1 Samuel 20 - Nobonob Baibel

Jonatan nug Dawit ehanitte, nug Saul uuitta, oola ukkom

¹ Amu be dimppa amu, Dawit nug aab onig Naiot, Rama guguittak dayom amu, nug aab amu uua, nug Jonatan anidkkunu ukkom. Nug ukka, Jonatan gumitta ta, nug Jonatan oɗ mettom. “Da kobol nau aɗi hemi? Da ɗo aɗi tippalmi? Da keeke nau aɗi hemi amunu, na mamen nug amuppa guittak doyaya, gemu nug da iweb mauhkkulnu hette?” awa aum.

² Dawit nug Jonatan amegppa anam mattie, amu Jonatan nug inam nob meum. “Da mamel nug nuhig dabmakppa na nidakkunu am iittanab iitta! Na ii mauhmana! Antte! Haen mama nug keeke okkai laa hekkunu oo daatte amu, nug tatam da amelppa atte. Awowa, dimppa nug hette. Anamib, haen nug keeke nakok laa hekkunu dabmette amu, amu ele, nug tatam da amelppa awowa, dimppa amu nug hette. Na attem amu, amu ele nug anam hekkunu dabmelo amu, nug ab, da doolom. Da doottem, mama nug na nitteb ii mauhmana! Iitta genab.” Jonatan nug anam aum.

³ Jonatan anam aum, amge Dawit nug nuhig nai ɠagattag qetta, nug nob ma amegppa aum. “Na mamen nug na dahilnu ena doottem dootte amunu, nug inam dabmette. ‘Jonatan nug da Dawit qeppi mauhkkunu hettem doya amu, nug ooppa guittak naunab dookku. Nug anam dookku amunu, nug aib amu doyom!’ Nuhig dabmak anam daatte amunu, nug da iweb mauhkkulnu hette amu, dabmak amuam nuhigppaib lokkumak daatte. Nug amu hette am, na nuhig dabmak amu ii doottem, amge Yawe genab bau daatte, na ele genab bau daattem, genab amubia na mamen nug da iweb mauhkkulnu hette; dahil mauhak amu miagnab daatte,” awa aum.

⁴ Amu Dawit nug Jonatan amegppa anam a amu, Jonatan nug Dawitnu nai nob ma aum. “Na da amelppa appe, da geha keeke aɗi na ehanidkkulnu hekkul amu, keeke amuam da geha hekkul,” awa aum.

⁵ Jonatan nug anam a amu, Dawit amegppa aum. “Antte! Butti am kalam baunu qagmak gamag ahak elenu deɗ, amu da geha king ele daaɗɗa, ee lakkunihnu daatte. Da hekkulnu aakku daatte, amge na appe, da geha ukke, aab dimittim dad okkaippa lokkumak aben eleppa lokkume daappi ukkeb, laatu tueb batak.

⁶ Geha da anam heppi, na mamen nug hobul haenppa da ii daattemnu dabma, nug na oɗ metteb amu, na inam appe doyaɗ! ‘Maɗ ohppa haen inamppa Dawit baekkudppa ag oh doɗ main, Kayak medatteb amunu, nug appag diigppa Betlehem ukka, geha nug baekkudppa ele oh daanna, haen amu ag mana mettak amu main, Kayak mettaglagnu nug da oo unuqagppanu oɗ meɗe, da nug amegppa, “Na ena gokkut,” ami. Da anam ai, nug ukkom.’

⁷ Na geha mamen amegppa anam appe amu, nug, ‘Am ena, da nai iitta,’ akku dayeb amu, da, nahip maɗi nid, da am geha ena daakkul. Amge nug doya, nug amunu oo nauheb, na miag tutukku dookkut; na mamen nug da eheɗ heiɗkkunu dabmak awe ɠagattag eppom daatte.

⁸ Anukka na he, i nug tituana nai qakkak laa Yawe noobppa hemuɗ, amu tituanak amuppa i iya iya geha ehanitkkunihnu amuɗ amunu, na dahilnu oo mauhaknab doon, na ame amu, na nai amu dim lamidna ehaniɗkkutnu oɗ medattem. Amge da eheɗ laa hemi dayeb amu, na iuppe mauhei! Aib omaiɗna, na mamen gumidna goppe, nug da iwom.” Dawit nug Jonatan amegppa anam aum.

⁹ Dawit anam a amu, Jonatan nug nob ma amegppa aum. “Na aib anam dabmeme! Aɗinu? Da mamel nug na eheɗ heidkkunu dabmak aɗe ɠagattag eppom daalo, da amu nakok doolom amu, da na amenppa iite alom?” awa aum.

¹⁰ Jonatan anam a amu, Dawit nug Jonatan amegppa aum. “Nahip dabmakppa na dahilnu ena doottem amunu, haen na, na mamen amegppa da Betlehem gottem appe doya, nug amunu oo nauheb amu, aun nug da amelppa ab dookkul?” awa aum.

¹¹ Dawit nug anam a amu, Jonatan nug amegppa aum. “Doppe, i aab okkai dimittim dad okkaippa goɗa, i nai mattignih,” awa aum. Nug a, aa ahaiya gopiɗ.

¹² Aria aa ahai, aab okkai dimittim dad okkaippa goya, amu Jonatan nug Dawit amegppa aum. “Da Yawe, Israel dilag Kayak, da Nug noobppa imu hekkulnu iikku madittem. Butti, o laatu amu, da geha nahipnu mama oɗ medakkul. Oɗ medappi, nug nahipnu ena akku amu, da na appi dookkut.

¹³ Amge genab, mama nug na eheɗ heidkkunu dabmette dayeb amu, da na amenppa ii ain, da na elele oolna gokkutnu ii ehanidppi amu, aria Yawe Nug geha bu okkainab meɗakkunu ool daatte. Amu keeke laippu aakkuib am, Yawe Nug anukka da mamel ele daapiɗ bia, Nug na ele daaglahnu ool daatte.

¹⁴ Amge da paha ii mauhkkul dayeb, ⌊amu dimppa na king bena,⌋ geha na Yawe hette, amubia na oo mauhaknab dahilnu doon dim lamidna ehaniɗppe, da duug wakppa ii mauhpanu oɗ medattem.

¹⁵ ⌊Amge haen gamag imuppa da mauhppi, dimppa haen na king bewona,⌋ na da baeladppa dilagnu oo mauhaknab doon, aqappe ii mauhmananu oɗ medattem. Ao, Yawe Nug heeb, nahip kekeɗ ohnab ag mauhadna malappeg amu, haen amuppa ele na da baeladppa dilag enaib hekkutnu oɗ medattem,” awa aum.

¹⁶ Jonatan nug anam awowa, nug Dawit amegppa a, aa haen amuppa nug tituanak bau laa heya, Jonatan nug aum. “Yawe Nug Dawitnu kekeɗ oh heeb nauhkkulagnu ool daatte,” awa aum.

¹⁷ Amu Jonatan nug nukka nug nuhignu oo mauhom, amubia nug Dawitnu oo mauhom amunu, nug he, Dawit nug baula Jonatan layag tuɗid daakkunu nuhig nai ɠagattag qetta aum.

¹⁸ Aria, aa amu heya maloya, Jonatan nug Dawit amegppa aum. “Butti amu, kalam baunu qagmak gamag ahak ele haknu haen. Na geha amuppanu ee lanakppa ii daamna, dayak balal nahip am hamu daakku amunu, laa ag ee lanak amuppa daanna, geha ag na ii daattem anidkkulag.

¹⁹ Na butti ee lanak amuppa ii daamna; laa ag anidna, ag amunu nakok dabmekkulag, amge laatu ele na ii daamna amu, laa ag anam anidna, geha ag dabmak kuɗum aoglag amunu, laatu amu, na gona, men naɗi, onig Eselnu men, anukka na amu guguittak lokkumna daame amu, na laatu ele appa baula lokkumna daye!

²⁰ Na gona, appa lokkumna daappe, ⌊aria dimppa haen da mamanu dabmak doye amu, da geha appa gokkul.⌋ Da ukke, amu keeke laa men heqoppa qaknu mak daalo, da lat doɗo ewam laa keeke amu qelomnu ewadppi gokkulag.

²¹ Da lat doɗo ewam geha eppi ukkeb, da nid bau, nug da ele uɗignih amu, da geha nug amegppa, ‘Na gona lat doɗo mattin anidna, aon uɗie!’ appi dookku. Da geha nug amegppa anam appi, haen nug lat doɗo amu anadkkunu ukkebeb, da, ‘Neekke! Na lat doɗo eɗadna gome, ag miag iikku daatteb. Na eɗun dona uɗin, diin da gumiɗna uɗie!’ appi amu, aria genab Yawe Nug bauklel daatte, genab amubia na laa nug na eheɗ heidkkunu ii hette, laa na nitteb mauhkkutnu ii hette dookkut amunu, na uɗin, da aniɗe!

²² Amge, da lat doɗo ewoya, da nid bau amu onigppa ein, ‘Neegna, na umanab ii gome. Lat doɗo nakok uma daatteb,’ eppi, aria na Yawe Nug na gokkutnu oo daatte amunu, na ahan gokkutoitte dookkut.

²³ Am nug tituanak i haen aɗit hemuɗ amu, Yawe Nug geha amu haen oh dabmedakku. Dabmettebeb amu, i oonihppanu laa nug nai amu tippaleb, aria Yawe Nugib nug epeɗidkku.” Jonatan nug anam aum.

²⁴ Dawit, Jonatan ele aa nai mattiya maloya amu, Dawit nug aab okkai dimittim, dad okkaippa lokkuma dayom. Dayeye, wagɗe buttua, deɗ amuppa, amuam kalam baunu qagmak gamag ahak elenu digmaknu deɗ amu, deɗ amuppa ee lanak haenppa, King Saul nug ee lanak balalppa dayom.

²⁵ Saul nug ee lanak balal gilil guguitta haen oh daatte, nug amuppa dayom. Am Jonatan nug ee lanak balal heqo laih, Saul noobppan dayom. Apner nug ee lanak balal heqo, Saul eppeg laappa dayom. Amge Dawit nug ii dayom.

²⁶ Dawit ii daye, Saul nug amu anttom, amge nug Dawitnu inam dabmeum. “Nuhigppa keeke laa beum amunu, nug Kayak ele ouqa dayaknu elele iittatai. Ao, nug Kayak ele ouqa dayaknu elele iitta amunu, nug ii uɗiombia doottem.” Saul nug anam dabmeum ⌊amunu, nug Dawit ii dayomnu laa amegppa laa ii mattiom⌋.

²⁷ ⌊Saul nug kalam baunu qagmak gamag ahak elenu deɗ amuppa nai laa Dawitnu ii mattiom,⌋ amge wagɗe deɗ amuppa Dawitnu dayak balal anamib hamu daye, Saul antta, nug bekka Jonatan amegppa inam aum. “Aɗinu Jesi bekka tumai ee lanakppa ii doum, gemu ele iitta?” awa oɗ mettom.

²⁸ Saul nug amunu ana oɗ mette, Jonatan nug nai nob ma aum. “Dawit nug Betlehem gokkunu oo unuqagppanu da oɗ meɗom.

²⁹ Nug oɗ meɗaɗa, nug inam aum. ‘Da baeladppa ag geha doɗ laa manan, Yawe mettak hekkulagnu da awal ⌊matunu⌋ amu, nug da amelppa da goppi, ag ele oh daagnignunab aum. Anam amunu, da na noomppa da ena daattem dayeb, na ena appe, da geha Betlehem ukke, da awalad aɗi ag anadkkul!’ Nug da amelppa anam a amu, da nug amegppa ‘Amu ena, na ukke!’ ai, nug ukkom. Diig amuppa Dawit nug kingnu ee lanak imuppa ii daatte,” awa aum.

³⁰ Jonatan nug anam a amu, Saul nug oo huana nauhe, nug aum. “Na eheɗ hekkutnu amu, na tiinppa daatte! Na am nai tappe nak danab daattem! Da na Jesi bekka ehanidttem iite doottem? Na nug ehanidnana, amuppa na nakka na onin he nauhe, amu na anin, nug na menuittom ele amu, na nug onig ele he nauhtte.

³¹ Haen oh Jesi bekka wan imuppa dayebeb, na, nahip ɗo maɗoɗ ele am ɠagattag ii daama. Anam amunu, na gona, nug omalppe ippa uɗiaɗ! Aɗinu? Nug mauhkkuoitte!” awa aum.

³² Saul anam a amu, Jonatan nug nob ma mameg oɗ mettom. “Aɗinu geha na nug qeppe mauhkku? Nug aɗi eheɗ laa heum?” awa oɗ mettom.

³³ Jonatan nug anam oɗ mettom, amge Saul ban nuhig amu Jonatan yeeb mauhkkunu eum. Nug Jonatan yeeb mauhkkunu heum, amuppa Jonatan nug, “Genabnab mama nug Dawit qeeb mauhkkunu dabmette,” dabma doyom.

³⁴ Saul nug anam he, Jonatan nug amunu oo nauhak huanaknab doya, nug aha, lag oo amu uua ukkom. Deɗ amuam kalam bau doumnu deɗ aɗit, amu Jonatan nug deɗ amuppa ee ii laum. Jonatan nug oo nauhak huanaknab doya, ee laa deɗ amuppa ii laumnu diig am, nug genabnab genab nug mameg nug Dawitnu eheɗ hedakkunu doya, Dawitnu dabmaama, mameg nug ele Dawit uɗa nak mette doyom.

³⁵ Jonatan nug anam doya ukkom. Ukke, wagɗe buttua amu, nug aha, aab okkai dimittim, dad okkaippa Dawit anidkkunu, aa nai madipiɗ bia ukkom. Nug nid nakok laa ele awe, oh gopiɗ.

³⁶ Aa goya datta teya, Jonatan nug nid bau amu amegppa aum. “Da geha lat doɗo ewadkkul, amu haen da lat doɗo eppi ukkebeb, na qaiqaɗ gona, aon eɗun uɗie!” awa aum. Nug amegppa anam a, nid bau nug qaiqaɗ ugekke, Jonatan nug lat doɗo laippu e, umanab ukkom. Nid bau amu eɗitta ukkom.

³⁷ Jonatan nug lat doɗo eewo, haen nid ukka, lat doɗo na qeum, amu guguittette, Jonatan nug ewa inam aum. “Lat doɗo amu aben na daattem eɗitta, uma ukkom!” Jonatan nug ewa, nid amegppa anam eum.

³⁸ Jonatan nug anam ewowa, aria nug baula ewawa, nid bau amu tappaɗittatta aum. “Paha aon maon do! Na pahanab uɗie! Na aib daame!” awa aum. Nug anam e, nid bau lat doɗo awa mawa, Jonatan gumitta uɗiom.

³⁹ Nid nakok nug amu heum, amge Jonatan nug aɗinu anam eum amu, nid amu nug amunu diig ii doyom. Iitta. Jonatan, Dawit ele aa ayaib doopiɗ.

⁴⁰ Nid bau lat doɗo mawa, Jonatan gumitta do, Jonatan nug lat tanig, lat doɗo ele mette mawatta, eɗua aab okkaippa gokkunu amegppa a ukkom.

⁴¹ Am nid bau nug eɗua ugekke, Dawit nug men heqo laih yau uɗitteppanu aha uɗia, Jonatan gumitta do, gateg qaun o, gomela, iɗu wanppa me, haen ewam batom. Amu dimppa amu, aa nug ootuqidya gaapiɗ, amge Dawitnu gayak am Jonatannu gayak eɗittom.

⁴² Aa gaaya maloya, Jonatan nug Dawit amegppa aum. “Na ena, oot maɗoɗ ele ukke! Aɗinu? I Yawe onigppa nug ehanittak hekkunihnu nai ɠagattag qeɗa amuɗ, amu Yawe Nug geha amu haen oh dabmedakku. Dabmettebeb amu, i oonihppanu laa nug nai amu tippaleb, aria Yawe Nugib nug epeɗidkku,” awa aum. Jonatan nug anam a, Dawit aha ugekke, Jonatan eɗua, aab okkaippa ukkom.