1 Stori 15 - Nobonob Baibel

Dawit he, ag Tituanak Nainu Kunup aon, Jerusalem uɗippig

¹ Am Dawit nug he, Dawitnu Aab, appa ag lag laala nuhig heeg, nug aben laa Kayaknu Tituanak Nainu Kunup daakkunu ele babaitta, peh lag laa ele Tituanak Nainu Kunup aguppa daakkunu aben amuppa taiettom.

² Nug amu oh ha malowa, nug aum. “Yawe Nug Lewi buɗub aakkuib ag haen oh Kayaknu Tituanak Nainu Kunup maoglagnu, agib Nug noobppa nuhig ɗo maɗoɗnu uɗat hekkulagnu tituanattom amunu, ag Yawenu Tituanak Nainu Kunup maoglagoitte. Laa iinab maomna,” awa aum.

³ Dawit nug anam ana he, Israel oh ag Yawenu Tituanak Nainu Kunup aon, Tituanak Nainu Kunup amu daakkun aben Dawit babaittomppa mekkulagnu Jerusalem uɗippig.

⁴ Dawit nug Israel laa oh uɗiglagnu ha, nug ele Aron buɗub, Lewi buɗubppan mana mettak danab iitta, ag ele uɗiglagnu onilagppa eum. Lewi buɗub uɗippig ele am inam.

⁵ Kohat buɗubnu; ahilag okkai Uriel, danab 120 ele. Danab amu ag Uriel ele tiilag laippu.

⁶ Merari buɗubnu; ahilag okkai Asaia, danab 220 ele. Danab amu ag Asaia ele tiilag laippu.

⁷ Gerson buɗubnu; ahilag okkai Joel, danab 130 ele. Danab amu ag Joel ele tiilag laippu.

⁸ Elisapan buɗubnu; ahilag okkai Semaia, danab 200 ele. Danab amu ag Semaia ele tiilag laippu.

⁹ Hebron buɗubnu; ahilag okkai Eliel, danab 80 ele. Danab amu ag Eliel ele tiilag laippu.

¹⁰ Usiel buɗubnu; ahilag okkai Aminadap, danab 112 ele. Danab amu ag Aminadap ele tiilag laippu.

¹¹ ⌊Dawit nug danab amu he, ag Jerusalem uɗieg,⌋ nug Sadok, Abiatar ele, aa mana mettak danab amu, aria Uriel, Asaia, Joel, Semaia, Eliel, Aminadap ele, ag am Lewi buɗubppan mana mettak danab iitta, nug amu oh onilagppa e, nug gumidna goppig.

¹² Ag nug gumidna ukkaeg, nug ag amelagppa aum. “Lewi buɗub oolagppanu amu, ag, ag baelkadppa dilag okkai daatteb. Ag anam daatteb amunu, ag, ag lailkad ele, ag oh Lewi buɗub amu, ag anen anen, ag hena, ag Yawenu tituana mettak daanna, ag Yawe, Nug Israel dilag Kayak, ag nuhig Tituanak Nainu Kunup aon, da aben kunup amunu bappaidmi, ag aguppa mekkulag.

¹³ Ig tatam Tituanak Nainu Kunup amu aognignu gomut, haen amuppa ig attemnab maot uɗignignu Kayak oɗ ii mettata, ib laappa aot uɗignignu heta, ag Lewi buɗub ag gona, maon ii uɗippig amunu, Yawe, ihinig Kayak, Nug ihinignu oo nauhe, bu mekkom,” awa aum.

¹⁴ Dawit nug anam aum amunu, Lewi buɗubppan mana mettak danab, Lewi buɗubppan mana mettak danab iitta ele ag Yawe, Israel dilag Kayak, ag nuhig Tituanak Nainu Kunup aon, Jerusalem uɗiglagnu ag hena, ag Kayaknu tituana mettak daappig.

¹⁵ Ag anam hena daanna, Lewi buɗub ag Yawe, Moses amegppa attem hena maoglagnu a, Moses ag amelagppa anam hekkulagnunab aum amu, ag amubia Kayaknu Tituanak Nainu Kunup ad aɗitppa gukkalagppa maoppig.

¹⁶ Amu Dawit nug Lewi buɗub dilag okkai ag lailkad Lewi buɗub laa, ag oolagppan laa ag musik haknu danab, am laa ag ahiettak danab, nug ag ag tituanadppeg, musik hak danab ag laia, harp, amu simbal ele hebeppeg, laa ag ahi gamag ahak ele ettaglagnu aum.

¹⁷ Nug anam aum amunu, ag Joel bekka Heman, nug ele tiig laippu laa, Berekia bekka Asap, amu aa lailti oolagppanu, Merari buɗubppanu, am Kusaia bekka Etan ele tituanadna,

¹⁸ ag ewam amu lailkad oolagppanu, ag danab ewam okkainab daappig, ag okkainab amubia ii daappig amu, ag amu dilagppa, ag oolagppanu Sekaraia, Jasiel, Semiramot, Jehiel, Uni, Eliap, Benaia, Masea, Matitia, Elipelehu, Miknea, Obetidom, Jeiel ele tituanadppig. Obetidom, Jeiel ele aa od gumak danab daapiɗ.

¹⁹ Musik hak danab Heman, Asap, Etan ele ag simbal, brasppa hak hekkulagnu daappig.

²⁰ Sekaraia, Jasiel, Semiramot, Jehiel, Uni, Eliap, Masea, Benaia ele ag ⌊musik hak kobol laa onig⌋ alamot dim lamidna, laia hekkulagnu daappig.

²¹ Aria, Matitia, Elipelehu, Miknea, Obetidom, Jeiel, Asasia ele, ag ⌊musik hak kobol laa onig⌋ seminit dim lamidna, harp qattaglagnu daappig.

²² Lewi buɗub dilag okkai Kenania, nug ahi edakkunu doya autanab awom amunu, nug laa ahi edappig dilag gumak okkai dayom.

^23-24 Laa amu ag musik hak, ahiettak ele gumaglagnu otiona, ag Lewi buɗub laa Tituanak Nainu Kunup atognoaknu ele tituanadppig. Ag am Berekia, Elkana, Obetidom, Jehia ele. Ag danab amu ag uɗat amu hekkulagnu tituanadna, ag mana mettak danab Sebania, Josapat, Netanel, Amasai, Sekaraia, Benaia, Elieser ele ag Kayaknu Tituanak Nainu Kunup noobppa oinna, trampet iwalkkulagnu ele tituanadppig.

²⁵ Ag oh amu, ag uɗat amu hekkulagnu tituanatteg, Dawit, Israel dilag ikki danab, ban daup ikki, ag anen anen daup 1,000 gumadppig, ag ele oh Yawenu Tituanak Nainu Kunup kontrak inak ele Obetidom laugppanu aon, Jerusalem uɗiglagnu gamag ahak okkai ele doon goppig.

²⁶ Ag ahan gona, Lewi buɗub ag Yawenu Tituanak Nainu Kunup kontrak inak ele maoegeg, Kayak ehanatte, ⌊laa Usa mauhom bia ii mauhom⌋ amunu, ag makau dawai eblaih aɗit ele, sipsip dawai eblaih aɗit ele, ag doɗ amu oh manadna, Yawe medappig.

²⁷ Amu Dawit, Lewi buɗub ag Tituanak Nainu Kunup maoppig ele, danab ahi edappig, Kenania, nug danab ahi edappig gumattom ele, ag oh lamen elab linen hakkabppa hak takkan oippig. Ag oh linen lamen takkadna oin, Dawit nug ele lamen enanag-epod, linenppa hak takkom.

²⁸ Anam aakku ag gona, Yawenu Tituanak Nainu Kunup kontrak inak ele aon uɗinna, ag enana, ag musik haknu keeke doɗ qeqeɗippa hak, trampet ele iwalnana, ag simbal hena, laia, harp ele qeppig.

²⁹ Ag Yawenu Tituanak Nainu Kunup kontrak inak ele anam aon uɗinna, ag Dawitnu aab, ag appa bena, aab ooppa nonana, Dawit nug gamag ahak okkai ele doyaya, nug ahi huana goɗeɗe, nug wau, Saul aɗeg Mikal, nug lag ooppa dayaya, gililppa ulah ibuppa daya, haen nug neekke ukke, King Dawit anam he antta amu, nuhignu nug ooppa ena iinab doyom.