1 Stori 19 - Nobonob Baibel

Israel, Amon, Aram ele ban heppig

¹ Aria, haen laa ukke, Amon dilag king Nahas nug mauhe, nug bekka Hanun nug mameg abenabppa Amon dilag king dayom

² Nahas nug mauhe, Hanun king daye, Dawit nug inam dabmeum. “Nahas nug dahilnu oo mauhaknab kobol doya dim lamittom amunu, da nug bekkanu ele oo mauhaknab kobol doye, dim lamidkkul,” dabmeum. Dawit nug anam dabmeum amunu, nug nuhikkud danab laa gona, oo doyak ehanittak nai Hanun amegppa akkulagnu maatte goppig. Nug maatte gona, ag Amon wanppa teppig.

³ Ag nai amu aon, Amon wanppa gona teppig, amge Amon dilag anuqak danab laa ag ahilag okkai Hanun amegppa appig. “Dawit nug danab imu ag uɗin, oo doyak ehanittak nai amenppa akkulagnu maatte uɗippig amu, am nahip dabmakppa nug diig amunu na mamen genab binag mekkunu hette dabmettemte? Amunu iitta. Dawitnu danab imu ag nagattoppa uɗin, ag oinna, wan imu lokkumakppa italna anidna, nug amegppa attem daatte appeg, Dawit nug uɗia, ig eɗigkkunu uɗippig,” aon appig.

⁴ Amon dilag anuqak danab ag anam aeg, Hanun he, laa danab Dawit maatte goppig amu aɗualadna, akkaɗilkad hoina, ahilkad lamen ele gamagppa, ag bitolagppa otaɗadna heeg, ag eɗun goppig.

⁵ Hanun aɗi ag anam heeg, danab Dawit maatte goppig ele ag uɗa nak nau doon, eɗun uɗiegeg, laa nug uɗia, kobol amunu Dawit amegppa aum amunu, King Dawit nug danab uɗa nak dooppig ele dilag nai imu nai awa ukkak danab oɗelagppa me goppig. “Ag Jeriko appa daappeg ukkeb, ag akkaɗilkad eɗun daappig bia daappeg, ag eɗun uɗieg!” Nug nai amu ahilagnu me ukkom.

⁶ Aria, King Hanun, Amon danab ele ag amu heeg ukke, ag Dawitnu neekkakppa eheɗ nau heppig dooppig. Dawit nug ahilagnu, danab nug uɗig nau noobppa dootte, nug ahilagnu anam doyom dooppig. Ag anam doyona, Hanun ag ele, ag 34,000 kilogram silwa aon, Aram Naharaim danab, Aram Maka danab, Soba danab ele ag ahilkad daup, laa ag bannu karis attan daan, ban hetteb, laa ag hos attan daan, ban hetteb ele amu, ag daup amu maadppeg, ag ehanadkkulagnu silwa amu meeg ukkom.

⁷ Ag silwa huanak amu meeg ukke, appan danab ag bannu karis 32,000, daup karis amu lamadppig ele maatteg uɗieg, Maka dilag king, nug nuhikkud daup ele oh uɗippig. Ag uɗin, ag aab Medeba guguittak haen tutu dayaknu aab kalan daappig. Amon daup ele ban hekkulagnu ag ahilkad aabaabppanu, ban hekkulagnu onilagppa ewak dim lamidna, ag ele ahan uɗippig.

⁸ Amon ag anam heeg, Dawit doya, nug he, Joap, Israel dilag ban daup oh ele ag Amon ele ban hekkulagnu goppig.

⁹ Ag gona teeg, Amon dilag daup ag ahan, ahilag aab okkainu aɗ odppa ban hekkulagnu bappaidna daappig. Aria laihnu uɗippig, ahilkad king ele ag oh aab dimittim dad okkaippa ban hekkulagnu bappaidna akka daappig.

¹⁰ Ag anam aben aon daaegeg, Joap nug noobppa, dimugppa ele ban haknu dayom antta, nug Israel daup ena enaib laa otiatte, ag nug ele ag Aram dilag daup ele ban hekkulagnu aum.

¹¹ Nug anam hewowa, nug he, nug amag Abisai nug Israel daup laa oh dilag okkai daye, nug Abisai aɗi ag Amonnu daup ele ban hekkulagnu aum.

¹² Nug anam babaitta, nug Abisai amegppa aum. “Aram dilag daup ag da eɗilkkulagnu hekkulag dayeb amu, na uɗin da ehaniɗe! O iitta, Amon dilag daup ag na eɗidkkulagnu hekkulag dayeb, da ukken, na ehanidkkul.

¹³ Na ɠagattag daye! Ig ihinkad danab ah dilagnu, ig appanig Kayak mekkom ele amu, ig amunu ele oonigppa ɠagattag doot, ban imu ɠagattag hetu! Yawe Nug aɗi bekkunu ena anidtte amu, Nug anamib heeb baɗ!” awa aum.

¹⁴ Joap nug anam ana he, nuhikkud daup ele ag ahan, Aram dilag daup ele ban hekkulagnu gona heeg, Aram dilag daup ag noolagppanu oolppig.

¹⁵ Aram dilag daup ag ooleg, haen Amon dilag daup ag amu anidna amu, ag ele Joap amag Abisai aɗi noolagppanu oolna, eɗun, aab okkai ooppa gona daappig. Ag anam heppig amunu, Joap nug he, nug nuhikkud daup ele ag eɗun, Jerusalem teppig.

¹⁶ Aria, Israel heeg, Aram dilag daup ag oolppig, Aram ag amu anidna, ag nai awa ukkaknu danab oɗelagppa nai meeg, ag lailkad laa le Yupretis heqo laihppanu uɗin ehanadkkulagnu ukkom. Ag nai meeg ukke, appan ban daup ele uɗippig. Hadatesernu ban daup ikki anuqak Sopak nug ag noolag awe uɗippig.

¹⁷ Ag anam heeg, laala ag amunu Dawit amegppa aeg doya, nug he, Israel dilag daup oh ag uɗieg, nug ag ele Jodan le mataɗna wana, Aram dilag daup ele ban hekkulagnu bappaidppig. Dawit he, nuhikkud daup ag ban hekkulagnu aakku babaittak daaeg, Aram dilag daup ag ban hena aqaglagnu uɗin heppig.

¹⁸ Aram ag anam heppig amge Dawit, nuhikkud daup ele ag ban heeg, Aram dilag daup ag ooleg, Dawit aɗi ag Aram dilag daup bannu karis lamadppig amu 7,000 aqaeg mauheg, amu ban danab baelagppa oin, ban heppig ele 40,000 ag aqaeg mauhppig. Ag Aram dilag ban daup ikki Sopak ele qeeg mauhom.

¹⁹ Dawit nug Aram dilag daup huanak anam aqe, king laala ag Hadateser waappa daan, nug ehanidppig ele, ag amu anidna, ag Dawit ele maɗoɗ daaglagnu nai qagappig. Ag nai amu qakkan, ag nug waappa daappig. Anam amunu, Aram danab ag baula Amon ehanadkkulagnu uuppig.