1 Stori 17 - Nobonob Baibel

Yawe Nug nai laa Dawit dookkun me ukkom

¹ Amu anam daye ukke, Dawit nug lag enanagnab nuhig babaitta mala, appa ta dayaya, nug propet Natan amegppa aum. “Antte! Da lag enanagnab ad sidappa hak, da imuppa daattem, amge Yawenu Tituanak Nainu Kunup kontrak inak ele am peh lagppa daatte,” awa aum.

² Dawit nug anam a amu, Natan nug oɗeppa awa aum. “Kayak Nug na ele daattep amunu, na aɗi hekkutnu dabmettem amu, na anamib he!” awa aum.

³ Natan nug Dawit amegppa anam aum, amge tuqan amuppa Kayak Nug nuhig nai imu Natan mettom.

⁴ “Natan, na gona, dahil maɗi nid Dawit amegppa inam appe doyaɗ! ‘Yawe Nug inam atte. Na lag dahil, da lag amuppa daakkul amu, na lag amu ii hemana. Laa nug hekku.

⁵ Da ag Israel Isip wanppanu omalatti beeg, uɗie uɗie, gemu batak amu, da lagnab laappa ii daami. Israel danab ah ag adeppa adeppa haen tutu dayaknu aab kalanna, ag adeppa adeppa daaglagnu daappig amu, da mettid haknu peh lag dahil amuppa daami.

⁶ Da anam daaiyi, Israel oh ele anam adeppa adeppa oitta amu, haen amuppa da haen laa ikki danab laa nug dahilad danab ah Israel, nug ag gumadkkunu amegppa ami amu, da amu dilagnu laa, “Diig aɗinu na lag dahil ad sidappa hak laa hena ii meɗame?” amegppa amite? Iitta!’

⁷ Anam amunu, na gona, dahil maɗi nid Dawit inam appe doyaɗ! ‘Yawe Nukka Ɠagattag Oh Ele Nug inam atte. Na gikkiɗah dad okkaippa sipsip gumattette, da hei, na uɗat amu uun, dahilad danab ah, amu Israel danab ah, na ahilag okkai daakkutnu meidmi.

⁸ Na adeppa adeppa gome amu, da ele oh gomuɗ. Amu ele da hei, na kekeɗ nahip oh eɗatte, gemu ag na waatppa daatteb. Aria, gemu amu, da heppi, na onin okkainab, danab onilag okkai okkai laa oh eɗattak, wanppa daan oippig, oitteb ele amu, na onin okkainab, ag onilag bia daakku.

^9-10 Da danab keeke eppe, ena bette, amubia da Israel danab ah ag wan ele daaglagnu, ag amuppa maɗoɗ ele daaglagnu ehanatten, aben madappi daaglag. Danab nau ag anukka da Israel dilag ikki danab digmein tituanadmi, haen amuppa danab nau amu ag digmena, dahilad danab ah eheɗ hattaegeg uɗie, gemu ele hetteb, amge da heppi, ag amu tuɗidna ii hemana. Amu ele, da heppi, nahipad kekeɗ ag ɠagattag ii daamna. Da na amenppa iikku attem. Da, Yawe, da heppi, na, amu na buɗunad oolagppanu laala ele ag anen anen ahilag haenppa Israel dilag king daaglag.

¹¹ Anam, amu haen na nahip mauhak haen doob mauhppe, da heppi, na buɗun laa na abenamppa ta, king daakku. Nug am na bekkatnab laa. Nug king abenabppa ta dayebeb, laa nug gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku.

¹² Laa nug gumak uɗat nuhig nug eppegppanu matakka ii aoma; da heppi, hanhan nug eppegppa, nug buɗub eppelagppa ele daakku. Nid nahip amu, nugnab dahil lag, dahilnu hekku.

¹³ Da nug mameg daappi, nug da bekkal daakku. Da na bekkat amu, da dahil oo mauhaknab kobol nuhigppanu aɗitten ii aopa. Da Saul, nug na king ii daame haenppa king dayom amu, da oo mauhaknab kobol dahil nuhigppanu aɗitten aomi, amge da na bekkatnu anam ii hepa. Iitta. Da hanhan nuhignu oo mauhaknab kobol dookkul.

¹⁴ Da heppi, na bekkat, nug dahilad danab ah gumadkku, amu nug buɗub ag ele hanhan anamib gumadkkulag,’ awa aum.” Kayak Nug nuhig nai amu Natan mettom.

¹⁵ Yawe Nug nai amu oh Natan amegppa a, Natan nug Dawit amegppa Yawe Nug mattiom, nug nai amunab Dawit amegppa aum.

Dawit Yawe amegppa, “Ena heme,” aum

¹⁶ Natan nug King Dawit amegppa nai amu mattia male, Dawit nug aha ukka, Yawenu pehppa noa, Yawe noobppa heɗep na dayaya, nug Yawe amegppa aum. “O Yawe Kayak, da attem dayeye, da baeladppa ele am attem daaegeg, na da ehaniɗe, da gemu okkai daattem? ⌊Dahilppa ii beum. Iitta! Na ii helom bia, amge na nahip hak enappa aakku heme.⌋

¹⁷ Anam, amge O Kayak, na amuib ehaniɗna hekkutnu ii dabmettem. Iitta. Na heppe, da, da nahip maɗi nid amu, da buɗulad oolagppanu laala, ag ahilag haen anen anenppa, ag Israel dilag king hanhan bena daaglagnu ele ame. O Yawe Kayak, na da danab okkainab daalom, na ehaniɗkkutnu helom bia iikku hettem, amge da danab okkainab amubia iitta.

¹⁸ O Kayak, da Dawit, nahip maɗi nid amu, da aɗi nai laa na amenppa madikkulnu daatte? Iitta. Na hettem amu, amuppa na aakku binan meɗattem. Na da dooiɗttem.

¹⁹ O Yawe, na da, nahip maɗi nid, na dahilnu dabmak anuqak aona, na oot hettenu ele, na diig aɗit amuppa na keeke okkai imu hena, na da ehaniɗkkutnu, butti aɗi da buɗulad ag ele sia kingppa daaglagnu ae doomi.

²⁰ O Yawe, laa na bia ii daatte. Ig daunigppanab doomut bia, naib Kayak daattem; kayak laa ii daatte.

²¹ Aun aɗi laa ag nahipad danab ah, Israel, ag ag bia daatteb? Laa iitta. O Kayak, na huu laa ag begbeg maɗi nid daaegeg, na ag nahipad daaglagnu na ag begbeg dayaknu qagaiettakppanu eɗua uhuqak hemete? Iitta. Na nahipad danab ah Isip wanppanu dayaknu qagaiettakppanu eɗua uhuqak heme, amuppa na he, danab ah oh ag na onin dootteb. Na kobol okkai naɗi, danab hekkunu elele iitta, na amu henana, amuppa na hee, nahipad danab Israel, ag Kanan wan imuppan danab lamadppig.

²² Na hee, Israel danab ah ag nahipadnab danab ah aakku daatteb; hanhan anam daaglag. Na, O Yawe, na ahilag Kayak bena daattem.

²³ Anam amunu, O Yawe, na da, nahip maɗi nid, na keeke dahilppa, da buɗuladppa ele dilag hekkutnu, na nai anan qakkame amu, na heppe, nai amu hanhan ɠagattag daya meu okkunu oɗ medattem.

²⁴ Na amu hekkutnu diig am, na anam heppe, nai na anan qakkame am ɠagattag daya, meu oobob, na onin am hanhan binag ele daakku; am ele, danab ag, ‘Yawe Nukka Ɠagattag Oh Ele, Nug Israel danab ah gumadtte, Nug am Israel dilag Kayak!’ aon akkulag. Laa amu da Dawit, nahip maɗi nid amu, da buɗulad ag hanhan na noomppa king daaglag.

²⁵ O Kayak, na dahil Kayak, na hee, da, nahip maɗi nid, da na heppe, da, amu da buɗulad oolagppanu laala ele, ag ahilag haen anen anenppa, ig Israel dilag king hanhan daagnignu doomi amunu, diig amuppa da na inam unuqidkkulnu ɠagattag awen, iikku unuqidmi.

²⁶ O Yawe, na am Kayak! Na keeke ena ena dahilppa hekkutnu da, nahip maɗi nid, da amelppa nahip nai amu anan qakkame.

²⁷ Anam amunu, na oot hette bia na da, nahip maɗi nid, na da, da buɗulad ele, ig na noomppa hanhan king daagnignu itittak ena mekkame. O Yawe, na itittak ena mekkame amunu, na ig hanhan itigkkut.” Dawit nug anam unuqittom.