1 Samuel 3 - Nobonob Baibel

Yawe Nug Samuel gumitta neum

¹ Aria, nid danab Samuel nug Eli waappa dayaya, nug Yawe noobppa Yawenu ɗo maɗoɗ uɗat heum. Amu haen amuppa amu, Yawe Nug deɗ laippu laippuib he, danab laala ag tul niinna, ag nuhig nai ib amuppa dooppig. Nug haen kuɗum anam ii heum; haen laippu laippuib heum amunu, haen amuppa Yawe Nug nai haen kuɗum miag ii atiom.

² Anam daye amu, deɗ laa tuqan Eli, nug ameg nauhkkunu heehe, nug pehettak neegkkunu elele iitta, nug niiak aben nuhigppa niiom.

³ Nug nuhig abenppa anam niie, Yawenu mettid haknu peh lakka appa lam ewawa dayeye, Samuel nug ele lag amuppa niiom. Kayaknu tituanak nainu kunup ele amuppa dayom.

⁴ Nug anam niieye, Yawe nug Samuel onigppa eum. Yawe Nug anam e, Samuel nug, “Da iikku daattem!” anana,

⁵ nug aha, paha Eli niiomppa ukka, nug Eli amegppa aum. “Na da onilppa e doomi, aakku da iikku daattem,” awa aum. Nug anam a, Eli nug doya, nug aum. “Iitta. Da na oninppa ii emi amunu, na eɗun gona niie!” awa aum. Nug anam a amu, Samuel nug eɗua ukka, nuhig niiak balalppa niiom.

⁶ Samuel nug balalppa niieye, Yawe Nug baula onigppa ewa, “Samuel” ana ewa eum. Nug anam onigppa e, Samuel nug aha, Eli niiomppa ukka, “Na da onilppa e doomi, aakku da iikku daattem,” awa aum. Nug anam a, Eli nug aum. “O da bekkal, da na oninppa ii emi. Na eɗun gona, niie!” awa aum.

⁷ Kobol amu beumnu diig am, Samuel nug haen amuppa nug Yawe baag ii doyom. Yawe Nug haen amuppaib digma, Samuel amegppa nai mattiom. Anukka Nug anam laa ii heum.

⁸ Aria, Samuel nug eɗua ukka, niiak abenppa niieye, Yawe nug baula Samuel onigppa e, Samuel nug eɗua, Eli niiomppa ukka, nug Eli amegppa, “Na da onilppa e doomi, aakku da iikku daattem,” awa aum. Nug anam a, Eli nug aakku doyom, Yawe Nug nid amu onigppa eum.

⁹ Eli nug anam doya, nug Samuel amegppa aum. “Na eɗun, niiak aben nahip-ppa gona, na balalppa niippe, laa Nug na oninppa ette ele amu, Nug baula na oninppa eeb amu, na inam a! ‘O Yawe, nahip maɗi nid da, da nai nahip dookkulnu iikku daattem amunu, na aɗi akkutnu hettem amu, na akkutnu ool daatte.’ Na anam aon a!” awa aum. Nug anam aum amunu, Samuel nug eɗua ukka, niiak aben nuhigppa, nuhig balalppa niiom.

¹⁰ Nug anam niieye, Yawe Nug uɗia, Samuel niiomppa guguitta hibaitta dayaya, nug haen laa oh Samuel onigppa eum bia baula ewa “Samuel! Samuel!” aum. Nug anam e amu, Samuel nug aum. “Nahip maɗi nid da, da nai dookkulnu iikku daattem amunu, na aɗi akkutnu hettem amu, na anam akkutnu ool daatte,” awa aum.

¹¹ Samuel nug anam mattia male, Yawe Nug aum. “Antte! Da Israel danab ah oolagppa kobol laa hekkulnu hettem amu, da amu heppi, Israel danab ah ag amu anidna, ag eheɗ ottaikkulag.

¹² Da kobol amu hekkul ele am inam. Da uug aɗi aɗi Eli, nug buɗub ele, da ag uug madakkulnu ami amu, da amu ohnab hekkul. Da laippu laa iinab tippalpa.

¹³ Ge! Eli bekoɗ aa eheɗ nau heyaya, da noolppa, amu Israel danab noolagppa ele aa danab nau daaeheh, Eli doyom, amge nug aa ii hemayanu aa daulah elele ii batom amunu, da nug amegppa, da nug, amu nug buɗub dilagnu ele oh epeɗiatten, uug madakkulnu ami.

¹⁴ Eli, amu nug bekoɗ ele ag eheɗ anam heppig amunu, da Eli, nug buɗub ele amelagppa nai ɠagattag qetten, inam ami. ‘Eli, amu nug buɗub ele dilagnu, ag mana mettak uɗat aɗi hekkulag, o ag aɗi ofa da meɗaglag amu, amuppa ag uug ahilagppa bekkunu ami amu, ag heppeg ii iitta mema. Iittanab iitta!’ ” Yawe Nug Samuel amegppa anam aum.

¹⁵ Yawe Nug anam mattia male, Samuel nug balalppa daye ukke, wagkkaɗe nug aha, nug Yawe laugnu od matulom. Nug anam heum, amge nug Yawe tuleglegppa nai mattiom, Samuel nug nai amu Eli amegppa akkunu baɗom.

¹⁶ Samuel nug anam heum, amge Eli nug onigppa ewa, “O da bekkal Samuel,” awa aum. Nug ewa, anam aum amu, Samuel nug aum. “Da iikku daattem,” awa aum.

¹⁷ Samuel nug anam a amu, Eli nug oɗ mettom. “Kayak Nug na amenppa aɗi aum? Na nai amu aib lokkumme. Na nai amu nakok laa lokkumkkut dayeb amu, Kayak Nug bu okkainab medakkunu ool daatte,” awa aum.

¹⁸ Eli nug anam aum amunu, Samuel nug keeke amu ohnab mattie doyom. Nug nai huppu nakok laa ii lokkumom. Nug amu mattie, Eli nug doya, nug aum. “Nug am Yawe. Aɗi kobol Nug noobppa am ena amu, nug anamib haɗ!” awa aum.

¹⁹ Aria, Yawe Nug Samuel, nuhigppa dayeye, Samuel nug okkai meeme, Yawe he, Samuel nug aɗi aum amu, nai amuam genab meu oum. Nai amu hamu laa ii qettoɗom.

²⁰ Anam dayom amunu, Israel danab ah oh, aab onig Dan, appanu ukka ukka, Berseba aabppa batak amu, ag Samuel nug genab Yawenu propet dayom dooppig.

²¹ Amu Yawe Nug tuɗitta, Silo appa Samuel gumitta naana, Nug Samuel amegppa nai mattiom amunu amuppa, Nug Samuel Nug diig ippunittom.