1 Stori 13 - Nobonob Baibel

Dawit nug Tituanak Nainu Kunup awa, Jerusalem uɗikkunu dabmeum

¹ Amu dimppa Dawit nug nuhikkud ban daup 1,000 dilag ikkilkad, laa ag ban daup 100 dilag ikkilkad ele, nug ag onilagppa e uɗieg, nug ele nai madippig.

² Dawit nug anam onilagppa e uɗieg, nug ag oh amelagppa aum. “Ag oolag heeb, Yawe, ihinig Kayak, Nug ele oo daatte dayeb, ig nai mepput, Israel wan ohppa ukkeb, Israel laa oh ag uɗippeg, ig ele daagnig. Laa uɗiglag am ig ele tiinig laippu, ag Israel wan laih laih daatteb. Ag amu, aria Lewi buɗubppan mana mettak danab, Lewi buɗubppan mana mettak danab iitta ele, ag appa Israel danab ah oolagppa, ahilag aabppa, ahilag gikkiɗah dad okkaippa ele daatteb amu, ag ele oh uɗiglag.

³ Ig apput, ag uɗippeg, ig gota, ihinig Kayaknu Tituanak Nainu Kunup aot uɗignig. Aɗinu? Saul king dayeye, haen amuppa amu, ig Israel, ig Kayaknu Tituanak Nainu Kunupnu ii dabmeut, hamu dayom,” awa aum.

⁴ Amu Dawit nug danab amu amelagppa anam a, kobol amuam kobol tutukku dooppig amunu, ag oh amu haknu oolag laippu dayom.

⁵ Ag oolag laippu dayom amunu, Dawit nug nai me ukke, Israel danab ah, Israel wan ohppan uɗippig. Yau uɗitteppanu Israel, Isip ele dilah tom am le onig Saiho, aria yawalti uɗitteppanu Israel dilag tom am Lebo Hamat, amu Israel danab ah ag wan oh tom aɗit amu gamalahppa daatte, ag appanu uɗippig. Ag Kayaknu Tituanak Nainu Kunup Kiriat Jearimnu aon uɗiglagnu uɗippig.

⁶ Ag uɗieg, Dawit nug danab amu oh ele ag ahan, Kayak, Nug Yawe, ag nuhig Tituanak Nainu Kunup aon, Jerusalem uɗiglagnu aab onig Bala, Juda wanppa dayom, ag appa goppig. Aab onig Bala, Juda wanppa dayom, am onig laa am Kiriat Jearim. Tituanak Nainu Kunup amuppa amu, Yawe, Nug engel okkai-kerubim aɗit dottolah, Tituanak Nainu Kunup amuppa hippaidya daattep, Nug aa gamalahppa sia king nuhigppa daatte amu, Nug onig amuppa daatte.

⁷ Kayaknu Tituanak Nainu Kunup amuam Abinadap laugppa dayom amunu, ag gona, nug laugppa tena, ag Kayaknu Tituanak Nainu Kunup lag ooppanu aon, uɗatnu karis bauppa meeg dayeye, ⌊Abinadab bekoɗ⌋ Usa, Ahio ele aa karis amu adeppa adeppa gokkunu atognopiɗ.

⁸ Ag anam hena, Dawit, Israel laa oh ele daappig amu, ag oolag gamag huana ahehe, ag Kayak noobppa ahi huana ettanna, ag harp, laia, tambarin, simbal, amu trampet ele aɗan, musik ele huana heppig.

⁹ Ag amu henana, ag Kidonnu ee aeg mumuɗaknu abenppa gona teegeg, makau okkai ebehi ele uɗatnu karis amu eeɗpiɗ, aa taataɗ qettak heeh, Kayaknu Tituanak Nainu Kunup, uɗatnu karis attan uɗalom amunu, Usa nug ɠagattag daakkunu eppeg bahia aɗom.

¹⁰ Nug anam he, Yawe Nug ⌊matu laa nug mana mettak danab iitta Tituanak Nainu Kunup amu ii aɗamanu ɗo meum amunu,⌋ Nug oo huana nauhe, Usa nug Tituanak Nainu Kunup am aɗom amunu, Yawe Nug he mauhom. Nug aguppa Kayak noobppa mauhom.

¹¹ Dawit nug Yawe he, Usa mauhe anttom amunu, ⌊nug nuhig hakppa uug amu beum doya, nug nukka nuhignu⌋ oo nauhom. Nug oo nauhom amunu, nug aben amu onig Peres Usa attaɗe, gemu, ⌊nai imu yaak haenppa⌋ ele ag anamib atteb.

¹² Amu Dawit nug Yawe anam he antta, nug Kayaknu baɗa aum. “Da genab Kayaknu Tituanak Nainu Kunup awe tein, dahil aabppa mekkulnu elele iitta,” awa aum.

¹³ Dawit nug anam ana, nug Kayaknu Tituanak Nainu Kunup awa ta, aab nug daatteppa, amuam Dawitnu Aab amu, nug appa ii meum. Nug appa ii ma, nug laih ukka, danab onig Obetidom, nug Gat ⌊Rimon⌋ danab, nug laugppa meum.

¹⁴ Dawit nug Kayaknu Tituanak Nainu Kunup Obetidom laugppa appa me, Tituanak Nainu Kunup amuam kalam ewam appa dayom. Dayeye, Yawe Nug Obetidom, nug baegppa oh, amu nuhig keeke oh ele itattom.