1 Samuel 28 - Nobonob Baibel

Saul nug ah mauhak ouɗilag ele nai maditteb Endo dayom anidkkunu ukkom

¹ Nakok dimppa, Pilistia danab okkai ag ahilkad ban danab goppeg, Israel ele ban hekkulagnu onilagppa eppig. Pilistia dilag danab okkai ag anam heegeg, am Akis nug Dawit amegppa aum. “Na imu matu doome bia doottem, amge da na amenppa attem. Haen da dahilad ban danab ele banppa gottem amu, ag ig ele oh gokkunig. Na amu doottemte?” awa oɗ mettom.

² Akis nug Dawit anam oɗ mette, Dawit nug nob ma aum. “Da am nahip maɗi nid, amu keeke da hekkul elele amu, na geha anidkkut,” awa aum. Dawit nug anam a, Akis nug aum. “Amu ena. Geha da heppi, na dahil atognoak danab bekkut, na geha haen oh anamib daakkut,” awa aum.

³ Haen matu Samuel mauhe, Israel ag nuhignu qanana, appag diigppa Rama boumppig. ⌊Amge haen Samuel ii mauhom dayeye,⌋ Saul nug he, mauhak ele gamag danab, amu mauhak ele mattiak danab ag Israel wanppa ii daappig.

⁴ Pilistia ag Israel ele ban hekkulag heppig amunu, ag qagmena, ahan uɗin, aab okkai Sunem guguittak haen tutu dayaknu aab kalappig. Ag uɗin, aab aoegeg, Saul nug Israel ban danab e uɗieg, qagmaatte, Gilboa qaukoppa haen tutu dayaknu aab kalappig.

⁵ Pilistia, Israel ele ahilah ban danab ameg aɗit ag anam heegeg, haen Saul nug Pilistia ban danab amu anatta amu, nug eheɗ nau baɗom.

⁶ Saul nug anam baɗa haaha, geha nug attem hekkunu Yawe oɗ mettom, amge oɗmak amu nob mak amu, Yawe Nug tul niiakppa, o Urim, ⌊Tumim⌋ eleppa, o propet laa oɗeppa oɗmak nob laa ii mettom. Iittanab iitta.

⁷ Saul nug Yawe oɗmak nuhig ii nob me antta, nuhig ehanittak amelagppa aum. “Da ukke, geha keeke aɗi bekkunu amu oɗ medakkulnu, ag gona, ah laa mauhak ouɗilag ele nai maditte, ag nug mattin anidna, ag eɗun uɗin, da amelppa appeg, geha da ukken, ah amu keeke aɗi bekkunu daatte amu, da nug amunu oɗ medakkul,” awa aum. Saul nug anam nuhig ehanittak amelagppa a, ag nob mena amegppa appig. “Laa Endor appa daatte,” aon appig.

⁸ Ag Saul amegppa aeg, Saul nug king lamen ii takkom. Iitta. Nug lamen laa awa takkom. Lamen amuam lamen iɗu laa. Amu danab ag anidna, ag nug ii doomna; ag, “Umu am Saul,” ii amana. Nug lamen amu takke, nuhig ehanittak danab aɗit ele ag gona, tuqan ah amu gumidna teppig. Ag gona tena, Saul nug ah amu amegppa inam aum. “Da mauhak laa dottog ele nai mattignihnu ool daatte amunu, na heppe, geha danab laa mauhom, da nug onig na amenppa appi dookkut amu, na heppe nug dottog bekkunu oɗ medattem,” awa aum.

⁹ Saul nug anam aum, amge ah nug inam aum. “Amu Saul keeke heum amu, na iite doottem. Saul nug he, danab ah ag mauhak ele gamag danab, o ag mauhak ele mattiak danab amu, ag Israel wanppa ii daatteb. Aɗinu na da mauhkkulnu pelem mettem?” anam aum.

¹⁰ Ah nug anam a amu, Saul nug nai nuhig Yawe onigppa ɠagattag qetta, ah amegppa inam aum. “Genabnab genab, Yawe bauklel daatte, genab amubia na nai dahil dim lamidppe amu, geha nob mettak nau laa nahip-ppa ii bema. Iitta genab,” awa aum.

¹¹ Saul nug anam a, ah nug ⌊hekkunu elele⌋ doya, nug Saul amegppa aum. “Da appi, geha aun bekkunu oot daatte?” awa aum. Nug anam a amu, Saul nug amegppa nob ma aum. “Na heppe, Samuel bekkunu ool daatte,” awa aum.

¹² Saul nug anam a, ah Samuel onigppa e beum, amu haen ah nug Samuel antta, nug Saul am Saul doyom, amu nug eheɗ nau ewa, amegppa aum. “Aɗinu na da buppuiɗme? Na Saul!” awa aum.

¹³ Ah nug anam he, King Saul nug amegppa aum. “Na aib baɗame! Na aɗi keeke anidme?” Nug anam a, ah nug aum, “Da kayak laa, nug wanppanu be anidttem,” awa aum.

¹⁴ Ah nug anam a amu, Saul nug oɗ mettom. “Nug iɗu attemu anidttem?” Saul anam a amu, ah nug aum. “Nug bette am, nug danab kaino laa, nug lamen elab takkom bette.” Ah nug anam a, aria Saul nug doyom, nug am Samuel. Saul nug amu doya, nug gateg qaun o, gomela, iɗu wanppa meum.

¹⁵ Anam dayeye, Samuel nug Saul oɗ mettom. “Aɗinu na dahil dayak okkulna, da onilppa e, da eɗue uɗimi,” awa oɗ mettom. Nug anam oɗ me, Saul nug nob ma aum. “Da uug nau doottem. Pilistia ag da ele ban hekkunignu uɗippig, amu Kayak Nug da dimeɗa, nug propet oɗelagppa nai laa ii meɗatte, tul niiakppa ele iitta. Anam daye amunu, da na oninppa emi. Geha da attem hekkul amu, na appe dookkul,” awa aum.

¹⁶ Saul nug anam a amu, Samuel aum. “Yawe Nug na dimetta, na kekeɗ mettom, am aɗinu da na ehanidkkulnu onilppa eme?

¹⁷ Yawe Nug da oɗelppa geha keeke nahip-ppa aɗi bekkunu aum amu, Nug aakku he beum. Danab ah gumattaknu ehah amu, na aɗitta, laa na guguittom daatte, am Dawit, nug mettom.

¹⁸ Yawe Nug Amalek dilagnu oppoɗi bak okkai doya, Nug na gona, ahilagppa aɗi hekkutnu na amenppa aum, amge na nai amu tippalna, Nug aum bia na ii heme amunu, Yawe Nug gemu danab ah gumaknu ehah na eppenppanu aakku aɗidtte.

¹⁹ Yawe Nug uuitteb, geha na Pilistia eppelagppa daakkut. Amu haen na ag eppelagppa wappe, geha Israel ameg oh ele wakkulag. Butti Pilistia ag na, na begapad ele aqappeg, na ag ele uɗippeg, da ele daagnig. Yawe Nug uuatteb, Pilistia ag geha Israel oh eɗadkkulag.” Samuel nug anam aum.

²⁰ Deɗ amuppa Saul nug ee laa ii laum amunu, nug beɗu ɠagattag iitta, amu haen nug Samuel nai aum, nug nai amu doya, nug amunu huan baɗa haaha, nug na qa, wanppa niiom.

²¹ Saul nug anam he, ah nug gumitta wana, Saul nug huan eheɗ baɗeɗe antta, ah nug amegppa aum. “Danab okkai, da am maɗi ah nahip, na da imu hekkulnu oɗ meɗame amu, da hemi. Da dakka dahilnu dabmein, ‘Da nug attenu ii hepa,’ ii dabmemi. Iitta. Da mauhkkulnu ib oɗeppa dayeye, da na ame bia anam hemi.

²² Da, nahip maɗi ah, da ⌊na ehanidkkulnu hemi amunu,⌋ gemu na geha dahil nai dookkutnu ool daatte. Amu na ahan gokkutnu ɠagattag aokkutnu amu, na appe, geha da ee babaitte medakkul,” awa aum.

²³ Ah nug anam aum, amge Saul nug aum. “Iitta. Da ee ii lapa.” Nug anam aum, amge nuhig ehanittak danab aɗit aa ahnu nai ɠagattag qettaeh, Saul nug ahilag nai doya, Saul nug aha, niiak balalppa dayom.

²⁴ Saul nug anam he, ah nug paha makau nag nug begittom, ena ittag ele amu, nug tuqe ne, battiom. Amu nug plaua ele kabolia, bret yis iitta manom.

²⁵ Ah nug ee ha mala, nug ee amu awa wana, Saul, nuhikuɗ danab aɗit ele matte lappig. Ag ee lawona, tuqan amuppaib ag eɗun goppig.