1 Samuel 21 - Nobonob Baibel

Dawit nug Nop ukkom

¹ Dawit nug Jonatan uuitta, Ahimelek anidkkunu aab onig Nob, appa ukkom. Ahimelek nug am Yawenu mana mettak danab. Dawit nug ukka, Nop te, Ahimelek antta, nug eheɗ ottaiom. Nug eheɗ ottaia, beɗu hahaɗeɗe, nug Dawit oɗ mettom. “Amu aɗi diignu na nakkaib uɗime? Amu aɗi diignu laa nug na ele oh ii uɗipiɗ?” awa oɗ mettom.

² Mana mettak danab Ahimelek nug Dawit anam oɗ mette amu, Dawit nug nob ma inam aum. “King nug da amelppa uɗat laa hekkulnu anana, nug ‘Danab laa nug na uɗat geha hekkut amu, laa nug amunu naippu nakok ii dooma! Laa ele, laa nug uɗat amu ippu attem haknu nai huppu ele ii dooma!’ Nug da amelppa anam aum amunu, da ukke, uɗat amu hekkulnu gottem. Am dahilad danab amu, ag am da ag amelagppa ami bia, ag aben laappa da aniɗkkulagnu gona daappeg, geha ig appa, aben amuppa qagmekkunig.

³ Am gemu aɗi ee laa na eppenppa daattetai? Bret tanig ele na eppenppa daatte dayeb amu, da meɗakkutnu na oɗ medattem. O amu iitta dayeb amu, ee diig laa daatte dayeb, na amu meɗakkutnu oɗ medattem,” awa aum.

⁴ Dawit nug Ahimelek anam oɗ mettom, amge Ahimelek nug nob ma, Dawit amegppa inam aum. “Bret hamu laa ii daatte. Iitta. Bret Kayaknu tituana mettak, bret amu aakkuib daatte. Bret amu daatte amunu, nahipad danab, ⌊geha ag na ele qagmekkulag amu,⌋ danab amu ag gemu, tumai ele keeke, ag haen amuppa ah ele ii oippig dayeb amu, da bret amu na medappi, ag lakkulag,” awa aum.

⁵ Ahimelek nug anam Dawit amegppa a amu, Dawit nug nob ma amegppa aum. “Ig ah ele oimtanu ig deɗ ewam imu awaittak daamut amunu, ig ah ele ii oimut. Haen ig keeke laa hanhan hettem bia hekkunignu gottem amu, dahilad danab ag Kayak ele ouqa dayaknu elele daaglagnu henana, ahilag keeke ele Kayaknu neekkakppa dubuttid ele daamnanu henan gotteb. Gemu amu, ig keeke hamu hekkunignu ii gottem, ig keeke laa hekkunignu gottem amunu, ig anam pehettaknab heta auta autanab iite hemata?” awa aum.

⁶ Dawit nug anam a amu, Ahimelek nug bret Kayaknu tituana mettak daatte, nug bret amu Dawit mettom. Aɗinu? Bret laa ii dayom. Kayak Nug ina daatte ippuanattaknu bret, bret amu aakkuib dayom. Bret amuam, tatam Ahimelek nug balalppa me, appa Yawe noobppa dayeye, mettid laippu uue, dimppa nug bret amu eɗua awawa, nug bret bau balalppa meum, amge bret alag nug awom, bret amuib nug awa Dawit mettom.

⁷ Am deɗ amu Dawit nug uɗia, Nop aabppa beum amu, Saulnu maɗi nid laa nug appa deɗ amuppa Yawe noobppa daakkunu dayom. Danab amu nug danab huu laa ag sipsip, makau, keeke Saulnu gumadtteb, nug am amu dilag gumak danab. Danab amu onig am Doeg, nug am Edom danab.

⁸ Aria, Ahimelek nug bret amu Dawit mette, Dawit nug oɗ mettom. “Na qep elab, o ban laa ele daatte, o iitta? ⌊Laa daatte dayeb amu, na meɗakkutnu ool daatte.⌋ Aɗinu? King nug da tappaɗilom amunu, da ban dahil ii aomi, qep elab dahil keeke ele ii aomi,” awa aum.

⁹ Dawit nug anam amegppa a amu, Ahimelek nug nob ma inam aum. “Pilistia danab, Goliat, na oolnu noak onig Ela, na appa nug qee mauhom amu, danab amu, nuhig qep elab ippa ina daatte. Qep elab amuam lamen laappa hautak, kunup laa, ag lamen enanag-epod kunup amuppa aihtteb ele amu, am kunup amu dimugppa daatte. Na aokkut dayeb amu, na aokkut. Aɗinu? Qep elab laal ii daatte.” Ahimelek nug anam aum. Ahimelek anam a amu, Dawit nob ma amegppa aum. “Da meɗe! Qep elab amubia laa iitta!” awa aum.

Dawit nug Gat ukkom

¹⁰ Ahimelek, Dawit ele aa anam heya maloya, amu Dawit nug Saul aɗamanu aha oola, Akis gumitta ukkom. Akis nug Gat dilag king.

¹¹ Am Dawit nug ukka Gad aabppa teum, amge Akisnu maɗi nid ag Akis amegppa appig. “Danab imu nug am Dawit. Nug appag diigppanu king. Danab amu, nuhignu amu, Israel ah ag ahi goɗanna, ahi inam edappig. ‘Haen kuɗum Saul nug danab 1,000 aqe mauhtteb, amge Dawit nug danab 10,000 aqe mauhtteb.’ ” Ag Akis amegppa anam appig.

¹² Ag Akis amegppa anam aeg, Dawit nug amu doya, nug nai amunu nuhig dabmakppa, am nai hamu bia ii dabmeum. Iitta. Nug amunu uugnab doyaya, nug Gat dilag king, Akis, nug nuhignu okkai baɗom.

¹³ Dawit nug Akis baɗittom amunu, haen nug Akis, nuhikkud ehanittak ele gukkuattak dayom amu, nug nuhig oiyak kobol laappa oiyom. Nug ag oolagppa dayaya, kaaka laa bia heum. Nug anam ha, nug aabnu od okkai, nug amuppa kaaka nai ya, amu nug waɗu he na, akkaɗippa dayom.

¹⁴ Dawit nug anam heehe, Akis nug nuhig maɗi nid amelagppa aum. “Danab umu antteg! Nug am kaaka. Amu aɗinu ag nug omalna, dahilppa uɗippig?

¹⁵ Da waalppa danab kaaka kuɗum ii daattebnute, ag danab kaaka amu omalna uɗieg, kobol kaaka digdig da noolppanab iikku hette? Amu genab, danab amu nug uɗia, da laulppanab kobol amu hekku am enate?” awa aum.