1 Stori 16 - Nobonob Baibel

¹ Aria, ag Kayaknu Tituanak Nainu Kunup anam aon uɗin, Jerusalem bena, peh lag Dawit nug amunu babaittom amu, ag aon gona, amu ooppa meppig. Ag mewona, ag manaknu ofa, laippu dayaknu ofa ele aon, Kayak gumidna wana, Nug medappig.

² Amu Dawit nug manaknu ofa, laippu dayaknu ofa ele manatta, Kayak metta mala, nug Israel danab ah Yawe onigppa itittak ena ag mattom.

³ Nug amu ha mala, nug Israel danab ah oh ele daappig, nug ag oh anen anen, bret batappatak laippu, ad onig det meu qaɗaiettak batappatak laippu, grep meu qaɗaiettak batappatak laippu ele ag mattom.

⁴ Amu dimppa Dawit nug Lewi buɗub laa ag Tituanak Nainu Kunup noobppa daanna, ag Yawenu ɗo maɗoɗnu uɗat hekkulagnu, ag Yawe unuqidkkulagnu, ag Nug amegppa, “Ena heme,” akkulagnu, ag Yawe, Israel dilag Kayak, ag Nug binag ele mekkulagnu tituanattom.

⁵ Amu dilag okkai am Asap. Nug waappa am Sekaraia. Sekaraia waappa am Jeiel, Semiramot, Jehiel, Matitia, Eliap, Benaia, Obetidom, Jeiel ele. Ag am laia, harp ele qadappeg, Asap nug simbal hekkun daappig.

⁶ Ag amu hekkulagnu daaegeg, mana mettak danab aɗit Benaia, Jahasiel ele aa trampet Kayaknu Tituanak Nainu Kunup kontrak inak ele noobppa haen oh haenppa iwalkkulahnu daapiɗ.

Dawitnu Kayak amegppa, “Ena heme,” anaknu ahi

⁷ Amu deɗ amunu Dawit nug Yawe amegppa ena heme anaknu ahi imu Asap, nug laikkud ele, ag ahi ettaglagnu mattom.

⁸ ⌊O Israel danab ah,⌋ ag Yawe amegppa, “Ena heme,” anana, ag Nug unuqitteg! Ao, ag appeg, wan atu ohppan danab ah ag Nug aɗi keeke heumnu doyeg!

⁹ Ag ahi ettanna, ag Yawe binag meig! Ge, ag onig humaknu ahi ettanna, ag Nug binag meig! Ao ag nuhig hak ena ena ohnu, ag danab ah laa oh ag amu dooglagnu ag amelagppa aig!

¹⁰ Nug onig am oppiaawak daatte; ag Nug onignu oolag okkainab gamalag ahaɗ! Ao, laa ag Yawe anidna dim lamidkkulagnu Nug maditteb ele, ag gamalag ahaɗ!

¹¹ Ag Yawenu, nuhig ɠagattag okkai elenu oolagppa genab doyeg! Ao, ag hanhan Nug anidna dim lamidkkulagnu Nug mattieg!

^12-13 O Israel buɗub, ag Yawenu maɗi nid daatteb. Ao, O Jakop bekkod, Yawe ag nuhikkud daaglagnu tituanattom. Ag Israel aakku, ag Yawe Nug uɗat ɠagattag danab hekkun elele iitta digdig heum amu, ag amu dabmetteg! Ao, uɗat digdig danab hekkun elele iitta Nug heum; nai doya mala hettoɗia epeɗia elele mettak kobol Nug dim lamittom ele amu, ag dabmetteg!

¹⁴ Nug am Yawe, ihinig Kayak; nuhig nai doya mala hettoɗia epeɗia elele mettak kobol am wan oh tualom daatte.

¹⁵ Yawe Nug nuhig nug tituana nai qakkak hanhan dabmette. Nug daug ii atitte. Ao, Yawe Nug ana qakkak nai nuhig hanhan daakkunu aum amu, Nug nai amu dabmette.

¹⁶ Amuam nug tituana nai qakkak Nug Abraham ele hepiɗ. Ao, amuam aɗi keeke Nug hekkunu Aisak amegppa nuhig nai ɠagattag qetta aum aakku.

¹⁷ Nug nai amu Aisak amegppa ɠagattag qetta ana, dimppa Nug nai amu awa, ɗo naippa ma mattia, Jakop amegppa ele nai amuib baula aum. Ao, nug tituana nai qakkak amu Nug awe, Israel ele nug tituanya nai qagapiɗ. Amu nug tituana nai qakkak amuam hanhan daakkunu babaittom.

¹⁸ Nug Jakop amegppa aum. “Da Kanan wan na medakkul. Ao, da na medappi, wan amuam na aut aakku daakku,” awa aum.

¹⁹ Yawe Nug nai imu haen Abraham buɗub ag tutuib daaegeg aum. Ao, ag aab diig danab iitta Kanan wanppa, danab ameg nakokib daappig.

²⁰ Ag qati qati, mauhnoak wan anen anenppa oippig. Ge, ag wanppan ɗo maɗoɗ digdigppa anam oippig.

²¹ Ag anam heppig, amge Kayak Nug ⌊danab okkai⌋ laa ag eheɗ hadakkunu ib oo neum. Ao, ag memetalkad amu, ag ena daaglagnu, Kayak Nug king laala daulag batom.

²² Nug okkai danab amelagppa aum. “Ag dahilad, da goɗen gokkaɗakppa tituanadmi amu, ag amu dilagppa eheɗ laa aib heppig. Ao, ag dahil propet guittak aib madappig,” awa aum.

²³ Anam amunu wan atu ohppan danab ah oh ag Yawenu ahi etteg! Deɗ ohppa ag laa amelagppa, “Yawe Nug ig padal mematanu ehanigtte,” aon aig!

²⁴ Ag nuhig binag amahlak oppiaawak elenu amu, ag wanppan wan ohnu danab ah amelagppa mehuqeg! Ao, ag nuhig hak enanagnu huu ohppa appeg doyeg!

²⁵ Aɗinu? Yawe Nug onig ɠagattag ele, laa oh eɗattak daatte. Nug danab ah ag Nug binag mekkulagnu elelenab daatte. Ge, danab ah ag nuhignu ebehilag oh bodoetta le mekkunu elelenab daatteb. Kayak laa anam laa ii daatte.

²⁶ Laa amu, wanppanu danab ah laa dilag kayak oh ag keeke genab iitta. Ao, ag am dottolkad aakkuib daatteb, amge Yawe Nug amubia iitta. Nug hab heum.

²⁷ Nug dagom onig ɠagattag okkai naɗi ele. Ao, ɠagattag, gamag ahak ele nuhigppan uɗitte.

²⁸ Ag wanppan wan anen anen ohppan danab ah ag Yawe, Nug binag amahlak oppiaawak ele, ɠagattag ele amu, ag amu doyeg! Ge, ag amu doyeg!

²⁹ Yawe onig am binag amahlak oppiaawak ele, ag amu doyeg! Ao, ag doɗ laa manan mettaglagnu aon, Nug noobppa uɗieg! Ag Yawenu oppiaawak ele daan, ag Nug noobppa dup nona Nug binag meig!

³⁰ Ao, ag wan danab ah oh, ag Nug noobppa daappeg, beɗulag hahaɗaɗ! Nug wan ha, abenabppa meum daatte. Ao, am anam amunu, wan am laih wakkunu elele iitta.

³¹ Ag habppa daatteb ele, ag oh gamalag ahaɗ! Ao, ag wanppa daatteb ele, ag oh gamalag ahaɗ! Ag wanppan wan ohnu danab ah oh amelagppa, “Yawe Nug King daatte!” aig!

³² Yu, nuhig keeke oh ele, ag gamalag aheb, eig! Ge, dad okkai oh, amuppan keeke oh ele, ag gamalag ahaɗ!

³³ Ag anam heppeg, ad atuppa daatteb ag ahi ettaglag. Ao, ag gamag ahak doon, Yawe noobppa ahi ettaglag. Aɗinu? Yawe Nug wan imu epeɗikkunu uɗitte.

³⁴ Ag Yawe amegppa, “Ena heme,” aon aig! Aɗinu? Yawe Nug enaib dayaya, enaib ele hette. Ao, nuhig oo mauhaknab kobol hanhan, alet daatte.

³⁵ ⌊O Israel danab ah⌋ ag Nug inam unuqitteg! “O Kayak, ihinig Padal ii maknu ehanittak, ig na, na onin am oppiaawak ele, ig na amenppa, ‘Ena heme,’ akkunignu, ig gamag ahak okkai doot, na onin humagnignu, na ehanigppe, ig padal mematanu unuqidttem. Ao, na ehanigppe, ig qagaiettakppa ii daapput, wanppan wan laalappanu qagmeigppe, ig ihinig wanppa daagnignu oɗ medattem.” Ag anam aon unuqitteg!

³⁶ Ag Yawe, Nug ig Israel, ihinig Kayak, Nug gemu daatte, butti aɗi ele hanhan anam daakku amu; ag Nug binag meig! Dawit nug Asap laikkud ele anam ippuanatta male, danab ah oh ag daan dooppig amu ag, “Genab, anam dayaɗ!” anana, ag, “Ig Yawe binag metu,” appig.

³⁷ Amu Dawit nug he, Asap nug laikkud ele ag deɗ ohppa Yawenu Tituanak Nainu Kunup kontrak inak ele, amu daatteppa, Kayaknu ɗo maɗoɗnu uɗat hekkulagnu appa daappig. Yawe Nug ag aɗi aɗi deɗ anen anenppa hekkulagnu aum amu, ag amu hekkulagnu daappig.

³⁸ Amu Dawit nug ele he, Obetidom, nug laikkud 68 ele, ag ele appa, Asap aɗi ele ehanadkkulagnu daan, Kayaknu ɗo maɗoɗnu uɗat hekkulagnu daappig. Aria, Jedutun bekka Obetidom, amu Hosa ele, aa od gumak danab daapiɗ.

³⁹ Danab amu ag Jerusalem appa Kayak uɗat hekkulagnu daappig, amge Dawit nug he, mana mettak danab Sadok, mana mettak danab laa ele ag Yawenu mettid haknu peh lag Gibeonnu, mettid haknu abenppa dayom amu, ag appa daappig.

⁴⁰ Yawe Nug ɗo Israel mattomppa, mana mettak danab ag deɗ anen anen ohppa buttua, tueb ele manaknu ofanu ippuanattom amu, anamib ag appa daanna, doɗ amu buttua, tueb ele, ɗo atte bia, ag manaknu ofa haknu qaɗabppa main, Yawe mettaglagnu daappig.

⁴¹ Amu Heman, Jedutun ele aa ele Gibeon appa daapiɗ. Aa amu laa Dawit nug tituanatta, onilag diie, ag Heman, Jedutun ele Gibeon daanna, ag Yawe amegppa, “Ena hen mekkame,” akkulagnu daappig. Aɗinu? Nuhig oo mauhaknab kobol hanhan alet daatte.

⁴² Heman, Jedutun ele aa trampet iwalkkulahnu, simbal, am musik hak keeke laala ele hekkulahnu daapiɗ. Keeke amuppa ag ahi Kayak binag maknu heppig. Jedutun bekkod ag Gibeon appa od gumak danab daappig.

⁴³ Aria, amu oh dimppa amu, Israel danab ah oh ag ahan, ag laulag aben aben gokkulagnu goppig, amu Dawit nug ele eɗua, nug laugppa nug baegppan itittak ena madakkun ukkom.