1 Samuel 7 - Nobonob Baibel

¹ Bet Simes danab ag nai amu meeg ukke, Kiriat Jearim danab ag uɗin, Yawenu Tituanak Nainu Kunup aon gona, Kiriat Jearim ted onig Abinadab, nug laugppa meppig. Abinadab nug Kiriat Jearim appa, qauko nakok igippa dayom. Amu ag Tituanak Nainu Kunup aon gona, nug laugppa meeg dayeye, ag Abinadab bekka Eleasar, nug Yawenu tituana mettak dayaya, ag nug nainu kunup atognokkunu otieg, nug Kayak noobppa uɗat amu hekkunu dayom.

Yawe he, Samuel nug Mispa appa Pilistia eɗattom

² Kiriat Jearim danab ag amu oh hena malaeg, Yawenu Tituanak Nainu Kunup appa haen elab, maɗ 20 dayom. Amu Israel danab ag eɗun Yawe dim lamidkkulagnu dabmenan, mahippig.

³ Israel danab ah ag anam heegeg, Samuel nug ag amelagppa aum. “Ag meulag ohppa oolag eɗue, Yawe dim lamidkkulagnu hetteb dayeb amu, ag laa dilag kayak hambuppuak dottolkad, amu kayak hambuppuak Astoret iɗu iɗu dottolkad agappeg goppeg, ag noolkadppa dup noa binag mak hekkulagnu uueg! Ag anam henana, ag beɗulag oh agappeg, Yawe, nuhigppa ukkeb, Nugib waappa daan, Nug oɗeib dim lamitteg! Ag amu heppeg, Nug ag Pilistia danab eppelagppanu eɗua diiadkku,” awa aum.

⁴ Samuel nug anam a, Israel danab ah ag nai amu doon, ag ahilag kayak hambuppuak Bal, Astoret ele digdig noolkadppa dup noa binag mak hekkulagnu uun, ag Yawe, Nugib waappa daan, Nug oɗeib dim lamidppig.

⁵ Israel ag anam heeg, Samuel ag aab onig Mispa, appa gokkulagnu anana, nug ag amelagppa aum. “Mispa appa da Yawe ag ehanadkkunu unuqidkkul,” awa aum.

⁶ Samuel nug anam a, Israel oh ag Mispa gona, qagmeppig. Qagmena, ag le itan, Kayak noobppa mana mettak bia daakkunu gokkaɗeg no, ag deɗ amu buttua ukke tueb batak amu, ag kud mena, ee uuna daappig. Ag amu henana, ag miagib madippig. “Ig Yawe, nuhigppa hipunin hetata daamut,” aon appig. Mispa appa Samuel nug Israel danab ah epeɗiattom.

⁷ Haen Pilistia danab ag, “Israel Mispa appa qagmetteb,” ag nai amu doona amu, ahilkad king tanig ele, daup ahilkad ele ag ahan, ag Israel ele ban hekkulagnu goppig. Ag ukkaegeg, Israel ag amu doon, ag oolag baɗe,

⁸ ag Samuel amegppa appig. “Yawe, ihinig Kayak, Nug ehanikkeb, Pilistia ag ii iqamnanu, na Nug unuqidkkutnu aib uume; tuɗidna unuqitte!” aon appig.

⁹ Ag anam aeg, Samuel sipsip nag, anig huh lanan dayom ele laa awa, qe mauhe, nug doɗ amuppa manaknu ofa kunum heum. Nug mana medatta, nug Yawe Israel ehanadkkunu unuqitte, Yawe doyom.

¹⁰ Samuel nug doɗ mana, Kayak medette, Pilistia ag ban digmena hekkulagnu Israel gukkuadna uɗippig, amge Yawe he, ag daappig ikkilagppa hakkaɗ eheɗ qa he, Pilistia dilag dabmak kabolie, ag eheɗ baɗan, Israel noolagppanu oolna goppig.

¹¹ Ag oolna ukkaegeg, Israel ag Mispa appanu ahan, Pilistia lamadna aqanna gona, aab onig Betkar nakok eɗitta wanak batappig.

¹² Israel ag Pilistia anam lamatteg, Samuel nug men naɗi laa awa, aab aɗit Mispa, Sen ele gamalahppa qappe dayeye, nug, “Yawe ehanikke uɗie uɗie, iikku batom,” anana, nug men amu onig, “Ebenisa,” ataɗom.

¹³ Yawe he, Israel ag Pilistia eɗadppig amunu, Nug Pilistia ag eɗun uɗin, Israel ele baula ban hemananu ib oo neum. Ib oo ne, haen elab anam dayom. Amu Samuel bau dayeye, haen amu oh, Yawe Nug Pilistia eheɗ hattom.

¹⁴ Amu Pilistia ag Israel ele matu ban hena, aab okkai aɗit onilah Ekron, Gat ele, ag Israel dilag aab laala aab aɗit amu gamalahppa daappig amu, Pilistia ag aab amu oh aon gumadppig, amge gemu Israel Pilistia eɗadppig amunu, ag heeg, Pilistia ag aab amu oh eɗun, Israel gumadkkulagnu Israel eppegppa meppig. Israel ag ahilag wan oh haen amuppa aakku eɗun aoppig. Aoeg amu, Israel, Amo danab ele, ag oh maɗoɗ ele daappig.

¹⁵ Amu Samuel nug bau dayaya, nug Israel epeɗiatte ukke, mauhom. Nug bau dayaya, uɗat amu laa ii uuom.

¹⁶ Samuel nug aab onig Rama, appa dayom, amge maɗ oh nug Ramanu aha, Betel ukka, nakok dayowa aha, Gilgal ukka, nakok dayowa aha, Mispa ukka, nakok dayowa, appanu aha eɗua Rama gottom. Nug ukka, aab amu ohppa daya oiyaya, nug Israel dilag nai babaittom.

¹⁷ Nug oiyak amu oh ha mala amu, nug hanhan eɗua, Rama ukka dayom. Aɗinu? Am nug appag diig, nug laug aguppa dayom. Appa ele amu, nug Israel danab ah epeɗiattom. Amu Rama appa Samuel nug Yawenu qaɗab ele qeum.