1 Samuel 24 - Nobonob Baibel

Dawit nug Saul ii qe mauhom

¹ Saul nug Pilistia ele ban ha lamattowa, nug eɗua uɗie, danab ah laala ag nug amegppa inam appig. “Dawit nug atu taɗak onig Engedi, appa daatte.” Ag anam appig.

² Ag Saul amegppa anam aeg, nug Israel ban danab oolagppanu ban danab ban haknu doya auta awak 3,000 otiatte, Saul nug ele oh ag Dawit nuhikkud danab ele mattialadkkulagnu goppig. Nug diie gona, aben onig Meeme Dakkuɗ Dilag Men atteb amu, ag amu guguittak talilidna oippig.

³ Saul nug nuhikkud danab ele ag gona, ag aben laappa teppig. Aben amuppa ib daatte amu, ib amu heqo laih sipsip dilag aɗ daaegeg, amu aben amu guguittak, appa amu wan oɗe laa ele dayom. Amu Saul aɗi ag gona, appa tena, Saul nug biikkunu wan oɗe amuppa noum, amge Dawit nug nuhikkud huu ele ag wan oɗe amuppa, uma noa ukkak, ag appa ag lokkumna autna aon daappig.

⁴ Saul nug wan oɗe okkai amuppa noa dayeye, Dawitnu danab ag Dawit amegppa appig. “Yawe Nug anukka na amenppa inam aum. ‘Da geha nahip kekeɗ na eppenppa meppi, na attem hekkutnu oot daatte amu, na hekkut.’ Nug anam aum amu, gemu am haen Yawe Nug anukka amenppa aum aakku. Gemu nug na eppenppa aakku meum,” aon appig. Ag anam aeg, Dawit nug qinonobnab ukka, Saul guguitta wana, nuhig lamen elab nob honap nak amu nakok otaɗa awom.

⁵ Dawit nug lamen elab Saulnu nakok otaɗa awowa, dimppa nug nuhig ooppan oiyak ippunittaknu ulumppa amu, nug eheɗ doya aum. “Da eheɗ hemi.”

⁶ Dawit nug Saulnu eheɗ heum, amunu dabmak huan qeum, ⌊amge nuhikkud danab ag nug Saul qeeb mauhkkunu eɗun appig⌋ amunu, Dawit nug ag amelagppa aum. “Yawe Nug Saul, dahil okkai, am nug Israel dilag king daakkunu goɗen gokkaɗakppa tituanom amunu, da nug iinab qeppi mauhma. Iittanab! Nug Israel dilag king daakkunu Yawe Nug goɗen gokkaɗakppa tituanom amunu, da nug heppi nauhkkunu aib okkainab aakku daatte,” awa amelagppa aum.

⁷ Dawit nug anam nuhikkud danab daulag bata anana, nuhikkud danab ag gona, Saul qeeg ii mauhom. Dawit nug anam he, nuhikkud danab ag daaegeg, Saul nug wan oɗe ooppanu aha ba, dimittim ukkom.

⁸ Saul nug wan oɗe ooppanu ba ukke, Dawit ele wan oɗe ooppanu dimittim ba, Saul dookkunu inam eum. “O Naɗi dahil, na king!” Nug anam e, Saul nug eɗua neekka, Dawit antte, Dawit nug gateg qaun o, gomela, iɗu wanppa meum.

⁹ Dawit nug anam hewowa, nug Saul amegppa inam aum. “Danab ah laala ag da nahipnu eheɗ hekkulnu hettemnu maditteb amu, aɗinu na amu doon, amunu dabmettem? Na amu aib dabmettame!

¹⁰ Gemu, geha iikku na wan oɗeppa dayeye, Yawe Nug na da eppelppa meum amu, na gemu na amenppanab keeke amu aakku anidttem. Laa ag da na nidappi mauhkkutnu appig, amge da uumi. Da uumi amunu, na ii mauhme. Da anam heinne amu, da inam ami. ‘Yawe Nug dahil naɗi nug king daakkunu goɗen gokkaɗakppa tituanom amunu, da nug heppi nauhkkunu, da keeke eheɗ laa da eppelppa ii hepa. Iittanab!’ Da anam ami.

¹¹ O mama, antte! Gemu geha iikku da nahip lamen elab amu nob nakok otaɗe aomi iikku, amge da na ii nittai mauhme. Am na amu anidna, dabmena, geha na diig amuppa na oot maitteb dookkut; da na nidappi ii mauhmana! Iittanab! Laa amu, da nahip nai tabappi nekkunu, o nahip aben aokkulnu ii hettem. Da nahip-ppa keeke eheɗ laa ii hettem, amge na am da iuppe mauhkkulnu banel oittem.

¹² Am Yawe Nug geha kobol dahil, amu nahip kobol ele awa, i oonihppa aun nug eheɗ hette anidkkunu i oh hettoɗitkkunu ool daatte. ⌊Nug anam ha, nug geha anidkku, da eheɗ ii hemi⌋, amu geha Nugib na eheɗ hemenu nob tutukku medakkunu ool daatte, amge da am, da keeke eheɗ laa nahip-ppa ii hepa.

¹³ Nai tutu meu ele anukkanu amu, na doottem. Nai amu inam atte. ‘Danab nau ag kobol nau hetteb.’ ⌊Doye! Da am danab nau iitta⌋ amunu, da kobol eheɗ laa nahipnu ii hepade!

¹⁴ Na am Israel dilag king, na danab ɠagattag laa ele ban hekkulahnu uɗimete? O na danab laa ebehi ele lamidkkutnu uɗimete? Iitta! Da am qai laa mauhom amubia. Da am keeke hamu laa, mi bia daattem.

¹⁵ Yawe Nug i oh ihinihnu nai doya mala, hettoɗia epeɗieb, da eheɗ laa ii hemi miag atikkunu ool daatte. Nug na eheɗ dahilppa heme bappaidkkunu ele ool daatte, amge da nahip-ppa eheɗ laa ii hepa.” Dawit nug Saul amegppa anam aum.

¹⁶ Dawit nug Saul amegppa anam mattie amu, Saul nug aum. “Da danab laa baag doomi amu, o da bekkal Dawit, amuam nate baat?” Saul nug anam awowa, nug naɗi gayom.

¹⁷ Nug gayaya aum. “Na amu, na am genab tutukku hak danab, da eɗilak. Aɗinu? Da nahipnu eheɗ hemi, amge na am dahilnu ena heme.

¹⁸ Gemu, geha iikku, Yawe Nug da na eppenppa meiɗom, amge na da ii niɗe mauhmi. Kobol amuppa na hak ena nahip dahilnu hettem amu, na da ippuniɗme.

¹⁹ Haen danab laa nug nuhig kekeɗ anidtte amu, nug guittak iite medatte? Ao, nug guittak medatte. Danab laa nug kekeɗ antta, geha nug, nug amegppa, ‘Na appanppa eɗun ukke!’ akkute? Iittanab iitta amunu, da ool inam daatte. Geha Yawe Nug kobol ena oh na dahilnu heme amu antta, Nug nob ena na medakku.

²⁰ Da genabnab na geha Israel dilag king bena, na king daappe, laa nug uɗat amu eppenppanu ii aɗitta aoma doottem.

²¹ Amunu na geha Yawe onig aon, nahip nai ɠagattag qettan, da alalad aɗi amu, na ag ii aqappe mauhkkulagnu appe dookkulnu ool daatte. Amu na mama baekkudppa, na da onil amuppanu heppe iitta ii mema ele ool daatte.” Saul nug anam aum.

²² Saul nug anam a, Dawit nug anam hekkunu Yawe onig awa, nuhig nai ɠagattag qettom. Nug anam he, Saul nug eɗua aabppa ukkom, amge Dawit nug nuhikkud danab ele ag eɗun, ban haknu aben ɠagattag eleppa gona, appa daappig.