1 Samuel 25 - Nobonob Baibel

Dawit, Nabal, amu Abigel ele dilag kaya

¹ ⌊Saul nug Dawit uuitta, nug eɗua nuhig aben daatteppa ukkom. Nug ukka dayeye⌋ amu, Samuel mauhom. Nug mauhe, Israel huu oh ag uɗin, qagmena gaanna, Rama aabppa nug laug guguittak boumppig. Ag boumeg, amu dimppa Dawit, nug danab nug ele daatteb ele, ag ahan, Juda wan laih ⌊yau uɗitteppanu⌋ gona, atu taɗak laa onig Paran, appa daappig.

^2-3 Aria, enub danab laa, nuhig en am okkainab ele, nug onig am Nabal. Nabal nug am Kalep huuppan danab, amu nug appag diig am atu onig Maon, appa. Nug wau onig amu Abigel. Abigel nug iɗu tuqak enanag; nug dabmak pahaettak ele, amge Nabal nug am danab oo nauhe oiyak ele. Nug laa guittak paha medakkunu ha oiyom. Nabal nug meeme 1,000 am sipsip 3,000 ele. Anam amu, nug nuhig wan maha laa aab Karmel guguittak dayom, amu haen laa nug appa sipsip uɗilag hoyak uɗat heum.

⁴ Aria, Nabal nug aab Karmel, appa dayeye, Dawit nug atu taɗakppa dayom. Dayeye, laa Dawit amegppa aum. “Nabal nug sipsip uɗilag otaɗtte,” awa aum. ⌊Nug Dawit amegppa anam a, aakku Dawit doyom, Nabal nug geha nuhikkud maɗi nid gamag ahak madakkunu hobul okkai okkai hekku.⌋

⁵ Dawit nug amu doya, nuhikkud nid bau eblaih tanig ele ag Karmel gona, Nabal anidkkulagnu onilagppa e uɗieg, nug amelagppa aum. “Ag Karmel gona, Nabal anidna, ag dahil humittak mettanna,

⁶ ag nug amegppa inam aig! ‘Dawit nug na, na baenadppa, amu nahip keeke oh ele enaib daaglagnu oo daatte.

⁷ Amu Dawit nug nai imu ele apput dookkutnu aum. “Da gemu amu, da na sipsip uɗilag otaɗttemnu aeg doomi. Amu haen danab nahipad ag Karmel daanna, sipsip gumadppig amu, ag ig guguikkak daaegeg, ig ag eheɗ nakok laa ii hattamut. Iitta. Amu keeke ahilag laa ele ii qettoɗom.

⁸ Na nahipad maɗi nid oɗ madappe, ag ele geha amu appeg dookkut. Amu gemu na hobul okkai laa hekkutnu aakku daatte amunu, da na ⌊ig kobol ena nahipad danab dilag hemut amu, na amu dabmenana,⌋ nid bau dahilad, na amu dilag daut ii atimanu oɗ medattem. Dahilad danab ag am maɗi nid nahipad, amubia daaegeg, da am na bekkat bia daattem amunu, na aɗi keeke nakok nahip-ppa daatte anidttem amu, na nakka pakkol mena, megakkutnu oɗ medattem.” ’ ” Dawit nug danab nuhikkud ag Nabal amegppa anam akkulagnu amelagppa aum.

⁹ Dawit nug anam amelagppa a, ag ahan, Nabal gumidna, Dawit aum oɗe amu aon, ag gona, Nabal amegppa appig. Ag Nabal amegppa awona, ag Nabal nug nai amu nob attem eɗua ag amelagppa ab dooglagnu ameg meppig.

¹⁰ Ag Nabal ameg mena, nug nai nob ma amelagppa akkunu daaegeg, nug amelagppa aum. “Ag Dawitnu appig amge, nug am aun? Ag Jesi bekkanu atteb, amge nug am aun? Gemu maɗi nid kuɗum ag danab okkai ahilkad uuadna oolna laih goppig daatteb.

¹¹ Amu da dahil bret, le, amu doɗ da baalag otaɗadmi ele, da ee amu danab sipsip uɗilag otaɗadtteb lakkulagnu bappaidmi amu, aɗinu da amu awen, da danab laih da ii doottem ele madakkul?” awa aum.

¹² Nabal nug anam amelagppa a amu, Dawitnu danab ag eɗun, Dawit gumidna gona, ag Nabal nug nai oh mattiom ele nug amegppa appig.

¹³ Ag Dawit amegppa amu mattieg doya, nug nuhikkud danab amelagppa aum. “⌊Ban hekkunignu babaittak dayaknu amu,⌋ ag qep elab ahilkad diin, imualagppa takkeg!” awa aum! Nug amelagppa anam a, ag oh ahilkad qep elab akkan, imualagppa takkeg, Dawit nug ele qep elab nuhig awa takkom. Nug takke, nuhikkud danab 400 keeke anam ag ahaeg, nug ele goppig. Danab 200 amu ag keeke guman daappig.

¹⁴ Am Dawit nug nuhikkud danab ele ag anam heegeg amu, Nabalnu maɗi nid laa ukka, Abigel, Nabal wau, nug amegppa aum. “Dawit nug nuhikkud danab laala maatte, ag atu taɗakppanu uɗin, ihinig naɗi Nabal humittak nai mettaglagnu uɗippig, amge Nabal nug awa awa qettak nai baag okkaippa eum.

¹⁵ Nabal nug ahilagnu eheɗ anam heum, amge haen ig aab dimittim dad okkaippa ag gukkuattak daamut amu, danab amu ag ihinigppa kobol enaib heppig. Ag ihinignu keeke eheɗ laa ii heppig, am haen amu oh ihinig keeke laa ele ii qettoɗom. Iitta!

¹⁶ Amun tuqan ele haen ig ag gukkuadta oita, sipsip gumadtat oitut, danab amu ag am ihinig aɗ ɠagattag ig taliligna daappig.

¹⁷ Ag anam heppig, amge ihinig danab okkai, nug am danab nau, laa nug ele nai mattiglahnu elele iitta, gemu nug kobol nau he, nug, nug baegppan ele, ig oh aakku naunab aognignu miag daattem. Ig nauhmut miag daattem amunu, na geha keeke amu ohnu na dabmekkutnu ool daatte. Na dabmena, na keeke aɗi hekkutnu elele amu, na hekkut.” Danab amu nug Abigel amegppa anam aum.

¹⁸ Danab amu nug Abigel amegppa anam mattie, Abigel doya, nug paha aha, bret kunum 200 diia, wain doɗ gaɗappa inak aɗit, sipsip manak tanig ele, 20 kilogram ee aeg manik, grep meu qaɗaiettak batappatak 100, ad fig meu qaɗaiettak batappatak 200 ele, nug ee amu oh diia qagma, donki laala attan maattom.

¹⁹ Abigel nug anam hewowa, nug nuhikkud maɗi nid amelagppa aum. “Ag donki diin anuqna gobepeg, da am geha ag dim lamatte gokkul.” Nug anam amelagppa aum, amge nug gamu Nabal amegppa amunu ii aum.

²⁰ Abigel nug anam ha, nug donki laa attan ta, nug ukka ukka, aben qauko nakok aɗit ikkilah laih laih daatteppa teum. Gamalahppa am aben oolnu noak, amu Abigel nug heqo laihppa noa ukkom. Nug noa ukke, amu heqo laihppa Dawit, nug nuhikkud danab ele ag ele aben oolnu noak amuppa nokkulagnu noegeg, Abigel nug ag appa uɗalag teum.

²¹ Abigel nug aben amuppa gokkunu ugekke, haen amuppa Dawit nug aum. “Haen da danab umunu keeke atu taɗakppa gumami, nuhig keeke laa ii qettoɗom amu, haen amuppa da uɗat amu hamunab hemi. Da kobol ena nuhignu hemi, amge nug dahilnu kobol eheɗ heum.

²² Gemu digmak ukkeb, wagɗeb butti buttua batak amu, da Nabal, nug baekkudppan nid danab, nuhikkud maɗi nid, ag bekkalkad ele amu, da danab amu ohnab ii aqakkul, da laippu laa uuppi, bau daakku dayeb amu, Kayak Nug bu okkainab meɗakkunu ool daatte!” awa aum.

²³ Dawit nug anam aawo amu, Abigel nug uɗia, gumitta doa, nug Dawit antta, nug paha donki attannu oola na, Dawit noobppa dayaya, nug gateg qaun o, gomela, iɗu wanppa meum.

²⁴ Abigel nug anam hewowa, Dawit baegppa dayaya, nug Dawit amegppa aum. “O naɗi, kobol nau beum daattenu diig am daib. O naɗi, da am nahip uɗat hak ah, da na amenppa nai madikkulnu oɗ medattem. Na ena appe amu, da na amenppa appi, geha na nai dahil dookkutnu ool daatte.

²⁵ O naɗi, da na oɗ medattem; na Nabal, nug am danab nau amu, na nai nug mettom am aib dabmeme. Aɗinu? Nug onignu diig eɗuak amu inam, ‘Danab nug Kayak dab-ii-maama ii dim lamidtte ele.’ Nug onig eɗuak am anam, amu eɗuak amuam genab, nug am danab anam ele aakku. Kobol nuhig ele amu, am anamib. Amge dahilnu amu, da na, dahil naɗi, da nahipad danab na ag amelagppa ae, ag ig gumigna goppig amu, da, da maɗi ah nahip, da danab amu da ag ii anadmi.

²⁶ Amu O naɗi, Yawe Nug nahip ib oo ne, na nakka, na eppenppa laa nob nau ii mettan qee mauhom amu, Yawe Nug genab bau daatte, na ele genab bau daattem, genab amubia Yawe Nug heeb, nahip kekeɗ laa oh ag eheɗ heidkkulagnu hetteb ele amu, ag Nabal, ⌊gemu laa dilag neekkakppa nauib daatte,⌋ ag anamib daaglagnu ool daatte.

²⁷ Da, da am nahip maɗi ah amu, da keeke awe uɗimi imu, da na, dahil naɗi, da nahip daakkunu na hamu medakkulnu hettem. Na keeke amu, danab na dim lamidtteb ele, na ag eppelagppa mekkutnu ool daatte.

²⁸ O naɗi, da, da nahip maɗi ah amu, da na dahil eheɗ hak uhuqna meɗakkutnu oɗ medattem. Aɗinu? Na, na am dahil naɗi, na hanhan ukke, Yawe Nug oo hette amubia na gona, Yawenu kekeɗ ele ban hena aqadttem amunu, Yawe Nug geha heeb, na, na buɗunad oolagppanu laala ele ag ahilag haen anen anenppa ag geha king daaglagnu ɠagattag tuqa ii awak bia aɗaglag. Anam bekku amunu, gemu haen na daattem imuppa, laa nug nai genab geha ana, ‘Dawit nug eheɗ heum,’ akkunu elele daakkunu da ool ii daatte.

²⁹ Na am naɗi dahil, amu danab laa nug na gumitta doa, nug na nidakkunu hekkutai, amge Yawe, nahip Kayak, Nug geha na danab laa nug nuhig keeke ena ena atognotte bia atognoitteb, na ii mauhmana. Yawe Nug geha nahipnu anam hekku, amge geha Nug nahip kekeɗ amu aqeb, iitta mekkulag; danab nug men ketapolppa ma, e gotte bia, anamib Yawe Nug geha nahip kekeɗ geɗatteb, gona iitta mekkulag.

^30-31 O naɗi dahil, Yawe Nug keeke ena ena geha na medakkununab aum, dimppa, haen Nug keeke amu medatte, haen amuppaib Nug na Israel dilag kingnu balalppa ele meidkku, amu gemu na nai dahil dim lamidppe amu, dimppa haen amuppa na Nabal baegppanu laa ii qe mauhomnu gamag ahak dookkut. Na laa anam ii qeppe mauhkku amu, haen amuppa ele na, ‘Da danab eheɗ ii heppig ele aqe mauhppig amunu, da bu aokkulnu daattem,’ dab-ii-memana. Laa ele, am qinob dimppa Yawe Nug keeke ena ena amu oh nahip ha maleb, aria na da, nahip maɗi ah, na dahilnu dabmekkutnu oɗ medattem.” Abigel nug Dawit amegppa anam aum.

³² Abigel nug anam a amu, Dawit nug nob ma, amegppa inam aum. “Yawe, Nug am Israel dilag Kayak, gemu Nug na meitte uɗin, da uɗal teme amunu, ig Nug onig attan humagnig.

³³ Na doyak, dabmak ena ele meɗame, amu na he, da laa dahilppa eheɗ heum amu, da dakka nob metten, nug, nuhikkud ele ii aqai mauhppig. Na keeke aɗit amu aakku heme, am diig aɗit amunu Yawe Nug geha na itittak ena medakkunu ool daatte.

³⁴ Aɗinu? Yawe, Israel dilag Kayak, Nug he, da nahipnu eheɗ laa ii hemi amu, Nug genab bau daatte, genab amubia na paha uɗin, da uɗal ii telom amu, da Nabal, nug baekkudppan nid danab, nuhikkud maɗi nid, ag bekkalkad ele ohnab aqalom. Ao, gemu digmak ukkeb, wagɗeb butti buttua batak, da ag oh aqappi mauhlob.” Dawit nug anam aum.

³⁵ Dawit nug anam awowa, nug Abigel keeke awa uɗia mettom nug eppegppanu awawa, amegppa inam aum. “Nai nahip amu, da doomi, da geha na oot daatte amuib dim lamidkkul amunu, na oot maɗoɗ ele dayebeb, eɗun lautppa ukke!” awa aum.

³⁶ Dawit nug anam a amu, Abigel nug eɗua laugppa ukkom. Amu Nabal nug nuhikkud maɗi nid ele ag daanna, hobul naɗi, king hobul hetteb, amubia heppig. Ag amu lanana, Nabal nug gamag huana ahe, nug le la, qe, spak meum. Nug anam dayom amunu, Abigel nug Nabal ele nai laa ii madipiɗ; daye ukke wagɗom.

³⁷ Abigel nug Nabal amegppa nai ii mattiom ukke, wagɗe buttua Nabal nug eɗua dabmak awe, haen amuppa Abigel nug keeke beum amu, nug amu oh Nabal amegppa aum. Nug Nabal amegppa amu mattie, Nabal gamagppan uttu taub aakku nauha, uɗat ena ii he, amuppa Nabal nug aakku men laa bia dayom.

³⁸ Nabal nug anam daye niie ukke, deɗ eblaih tanig ele anam dimppa Yawe he, nug mauhom.

³⁹ Nabal mauhe amu, danab laa nug amunu Dawit amegppa a, Dawit nug aum. “Nabal nug dahilnu eheɗ heum, nug dahilnu am keeke hamunab doyaya heum, amge nob mettak nau Nabal nug heumnu amu, Yawe Nug da ehaniɗa, eɗua awa, Nabal mettom amunu, ig Yawe onig humapput, attan taɗ! Yawe Nug nuhig ehanittakppa da ehaniɗe, nob mettak nau eɗuen awen, Nabal medakkulnu ii hemi. Yawe nug Nabalnu eheɗ hak antta awa, eɗua Nabal mettom.” Dawit nug anam aum. Dawit anam awowa, dimppa amu nug nuhikkud maɗi nid laala maatte, ag Abigel gumidna gona, oɗ medappeg, nug uɗia, geha nug Dawit wau daakkunu goppig.

⁴⁰ Dawit nug he, nuhikkud maɗi nid ag Karmel appa, Abigel toppa gona, nug noobppa wana appig. “Dawit nug ig na omaidta gopput, na nug wau daakkutnu meikke uɗimut.” Ag anam appig.

⁴¹ Ag anam aeg, Abigel nug amu doya, nug gateg qaun o, gomela, iɗu wanppa ma, nug aum. “Antteg! Da am naɗi dahil Dawitnu maɗi ah dayeye, nuhig maɗi nid baelag ihak uɗat hekkulnu babaitte daattem,” awa aum.

⁴² Abigel nug anam anana, nug pahanab nuhig donki awa, attan ta dayaya, nuhikkud maɗi ah tanig ele amu oh gokkulagnu amelagppa a, ag oh Dawitnu danab uɗippig, ag amu ele oh goppig. Ag Dawit gumidna ukkaeg, Dawit nug Abigel nug nuhig ah daakkunu awom.

⁴³ Tatam, haen keeke amu oh ii beegeg, Dawit nug Jesril ah laa awom; ah amu onig am Ahinoam. Gemu Dawit nug Abigel awe, ah aɗit aa oh am Dawit wauuɗ daapiɗ.

⁴⁴ Saul aɗeg, Mikal, nug ele Dawit wau, amge Saul nug aɗeg amu awa, Lais bekka Palti mette, nug nuhig ah dayom. Lais nug am Galim aabppanu danab.