1 Samuel 5 - Nobonob Baibel

Tituanak Nainu Kunup Pilistia wanppa dayom

¹ Pilistia ag Kayaknu Tituanak Nainu Kunup Israel eppelagppanu aowona, ag Ebenisa appanu maon, ahilag aab laa onig Asdot, appa goppig.

² Ag maon gona, Asdot tena, ag Kayaknu Tituanak Nainu Kunup aon, ahilag kayak hambuppuak Dagon, ag nug laug ooppa, Dagon dottog heqo laihppa, appa meppig.

³ Ag meeg dayeye, wagɗe buttuanab Pilistia danab ag ahan, mettid lag ahilagppa gona, Dagon dottog Yawenu Tituanak Nainu Kunup noobppa na qa, iɗu wanppa noa dayeye anidppig. Ag amu anidna, ag Dagon dottog eɗun aon, nuhig abenppa meeg dayom.

⁴ Ag anam heeg dayeye ukke, deɗ amu uue, wagkkaɗe Pilistia danab ag ahan, eɗun mettid lag ahilagppa gona, Dagon dottog nug baula Yawenu Tituanak Nainu Kunup noobppa na qa, iɗu wanppa noa dayeye anidppig. Nug anam dayom anidppig, amge gemu amu, nug ikki, eppeg ele am qiin nena, piɗe piɗe daaegeg, nug beɗu laa oh aakkuib kunum dayom. Beɗu laa kunum dayom, amge nug ikki, amu nug eppeg ele od oɗe diigppan ad, ad amu attan daaegeg anadppig.

⁵ Ag Dagon dottog ikki, eppeg ele nuhig mettid lag Asdotnu od oɗe diigppanu ad attan daaegeg anadna, diig amunu Dagonnu mana mettak danab, am laa oh lag amuppa watteb ele amu, ag haen amuppa digmena, ag lag amunu od oɗe diigppan ad amu ii tabappig. Iitta. Ag ad amu tippalnan, lag amu ooppa noppig. Gemu, ⌊nai imu yaak haenppa⌋ ele, ag anamib hetteb.

⁶ Pilistia ag anam heeg ukke, Yawe Nug he, Asdot danab ah, am danab ah Asdot guguittak daappig ele, uug okkainab ahilagppa be, ag eheɗ nau baɗappig. Uug beum am, mamattin ag beɗulagppa beum.

⁷ Uug amu anam be, haen Asdot danab ag amu anidna, ag akka akka appig. “Israel dilag Kayak Nug he, uug imu oh ihinigppa baaba, Dagon, ihinig kayak, nuhigppa ele bette amunu, Kayaknu Tituanak Nainu Kunup nug ippa iinab daama!” aon appig.

⁸ Ag akka akka nai amu mattinna, ag heeg, Pilistia dilag okkai laa oh ag uɗieg, ag oɗ mattan appig. “Ig Israel dilag Kayaknu Tituanak Nainu Kunup imunu amu, ig amunu attem hekkunig?” aon appig. Ag anam aeg amu, Pilistia dilag okkai laa oh ag appig. “Ag heppeg, laa ag Israel dilag Kayaknu Tituanak Nainu Kunup maon, Gat ukkeg!” aon appig. Ag anam appig amunu, ag Israel dilag Kayaknu Tituanak Nainu Kunup maon, Gat gona, appa meppig.

⁹ Ag maon goppig, amge ag appa meppig dimppa amu, Yawe he, uug okkainab danab appanu ele, uug amu ahilagppa ele be, ag eheɗ baɗappig. Yawe he, aab okkai amunu danab ah bau, kaino ele, ag beɗulkadppa mamattin nau beum.

¹⁰ Uug amu beum amunu, Gad danab ag heeg, danab ag Kayaknu Tituanak Nainu Kunup amu maon, Ekron goppig, amge Ekron danab ah ag danab amu ag Kayaknu Tituanak Nainu Kunup amu maon uɗin, aab ooppa uɗiglagnu uɗieg anidna, ag eheɗ enana appig. “Ag Israel dilag Kayaknu Tituanak Nainu Kunup ig, ihinkad danab ah ele iqeeb mauhkkunignu maon uɗippig,” aon appig.

¹¹ Ag anam appig amunu, ag heeg, Pilistia danab okkai laa oh ag uɗin qagmeeg, ag ag amelagppa appig. “Ag heppeg, laa ag Israel dilag Kayaknu Tituanak Nainu Kunup imu maon ukkeg! Nug eɗua, nuhig abenppa ukkaɗ! Anam iitta amu, Nug heeb, ig oh mauhkkunig,” aon appig. Ag amu appignu diig am, Kayak Nug bu okkainab matta he, ag oolagppanu danab ah kuɗum ag mauhppig amunu, aab okkai amunu danab ah ag eheɗ baɗappig.

¹² Kuɗum ag mauhadna malappig, amge laa ag ii mauhppig amu, Kayak Nug he, mamattin nau ag beɗulagppa beum amunu, ag eheɗ gaappig. Ag gaaegeg, gayak amuam habppa teum.