1 Stori 22 - Nobonob Baibel

¹ Amu Dawit nug aum. “Yawe Kayak laug am iguppanab daakkuoitte. Manaknu ofa haknu qaɗab, Israel danab ah ag amuppa doɗ manadna, Kayak mettaglag ele iguppa daakkuoitte,” awa aum.

Dawit nug Kayaknu mettid lag hekkunu keeke babaittom

² Dawit nug Kayaknu mettid lag aguppa daakkun dabma, nug haknunab nai ma he, wan laihnu danab Israel wanppa daappig amu, ag uɗieg, nug ag men otaɗa babaittak Kayak laug haknu bappaidkkulagnu tituanattom.

³ Nug anam ha, nug aen kuɗum ag tutui, od manak qakkaglagnu keeke, odnu keeke laala ele hekkulagnu ma, nug bras huanaknab ele meum. Laa nug bras amunu uug skelppa dookkunu elele iitta. Huanaknab.

⁴ Nug amu oh ma, nug ad sida imuag kunum kuɗumnab ele, danab aun nug ebaqadkkunu elele iitta, nug ad amu, ag amuppa Kayaknu mettid lag hekkulagnu meum. Aɗinu? Saidon danab, Tair danab ele ag ad amu kuɗumnab nug medappig.

⁵ Dawit nug amu heumnu inam aum. “Solomon, da bekkal, nug nid bau. Nug keeke imu haknu doyak ii awom oitte, amge wanppan wan ohppan danab ag Yawenu mettid lagnu enanagnab dooglagnu, ig nuhig lag hekkunig am lag okkai naɗi, neekkak ele enanag daakkuoitte amunu, da amu haknu babaittak hekkul,” awa aum. Dawit nug anam aum amunu, nug ii mauhom haenppa nug babaittak uɗat okkainab heum.

⁶ Dawit nug oh anam ha mala, nug Solomon onigppa e uɗie, nug Yawe, Israel dilag Kayak, nug Nug laug hekkununab nug amegppa aum.

⁷ Amu Dawit nug Solomon amegppa aum. “O bekkal, da Yawe, dahil Kayak, da Nug laug, Nug onig amuppa daakkunu hekkulnu dabmein, ool okkai dayom.

⁸ Da ool anam dayom, amge Yawe Nug nuhig nai imu da meɗom. ‘Na ban kuɗum hena, danab kuɗum aqame. Amuppa na danab kuɗum tiilag da amelppa gokkaɗe, wanppa noum amunu, na da laul ii buumna.

⁹ Amge na bekkat, na menukkut amu, nug maɗoɗ danab, nug ban hak danab ii daama. Amu da heppi, kekeɗ nuhikkud ag taliliadna daatteb ele ag ahan, ban ii hemana. Nug onig Solomon daakku amunu, nug king dayebeb, da heppi, haen amuppa Israel danab ah ag maɗoɗ, ban hak iitta daaglag.

¹⁰ Solomon nug da laul, da onil aguppa daakkunu buukku. Nug am da bekkal daakku, da nug mameg daakkul. Laa nug Israel dilag gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku.’ Yawe Nug he, da nai amu aakku doomi.

¹¹ Amunu, o da bekkal, Yawe Nug na ele daaglahnu ool daye, na aɗi aɗi hekkut amu, Nug ehanitteb, ena beeb, na nuhig lag, Nug Yawe, nahip Kayak, Nug aum bia buukkutnu ool daatte.

¹² Amu na Yawe, nahip Kayak, na nuhig ɗo dim lamidkkutnu, haen Nug na Israel danab ah gumadkkutnu meitteb king daappe amu, Yawe Nug heeb, na laan neekkakppa nug dabmak eheɗ ii aomanu kobol, diignu doyak tutukku ele aɗan oikkutnu ool daatte.

¹³ Na Yawenu ɗo iɗu iɗu, Nug Moses ig Israel ig dim lamidkkunignu mettom ele, na nai amu oh pehettak, elele dim lamidkkut dayeb amu, na ena daakkut. Na ɠagattag, ootppa ɠagattag qettak ele doon oiye! Na aib baɗame; na dabmak qe nak ele aib doome.

¹⁴ Da wagai mein, na Yawenu mettid lag hekkutnu keeke qagmein bappaidmi daatte. Da gol 3,450,000 kilogram, silwa 34,500,000 kilogram ele qagmemi. Aen, bras ele da qagmemi amu, danab nug skelppa uug dookkunu mekkunu elele iitta. Aɗinu? Am huanaknab. Amu da ad, men ele qagmemi. Da amu oh qagmemi, amge na amu tuɗidna, laa ele qagmekkutnu elele.

^15-16 Amu na uɗat nid kuɗum ele. Danab amuam ag men bappaidkkulagnu doyak ele, danab ag men gililppa mekkulagnu doyak ele, kapenda danab, danab laa ag keeke digdig haknu doyak danab, amuam ag keeke golppa haknu, keeke silwappa haknu, keeke brasppa haknu, keeke aenppa haknu ele. Ag oh am danab uɗat laala haknu doyak okkai ele, ag am kuɗumnab, amu ag oh nahip uɗat nid aakku daatteb. Ag aakku daatteb amunu, na ahan, Yawenu mettid lag he! Na hebeppe, Yawe Nug na ele daaglahnu ool daatte,” awa aum.

¹⁷ Dawit nug anam ana, nug Israel dilag okkai oh ag nug bekka Solomon ehanidkkulagnunab amelagppa anana,

¹⁸ nug aum. “Yawe, ahilag Kayak, Nug ag ele iite daatteb? Nug he, ahilag kekeɗ ag taliliadna daatteb ele, gemu ag ban hemananu toettan iite daatteb? Aɗinu? Yawe Nug he, danab wan imuppa daappig ele eɗatti, gemu wan imuam Yawenu, nuhig danab ah dilag ele daatte.

¹⁹ Anam amunu, gemu ag Yawe, ahilag Kayak, ag meulag ohppa Nug anidna dim lamidkkulagnu Nug mattieg! Ag Yawenu Tituanak Nainu Kunup kontrak inak ele aon uɗin, Nug laugppa mekkulagnu, ag keeke laala Kayaknu tituanak daatteb, ag amu ele aon, Nug laugppa mekkulagnu amu, ag ahan, Yawe Kayaknu mettid lag digmeig! Ag lag hekkulag amu, lag amuam Yawenu, Nug onig aguppa daakku,” awa aum.