1 Samuel 9 - Nobonob Baibel

Saul nug Samuel uɗa teum

¹ Amu Israel danab laa onig Kis, nug haen amuppa dayom. Nug am Benyamin buɗub. Nug danab onig ele, amu nug am Abiel bekka. Abiel am Seror bekka. Seror am Bekorat bekka. Bekorat am Apia bekka, amu Apia nug am Benyamin buɗub laa.

² Kis nug bekka laa onig Saul, nug am danab ɠagattag, nuhig anttak ele enaib. Amu elab nuhig am Israel laa oh eɗatta, 35 sentimita keeke, batak.

³ Amu Kisnu donki ag oolna gona, laih adebtag daappig amunu, Kis nug Saul amegppa aum. “Na ahan, maɗi nid laa ele appe goya, donki dahil mattialatteɗ!” awa aum.

⁴ Kis nug Saul amegppa anam aum amunu, Saul a, nug maɗi nid laa ele aa ahaya, Epraim wanppa, qauko qauko daattebppa donki mattioya, aa goya distrik laa onig Salisa, appa ele madipiɗ, amge aa ii anidpiɗ. Aa appa ele ii anidya goya, aa distrik laa onig Salim madipiɗ, amge donki ag appa ele ii daappig amunu, aa Benyamin wan laa ohppa ele madipiɗ, amge ii anidpiɗ.

⁵ Aa anam oiyya maloya, haen aa distrik laa onig Sup, aa appa teya amu, Saul nug maɗi nid, nug ele oh gopiɗ, nug nug amegppa aum. “Da mam nug donkinu daug atiebeb, ihinihnu dabmak qemanu amu, ahappe, i eɗuɗ lakka gokkunih,” awa aum.

⁶ Saul nug anam aum, amge maɗi nid nug aum. “Antte! Aab imuppa Kayaknu danab laa daatte; danab oh ag nuhignu ena elelenab dootteb. Nug aɗi atte amu, keeke amuam genab bette amunu, i goɗa, nug donkinu oɗ mettagnih. I nug oɗ medapuɗ, nug ag adeppa daatteb ab doognihtai,” awa aum.

⁷ Maɗi nid nug anam a, Saul nob ma aum. “Amge i nug gumidɗa gokkunih dayeb amu, i aɗi keeke nakok Kayaknu danab amu mettagnih? Aɗinu? Ee ihinih battamppanu oh iitta meum. I keeke laa nug mettagnihnu am iitta. I aɗi keeke mettagnih?” awa aum.

⁸ Saul nug anam a amu, maɗi nid nug aum. “Antte! Da 3 gram silwa ele iikku. Kayaknu danab amu nug ib atten dim lamidkkunihnu ab doognihnu amu, da nug medakkul,” awa aum.

^9-11 Amu Saul nug aum. “Am ena! I goɗu!” awa aum. Nug aum amunu, aa goya, aa aab laa amu, Kayaknu danab appa dayom, aab amuam qauko nakok igippa dayom amu, aa aab amuppa tekkulahnu qauko nakok teyaya, aa ah makkun laala ag le itaglagnu uɗippig, aa ag uɗalag tepiɗ. Aa uɗalag teya, aa oɗ madapiɗ. “Keekenu doyak danab nug aabppa, appa ana daattete?” aoya apiɗ. Anukka, Israel wanppa amu danab ah ag propet dilagnu, “Keekenu doyak danab,” adappig; gemu danab amunu am propet atteb. Amunu anukka, haen ag propet anidna, keekenu oɗ mettaglagnu heppig amu, ag, “Ahappeg, ig keekenu doyak danab toppa gokkunig,” adappig.

¹² Amu Saul, nuhig maɗi nid ele aa anam oɗ mattaeh, ag appig. “Ge, nug geha iikku anuqa aabppa teum. Gemu ippan danab amu, ag aabnu mettid lag nakokppa doɗ laa main, Kayak mettaglag amunu, nug gemu ig appanigppa uɗiom. Nug gemuib uɗiom amunu, aa anidkkulahnu paha teiɗ!

¹³ Amu aa goya, aabppa teya, ooppa noyaya, aa nug anidkkulah. Nug aabppan mettid lag nakokppa, danab laa ele mana mettaknu doɗ lakkulag amunu, aa ig amut bia hekkulah dayeb, aa nug aben amuppa ii tak haenppa anidkkulah. Aɗinu? Nug teppu amu ititteb, danab ag aakku lakkulag; tatam ii itittom haenppa ii lamana. Aa paha teiɗ! Aɗinu? Aa anam hekkulah amu, aa haen amuppa anidkkulah,” aon appig.

¹⁴ Ag anam aeg, Saul, amu nuhig maɗi nid ele aa aabppa teya, ooppa noyaya, aa Samuel nug haen amuppanab aabnu mettid lag nakok, ⌊aab dimittim daatte amu,⌋ nug appa tekkunu, aa gukkuata uɗieye anidpiɗ.

¹⁵ Amge Saul aab amuppa uɗiom, deɗ amuppa iitta, deɗ amu dimugppa tumai, Yawe nug Samuel amegppa nai laa imu mattiom.

¹⁶ “Dahilad danab ah ag Pilistia waalagppa daan gaaegeg doottem amunu, butti, haen inamppa amu, da heppi, danab laa nug na gumitta uɗikku; nug am Benyamin ted, nug appanu uɗikku. Nug uɗieb amu, nug Israel danab ah dilag king daakkunu na nug goɗen gokkaɗakppa tituane! Nug dahilad danab ah Pilistia waalagppa daamnanu, ag ehanadkku,” awa aum.

¹⁷ Yawe Nug anam mattiom amunu, gemu Samuel nug Saul antte, Yawe nug amegppa baula aum. “Tumai da danab laa uɗikkunu amenppa ami amu, danab imuam nugib. Nug dahilad danab ah dilag okkai daakku,” awa aum.

¹⁸ Yawe anam mattie, Samuel nug aab amu odppa dayeye, Saul nug Samuel guguitta ukka, amegppa aum. “Keekenu doyak danab laug amu, lag amu adeppa daatte, na appe dookkulnu ool daatte,” awa aum.

¹⁹ Saul a amu, Samuel nug aum. “Keekenu doyak danab am daib. Gemu aa da ele ee lakkunig amunu, aa anuqya goya, aabnu mettid lag nakokppa teiɗ! Butti buttua da keeke oh na dookkutnu oot daatte amu, da appi dooppe, da aa paɗalatppi gokkulah.

²⁰ Amu donki ag qettoɗeg, uɗin deɗ ewam mattiadme ele amu, na ahilagnu dabmak aib nittom. Aɗinu? Laa ag anadna diippig. Amge Israel danab ah oh amu, ag na, amu na mamen, nug baekkudppa ele, ahilagnu dabmenan daatteb,” awa aum.

²¹ Samuel nug Saul amegppa anam a, Saul nug aum. “Amge da am Benyamin ted. Ig Benyamin buɗub amu, ig kuɗum iitta; Israel buɗub laa oh ag eɗigtteb. Laa ele amu, Benyamin ooppa dahil aab ikki am onig iitta; laa oh ig eɗigtteb. Aɗinu na dahilnu anam attem?” awa aum.

²² Nug anam a, ag oh mana mettak abenppa tena, Samuel nug Saul, nuhig maɗi nid ele omalata, lag ooppa ukka, danab onilagppa eeg daappig ele, ag oolagppa aben laa onig okkai ele amu, nug aguppa daaglahnu he daapiɗ. Danab amuppa daappig, ahilag ebqak am 30 anam.

²³ Aria, Samuel nug amu ha mala, nug ee babaittak danab amegppa aum. “Da teppu maha laa, na piɗe meppe daakkunu, da na amenppa ami amu, na teppu amu aon do!” awa aum.

²⁴ Nug a, ee babaittak danab nug doɗ baeg laih, teppu ittag ele, nug amu awa uɗia, Saul noobppa meum. Nug me, Samuel nug Saul amegppa aum. “Teppu nahipnu tituanak dayom am aakku. Da danab laa imu oh ag ee lakkulagnu onilagppa ein, na ag ele daanna, na lakkutnu tituanmi amunu, na la!” awa aum. Nug anam a amu, Saul, Samuel ele aa deɗ amuppa ee lapiɗ.

²⁵ Aria, ag ee lawona, ag ahan, aabnu mettid lag nakok uun, aab ooppa nona, Samuel nug Saul ele aa lag attan, koɗokko uɗem ukkak aben, amuppa teya daayya, Samuel nug Saul ele nai madipiɗ.

Samuel nug Saul king daakkunu igippa goɗen gokkaɗom

²⁶ Aria, buttua wagkkaɗeɗe ag ahan, Saul lag koɗokko uɗem ukkakppa dayeye, Samuel nug onigppa ewa aum. “Na keeke bappaidppe, da heppi, na eɗun appanppa gokkutnu gokkut,” awa aum. Nug a, Saul nug anam he, nug Samuel ele aa dimittim gopiɗ.

²⁷ Amu Saul, nuhig maɗi nid, amu Samuel ele ag oh ahan gona, ag aab gigin gukkuidnana, Samuel nug Saul amegppa aum. “Appe, nahip maɗi nid nug anuqa ukkebeb, na nakok daappe, da Kayaknu nai nahipnu appi dookkut,” awa aum. Nug a, Saul he, maɗi nid nug anuqa ukkom.