1 Stori 12 - Nobonob Baibel

Dawitnu ban danab nug ele Siklak appa daappig

¹ Amu Kis bekka Saul nug Dawit qeeb mauhkkunu heehe, Dawit nug Siklak ukka dayeye, danab laala nug ehanidkkulagnu Siklak goppig. Danab amu ag ban danab, ban haenppa Dawit ehanidnana, ban heppig oolagppan laa aakku.

² Danab amu ag lat, ketapol ele aɗan, ag lat doɗo, men ele eppelag naɗiap-ppa o nanehppa ele ekkulagnu elele. Ag Israel dilag huu okkai Benyaminnu danab, Saul ele tiilag laippu.

³ Danab amu ag onilag am inam. Ahieser, Joas ele. Aa Gibea ted Sema bekoɗ. Ahieser nug danab amu dilag okkai dayom. Laa am Asmawet bekoɗ Jesiel, Pelet ele, aria Beraka, amu Anatot ted Jehu ele.

⁴ Laa am Gibeon ted Ismaia. Ismaia nug ban danab ɠagattagnab okkai ele. Ban danab 30 oolagppan laa am nug. Nug amu dilag ikki danab laa dayom. Aria, laa am Jeremaia, Jahasiel, Johanan, am Gedera ted Josabat,

⁵ Elusai, Jerimot, Bealia, Semaria, amu Harup ted Sepatia,

⁶ Elkana, Isia, Asarel, Joeser, Jasobeam ele. Danab tanig ele amu ag am Kora buɗubppan danab.

⁷ Aria, laa am Gedor danab onig Jeroham, nug bekoɗ Joela, Sebadaia ele. ⌊Danab amu ag Siklak appa Dawit gumidna goppig.⌋

⁸ Amu Dawit nug atu taɗakppa ban haknu aben ɠagattag eleppa dayeye, Gad buɗubppan danab laala ag nug ehanidkkulagnu uɗippig. Ag am ban danab ag oolagppa ɠagattag doon, ag ban haknu bappaidna daappig. Ag guppiɗ, ban ele aɗan, ban hekkulagnu doon daappig. Ag laion ban ha, doɗ laa aɗa, qeeb mauhkkunu babaittaknab daatte, ag amubia daan, ag doɗ gasel qaukoppa qaietta gotte bia hekkulagnu elele.

⁹ Gad danab amu dilag okkai am Eser. Nug okkai daye, nug waappa am Obadaia daye, amu nug waappa am Eliap.

¹⁰ Eliap waappa am Mismana. Mismana waappa am Jeremaia.

¹¹ Jeremaia waappa am Atai. Atai waappa am Eliel.

¹² Eliel waappa am Johanan. Johanan waappa am Elsabat.

¹³ Elsabat waappa am Jeremaia. Jeremaia waappa am Makbanai.

¹⁴ Danab amu oh ag am Gad danab. Ag ban danab dilag okkai daappig. Danab amu oolagppa aun nug ɠagattagnab dayom amu, nug ban danab 1,000 gumattom. Aun nug okkai, amge okkai anambia iitta amu, nug ban danab 100 gumattom.

¹⁵ Danab amu ag maɗ ooppanu kalam digmak, kalam amuppa Jodan le ui ele otte, haen amuppa Jodan le ui eheɗ oowo, ag le mataɗna wana, danab ah oolnu noak Jodan leppa nottebppa daappig ele, ag danab ah amu lamatteg goppig. Ag Jodan le heqo laih laih, Jodan leppanu kaɗag uɗitteppanu, qaban uɗitteppanu ele anam lamadppig.

¹⁶ Amu deɗ laa Dawit nug ban haknu aben ɠagattagppa dayeye, Benyamin danab laa ag, ag Juda danab laa ele ag oh, ag Dawit gumidna uɗippig.

¹⁷ Dawit nug ban haknu aben ɠagattagppa dayeye, ag uɗieg, Dawit aha dimittim ukka, ag uɗalag ta, ag amelagppa aum. “Ag da ehaniɗkkulagnu maɗoɗ ele uɗippig dayeb amu, ag uɗippeg, da ele daagnignu ool daatte, amge da eheɗ laa ii hemi, ag amu dab-ii-menana, ag hambuppuiɗna aɗailna dahil kekeɗ eppelagppa meiɗkkulagnu uɗippig dayeb amu, Kayak, ig mamenkad aɗi dilag Kayak, Nug amu antta, ag epeɗiatta, bu madakkunu ool daatte,” awa aum.

¹⁸ Dawit nug ag amelagppa anam a, Amasai, nug haen amu dimugppa ban danab ɠagattag 30 dilag okkai dayom, nug danab uɗippig oolagppa dayeye, Kayak Ouɗi Nug Amasai, nuhigppa uɗie, nug aum. “O Dawit, ig am nahip danab. Ge, Jesi bekka, ig na ehanidkkunignu daattem. Kayak Nug na ehanidkku amunu, na maɗoɗ ele daakkut. Na, am laa ag na ehanidtteb, amu ele, ag maɗoɗ ele daaglag,” awa aum. Amasaia nug anam aum amunu, Dawit nug diiatta he, ag Dawitnu ban daup huu laala ikkilag daappig.

¹⁹ Amu ban danab laa ag Dawit ehanidkkulagnu nug gumidna goppig ele amu, ag am Manase danab. Pilistia ag Saul ele ban hekkulagnu daaegeg, Dawit nug Pilistia ehanadkkun ukke, haen amuppa Manase danab amu ag Dawit gumidna goppig. Dawit, Pilistia ele ag Saul ele ban hekkulagnu goppig, amge Pilistia dilag okkai ag nai mattinna, “Dawit ig ele oh gota, banppa nug eɗua, nuhig okkai Saul ehanitteb, iqappeg mauhmata,” anana, ag heeg, Dawit, nuhikkud danab ele ag eɗun, Siklak goppig amunu, Dawit nug Pilistia ii ehanattom.

²⁰ Amu haen Dawit aɗi ag eɗun, Siklak goppig amu, Manase danab amu ag nug ele oh goppig. Danab anam heppig ele am Atna, Josabat, Jediael, Maikel, Josabat, Elihu, Siletai ele. Ag oh am Manase oolagppanu huu 1,000 anen anen dilag ikki danab daappig.

²¹ Manase danab amu ag ban danab oolagppa ɠagattag doyak ele amunu, kekeɗ uɗin, Dawit aɗi aqaglagnu ban heeg, ag ahaeg, ag ele ban heppig. Amu Dawit he, ag nuhig daup dilag ikki daappig.

²² Amu danab anam anam deɗ oh bia Dawit ehanidkkulagnu uɗippig amunu, Dawitnu daup am huanaknab daappig. Ahilag ebqak am Kayaknu daup dilag ebqak, amubia.

Saul mauhe, Dawit Hebron daye, laa nug ehanidkkulagnu nug gumidna goppig

²³ Yawe Nug Dawit, Saul abenab awa, king daakkunu aum bia amu, Israel danab kuɗum laa, danab amu oh ag ban hekkulagnu keeke eppelagppa aɗappig ele, ag king dayaknu ehah Saul eppegppa dayom aon, Dawit mettaglagnu Dawit gumidna, Hebron goppig. Am danab amu, ahilag ebqak am inam.

²⁴ Juda buɗubppanu am 6,800. Ag ban, guppiɗ ele aɗan, ag ban hekkulagnu babaittak daappig.

²⁵ Simeon buɗubppanu am 7,100. Ag am ban danab, ban hekkulagnu babaittak daappig.

²⁶ Lewi buɗubppanu am 4,600.

²⁷ Lewi buɗub oolagppa Jehoiada, nug Aron buɗub dilag okkai aakku, nug danab 3,700 ele daappig.

²⁸ Sadok ele Lewi buɗub oolagppa dayom. Sadok nug nid bau, ban danab ɠagattag. Nug danab 22 laa ele, ag nug ele oh tiig laippu, danab amu ag ban danab dilag ikki daappig amu, ag nug ele oh uɗippig.

²⁹ Benyamin buɗubppanu am 3,000. Danab amu ag Saul ele tiilag laippu. Danab uɗippig amu, ag laa king daakkunu tatam Saul buɗub, ahilagib dabmena oo metta ii uuak kobol dim lamidppig, amge gemu ag Dawit ehanidkkulagnu uɗippig.

³⁰ Epraim buɗubppanu am 20,800. Ag oh am ban danab ag oolagppa ɠagattag doyak ele. Ag baelkadppa oolagppa danab onilag ele daappig.

³¹ Israel dilag huu okkai Manase mahaib laanu danab am 18,000. Ag lailkad laa ag danab amu anen anen, ag onilagppa tituanna, ag gona, Dawit ahilag king daakkunu ɠagattag qettaglagnu maatte goppig.

³² Isakar buɗubppanu am danab okkai 200. Ag Israel danab aɗi aɗi hekkulagnu, haen adekku ag hekkulag am ele dooppig. Danab 200 amu, laa ag ele tiilag laippu ele, ag ag waalagppa daappig amu, ag oh uɗippig.

³³ Seblon buɗubppanu am 50,000. Danab amu ag ban haknu sul aon malappig. Ag lat, lat doɗo ele, o ban, o daɗib, o aɗi bannu keeke oh aɗan ban hekkulagnu dooppig. Ag meulag ohppa Dawit, nuhigib dabmena oo metta ii uuak kobol dim lamidppig.

³⁴ Naptali buɗubppanu am ban daup ikki 1,000. Ag waalagppa amu ban danab 37,000 ele uɗippig. Ag ban, guppiɗ ele aɗan ban amuppa ban heppig.

³⁵ Dan buɗubppanu am 28,600. Danab amu oh ag am ban danab, ag ban hekkulagnu bappaidna daappig.

³⁶ Aser buɗubppanu am 40,000. Danab amu ag ban hekkulagnu sul aon malan, ag ban hekkulagnu babaittak daappig.

³⁷ Ruben buɗubppanu, Gad buɗubppanu, Israel dilag huu okkai Manase mahaib laanu danab ele, ag am 120,000. Danab amu ag Jodan leppanu kaɗag uɗitteppanu daatteb, ag appanu uɗippig. Ban danab amu ag bannu keeke digdig oh aɗualadppig.

³⁸ Danab amu uɗippig ag, ag oh ban danabib daan, ag anen anen ag Dawitnu ban danab daaglagnu appig. Ag heppeg, Dawit nug Israel oh dilag king daakkunu dabmak aoeg ɠagattag eppa auta awe, ag nug gumidna, Hebron goppig. Danab amu oh ag heppeg, Dawit ahilag king daakkunu dabmak aon ukkaeg, am Israel oh ele ag Dawit ahilag king daakkunu dabmak laippu amu eleib aoppig.

³⁹ Danab Dawit gumidna, Hebron uɗippig ele amu, ag baelkadppa laa ag ahilkad ee keeke bappaidna madappig amunu, ag Dawit gumidna teeg, ag nug ele deɗ ewam daan, ag ee amu, le amu ele lappig.

⁴⁰ Am danab Hebron uɗippig ele ag ee lakkulagnu, Israel danab laa miag daappig, laa umanu, Isakar, Seblon, Naptali batak daappig, ag appan ee aon uɗippig. Ee amu ag donki, kamel, miul, makau okkai ebehi ele ele qaɗelagppa mena, aon uɗieg, ee okkai dayom. Ag plaua, ad fig meu qaɗaiettak batappatak, grep meu qaɗaiettak batappatak, wain, goɗen, makau, sipsip ele kuɗumnab aon uɗippig amunu, ee okkai dayom. Aɗinu? Israel danab ah ag gamag ahak okkai dooppig.