1 Stori 21 - Nobonob Baibel

Dawit he, ag Israel danab ah ebaqappig

¹ Amu Satan nug Israel danab ah uug madakkunu dabma, aha he, Dawit nug Israel danab ah ebaqakkunu dabmeum.

² Satan nug anam heum amunu, King Dawit nug nuhikkud ban daup oh dilag ikki Joap, Joapnu ehanittak okkai ele amelagppa aum. “Da Israel danab ah dilag ebqak dookkulnu amu, ag ahan, aab onig Dan, appanu ukka ukka, Berseba aabppa batak, amu, ag Israel wan amu ohppa gona oinna, ag Israel danab amu oh ebaqeg!” awa aum.

³ King Dawit nug ag amelagppa anam aum, amge Joap nug eɗua nob ma aum. “Yawe Nug heeb, nuhikkud daup ag huanaknab daaglagnu ool daatte. Gemu daup laippu daatte, Kayak Nug heeb, 100 daaglagnu ool daatte. O dahil naɗi, gemu daatteb amu, ag nahipnu, ‘Ihinig okkai,’ aon iite atteb? Na ebaqadkkunignu attem am diig aɗinu na anam hekkutnu attem? Na amu heppe, ig gota amu hekkunig dayeb amu, ⌊Yawe Nug ena ii dooma,⌋ Israel oolagppa aab daakku, am na diig aɗinu anam hekkutnu dabmettem?” awa oɗ mettom.

⁴ Joap nug anam aum, amge King Dawit nug nuhig dabmak eɗukkunu uua, nuhig nai am Joapnu eɗittom amunu, Joap aha, Israel wan ohppa ukka oiyaya, danab ebaqowa, nug eɗua Jerusalem uɗiom.

⁵ Nug eɗua, Jerusalem ta, nug Dawit amegppa Israel danab gane ag ban daup daaglagnu elele daappig a doyom. Amu ebqak ahilagppa Israel dilag daup, ag qep elab aɗan, ban hekkulagnu elele daappig amu, ebqak ahilag am 1,100,000. Aria, Juda danab ag qep elab aɗan, ban hekkulagnu elele daappig, ahilag ebqak am 470,000.

⁶ Joap nug anam Dawit amegppa aum, amge nug Dawit nug ebqak amu haknunab aum, nug amunu ena iinab doyom amunu, nug Lewi buɗub, Benyamin buɗub ele, nug amu dilag ebqak laa dilag ebqak ooppa me, Dawit amegppa ii aum.

⁷ Amu Dawit nug Joap Israel danab ebaqakkununab aum amu, Joap nug amunu ena iinab doye, Dawitnu haknunab nai amuam Kayaknu neekkakppa ele eheɗ dayom amunu, Nug Israel danab ah bu mattom.

⁸ Anam amu, Dawit nug Kayak unuqitta aum. “Da hemi imuppa amu, da hipunin okkainab hemi. Da hipunin hemi amunu, O Yawe, da, nahip maɗi nid, da na hipunin dahil uhuqna meɗakkunu ool ohppa oɗ medattem. Aɗinu? Da dabmak tutukku iittappa keeke laa iikku hemi.” Dawit nug Yawe anam unuqittom.

⁹ Dawit nug anam unuqitte, Yawe Nug Dawitnu propet danab Gad amegppa aum.

¹⁰ “Na gona, Dawit amegppa inam appe doyaɗ! ‘Yawe Nug inam atte. “Da bu medakkulnu ib ewam iikku ippunidkkulnu hettem. Da ippunidppi, na da ib attenppa bu medakkulnu oot daatte appe, da ib amuppa bu medakkul,” ’ ” awa aum.

¹¹ Yawe Nug Gad amegppa anam aum amunu, Gad nug aha, Dawit toppa ukka, amegppa aum. “Yawe Nug inam awa atte. ‘Na appe, Nug ib attenppa bu medakku. Ib ewam am iikku.

¹² Maɗ ewam Israel wanppa enug haen daakku, o iitta ahilkad kekeɗ ag kalam ewam ag Israel eɗadna lamadkkulag, o iitta Yawenu engel nug heeb, oɗe nau danab kuɗum aqe mauhtteb am deɗ ewam Israel wan ohnab ooppa daya heeb, danab ah mauhkkulag. Oɗe amuam Yawenu qep elab bia aakku.’ Ib ewam aakku amunu, na dabmak aona, na appe, da nahip dabmak laa meiɗe uɗimi ele amegppa appi dookku,” awa aum.

¹³ Gad nug anam a, Dawit nug aum. “Da uug naunab nau doottem. Amge Yawe Nug oo gai-iitta doya oo metta ehanittak kobol okkainab aɗa dim lamidtte amunu, ig Nug eppegppa bu aognignu ool hette. Da danab eppelagppa bu aognignu ool ii daatte. ⌊Nug heeb, oɗe ig iqakkunu ool hette⌋,” awa aum.

¹⁴ Dawit nug anam aum amunu, Yawe he, oɗe nau danab kuɗum aqe mauhtteb ele Israel aqe, 70,000 mauhppig.

¹⁵ Anam he ukke, Kayak Nug engel danab aqom ele nug Jerusalem heeb nauhkkunu me ukke, nug ukka, Jerusalem danab aqakkunu dayom, amge nug anam hekkunu he, Yawe antta, Nug uug naunab nau Israel dilagppa beum antta, ooppa guittak naɗi doya, Nug engel danab aqom ele amegppa aum. “Aakku elele. Baula aib heme,” awa aum. Yawenu engel nug Jebus buɗubppan danab Araunanu ee aeg mumuɗaknu abenppa dayeye, Yawe Nug engel amegppa amu aum.

¹⁶ Amu Dawit nug neekke, attan te, nug Yawenu engel nug hab, wan ele gamalahppa dayaya, nug qep elab eppegppa aɗe, qep amu Jerusalem attan daye antte, nug Israel dilag ikki danab ele, ag oh lamen heɗiag ele takkaladna amu, nug ag ele oh laippun gatelag qaun o, gomelna, iɗulag wanppa meppig.

¹⁷ Ag anam daanna, Dawit nug Yawe unuqitta aum. “O Yawe, daib danab ban hekkulagnu elele daappig dilag ebqak hekkulagnunab ami. Laa iitta. Daib hipunin hein, eheɗ hemi. Imu ag am sipsip bia aakkuib. Ag aɗi eheɗ heppig? Iitta! Da eheɗ hemi. O Yawe, dahil Kayak, ⌊da hipunin hemi amunu, na anam hekkutnu anidttem dayeb amu,⌋ na da, da baeladppa ele iqakkutnu ool hette, amge O Yawe, oɗe nau danab kuɗum aqe mauhtteb ele, danab ah nahipad imu ii aqamanu oɗ medattem,” awa unuqittom.

¹⁸ Dawit nug anam unuqitte, Yawenu engel danab aqom ele nug Gad amegppa nug Dawit aha ukka, Jebus danab Arauna, nuhig ee aeg mumuɗaknu abenppa appa Yawenu qaɗab qekkunu akkununab aum.

¹⁹ Engel Gad amegppa Yawenu nai amu anam a, Gad ukka, Dawit amegppa a, Yawe aum bia Dawit nug hekkunu ukkom.

²⁰ Amu Arauna nug wit aeg mumuɗaknu uɗat haaha, nug eɗua, engel amu antte, bekkod waɗele ag nug ele oh daappig ele anidna, bekkod waɗele ag wana, lokkumna daappig.

²¹ Amu ag anam heeg, haen amuppa Dawit nug uɗia, Arauna gumitta te, Arauna nug neekke ukke, Dawit antta, nug ee aeg mumuɗaknu aben uua ukka, Dawit gumitta ukka, nug noobppa gateg qaun o, gomela, iɗu wanppa meum.

²² Arauna nug anam he, Dawit nug amegppa aum. “Da laa ee aeg mumuɗaknu aben imu daden mekkunu oo heeb, na nug wan imu aokkunu noob elelenab medakkunu dabmenan appe, da men doɗo amunab ee aeg mumuɗak aben imu daden mekkulnu medakkulnu oɗ medattem. Da anam hewoya, da oɗe nau danab kuɗum aqe mauhtteb ele iitta mekkunu ippa Yawenu qaɗab laa hekkul,” awa aum.

²³ Dawit nug anam a, Arauna nug Dawit amegppa aum. “Na ee aeg mumuɗaknu aben imu awe! O naɗi dahil, na king, na ootppa attem attem hekkutnu ena doottem amu, na anamib he! Antte! ⌊Da wanib ii medapa. Iitta!⌋ Na manaknu ofa hekkutnu, da makau okkai ebehi ele imu medakkul. Ee aeg mumuɗaknu keeke palang otala okkaippa hak, da amu ele na mette, wit aeg, na ee aegnu ofa hekkutnu ele da medattem. Da keeke oh amu na medattem,” awa aum.

²⁴ Arauna nug anam aum, amge King Dawit nug nob ma aum. “Iitta! Da men doɗo elelenabppa daden mekkulnunab doottem! Aɗinu? Da nahip keeke hamu awen, Nug ii medapa. Laa ele, da doɗ da ii daden memi amu, da doɗ amuppa manaknu ofa, Yawe, dahil Kayak, ii medapa. Iittanab! Da daden mewoya, da manen medakkul,” awa aum.

²⁵ Dawit anam doya aum amunu, nug 7 kilogram gol Arauna mette, ee aeg mumuɗak aben amu nuhig dayom.

²⁶ Dawit aben amu anam daden ma, nug qaɗab qewowa, nug manaknu ofa, laippu dayaknu ofa ele qaɗab amuppa manatta, Yawe mettom. Nug anam ha, nug Yawe unuqitte, Yawe doya he, aab aɗu habppannu manaknu ofa haknu qaɗabppa neum.

²⁷ Amu dimppa amu, Yawe Nug engel nug baula heeb, oɗe nau danab kuɗum aqe mauhtteb ele danab ah ii aqamanu aum; amuam laa nug daup laa nug qep elab eɗua, nuhig gaɗappa mekkunu anak, amubia.

²⁸ Amu Dawit nug doɗ keeke manatta, Yawe metta unuqitte, Yawe he, oɗe aqak iitta me, Dawit amu antta, nug doɗ laala ele Jebus buɗubppan danab Araunanu ee aeg mumuɗaknu abenppa manatta, Kayak mettom.

²⁹ Yawenu mettid haknu peh lag, Moses atu taɗakppa heum, aria manaknu ofa haknu qaɗab ele amu, lag, qaɗab amu ele haen amuppa Gibeon appa, appan mettid haknu abenppa daapiɗ.

³⁰ Amge haen oɗe nau danab kuɗum aqe mauhtteb ele danab ah aqe mauhppig, haen amuppa Dawit nug Yawenu engelnu qep elab antta baɗom; baɗak amu he, nug dabmak awawa, baula Gibeon ukka, mana mettak haaha, appa Kayak aɗi hekkunu oɗ medakkunu elele ii doya, nug hanhan Araunanu ee aeg mumuɗak abenppa amu hekkunu dabmak awa, appaib heum.