1 Stori 14 - Nobonob Baibel

Dawitnu lag enanagnab, baekkudppa ele

¹ Dawit nug anam dayeye, Tair dilag king onig Hiram nug he, nuhig nai awa ukkak danab laala, kapenda danab, keeke menppa hak danab ele ag oh Dawit toppa goppig. Ag gonana, ag ad sida ele aon gona, kapenda, keeke menppa hak danab ele ag Dawitnu lag enanagnab hekkulagnu goppig.

² Amu Dawit nug Yawe, Nug nuhikkud danab ah Israel dilagnu anuqak doya, Nug he, Dawit nug ahilag king dayeye, wan laappan danab ag nuhig gumaknu am binag ele dooppig amu, nug amu doyom.

³ Amu Dawit nug Jerusalem ta dayaya, nug wauud laala ele diie, ag nug bekkod, aɗekkud laala ele menuadppig.

⁴ Jerusalem appa nug bekkod menuattak amu, ag am Samua, Sobab, Natan, Solomon,

⁵ Ibhar, Elisua, Elpelet,

⁶ Noga, Nepek, Japia,

⁷ Elisama, Beliada, Elipelet ele.

Dawit nug Pilistia danab eɗattom

⁸ Am haen Pilistia danab ag Israel oh ag Dawit nug ahilag king daakkunu goɗen gokkaɗakppa tituanppig doon amu, ahilag daup danab ohnab ag Dawit mattin anidna qeppeg mauhkkunu Israel wanppa goppig, amge Dawit nug nai amu doye, nuhikkud daup ele ag Pilistia ele ban hekkulagnu ahan, Pilistia uɗalag tekkulagnu goppig.

⁹ Amu Pilistia ag oolnu noak onig Repaim, appa uɗin, ag danab ah appa daatteb lamadnana, ahilag keeke aoppig.

¹⁰ Ag anam daappig amunu, Dawit nug Kayak oɗ mettom. “Da Pilistia banelag tekkul am enate? Da banelag teppi amu, na ag da eppelppa maadkkutte?” awa oɗ mettom. Dawit nug Kayak anam oɗ mette, Nug nob ma aum. “Da Pilistia na eppenppa maadkkul amunu, na te!” awa aum.

¹¹ Yawe Nug anam aum amunu Dawit, nuhikkud daup ele ag ukkaeg, Pilistia ele ban hena, Dawit aɗi ag Pilistia aqappig. Ag anam hena, Dawit nug aum. “Le keeke awa duttune gotte, amubia Kayak Nug dahilad kekeɗ he, iitta meppig,” awa aum. Dawit nug anam anana, nug aben amu onig Bal Perasim ataɗom

¹² Dawit aɗi ag Pilistia eɗatteg, ag kayak hambuppuak dottolkad ahilkad uuadna ooleg, Dawit aɗi ag uɗin manatteg eoppig.

¹³ Anam heeg ukke, haen laappa Pilistia ag baula uɗin, oolnu noak onig Repaim appa uɗin, baula danab ah appa daatteb amu lamadnana, ahilag keeke aoppig.

¹⁴ Ag anam heeg, Dawit nug baula Kayak, nug aɗi hekkunu oɗ mette, Kayak Nug Dawit amegppa aum. “Tutukku, Pilistia noolagppa tena, ban aib heme. Iitta. Na taliliadna gona, dimulagppa tena, ad balsam kuɗum ag dimulagppa daatteb amunu, na aben amuppa tena, appanu Pilistia gukkuadna goppe, ag ele ban heig!

¹⁵ Amge na gona, atu ad amu eleppa tena, na paha gona, Pilistia ele ban hekkulagnu aib gome. Iitta. Na appa daanna, ad amu gogppa oqotti laa, oqotti amuam ban danab ag laippuppa tappa ukkak oitteb oqotti bia, na oqotti amu doon, na da, Kayak, da na noomppa Pilistia aqadkkulnu gottem ippunidtte dookkut amunu, na amu doon, na paha ahan, Pilistia danab ele ban hekkulagnu ukke!” awa aum.

¹⁶ Kayak Nug anam haknunab aum amunu, Dawit nug anam heum. Nug anam ha, nug Pilistia danab kuɗum aqom. Nug aben onig Gibeon appa digma aqe ukke, Geser batak aqom.

¹⁷ Dawit nug anam heum amunu, danab ah wan atu ohppa nuhignu nai dooppig, amu Yawe he, wanppan wan ohppan danab ah ag oh nug baɗidppig.