1 Stori 26 - Nobonob Baibel

Danab Yawenu mettid lagnu od gumappig onilag

¹ Danab ag Yawenu mettid lagnu od gumappig ele, ag ele obatak anen anenppa daappig. Kora buɗubnu am Kore bekka Meselemia. Kore nug Asap buɗub.

² Meselemia nug bekkod ele. Nug bekka tatamnu am Sekaraia. Sekaraia dimugppan am Jediael. Jediael dimugppan am Sebadaia. Sebadaia dimugppan am Jatniel.

³ Jatniel dimugppan am Elam. Elam dimugppan am Jehohanan. Jehohanan dimugppan am Elieonai.

⁴ ⌊Kora buɗubnu laa,⌋ Obetidom nug ele bekkod ele. Nug bekka tatamnu am Semaia. Semaia dimugppan am Jehosabat. Jehosabat dimugppan am Joa. Joa dimugppan am Sakar. Sakar dimugppan am Netanel.

⁵ Netanel dimugppan am Amael. Amiel dimugppan am Isakar. Isakar dimugppan am Peuletai. Kayak Nug Obetidom itittom amunu, nug bekkod kuɗum ele.

⁶ Obetidom bekka Semaia, nug ele bekkod ele. Nug bekkod ag danab keeke haknu elelenab daappig amunu, ag mamelag baegppa danab okkai daappig.

⁷ Semaia bekkod am Otni, Repael, Obet, Elsabat ele. Danab aɗit laa, Elihu, Semakia ele, aa Semaia ele tiilag laippu, aa ele kalu mettak danab daapiɗ.

⁸ Amu oh ag Obetidom buɗub. Ag, ag bekkalkad, ag baelkadppa laa ele, ag oh danab keeke haknu elelenab daan, ag Yawenu lag gumak uɗat hekkulagnu ɠagattag elele daappig. Obetidom buɗub ohnu ebqak am 62.

⁹ Meselemia nug bekkod, amu laa nug ele tiig laippu ele, amu danab amu oh ag keeke haknu elelenab daappig. Ahilag ebqak am 18.

¹⁰ Merari buɗub Hosa, nug bekkod ele. Nug bekkod oolagppanu Simri nug anuqak danab dayom. Nug nid naanaeg iitta, amge nug anuqak dayom. Aɗinu? Nug mameg nug nid amu laikkud dilag ikki daakkunu tituanom.

¹¹ Hosa bekka laa, nid tatamnu amu dimugppan am Hilkaia. Hilkaia dimugppan am Tabalia. Tabalia dimugppan am Sekaraia. Hosa bekkod, baekkudppan laa ele ag ahilag ebqak am 13.

¹² Danab Yawenu mettid lagnu od gumappig ele, ag obatak anen anen daappig, amu obatak anen anen amu, ag oolagppanu baekkudppan danab okkai laa, nug ahilag okkai dayom. Ag lailkad, Lewi buɗubppan mana mettak danab iitta, ag Yawenu mettid lagppa uɗat hekkulagnu daappig, amubia danab imu ag Yawenu mettid lag, amuppa Kayaknu ɗo maɗoɗnu uɗat hekkulagnu daappig.

¹³ Ag danab bau o danab kaino bia, ag amu ii dabmeppig. Iitta. Ag obatak atten am od attenppa daan gumaglag amu, ag amu bappaidkkulagnu om ena yaan, tituanadppig.

¹⁴ Ag om ena yaan, Selemianu huu ag kaɗag uɗitteppanu odppa daan gumaglagnu daappig. Ag om ena bau yaan, Selemia bekka Sekaraianu huu ag yawalti uɗitteppanu odppa daan gumaglagnu daappig. Sekaraia nug am ulum mettak danab ena; nug doyak dabmak ena ele.

¹⁵ Ag om ena bau yaan, Obetidomnu huu ag yau uɗitteppanu odppa daan gumaglagnu daappig. Amu om ena yaak laappa ag nug bekkod ag keeke maknu oo laa, ag amuppa daan gumaglagnu tituanadppig.

¹⁶ Amu ag om baula yaaeg, Supim, Hosa ele dilah huu ag od aɗit, laa qaban uɗitteppanu od, od laa onig Saleket, ag od amuppa daan, od aɗit amu gumaglagnu daappig. Od onig Saleket am ib attan gotte daugppa daatte. Huu amu anen anen ag ahilag uɗat anam hekkulagnu tituanatteg, huu oolagppan laa ag ahilag abenppa daan uɗat heeg ukke, ag ahilag haen male, huu amu oolagppan laa ag uɗin uɗat heppig. Od ohppa ag anam heppig.

¹⁷ Danab ag od gumak uɗat heppig, ag Lewi buɗubppan mana mettak danab iitta amu, deɗ anen anen danab eblaih laippu ele ag kaɗag uɗitteppanu odppa daan gumappig. Amu deɗ anen anen danab waɗele ag yawalti uɗitteppanu odppa daan gumappig. Deɗ anen anen danab waɗele ag yau uɗitteppanu odppa daan gumappig. Amu keeke maknu oo, amuppa amu hanhan danab aɗit aɗit daappig.

¹⁸ Qaban uɗitteppanu, haɗap appan daatte, amunu odppa amu, danab waɗele ag ibppa daaegeg, aɗit laa haɗap-ppa daaeh, ag oh aben amu gumappig.

¹⁹ Danab ag Yawenu mettid lagnu od gumaglagnu daappig amu, ahilag obatak aakku. Ag am Kora, Merari ele buɗulti.

Yawenu mettid lagnu en okkai gumak danab

²⁰ Aria, Lewi buɗubppan mana mettak danab iitta, amu oolagppanu laa ag Kayak laugnu en maknu oo anen anen, amu oo anen anen keeke laala Kayaknu tituanna mettak daappig amu, ag amu gumappig.

²¹ ⌊Danab uɗat amu heppig am inam.⌋ Gerson buɗub laa am Ladan. Ladan buɗub laa ag baelkadppan dilag okkai daappig. Jehieli nug baelkadppan dilag okkai laa aakku, amu

²² nug bekoɗ Setam, Joel ele, nid aɗit amu aa Yawenu mettid lagnu en maknu oo anen anen, aa oo amu gumadkkulahnu daapiɗ.

²³ Laa ag Yawenu mettid lag, amuppa oo laala, ag oo amuppa Kayaknu en okkai meppig, ag oo amu gumaglagnu daappig amu, ag am Amram, Ishar, Hebron, Usiel ele buɗulkadppan.

²⁴ Subael, nug am Moses bekka, Gersom buɗub. Nug en maknu oo anen anen gumak okkai dayom.

²⁵ Amu Subael ele tiilag laippu, ag Elieser buɗubppa daappig amu, ag am Elieser bekka Rehabia. Rehabia bekka Jesaia. Jesaia bekka Joram. Joram bekka Sikri. Amu Sikri bekka Selomit ele.

²⁶ Selomit, laa nug ele tiilag laippu amu, ag en King Dawit, Israel danab ahilag baelkadppan okkai, ban daup 1,000 dilag ikkilkad, ban daup 100 dilag ikkilkad, amu daup dilag ikki laa ele ag Kayaknu tituanna medappig amu, ag en maknu oo anen anen amu oh gumappig.

²⁷ Amu Israel ag kekeɗ ele ban hena eɗadna, ag keeke ena ena aoppig, keeke amu laih ag aon gona, Yawenu mettid lag, lag amu bappaidkkulagnu, ag keeke amu Yawenu tituanna medappig, ⌊amu Selomit, nug ele tiilag laippu amu, ag keeke amu gumappig⌋.

²⁸ Aria, propet Samuel, Kis bekka Saul, Ner bekka Apner, Seruia bekka Joap ele, ag ele keeke Kayaknu tituanna medappig amu, Selomit, nug ele tiilag laippu, ag keeke amu oh ele gumappig.

Lewi buɗub laa, ag ahilag uɗat aoppig

²⁹ Ishar buɗubnu amu, Dawit aɗi ag heeg, Kenania, nug bekkod ele ag Kayaknu mettid lakka, appa uɗat ii heppig. Iitta. Ag Israel wan laih laihppa Israel dilag ehanittak anuqak danab, epeɗiak danab ele daappig.

³⁰ Hebron buɗubnu amu, Hasabia, nug ele tiilag laippu amu, ag Israel wan Jodan leppan qaban uɗitteppa daatte ele amu, ag atu amu ohppa Yawenu uɗat, kingnu uɗat ele gumappig. Hasabia laikkud ele, ag ahilag ebqak am 1,700. Ag am kalu mettak danab.

³¹ Hebron buɗubppan danab ah dilagnu amu, ahilag kayappa yaak niitte, amubia Jeria nug ahilag okkai dayom. Am Dawit nug king abenabppa ta dayeye ukke, maɗ 39 uue, maɗ 40 ooppa laa ag kaya nai digdig ebqenana, ag Hebron buɗubppan danab laala ag Gileat wanppa Jaser appa danab keeke haknu elelenab daaegeg anadppig.

³² Jeria nug danab 2,700, ag oh nug ele tiig laippu, nug ag gumattom. Danab amu oh ag am kalu mettak danab daanna, baelkadppan dilag danab okkai daappig. Ag anam daaegeg, King Dawit nug he, Jeria, nug laikkud ele ag Ruben buɗub, Gad buɗub, Israel dilag huu okkai Manase mahaib laan danab ele ag Kayaknu keeke hekkulagnu, kingnu keeke ele hekkulagnu daappig amu, ag amu hekkulagnu gumappig.