1 Samuel 27 - Nobonob Baibel

Dawit nug Pilistia ele daappig

¹ Dawit, Saul ele aa anam daapiɗ, amge deɗ laa Dawit nug nukka ooppa dabmak awa, inam dabmeum. “Da inamib daakkul amu, haen laa Saul nug geha da iweb mauhkkul. Amu ii bemanu da ahen, Pilistia wanppa ukken daakkul. Da anam heppi, geha Saul nug ippa Israel wanppa da mattiɗkkunu bahi yeeb, da Saul eppegppa ii wapa,” dabmeum.

² Dawit nug anam dabmeum amunu, nug, am nuhikkud 600 danab ele ag ahan, Pilistia dilag king laa onig Akis, nug Maok bekka, nug aab Gatnu king, ag nug gumidna goppig,

³ Dawit nug nuhikkud danab ele gona gumidna tena ⌊Dawit nug Akis oɗ mette, nug ena awa a,⌋ amu Dawit nug nuhikkud danab ag baelkadppa ele oh Gat aabppa, Akis daatteppa daappig. Dawit wauuɗ aɗit, laa Ahinoam, nug am Jesril ah, laa am Abigel, nug Karmel ah, aa ele oh Dawit ele Gad daappig. Abigel nug am anukka Nabal wau dayom, amge Nabal mauhe, Abigel nug hamu dayeye, Dawit awom.

⁴ Dawit aakku Gat dayeye, laa ag amunu Saul amegppa aeg doya, nug baula Dawit mattia aɗakkunu ii oiyom, iitta.

⁵ Anam daye ukke, Dawit nug Akis oɗ metta aum. “Da nahip maɗi nid amu, da aab imuppa daappi, na da ehaniɗak henana, na amunu uug doomnanu, nahip dabmakppa da am danab ena doottem dayeb amu, na aab laa, aab amu piɗe daatte, aab okkai daatte guguittak ii daatte, na laa amubia meɗappe, da daakkulnu ool daatte. Da nahip aab okkai imuppa daakkulnu ii daatte bia,” awa aum.

⁶ Dawit nug anam a, deɗ amuppaib Akis nug aab laa onig Siklak Dawit mettom. Nug aab Siklak Dawit mette, haen amu dimppa aab Siklak amu baula Pilistia dilag aab ii dayom. Iitta. Aab amuam haen amu dimppa uɗiak Juda king dilag dayom.

⁷ Am Dawit nug Pilistia wanppa maɗ laippu kalam waɗele dayom.

⁸ Dawit nug Pilistia wanppa dayeye, nug nuhikkud danab ele ag deɗ laala ahan ukkaeg, Gesur danab, Girsi danab, am Amalek danab ele ban hedappig. Danab huu ewam amu, ag anukkanu digmena, wan Sur aabppanu ukka, Isip dilag wan tom batak daanna oidppig.

⁹ Aria haen Dawit nug nuhikkud danab ele ag banelag ukkaeg, danab huu ewam amu laih adekkunu ele ban henana, ag danab ah oh aqatteg mauhadttappig. Laippu laa uueg ii dayom, amge sipsip, makau, kamel, donki, lamen keeke, ag keeke amu ag aon gona, eɗun Akis toppa goppig.

¹⁰ Haen ag Akis gumidna ukkaeg, Akis nug Dawit oɗ meedttom. “Na gemu gona, adeppa ban heme?” Nug Dawit anam oɗ mette, Dawit nug inam amegppa attom. “Da Juda dilag wan maha yau uɗitteppanu gomi.” Nug anam attom, o, “Da wan maha laa yau uɗitteppanu daatte, aab ikki Jeramel dilag wanppa gowoya uɗimi.” Nug anam attom. O, “Da Juda dilag wan, maha yau uɗitteppanu daatte, aab ikki Ken dilag wanppa gomi uɗimi.” Dawit nug anam attom.

¹¹ Dawit nug haen oh anam Akis amegppa attom, amge danab ameg Dawit nug ag banelag ele goppig, amu oolagppanu laa nug oola, Gat ukka, Akis amegppa ⌊aunnab ag ele ban heppig⌋ amanu amu, Dawit nug danab ah nug ele ban hetteb ele, nug ag oh aqe mauhtteb. Nug laippu laa uue, bau ii daatte. Haen Dawit nug Pilistia wanppa dayom, nug anamib hettom.

¹² Dawit nug anam hettom amunu, Akis nug Dawitnu ooppa genab doya, nug am danab nai genabib atte, nug am da layalnab doyom. Nug anam doyaya amu, nug ooppa am inam attom, “Dawit nug heehe, nug laikkud, Israel, ag nuhignu dabmak eheɗ nau dootteb amunu, nug geha hanhan dahil maɗi nid daakku.” Akis nug ooppa nukka nuhignu anam attom.