1 Stori 27 - Nobonob Baibel

Dawit nug aun aun ag daup dilag okkai daaglagnu tituanattom

¹ Kalam anen anen danab 24,000 ag uɗin, king ehanidnana, ban daup dilag uɗat aakku henan daappig. Kalam laa 24,000 uɗin heppig. Kalam laa 24,000 laa uɗin heppig. Ag anam heegeg ukke, maɗ laippu uue, ag baula haen ahilagppa uɗippig. Laa ag kalam anen anen uɗin, ban daup daappig, ahilkad ikki am Israelnu baelkadppan okkai, ban daup 1,000 dilag ikkilkad, ban daup 100 dilag ikkilkad, amu ban daup ikki laa ele. Danab amu ag daup kalam anen anenppa uɗin daappig, ag ag gumadppig; amu ag onilag am inam.

² Sabdiel bekka Jasobeam nug am kalam anuqaknu obatak dilag okkai dayom. Danab 24,000 ag obatak amuppa daappig.

³ Jashobeam nug am Peres buɗub laa. Nug ban daup ikki laa oh kalam digmakppa uɗippig, nug ahilag ikki dayom.

⁴ Aho ted onig Dodai, nug danab obatak kalam aɗitppa daappig dilag okkai dayom. Danab 24,000 obatak amuppa daappig. Danab laa onig Miklot nug nuhig ehanittak anuqak dayom.

⁵ Mana mettak danab Jehoiada bekka Benaia, nug danab obatak kalam ewamppa daappig dilag ikki dayom. Danab 24,000 obatak amuppa daappig, amu nug ahilag ikki dayom.

⁶ Benaia amu, nug am daup ameg laa onig Danab 30 oolagppan ikki anuqak dayom. Nug amu dilag okkai dayom. Nug bekka Amisabat nug nuhig ehanittak anuqak dayom.

⁷ Joap amag Asahel, nug danab obatak kalam waɗeleppa daappig dilag ikki dayom. Danab 24,000 obatak amuppa daappig. Nug mauhe, nug bekka Sebadaia nug abenab awom.

⁸ Isra buɗubppan danab Samhut, nug danab obatak kalam tanig eleppa daappig dilag ikki dayom. Danab 24,000 obatak amuppa daappig.

⁹ Ikes bekka Ira nug danab obatak kalam eblaih laippu eleppa daappig dilag ikki dayom. Danab 24,000 obatak amuppa daappig. Ikes nug Tekoa ted.

¹⁰ Pelon danab Heles nug danab obatak kalam eblaih aɗit eleppa daappig dilag ikki dayom. Danab 24,000 obatak amuppa daappig. Pelon nug Epraim buɗubppan danab.

¹¹ Sera buɗubppan danab Sibekai, nug danab obatak kalam eblaih ewam eleppa daappig dilag ikki dayom. Danab 24,000 obatak amuppa daappig. Sibekai nug Husa danab.

¹² Anatot ted Abieser, nug danab obatak kalam eblaih waɗeleppa daappig dilag ikki dayom. Danab 24,000 obatak amuppa daappig. Abaiesa nug Benyamin buɗubppan danab.

¹³ Netopa danab Maharai, nug danab obatak kalam eblaih laih eleppa daappig dilag ikki dayom. Danab 24,000 obatak amuppa daappig. Netopa nug am Sera buɗubppan danab.

¹⁴ Piraton ted Benaia, nug danab obatak kalam 11ppa daappig dilag ikki dayom. Danab 24,000 obatak amuppa daappig. Benaia nug am Epraim buɗubppan danab.

¹⁵ Netopa danab Heldai, nug danab obatak kalam 12ppa daappig dilag ikki dayom. Danab 24,000 obatak amuppa daappig. Heldai nug Otniel buɗubppan danab.

Dawit nug Israel dilag huu okkai dilag okkai daaglagnu tituanattom

¹⁶ Danab imu ag Israel dilag huu okkai dilag okkai daappig. Ruben dilag okkai am Sikri bekka Elieser. Simeon dilag okkai am Maka bekka Sepatia.

¹⁷ Lewi dilag okkai am Kemuel bekka Hasabia. Aron buɗub dilag okkai am Sadok.

¹⁸ Juda dilag okkai am Dawit awag Elihu. Isakar dilag okkai am Maikel bekka Omri.

¹⁹ Seblon dilag okkai am Obadaia bekka Ismaia. Naptali dilag okkai am Asriel bekka Jerimot

²⁰ Epraim dilag okkai am Asasia bekka Hosia. Israel dilag huu okkai Manase mahaib, Jodan leppanu qaban uɗitteppanu daappig ele dilag okkai am Pedaia bekka Joel.

²¹ Israel dilag huu okkai Manase mahaib Jodan leppanu kaɗag uɗitteppanu daappig ele dilag okkai am Sekaraia bekka Ido. Benyamin dilag okkai am Apner bekka Jasiel.

²² Dan dilag okkai am Jeroham bekka Asarel. Danab amu ag Israel dilag huu okkai dilag okkai daappig.

²³ Yawe Nug heeb, Israel danab ah ag huanaknab, hoɗopai bia daaglagnu nai anan qakkom amunu, Dawit nug Israel danab ebqekkun anan, nug danab ag ebqak uɗat heppig ele ag danab maɗ 20 ii eɗidppig ii ebaqamnanu aum.

²⁴ Amu Dawit nug he, Seruia bekka Joap nug digma, Israel danab ebaqakkunu heehe, Kayak Nug amu haknu uua, oppoɗi be he, uug naunab nau Israel danab ah dilagppa beum amunu, Joap nug ebqak uɗat amu uue dayeye, danab dilag ebqak amu King Dawitnu kaya bukppa ii yaappig.

Danab ag Dawitnu en, nuhig wan, keeke ele gumappig onilkad

²⁵ Dawit nug en okkai ele, amu Adiel bekka Asmawet nug Dawitnu keeke maknu lag oo ⌊Jerusalem appanu⌋ gumak uɗat gumom. Keeke maknu lag oo aben laalappa, amuam keeke maknu lag oo dad okkaippa hak, aab laalappa hak, aab naunauppa hak, amu lag attan ta ukkak menppa hak, aɗi uɗitte anittak danab aguppa daatteb amu, lag amu Usia bekka Jonatan, nug lag amunu gumak uɗat gumom.

²⁶ Danab ag kingnu dad okkaippa uɗat heppig dilag okkai am Kelub bekka Esri.

²⁷ Rama ted Simei nug King Dawitnu grep dad gumak uɗat gume, Sepam ted Sabdi nug grep meu, wain haknu, nug uɗat amu gumom.

²⁸ Israel wan ooppa qauko okkai qaban uɗitteppanu daatteb, qauko amu diigppa qauko nakok daatteb, qauko nakok amuppa olip ad, amu ad sikamo fig ele eppak daatteb. Amu Geder ted Balhanan nug ad amunu gumak uɗat gumom. Aria, ag olip meu aon, goɗen hena metteb ele amu, Joas nug uɗat amu gumom.

²⁹ Amu Saron ted Sitrai nug Saron wanppa appa Dawitnu makau gumak uɗat gumom. Aria, makau oolnu noakppa daappig amu, Adlai bekka Sapat nug gumak uɗat amu gumom.

³⁰ Ismael buɗubppan danab Obil nug Dawitnu kamel gumak uɗat gumom. Meronot ted Jedea nug donki gumak uɗat gumom.

³¹ Hagri ted Jasis nug Dawitnu sipsip gumak uɗat gumom. Danab amu oh ag King Dawitnu en gumattak ikki danab aakku.

Dawitnu ehanittak danab laa onilkad

³² Dawit mameg nakok Jonatan, nug Dawit ulum nai mettom. Nug am yaak danab, dabmak meu unuqagnu doyak danab ele. Hakmon danab Jehiel nug king bekkod gumattom.

³³ Ahitopel nug am Dawitnu ulum mettak danab. Ark danab Husai, nug am King Dawit layag.

³⁴ Ahitopel nug uɗat amu uue, Benaia bekka Jehoiada nug nuhig aben awom. Abiatar ele nug dimppa Dawitnu ulum mettak danab dayom. Joap nug King Dawitnu ban daup ikki anuqak dayom.