1 Stori 20 - Nobonob Baibel

Israel Amon eɗadna malappig

¹ Aria, anam daye ukke, aam haen digmekkunu heehe, haen amu king ag ahan, ban haknu gotteb ele, haen amuppa Dawit nug he, Joap nug Israel dilag daup diie, Amon wanppa eɗun goppig. Ag gona, Joap nug ban he, Amon wan nauhaknab daye, nug aab okkai Raba ukkom. Nug appa ukka, nuhikkud daup ele ag aab amu oo mattan aqaknu maadna daappig, amge Dawit nug Jerusalem appa dayom. Appa dayeye, Joap nug Raba ele ban haaha, nug eɗatta he, daup nuhig ag aab heeg nauha autanab awom.

² ⌊Am Joap nug aab amu laih nakokib ii awe dayeye, nug nai me ukke, Dawit uɗie, nug nuhikkud daup ele ag laih amu eɗidna,⌋ Dawit nug king haɗ Amon dilag king igippan aɗitta awa he, laa nug igippa meum. King haɗ amuam golppa hak, nuhig uug am 34 kilogram. Gol amu qaɗeppa men digdig, daden nob okkainab ele qataqak daappig. Amu Dawit nug en okkai naɗi ele aab okkai amuppanu awa ukkom.

³ Amu Dawit nug ele he, aab amuppan danab ah ag uɗat ɠagattag, hebebppa, hal aenppa hak, soppa ele heppig. Nug aab okkai amuppa anam ha, nug Amon dilag aab ohppa ele anam heum. Nug anam ha mala, Dawit nug nuhikkud daup oh ele ag eɗun, Jerusalem goppig.

Israel Pilistia ele ban heppig

⁴ Haen daye ukke, haen laa Israel, Pilistia ele ag Geser appa ban heppig. Amu ban amuppa Sibekai, nug am Israel ted appag diig Husa appanu amu, nug Repaim buɗub laa onig Sipai qe mauhom. Nug qe mauhe, Pilistia ag Israel waappa daappig.

⁵ Aria, haen laa Pilistia, Israel ele ban heppig, haen amuppa am Jair bekka Elhanan nug Goliat amag Lami qe mauhom. Goliat nug Gat danab; nuhig ban qaɗib am teppunab ele.

⁶ Amu haen laappa, Israel, Pilistia ele ag Gat appa ban henana, Pilistia dilag daup laa nug danab beɗu okkai okkainab ele dayom. Nug eppekuɗ anen anenppa doɗo eblaih laippu ele, am baekuɗ anen anenppa ele doɗo eblaih laippu ele. Eppekuɗ doɗo oh, baekuɗ doɗo oh ele am 24. Nug ele am Rapa buɗub laa.

⁷ Nug danab naɗi, beɗu anam, amge nug Israel awa awa aqatte, Dawit awag Simea bekka Jonatan, nug nug qe mauhom.

⁸ Dawit amu nuhikkud daup ele ag Pilistia danab amu oh aqaeg mauhppig. Ag oh am Rapa buɗub. Ag appalag diig am Gat.