1 Samuel 30 - Nobonob Baibel

Dawit Amalek danab he nauhppig

¹ Akis Dawit amegppa nug nuhig ban danab huu ele eɗun gokkulagnu a, aakku ag eɗun deɗ aɗit gona, gona, deɗ ewamppa ag aab ag daattebppa teppig. Aab amu onig Siklak. Ag gona, aab ag daatteb ele amuppa teppig, amge haen ag ii daaegeg, Amalek ban danab huu ag uɗin, Juda wan laih ulah yau uɗitteppanu, appa ban henan, uɗin Siklak aabppa ele ban heppig. Ag banelag uɗin, ban hena, aab Siklak manaeg ewom.

² Amalek ag aab amu mainna, ag appanu ah, laala aun aab amuppa daappig ele amu, ag amu oh aɗualadna, diin goppig. Laala diin goppig, amu oolagppanu kaino laala ele diin goppig; laala ag am danab bau. Ag danab ah oh diin goppig, laa uueg ii dayom. Laa amu, ag danab laippu laa ii qeeg mauhom. Iitta. Ag aɗualadna, oh diin goppig.

³ Aria, Amalek ag anam heeg, dimppa Dawit nug nuhikkud danab ele ag uɗin, Siklak aabppa teppig. Tena, aab amu oh manaeg ewom anidppig; laa amu Amalek ag ah ahilkad oh, bekkalkad, aɗelkad ele oh aɗualadna, diin goppig anidppig.

⁴ Ag keeke oh anam daye anidna, Dawit, nuhig huu ele ag amunu eheɗ qanaegeg ukka ukka, ebehilag oh bodoettom.

⁵ Amalek ag danab dilag ah amu oh aɗualadppig, amubia aakkuib ag Dawit wauuɗ aɗit, amu ele oh aɗalatppig. Ah laa am Ahinoam, nug am Jesril ah; ah laa am Abigel, nug am Karmel ted danab Nabal wau, amge Nabal mauhe, ah amu qab ma dayeye, Dawit nug awom.

⁶ Dawitnu danab ag Amalek heppig anidna, ag baelkadppanu dabmena, ag oolagppa uug naunab dooppig amunu, ag menppa Dawit makkuɗppeg mauhkkunu madippig. Ag madippig amunu, Dawit nug amunu uug nau doyom, amge nug Yawe, nuhig Kayak, nug Nug toppanu ɠagattag mattia awom.

⁷ Dawit nug anam haaha, nug Ahimelek bekka, Abiatar, nug am mana mettak danab, nug inam amegppa aum. “Lamen enanag-epod aon uɗie!” awa aum. Nug anam a, Abiatar nug awa uɗiom.

⁸ Abiatar nug anam he amu, Dawit nug Yawe oɗ metta aum. “Da ag ele ban hekkunignu da ban danab amu dim lamadkkul, o iitta? Da ukke amu, da ag gumatte wakkul, o iitta?” Dawit nug Yawe anam oɗ mettom. Nug Yawe oɗ mette, Yawe Nug nob ma, amegppa aum. “Ao, na ag dim lamatte! Aɗinu? Na dim lamadna gona, geha na gona, ag gumadna wana, na danab ah aɗualadna diin goppig amu oh diiadkkut.” Yawe Nug anam aum.

^9-10 Yawe Nug a, Dawit nug danab 600 nug ele daatteb ele amu ag oh ahan, danab amu dim lamadna gona, oolnu noak laappa teppig; oolnu noak amu onig Besor. Ag gona, appa tena, danab laala ebqak ahilag 200, ahilag ɠagattag amu iitta me, ag oolnu noak amu mataɗkkulagnu elele iittanu, ag aguppa daappig. Ag daappig, amge Dawit, nug danab 400 laa amu ele, ag goppig; ag kekeɗ ahilkad amu dim lamadna goppig.

¹¹ Ag gonana, Dawitnu ban danab laala ag Isip nid bau laa, nug wanppa niieye anidppig. Anidna, ag aon, Dawit toppa gona, ag ee, le ele nid bau amu medappig.

¹² Ee ag medappig am, grep meu qaɗaiettak batappatak aɗit, aria ad fig meu qaɗaiettak batappatak laih ele medappig. Ag ee amu mettaeg, nug ee amu lawowa, nug eɗua ɠagattag nakok awom. Nug eɗua, ena dayomnu diig am, nug deɗ ewam, tuqan ewam ele ee, le ele laa ii laum, amuppa nug ɠagattag nuhig oh iitta meum.

¹³ Nid bau nug ee lana, eɗua nakok ɠagattag awe, amu Dawit nug nug oɗ metta, amegppa aum. “Danab okkai nahip am aun? Na aab adeppan danab?” Dawit nug anam nid bau oɗ mette amu, nid bau nug nob ma aum. “Da am Isip danab,” awa aum. “Da am Amalek danab laanu begbeg maɗi nid. Da oɗe memi amunu, danab okkai dahil nug da uuiɗa ukke, da deɗ ewam iguppa daami,” awa aum.

¹⁴ Nid bau nug anam anana, nug nai tuɗitta Dawit amegppa aum. “Dahilnu amu anam, amge nakok matu bia danab naɗi dahil, nuhikkud huu amu ele ig Juda wan laih yau uɗitteppanu aben Keret daattebppa, ig gota, appa teut, danab amu ele ban heta, keeke ahilag aomut. Aot am ig eɗut, Juda wan laih yau uɗitteppanu Kalep alakkud daatteb, aben amuppa teut, ag ele ban heta, keeke ahilag amu oh akkat gomut. Gota, aab Siklak manaut ewom,” awa aum.

¹⁵ Nug anam a amu, Dawit nug oɗ mettom. “Na da omaiɗna, ban danab ameg amu daatteppa appa gokkutnu elelete?” Dawit nug anam a, danab amu nug nob ma, amegppa aum. “Na nai nahip Kayak onigppa ɠagattag qettan, na da ii iuppe mauhkkulnu, na eɗun, da danab okkai dahil eppegppa ele ii meiɗmananu akkut amu, da geha na omaitte gokkul,” awa aum.

¹⁶ Isip danab nug anam a, ⌊Dawit nug amunu ena a,⌋ Isip nid bau nug Dawit ⌊nuhikkud ban danab 400 ele⌋ oh omalatte, ag laih Amalek daattebppa goppig. Nug ag diia ukke, ag Amalek anadppig; ag wan laih naɗi amuppa mauhnoak daan daaeg ukke, daanna ee lanana, le lanana, gamag ahak naɗi henan daappig. Aɗinu? Ag Pilistia dilag wanppa keeke kuɗum awon; Juda wanppa ele keeke kuɗum aoppig.

¹⁷ Dawit nug nuhig huu ele ag Amalek anadna daaeg ukke, haɗaedette ag Amalek aqaglagnu ban digmeppig. Ag Amalek ele ban heegeg ukke, tueb me, ag ban malappig. Ag ban anam hena, Amalek danab ameg naɗi daappig, ag amu oh aqaeg mauhppig; Amalek nid danab bau 400 aakkuib ag kamel attan oolna goppig.

¹⁸ Dawit nug nuhikkud ban danab ele ag ban hewona, Dawit nug nuhikkud ban danab ele, ag keeke oh Amalek aon goppig amu, ag eɗun akkan, amu Dawit nug wauuɗ aɗit, amu ele eɗua diiatom.

¹⁹ Keeke laa ii qettoɗom. Iitta. Ag danab, ah, nid bau, amu oh diin, kaino ele oh diin, nid naunau, nid danab, nid ahin amu oh diin, keeke laala oh ele oh ag eɗun aoppig. Dawit, nuhikkud danab ele, ag keeke oh eɗun aɗadna, akkan uɗippig.

²⁰ Ag keeke amu oh Amalek dilagppanu eɗun aoppig. Ag aon, ag makau, sipsip ele Amalek dilag, ag amu ele agappig. Ag doɗ amu akkan, Dawit, nug nuhikkud ban danab ag heeg, doɗ ag anuqna ukkaegeg, ban danab ag appig, “Keeke imu ig banppa aomut amu, amuam Dawitnu.” Ban danab ag anam appig.

²¹ Ag anam hena gona, danab 200 ibppa beɗulag gai-iitta me, ag Dawit dim lamidkkulagnu elele iittanu daappig amu, ag amu daappigppa gukkuidna teppig. Aben amuam oolnu noak onig Besor. Ag gona, danab 200 daappig, aben amu guguittegeg, danab 200 amu ag Dawit, nuhikkud danab ele uɗippeg, ibppa nug uɗa tekkulagnu uɗippig. Ag uɗiegeg, Dawit nug ukka, ag gumatta wana, ag humatta “Amun ena,” aum.

²² Dawit nug anam heum, amge nuhikkud danab amu oolagppa danab laib laib laa ag danab nau, haen kuɗum ag heeg uug bette, danab amu ag appig. “Danab amu ag ig ele banppa ii gomut amunu, ig ban heta, keeke aomut, ig amunu laih ag ii mattamta,” appig. “Keeke imu aakkuib ag aoglag; anen anen ag ahilkad ah, nid naunau ele diiadna, ag diin ukkeg!” appig.

²³ Ag anam appig, amge Dawit nug amelagppa aum. “O awai aman aɗi, keeke Yawe Nug ig mekkom amu, ag anam aib heppig. Nug ig dabmegekke, ig eheɗ laa ii aomut. Laa amu, Nug ig ehanikke, kekeɗ ag ig eheɗ heigkkulagnu uɗippig, amge ig ag eɗadmut.

²⁴ Danab laa ahilag nai amunu ena dookkunu, am laa iitta. Ag aakkud doon, dabmak ena aweg! Ig keeke oh elele otit, danab oh eleleppa mattagnig. Aɗinu? Aun nug dayaya, nug keeke oh ena atognoa, dabmettom, Nug geha danab laa banppa ukkom ele, nug keeke aokku, anamib nug ele aokku.” Dawit nug anam aum.

²⁵ Dawit nug anam a, nai amu ɗo ba dayom. Ɗo ba dayom amunu, haen amuppa Israel wanppa ɗo amu ba dayeye uɗie uɗie, gemu ele daatte.

²⁶ Aria, Dawit nug nuhikkud danab ele ag eɗun, Siklak goppig. Ag gona appa daanna, amu Dawit nug keeke oh Amalek dilag awom am, laih otia, Juda dilag ikki danab, ag Dawitnu oolag dayom, ag nug ele nug layam daappig amu, nug ag matta, panie ukkom. Nug keeke pania, aoglagnu me ugekke, nai imu ele me ukkom. “Keeke imuam da ahilag daakkun hamu madattem; keeke imu da Yawenu kekeɗ eppelagppanu aomi.” Dawit nug keeke me ugekke, nai amu ele me ukkom.

^27-31 Aab o aben anen anen, Dawit keeke me, appa ukkom ele, amu onilag am Betel, Ramot Negebnu, Jatir, Aroer, Sipmot, Estemoa, Rakal, amu Jeramel buɗub dilag aab, Ken buɗub dilag aab, Horma, Borasan, Atak, amu Hebron ele. Amu nug keeke aben laa oh nug nuhikkud danab ele ag anukka aguppa nakok nakok oippig ele amu, nug keeke appa ele me ukkom.