1 Samuel 6 - Nobonob Baibel

Pilistia ag heeg, Tituanak Nainu Kunup eɗua, Israel wanppa ukkom

¹ Amu Yawenu Tituanak Nainu Kunup Pilistia dilag wanppa kalam eblaih aɗit ele aakku dayom.

² Nug anam kalam eblaih aɗit ele dayeye, Pilistia danab ag ahilkad mana mettak danab, amu ahilkad eman danab ele, ag ag onilagppa eeg, ag uɗieg, Pilistia danab ag appig. “Yawenu Tituanak Nainu Kunup amu, ig Tituanak Nainu Kunup amunu attem hekkunig? Ig aɗi keeke Tituanak Nainu Kunup amu ele mepput, nug eɗua, nuhig abenppa gokku?” aon appig.

³ Ag anam oɗ mattaeg amu, Pilistia dilag mana mettak danab, keeke doyaknu eman hak danab ele ag appig. “Ag Israel dilag Kayaknu Tituanak Nainu Kunup meppeg, nug eɗua nuhig abenppa gokkunu hekkulagnu hetteb dayeb amu, ag hamu aib meppeg ukkom. Iitta! Ag keeke laa, eheɗ haknu ofa daakkunu ele meppeg ukkaɗ! Ag anam heppeg amu, Kayak Nug heeb, ag eɗun ena daaglagtai. Ena daaglag dayeb amu, amuppa ag genab dooglag, Yawenu Tituanak Nainu Kunup ippa dayom amunu, Nug he, uug okkainab aqom,” aon appig.

⁴ Ag anam aeg, Pilistia danab ag appig. “Ig keeke, eheɗ haknu ofa daakkunu amu, ig attem keeke amu nuhigppa mepput gokku?” aon appig. Ag anam aeg amu, mana mettak danab, amu eman hak danab ele ag appig. “Pilistia danab okkai am tanig ele. Aria, uug beum ele amu, ag oh, king ahilkadppa ele, uug amu ag oh, ahilagppa laippu beum amunu, ag mamattin dottog tanig ele golppa hak, amu tog dottog tanig ele golppa hak ele, ag amu oh meppeg ukkaɗ!” aon appig.

⁵ Ag anam mattiona, ag tuɗidna appig. “Mamattin, amu tog ele ag wan imu heeg nauha auta aotte amunu, ag mamattin dottog, amu tog dottog ele hattona, ag Israel dilag Kayak mettaglag. Ag mettanna, amuppa ag Nug binag mekkulag. Ag anam binag meppeg amu, Nug heeb, ag, ahilkad kayak, amu wan ahilag ele, ag oh ena daaglagtai.

⁶ Ag Isip danab, Paro ele heppigbia aib heppig. Isip, Paro ele ag Kayaknu nai dim lamidmananu dabmak ahilag ɠagattag eppe, ag ii dim lamidppig amunu, Kayak uug naunab mattom. Matte, ag heeg, Israel ag ahan, atu laih gokkulagnu goppig.

⁷ Amunu amu, ag uɗatnu karis bau bappaidna, ag makau anig aɗit, nalti huh lattep ele, danab laa nug deɗ laa makau amu doɗnu duugppan tuqai duultippa ii qakkalatom ele amu, ag makau amu diiatna, doɗnu duugppan tuqai duultippa qakkalatona, ag uɗatnu karis amuppa qakkaglag, amge aa nalti diiatna, eɗun aɗppa maateg!” aon appig.

⁸ Ag anam awona, ag tuɗidna appig. “Ag nakuɗ diiatna, aɗppa maatppeg daapepeɗ, ag Yawenu Tituanak Nainu Kunup uɗatnu karis attan meig! Aria, ag keeke dottog golppa heppig ele, keeke amuam eheɗ haknu ofa bia, ag Yawe mettaglag amu, ag dottog amu aon, kunup nakok laappa inan, ag kunup amu Yawenu Tituanak Nainu Kunup heqo laih mewona, ag heppeg, makau ag uɗatnu karis amu eeɗpeɗ, Yawenu Tituanak Nainu Kunup am eɗua ukkaɗ!

⁹ Ag amu heppeg, makau aɗit amu aa uɗatnu karis Yawenu Tituanak Nainu Kunup ele, aa uɗatnu karis amu eeɗya, Yawenu Tituanak Nainu Kunup Israel wanppa, aab Betsemes appa tutukku gokkulahnu Betsemes gukkuidya gokkulah dayeb amu, amuppa ag dooglag, Yawe Nug he, uug naunab imu oh ihinigppa beum. Amge makau aa uɗatnu karis, Yawenu Tituanak Nainu Kunup ele appa tutukku aoya ii gokkulah dayeb amu, amuppa ig doognig: uug ihinigppa beum ele amu, amuam Yawe eppegppanu iitta. Uug amu oh ihinigppa hamu beum doognig,” aon appig.

¹⁰ Pilistia danab okkai ag anam aeg, Pilistia danab ag danab amu appig bia heppig. Ag makau anig aɗit diiatna, uɗatnu karisppa qakkalatppig, amge nalti amu, ag aɗppa inalateg daapiɗ.

¹¹ Pilistia danab ag anam hewona, ag Yawenu Tituanak Nainu Kunup uɗatnu karis attan mewona, ag kunup laa, kunup amuppa tog dottog, am mamattin dottog golppa hak ele inappig amu, ag kunup amu ele uɗatnu karis attan meppig.

¹² Ag kunup aɗit amu uɗatnu karis attan maatona, ag makau uhuqateg, makau aɗit aa Betsemes tutukku gokkulahnu ib aoya tepiɗ. Aa teyaya, aa qinonob gaayya gopiɗ. Aa laih naɗiap-ppa, o laih nanehppa ii gopiɗ. Iitta. Aa Betsemes tutukku gokkulahnu gopiɗ. Aa teeheh, Pilistia dilag king tanig ele ag aa dim lamatteg, Betsemes tomppa batappig.

¹³ Amu Betsemesnu danab ah ag oolnu noakppa wit aeg aoglagnu henana, ag appa daanna, wit ikki okkulna, qagmena aonna, ag neekkeg ukke, ag Tituanak Nainu Kunup anidna, ag oolag gamag ahom.

^14-15 Aria, makau aa goya teya, Betsemesnu danab laa onig Josua, aa nuhig wanppa teya, men naɗi dayom ele, aa men amu heqo laih, appa waya daapiɗ. Aa anam daaeheh, Lewi buɗub laa appa daappig ele, ag uɗin, Yawenu Tituanak Nainu Kunup uɗatnu karis attannu aon, men attan mewona, ag kunup laa, kunup amuppa keeke dottog daappig amu, ag kunup amu ele aon, men amuppa meppig. Ag anam heeg, appan danab ag karis amu oppateg ne ⌊heeg, mana mettak danab appa daappig ele⌋ ag manaknu ofa hena, Yawe medappig. Aria, deɗ amuppa Betsemesnu danab ag manaknu ofa, aria mana mettak laala ele henana, ⌊ag mana mettak danab mattaeg, ag⌋ manadna Yawe medappig.

¹⁶ Israel ag anam hena malaeg, Pilistia dilag king ag amu oh anttona, ag deɗ amuppa eɗun, aab onig Ekron goppig.

¹⁷ Aria, mamattin dottog golppa hak, dottog amu ag anen anen Pilistia dilag aab anen anen dilag Yawenu eheɗ haknu ofa daakkunu amu, aab amuam inam daappig. Laa am aab onig Asdotnu, laa am Gasanu, laa am Askelonnu, laa am Gatnu, amu laa am Ekronnu.

¹⁸ Aria, tog dottog golppa hak tanig ele amu, ag Pilistia dilag aab ɠagattag aɗ ele, aab naunau aab amu anen anen taliliadna daatteb, aab amu anen anen am Pilistia dilag danab okkai tanig ele waappa daappig amu, am aab amu ippunigtteb. Amu men naɗi Betsemesnu danab onig Josua, nuhig wanppa daatte, ag Yawenu Tituanak Nainu Kunup men amu attan meppig ele amu, men amu keeke imu oh genab beum amu, am at aakku dayom, gemu, ⌊nai imu yaak haenppa⌋ ele, am anam daatte.

¹⁹ Amu Betsemesnu danab laala ag Yawenu Tituanak Nainu Kunup ooppa neegppeg nokkunu kunup amunu ameg kolappig. Ag kolana, ag neekkeg, Tituanak Nainu Kunup ooppa ukkom amunu, Yawe he, danab 70 amu ag aakku mauhppig. Ag mauhppig amunu, appan danab ag Yawe Nug he, danab kuɗumnab mauhppig, ag diig amunu mahiak okkai heppig.

²⁰ Kobol amu beum amunu, Betsemesnu danab ag appig. “Aunnab nug Yawe noobppa daakkunu elele? Laa iitta! Nug am Kayak Oppiaawak Ele. Nug anam daatte amunu, nuhig Tituanak Nainu Kunup imu iguppa daakkunu am elele iitta, amge ig hepput, adebtai gokku?” aon appig.

²¹ Ag anam anana amu, ag nai meeg, Israel dilag aab laa onig Kiriat Jearim, ag danab appa daappig ele, ag nai meeg, ahilagppa ukkom. Ag nai meeg ukke, ag appig. “Pilistia danab ag heeg, Yawenu Tituanak Nainu Kunup eɗua, ihinigppa uɗiom amunu, ag ahan uɗin, ag maon ahilagppa ukkeg!” aon appig.