1 Stori 11 - Nobonob Baibel

Dawit nug king abenppa ta dayom

¹ Saul mauhom dimppa, Israel danab oh ag Dawit gumidna, Hebron uɗippig. Ag uɗin appig. “Ig na ele ig oh tiinig laippu.

² Amu anukka, haen Saul nug king dayeye, haen amuppa ele na ihinig ban danab noolag awe, ag oh ban heppig. Am haen amuppa Yawe, nahip Kayak, Nug na amenppa aum. ‘Na sipsip gumak danab sipsip gumadtte, amubia na dahilad danab ah, Israel, na ag gumadna, na ahilag king daakkut,’ awa aum,” aon appig.

³ Ag anam aeg, Israel dilag ikki danab oh ag Dawit gumidna, Hebron uɗieg, nug he, ag nug ele Hebron appa, Yawe noobppa nug tituanna, nai qagappig. Ag nug tituanna, nai qakkan, ag Dawit, nug Israel oh dilag king daakkunu goɗen gokkaɗakppa tituanppig. Yawe Nug Samuel oɗeppa amu bekkunu aum, aumbia Dawit nug king abenabppa ta dayom.

Dawit nug Jerusalem kekeɗ eppelagppanu aɗitta awom

⁴ Am haen amuppa danab ah ag Jerusalemnu, “Jebus,” adappig. Amu Dawit nug, nuhikkud daup ele ag ahan, appa banelag goppig. Ag ahan ukkaeg, Jebus danab appa daappig ele ag

⁵ Dawit amegppa appig. “Na ippa ii uɗimna,” aon appig. Ag anam appig, amge Dawit eɗattowa, nug aab Sion aɗ ɠagattagnab ele amu awom. Amuam Dawitnu Aab aakku.

⁶ Dawit nug nuhikkud daup ele ag ban hekkulagnu gonana, haen amuppa nug nuhikkud daup amelagppa aum. “Aun nug ban amegppa anuqak dayaya, Jebus danab tatam qe mauhtte amu, nug dahil daup oh dilag ikki daakku,” awa aum. Haen amuppa nug anam a, Seruia bekka Joap nug Jebus laa qe, Dawit nug nuhikkud daup dilag okkai aben aokkunu meum.

⁷ Dawit aɗi ag aab aɗ ɠagattagnab ele amu aon, Dawit nug aab aɗ ɠagattagnab ele amuppa ukka dayom, diig amunu danab ah ag aab amunu, “Dawitnu Aab,” appig.

⁸ Dawit appa dayaya, nug aab okkai amu daug daug lag keeke, bau hattom. Nug aben laa wan ita me bak, nug amuppa digma, lag keeke, hatte ukka, aabnu aɗppa batom. Aria, aab laa tatam dayom amu, Joap nug amu eɗua babaittom.

⁹ Yawe Nukka Ɠagattag Oh Ele Nug Dawit ele daapiɗ amunu, Dawit nug king ɠagattag daye, nuhig ɠagattag am teete, Dawit nug king ɠagattagnab dayom.

Dawitnu ban danab ɠagattag

¹⁰ Yawe Nug Dawit, Israel wan oh dilag king daakkunu Dawit amegppa nai anan qakkom amu, Nug aum bia Israel danab oh, ban danab ɠagattag ele ag Dawit ehanitteg, nug Israel wan oh dilag king ba dayeye, nuhig gumak ii uɗalom. Amu ban danab ɠagattag dilag nai am inam.

¹¹ Dawitnu ban daup ɠagattagnab dilag hak ⌊laala⌋ am inam. Tatam am Hakmon ted onig Jasobeam. Nug am huu laa onig Danab Ewam dilag ikki dayom. Danab Ewam ag am Dawitnu ban daup oolagppa onilkad okkai, laa oh eɗattak ele. Deɗ laa Jasobeam nug danab 800 ele ban henana, qep elab nuhigppa aqe mauhppig.

¹² Danab Ewam oolagppa Jasobeam dimugppa am Aho ted onig Eleasar, nug Dodai bekka.

¹³ Deɗ laa Pilistia ban danab ag Pasdamim appa Israel ele ban hekkulagnu qagmeeg, Eleasar, nug Dawit ele appa daapiɗ. Pilistia, Dawit, Eleasar, Israel dilag ban danab ele ag oh appa daanna, ban henana, bali dad okkaippa Pilistia wagainab meeg, Israel dilag daup ag oolppig.

¹⁴ Amge Dawit, Eleasar ele aa dad okkai amu gamagppa daayya, Pilistia ag aomnanu ban heyaya, Pilistia aqeh mauhppig. Yawe ehanate, aa aqeh mauhppig amunu, aa eppelahppa Yawe Nug Israel ehanittak okkai mattom.

¹⁵ ⌊Amu haen laa Pilistia dilag daup ag Israel ele ban heppig, haen amuppa⌋ Dawitnu ban daup ɠagattag ameg laa, Danab 30 atteb, danab amu oolagppanu danab ewam ag ahan gona, Dawit nug wan oɗe onig Adulam, nug amuppa daye, ag nug gumidna uɗippig. Pilistia danab ag oolnu noak onig Repaim appa haen tutu dayaknu aab kalan daaegeg, danab ewam ag neppig.

¹⁶ Dawit nug ban haknu aben ɠagattag amuppa daye, Pilistia ag ahilkad huu laa ag ahan gona, Betlehem aabppa, ag appa daappig.

¹⁷ Ag daaegeg, ⌊aben Dawit dayom, amuam atu taɗak amunu,⌋ Dawit nug le baag diie, nug aum. “O gadon, le moɗ Betlehem aab odppa daatte amu, elele daalo, laa nug ukka, le appanu awa uɗia, meɗeb lalom!” awa aum.

^18-19 Dawit nug anam aum, amu daup nuhig ewam amu ag doon, ag gona, wagainab mena, Pilistia eɗadna, Betlehemnu le moɗppanu le aon, ag eɗun Dawit gumidna goppig. Ag nug gumidna gona, le mettaeg, Dawit nug antta, nug lakkunu elele ii doya, nug, “O Yawe, danab ewam imu ag mauhkkulagnu henana, ag le imu aon uɗippig amunu, le imuam ag tiilag bia. Da lakkulnu elele iittanab iitta,” awa aum. Nug anam ana, nug lanak uua, nug danab wain mana mettak qaɗeppa gokkaɗa, Kayak medatte, nug amubia wanppa gokkaɗom. Ban danab ɠagattagnab ewam amu, ag anam anam heppig.

²⁰ Joap amag Abisai nug Danab 30, nug amu dilag okkai dayom. Deɗ laa nug danab 300 ele ban henana, nuhig banppa aqe mauhppig amunu, nug onig am danab ɠagattagnab ewam onilag bia dayom.

²¹ Danab 30 amu oh ag onilag okkai ele, amge Abisai nug onig okkainab ele, nug ahilag ikki dayom. Nug Danab 30, ahilag ikki dayom, amge nug danab ɠagattagnab ewam oolagppa ii dayom.

²² Aria, Jehoiada bekka Benaia, nug am Kapsel danab, nug ele ban hak danab ɠagattag. Nug kobol okkai okkai, iɗu iɗu ele heum. Nug Moapnu ban danab ɠagattag aɗit aqatom. Deɗ laa sno neene, nug wan moɗ laa oɗe okkai ele ooppa noa, laion laa appa dayom amu, nug qe mauhom.

²³ Amu haen laa nug Isip ted laa, elab nuhig am 2 mita maha ele, nug danab amu qe mauhom. Isip ted nug ban aɗom amu, ban amu qaɗib am teppunab ele; Benaia nug daɗibib aɗom, amge nug danab amu ele ban hekkulahnu ha wana, nug Isip tednu ban naɗi aɗom amu, nug ban amu qa oqaia, aɗitta awa, nug Isip ted nukka nuhig ban, nug amuppa eɗua nug ye mauhom.

²⁴ Jehoiada bekka Benaia nug kobol okkai okkai anam heum. Nug ele onig okkai, danab ɠagattagnab ewam, ag onilag okkai daappig bia.

²⁵ Danab 30, ag oh binalag okkai ele, amge ag oolagppa Benaia nug binag okkainab awom. Nug amu awom, amge nug ban danab ɠagattagnab ewam oolagppa ii dayom. Anam amu Dawit he, danab ag Dawit gumappig ele, nug ahilag okkai dayom.

²⁶ Dawitnu danab ɠagattag, ag Danab 30, huu amuppa daappig onilag am inam. Joap amag Asahel; Betlehem ted onig Dodo, nug Elhanan Bekka;

²⁷ Haror ted onig Samot; Pelon ted onig Heles;

²⁸ Tekoa ted onig Ira, nug Ikes bekka; Anatot ted onig Abieser;

²⁹ Husa ted onig Sibekai; Aho ted onig Ilai;

³⁰ Netopa danab aɗit onilah Maharai, Bana bekka Heled ele;

³¹ Benyamin wanppan aab onig Gibea ted onig Itai, nug Ribai bekka; Piraton ted onig Benaia;

³² Nahalegas ted onig Hurai; Araba ted onig Abiel;

³³ Barahum ted onig Asmawet. Salbon ted onig Eliaba;

³⁴ Gison ted onig Hasem, nug bekkod; Harar danab aɗit onilah Jonatan, Sage bekka, amu

³⁵ Ahiam, Sakar bekka ele; Ur bekka Elipal;

³⁶ Mekerat ted onig Heper; Pelon ted onig Ahaiya;

³⁷ Karmel ted onig Hesro; Esbai bekka Narai;

³⁸ Natan amag Joel; Hagri bekka Miphar;

³⁹ Amon danab onig Selek; Berot ted onig Naharai, nug Seruia bekka Joapnu bannu keeke mawom;.

⁴⁰ Itra danab aɗit, aa onilah am Ira, Garep ele;

⁴¹ Hit danab onig Uraia; Alai bekka Sabat;

⁴² Ruben danab onig Adina, Sisa bekka, nug Ruben danab dilag okkai laa, amu nug danab 30 ele oinna, nug amu dilag okkai dayom;

⁴³ Maka bekka Hanan; Mitan ted onig Josapat.

⁴⁴ Asterat ted onig Usia; Aroer ted Hotam bekoɗ onilah Sama, Jeiel ele;

⁴⁵ Simri bekka Jediael; Tis ted onig Joha, nug am Jediael amag;

⁴⁶ Mahawa ted onig Eliel; Elnam bekoɗ Jeribai, Josawia ele; Moap danab onig Itma;

⁴⁷ aria, Mesoba danab ewam onilag Eliel, Obet, Jasiel ele. ⌊Amu oh ag am Dawitnu ban danab ɠagattag aakku.⌋