1 Samuel 4 - Nobonob Baibel

¹ Yawe Nug anam heehe, Samuel Nug Kayak nai doya, nug mattieye, Israel oh dooppig. Aria, haen laa Israel, Pilistia ele ag ban hekkulagnu daappig amu, Israel ag ahan, aben laa onig Ebenisa, appa ag ahilag haen tutu dayaknu aab kalappig. Amu Pilistia dilag ban danab ag aab onig Apek, ag aab amu guguittak haen tutu dayaknu aab ahilag kalappig.

Pilistia ag Kayaknu Tituanak Nainu Kunup aoppig

² Aria, ag anam daanna, ban hekkulagnu henana, Pilistia dilag daup okkai ag daup ahilkad ag gona, aben aben daaglagnu aeg, ag gona daaegeg, ag Israel ele ban heppig. Ag oh ban heegeg, ban okkai, ɠagattag me, Pilistia ag Israel eɗadna, ag Israel dilag daup 4,000 anam aqaeg mauhadppig.

³ Ag mauheg, Israel dilag ban danab laa ag ii mauhppig ele amu, ag eɗun, haen tutu dayaknu aab kalak ahilagppa gona teppig. Ag teeg, amu Israel dilag ikki danab ag appig. “Aɗinu Yawe Nug he, Pilistia ag ig gemu eɗigppig?” aon appig. Ag anam awona amu, ag tuɗidna appig. “Yawenu Tituanak Nainu Kunup kontrak inak ele Silo appa daatte amu, ig amu aot uɗit, ig banppa maot gopput, Yawe Nug ehanikkeb, ig Pilistia dilag daup eɗadta, ig ag eppelagppa ii daamta,” aon appig.

⁴ Ag anam appig amunu, ag heeg, danab ag Silo gona, ag Kayaknu Tituanak Nainu Kunup kontrak inak ele, Yawe Nukka Ɠagattag Oh Ele, Nug appa sia king nuhigppa, engel okkai-kerubim aɗit dottolah gamalahppa daatte amu, ag amu aon uɗippig. Eli bekoɗ Hopni, Pinias ele, aa ele uɗipiɗ.

⁵ Ag gona, Yawenu Tituanak Nainu Kunup kontrak inak ele amu aon uɗiegeg, haen Israel danab ag Yawenu Tituanak Nainu Kunup kontrak inak ele haen tutu dayaknu aab kalak ahilagppa uɗiom anidna amu, ag huanaknab eppig amunu, wan aakku uɗalom.

⁶ Israel danab eegeg, Pilistia dilag daup ag daulagppa doon, ag akka akka nug oɗ medappig. “Diig aɗinu Hibru danab ag haen tutu dayaknu aab kalak ahilagppa daanna, huan etteb?” aon appig. Ag anam aeg, Yawenu Tituanak Nainu Kunup Israel dilag haen tutu dayaknu aab kalakppa uɗiom; ag nai amu uɗie doonna,

⁷ ag baɗappig. Ag baɗan ag inam appig. “Kayak laa nug Israel dilag haen tutu dayaknu aab kalakppa ag ehanadkkunu uɗiom amunu, ihinignu gadonnab gadon! Keeke laa imu bia deɗ laa iinab beum.

⁸ Gadonnab gadon! Uug nau aakku tonikkom daatte. Kayak uɗippig ele amu, ag am kayak ɠagattag ele. Ag heeg, uug naunab kuɗum Isip danab ah ele aqe ukke, atu taɗakppa gogppa te, ag nauhna autna aoppig. Aun nug kayak amu eppelagppanu awigkku? Laa iitta!” aon appig.

⁹ Ag anam akka akka mattiona amu, ag nai tuɗidna, akka akka inam ele madippig. “Amge ig Pilistia danab, ig ɠagattag daatu! Ig danabnab daatu! Iitta dayeb amu, Hibru danab umu ag eɗigppeg, ag ihinig maɗi nid daappig amu, ig amubia ahilag maɗi nid daagnig. Anam bemanu amu, ig danabnab daat, ig ban ɠagattag hetu!” aon appig.

¹⁰ Pilistia dilag daup ag akka akka anam awona, ag ban henana, ag Israel eɗatteg, Israel dilag daup ag oolna, laulkadppa goppig. Amge ag ban henana, Pilistia ag Israel dilag daup huanaknab aqappig. Ag aqaeg ukke ukke, Israel dilag daup 30,000 mauhppig.

¹¹ Pilistia ag Israel eɗadnana, ag Kayaknu Tituanak Nainu Kunup aonna, ag Eli bekoɗ Hopni, Pinias ele, ag aa ele aqateg mauhpiɗ.

Eli nug mauhom

¹² Aria, Pilistia ag Israel eɗatteg, deɗ amuppa Benyamin danab laa nug lamen nuhig pattiɗa, nug wan gappud igippa mewowa, nug ban hak abenppanu aha, qaietta Silo ukkom.

¹³ Danab amu nug qaiqaɗ ukka, Silo ta, nug ban abenppanu nai uug ele mattieye, danab ah dooppig. Aab amuppan danab ah ag doonna, ag eheɗ gaappig. Aria, Eli nug haen amuppa nug ib giginppa, nuhig dayaknu balalppa dayaya, ib neekkakka dayom. Aɗinu? Nug Kayaknu Tituanak Nainu Kunup eheɗ aomanu baɗaɗa dabmeum.

¹⁴ Amu danab nug ban abenppanu uɗiom ele amu, nug nai uug ele amu mattie, danab ah ag doon, huan gaaegeg, Eli doya, nug oɗ meum. “Muttub qak imu am, diig attem?” awa oɗ meum. Nug anam oɗ me, danab nai awa uɗiom ele, nug doya, nug paha Eli toppa ukkom.

¹⁵ Amu Eli nug am danab kainonab dayom; nuhig maɗ oh am 98, amu nug ameg ele gaɗuom amunu, nug neekkeb ukkeb, keeke laa anidkkunu elele iitta.

¹⁶ Aria, danab nug nai awa uɗiom ele nug paha Eli toppa uɗia, nug Eli amegppa aum. “Da deɗ imuppa, geha iikkunab banppanu uɗimi,” awa aum. Nug anam a amu, Eli nug aum. “O da bekkal, aɗinab beum? Na appe doyei!” awa aum.

¹⁷ Eli nug anam a, danab nug nai awa uɗiom ele amu, nug aum. “Pilistia dilag daup ag ban henana, ag Israel eɗadna aqaegeg, Israel huanaknab mauhadna, Israel ag aakku oolppig. Amu na begapaɗ Hopni, Pinias ele, aa ele mauhpiɗ, amu Pilistia ag Kayaknu Tituanak Nainu Kunup ele aoppig,” awa aum.

¹⁸ Danab amu nug anam mattiaya, haen nug Kayaknu Tituanak Nainu Kunupnu nai amu a, Eli nug Kayaknu mettid lagnu aɗ od guguittak dayaknu balal attan dayom amunu, nug nai amu doya, nug ukka, gomeppa na qe, nug duug ebehi qiie, nug mauhom. Nug am danab kainonab, titiɗak ele amunu, nug duug ebehi qiie, nug mauhom. Nug maɗ 40 Israel dilag okkai aakku dayom.

¹⁹ Amu Eli ahipa, Pinias wau, nug am oo ele oiyeye, nuhig haen miag doum amunu, nug Pilistia ag Kayaknu Tituanak Nainu Kunup aoppignu nai doyom, nug gamu mameg mauhomnu nai doyom, amu nug gamu mauhomnu nai ele doya, nug digma nid aokkunu guittak doyom. Nug guittak amu doya, nug nid awom, amge nug nid amu uug iitta ii awom. Iitta. Nug nid amu awawa, nug uug okkainab awom amunu,

²⁰ nug nid amu uug ele awawa, nug mauhkkunu heehe, ah laa ag nug nid aokkunu ehanidkkulagnu daappig ele amu, ag nug amegppa appig. “Na aib baɗame. Aɗinu? Na nid danab aakku aome,” aon appig. Ag anam appig, amge Pinias wau nug nob ii maama, nug ahilag nai ele dab-ii-mettom. Nug hamu doyom.

²¹ Nug nai amu hamu doya, nug, “Kayaknu binag amahlak oppiaawak ele Israel ooppanu ukkom,” anana, nug nid onig Ikabod ataɗom. Nug anam aumnu diig am, Pilistia ag Kayaknu Tituanak Nainu Kunup aon goppig, amu nug gamu, gamu mameg ele oh mauhpiɗ.

²² Nug nid onig Ikabod ataɗaɗa, nug aum. “Pilistia ag Kayaknu Tituanak Nainu Kunup aon goppig amunu, Kayaknu binag amahlak oppiaawak Israel ooppanu ukkom,” awa aum.