag haknunab nai nahip dim lamidkkulagnu ele daatteb, ⌊amunu na ahan he!⌋” awa aum.