1 Stori 10 - Nobonob Baibel

Saul bekkod ele mauhppignu kaya

¹ Amu Pilistia ban danab ag Israel ban danab ele ban hena, Israel ag oolna goppig. Pilistia ban danab ag qauko Gilboa appa Israel ban danab kuɗum aqaeg mauhppig.

² Pilistia ag anam hena, ag Saul bekkod ele huana lamadna gona, nug bekkod ewam onilag Jonatan, Abinadab am Malkisua ele oh aqaeg mauhppig.

³ Ag Saul bekkod nid danab ewam oh aqaeg mauheg, ban huan hena gona, Saul gukkuidna tena, Pilistia ban danab latppa ban hetteb ele ag Saul lamidna gona qeeg, nug guittak nau awom.

⁴ Saul nug guittak anam awa, nug danab bannu keeke nuhig maotte ele amegppa aum. “Pilistia danab amu ag Kayak ii dootteb, ag uɗin, da aniɗna, yaaiɗna, ag da beɗul komanman nau kuɗum qettamnanu, nahip qep elab gaɗappa daatte amu eeɗna aon, iuppe mauhei!” Saul nug anam aum, amge danab ban hak keeke nuhig mawom ele nug eheɗ nau baɗom amunu, nug Saul aum bia ii he, Saul nug nukka qep elab ⌊nuhig⌋ awa, amuppa nukka ha mauhom.

⁵ Saul nug anam he, danab Saulnu ban haknu keeke maotte ele, haen nug Saul mauhom antta amu, nug ele qep elab nuhig awa, amuppa ha mauhom. Nug Saul ele oh aakku mauhpiɗ

⁶ Anam amunu Saul, nug bekkod, nid danab ewam amu, nug baegppan oh ele ag haen laippu aakku mauhppig.

⁷ Saul nug, amu laala ele ag anam mauheg, Israel danab ah oolnu noak onig Jesril, appa daatteb, ag Israel ban danab oolna ukkaeg anattona, ag Saul, nug bekkod ele mauhppignu nai ele doyona, ag ahilkad aab uun, oolna goppig. Ag oolna ukkaeg, Pilistia danab ah ag uɗin, aab amuppa daappig.

⁸ Ban hak amu anam ukke, Israel ag oolna ukkaeg, wagɗe deɗ amuppa Pilistia ag Israel ban danab mauhppig beɗulagppanu keeke akkaglagnu uɗippig. Ag keeke aona oina, Saul mauhom gaɗa, nug bekkod mauhppig gaɗalag ele qauko onig Gilboa niiegeg anadppig.

⁹ Ag Saul mauhom gaɗa anidna, ag nuhig bannu klos uɗidna awon, ag nug baag otaɗna ikki aon, ag nai awa ukkak danab, ag Israel ban eɗidppig, ag nai amu aon, ahilag kayak hambuppuak dottolkad amelkadppa akkulagnu, am Pilistia danab ah ele amelagppa appeg dooglagnu maatteg goppig.

¹⁰ Ag Saulnu bannu lamen aon gona, ahilag kayak hambuppuak dottolkad laulagppa meppig, amge ag Saul ikki aon gona, ahilag kayak hambuppuak onig Dagon, nuhig mettid lagppa aiheg dayom.

^11-12 Pilistia ag anam heeg, haen Gileat atuppan aab Jabesnu danab ah ag Pilistia ag Saul, nuhigppa keeke heppig, ag nai amu doona, danab ɠagattag aab amuppan oh ag ahan gona, Betsan aabppa tena, ag Saul gaɗa, bekkod ewam gaɗalkad ele, ag gaɗalkad amu oh akkan, eɗun Jabes gona, mauhak ebehilkad amu ad ok laa Jabes daatte, amu waappa boumadppig. Ag boumadna malona, ag ee ohnu kud mena daaeg ukke, deɗ eblaih aɗit ele uue, ag eɗun ee lappig.

¹³ Saul nug Yawe ippunittom bia Nug dim lamidkkunu oo metta ii uuak kobol ii dim lamittom amunu, nug mauhom. Amge nug nau amuib ii heum. Iitta! Nug amu haaha, nug ele nau laa ele ha, nug mauhak ele gamag ah doyak medakkunu oɗ mettom.

¹⁴ Nug Yawe doyak medakkunu oɗ ii mettom. Nug anam anam heum amunu, Yawe he, nug mauhe, nuhig kingnu dayaknu ehah nuhigppanu aɗitta awa, Jesi bekka Dawit mettom.