1 Samuel 26 - Nobonob Baibel

Dawit nug baula Saul qeeb mauhkkunu ib antta, ii heum

¹ ⌊Dawit nug anam he, haen laappa amu⌋ Sip danab laala ag ahan, Gibea aabppa gona, Saul anidna, amegppa appig. “Dawit nug qauko nakok Hakila, qauko amuam Jesimonnu ulah yau uɗitteppanu daatte amu, nug appa lokkuma iite daatte?” aon appig.

² Ag Saul amegppa anam aeg, aakku Saul nug ban danab 3,000, ban danab ameg amu ag am Israel ban danab oolagppanu enaib amu, Saul nug ban danab amu diie, nug ag ele atu taɗak onig Sip, appa Dawit mattiglagnu goppig.

³ Saul nug nuhikkud danab ele ag nena gona, qauko nakok Hakila appa, Saul nug ib Hakila tette, amu daugppa haen tutu dayaknu aab nuhig kalom. Hakila am laih Jesimonnu yau uɗitteppanu daatte. Saul nug nuhikkud danab ele ag uɗin, haen tutu dayaknu aab kalaeg, Dawit nug nuhikkud danab ele ag atu taɗakppa daanna, amu Dawit Saul uɗiom doya,

⁴ nug lokkumakppa atu italaknu danab laala maatte, ag gona oippig. Ag gona anidppig, am genabnab Saul nug teum, Hakila daatte anidppig. ⌊Ag anam anidna, ag eɗun gona, Dawit amegppa amunu appig.⌋

⁵ Ag Dawit amegppa aeg, Dawit nug aha ukka, Saul haen tutu dayaknu aab kalom amu, nug aab amu guguitta ta, nug Saul, amu nuhikkud ban daup ikki anuqak Apner, nug am Ner bekka, nug aa niittep aben anttom. Saul nug aab amu gamagppanab niie, nuhikkud ban danab ag nug talilidna niiegeg anttom.

⁶ Dawit nug ukka ta, nug Saul, nuhikkud ban danab ele ag attem niitteb am anttom amunu, nug Hit danab onig Ahimelek, amu Seruia bekka Abisai, Joap amag amu, nug aa amelahppa aum. “Aa oolahppa, aun nug geha da ele haen tutu dayaknu aab kalak imuppa goɗa, Saul gumidɗa wakkunih?” awa oɗ matom. Nug anam oɗ me, Abisai nug nob ma aum. “Da geha na ele oh gokkunih,” awa aum.

⁷ Abisai nug anam a, tuqan amuppa Dawit nug Abisai ele aa haen tutu dayaknu aab kalak amu ooppa noya, Saul nug aab gamagppa niiaya, nuhig ban gudkkud am nug ikki guguittak qappe dayom. Apner nug ban danab laala ele, ag Saul talilidna niiegeg anadpiɗ.

⁸ Amu Abisai nug Dawit amegppa aum. “Gemu Kayak nug nahip kekeɗ na eppenppa meum. Na appe, da geha haen laippuib ban imuppa yaappi, ban aeg ukka, wan ele yeeb, nug mauhkku. Da haen aɗit ii yaapa. Iitta,” awa aum.

⁹ Abisai nug anam aum, amge Dawit nug nob ma aum. “Na nug aib qeppe mauhom. Aɗinu? Yawe Nug Saul, Israel dilag king daakkunu goɗen gokkaɗakppa tituanom, amu aun laa nug Saul qeeb mauhkku amu, Yawe Nug danab amu nug eheɗ heum, nug beɗuppa aab ele antta, ⌊am geha Nug danab amu nob nau medakku⌋,” awa aum.

¹⁰ Dawit nug anam awowa, nug baula tuɗitta aum. ⌊“I nug ii qepuɗ mauhma.⌋ Amu Yawe Nug genab bau daatte, genab amubia Yawe Nug geha nob nau Saul medakku. Ao, geha Saulnu haen maleb, nug mauhkku, o iitta geha nug ban heebeb, laa nug geha qeeb mauhkku,

¹¹ amge Yawe Nug da danab Nug king daakkunu goɗen gokkaɗakppa tituanom amu, da nug qeppi mauhkkunu matu aibnab aib aum daatte. Anam daatte amunu, na ban, le nippud nuhig ele, ikki guguittak daattep amu, na keeke aɗit amu diiatppe, i eɗuɗ gokkunih!” awa aum.

¹² Dawit nug anam anana, nug ban, le nippud ele Saul ikki guguittak daapiɗ am awe, Abisai ele eɗuya gopiɗ. Aa gopiɗ, amge Saulnu danab oolagppa laippu laa aa ii anatom. Keeke laala aa hepiɗ, am ele laippu laa ii anatom. Iitta. Aɗinu? Yawe nug he, ag niin gad meppig amunu, ag oh anam niippig.

¹³ Dawit aha ukka ukka, aben oolnu noak amu heqo laihppa ukka, nug qauko nakok laa igippa ta, hibaitta dayom. Qauko nakok amu aben Saul niiomppanu ukkak am, nakok uma daatte.

¹⁴ Dawit nug anam hibaitta dayaya, nug Saulnu ban danab, amu Ner bekka Apner ele dooglagnu onilagppa inam eum. “Apner, Ner bekka, na nai dahil doottem, o iitta?” Nug anam awa e amu, Apner nug doya, nob ma ewa aum. “Na aun na enana, na king maɗedattem?” awa ewa aum.

¹⁵ Apner nug nob ma, anam a, Dawit nug aum. “Na Saulnu ban daup ikki anuqak iittate? Na am Israel oolagppanu danab laa oh iite eɗadttem? Na anam aakku daattem dayeb, am aɗinu na king, nug am nahip okkai amu, aɗinu na nug ii dabmettame? Aɗinu? Gemu geha iikkunab danab laa haen tutu dayaknu aab kalak na daattemppa nug king nahip qeeb mauhkkunu uɗiom; king nug am nahip okkai.

¹⁶ Apner, keeke na heme am ena iitta! Na danab amu, nug am nahip naɗi, nug king daakkunu Yawe Nug goɗen gokkaɗakppa tituanom, amu na nug tutukku ii dabmettame amunu, genabnab genab, Yawe bauklel daatte, genab amubia laa nug na, amu ban daup danab nahipad laa oh ele aqeb mauhlob, amu geha nug kobol tutukkuib helo. Na neegna antte! Kingnu ban gudkkud, am le nippud ele, keeke aɗit amu aa nug ikki heqoppa daapiɗ, keeke aɗit amu adeppa daattep?” awa aum.

¹⁷ Dawit nug anam awa e, Saul nug Dawit baag doya, nug ewa inam aum. “Dawit, na da bekkal, baag laa doomi amu, amuam na baatte?” Nug anam a amu, Dawit nug nob ma aum. “O naɗi dahil, na am king, ao, da aakku,” awa eum.

¹⁸ Dawit nug anam awowa, nug tuɗitta aum. “Na am naɗi dahil, da am maɗi nid nahip, amu da na tutukku appe dookkulnu oɗ medattem. Na diig aɗinu da aɗailkkutnu lamiɗttem? Da eheɗ aɗi laa hein, da ɗo aakku tippalmi?

¹⁹ O naɗi dahil, na am king daattem, da am nahip maɗi nid, na dahil nai dookkutnu ool daatte. Amu Yawe Nug he, na ahan, da aɗailkkutnu lamiɗttem dayeb amu, da doɗ laa mane, Nug medappi, Nug dahilnu oo ena daakkunu ool daatte. O iitta, danab laala ag heeg, na ahan aɗailkkutnu oittem dayeb amu, am geha ag Yawe noobppa eheɗ laa awaknu anak waappa daaglagnu ool daatte. Aɗinu? Ag kobol hetteb, kobol amuppa ag da lamiɗna, da inam oiyeye, da Yawenu mettid haknu peh lag appa ukken, Nug noobppa dup noin binag mekkulnu elele iitta. Kobol ahilag amuppa amu, ag aakku da amelppa, ‘Na gona, kayak laa binag me!’ atteb bia hetteb.

²⁰ Amu da wan laappa mauhe, Yawenu wanppa ii mauhkkul dayeb amu, amuam nau, ena iitta amunu, na heppe, da mauhpanu oɗ medattem. Aɗinu? Na am Israel dilag king, da am danab hamu. Na da iuppe mauhkkul, amuam da am mi laa danab aoɗom bia; o danab laa qaukoppa mala qe mauhom bia,” awa aum.

²¹ Dawit nug anam a, Saul nug aum. “Da hipunin hemi. O Dawit, na da bekkal, da baula eɗue nahip-ppa eheɗ ii hepa amunu, na eɗun uɗippe, da ele daagnihnu oɗ medattem. Aɗinu? Gemu na dahil bau dayak am keeke okkai dabmeme. Genab, da Kayak ii dabmein, ii dim lamidttitti, kobol dahil am elele iittanab iitta.” Nug anam aum.

²² Saul nug anam a, Dawit nug nob ma aum. “O king, ban gudkkud nahip am iikku daatte. Na nahip danab laa meppe uɗia, awa ukkaɗ!

²³ Yawe Nug nob ena danab nug kobol genab tutukku dim lamitta, oo metta ii uuak kobol ele dim lamidtte amu medatte. Gemu Yawe Nug na da eppelppa meittom, amge da na, Yawe Nug na king daakkutnu goɗen gokkaɗakppa tituanittom ele amu, da na eheɗ heidkkulnu uumi.

²⁴ Antte! Gemu da bau dayak nahip am keeke okkai dabmein, da keeke eheɗ laa nahipnu ii hemi; anamib Yawe Nug bau dayak dahilnu ele dabmaama, haen dahilppa uug betteb, am geha Nug da ehaniɗeb, da uug amu eɗadkkulnu ool daatte,” awa aum.

²⁵ Dawit nug anam a, Saul nug nob ma aum. “Dawit, da bekkal, Kayak nug geha na itidkkunu ool daatte. Da doottem, na geha uɗat okkai okkai hebeppe, nahip hak am ta, ena gokku,” awa aum. Saul nug anam a, Dawit nug eɗua ugekke, aakku Saul eɗua appagppa ukkom.