1 Samuel 2 - Nobonob Baibel

Hana nug unuqitta, Yawe binag meum

¹ Hana nug Yawe binag ma mattiaya, nug inam aum. “Da Yawenu amu, da ool gamag ahatte. Nuhig ehanittakppa amu, da ɠagattag daattem. Yawe Nug he, da kekeɗ dahilad imadttem. Aɗinu? Nug da ehaniɗe, da amunu enanagnab doottem.

² Laa nug oppiaawak, Yawe daatte bia, laa nug amubia ii daatte. Kayak laa ii daatte. Ihinig Kayak Nug kekeɗ ig nikkamanu ehanittak ihinig daatte, laa nug anam bia ii hette.

³ Na dada danab dilag nai tuɗidna, aib mattime. Ao, na hib guitta qak nai mattiak uue! Aɗinu? Yawe, Nug Kayak genab, Nug keeke oh dootte. Ao, Nug danab dilag hak epeɗidtte.

⁴ Yawe he, ban danab ɠagattag ag gai-iitta, lat qiiom bia daatteb. Nug he, danab nena qeppig ele, ag eɗun ɠagattag daatteb.

⁵ Yawe he, danab ag keeke oh ele amu, ag eɗun, keeke iitta ele daanna, ag danab laanu uɗat henana, ee daden mekkulagnu men doɗo aotteb. Ao, Nug he, danab ag enug daappig ele, ag gemu ee ele daatteb; ag enug iitta. Yawe Nug he, ah laa nug mattoi dayom amu, nug nid eblaih aɗit ele menuattom. Ao, Nug he, ah laa nug nid danab kuɗum menuattom ele, nug nid amu mahiadtte.

⁶ Yawe Nug he, danab ag mauhtteb; Nug he, danab mauhppig ele amu, ag eɗun hippaidtteb. Ao, Nug he, danab ag moɗppa niitteb; Nug he, danab mauhppig ele amu ag hippaidna oitteb.

⁷ Yawe Nug he, danab laa ag keeke iitta ele daatteb; Nug he, danab laa ag keeke kuɗum ele daatteb. Ao, Nug he, danab laa ag onilag iitta ele daatteb; Nug he, danab laa ag onilag ele daatteb.

⁸ Yawe Nug he, daɗek danab ag gappudppan ahan, ag nau ii daatteb. Ao! Nug he, ag uhuɗppa ii daatteb; ag aben enappa daatteb. Genab! Yawe Nug he, daɗek danab ag king tiigppan danab ele heɗep nena daatteb. Yo! Nug he, ag sia king, sia amu onig ele amu, ag sia amubiappa daatteb. Yawe Nug amu oh hekkunu elele. Aɗinu? Yawe Nug wan imu ohnab mameg daatte. Ao, Nug wan imu oh ma, babaittom daatte.

⁹ Yawe Nug nuhikkud danab ah ag nuhignu oo metta ii uuak kobol dim lamidtteb ele am atognoadtte. Ao, Nug he, nau hak danab ag gatatu ooppa daanna mauhtteb. Aɗinu? Danab ag akka, ag ahilag ɠagattagppa ena ii daatteb.

¹⁰ Danab ag Yawe ele ban hak bia hetteb amu, Nug heeb, ag nauhna autna aoglag. Genab! Yawe Nug hab aabppa dayaya, nuhig ɠagattagppa heeb, danab amu ag uug aoglag. Yawe Nug wan imuppan danab ah oh epeɗiadkku. Yawe Nug heeb, nuhig king am ɠagattag ele daakku. Ao, Nug laa king daakkunu goɗen gokkaɗakppa tituanom ele, Nug ɠagattag onig okkai ele nug metteb daakku.” Hana nug anam unuqittom.

¹¹ Hana nug anam unuqitta male, Elkana, Hana ele aa eɗuya, Rama gopiɗ, amge nid danab Samuel, nug Silo dayaya, mana mettak danab Eli waappa Yawe noobppa Yawenu ɗo maɗoɗnu uɗat heum.

Eli bekoɗ aa kobol naunab hepiɗ

¹² Elkana, Hana ele aa goya aabppa daaeheh, Samuel nug Eli ele Silo appa daapiɗ. Aa anam daaeheh, Eli bekoɗ, aa onilah am Hopni, Pinias ele, aa mana mettak uɗat hepiɗ, amge aa am danab nau; aa Yawenu, “Nug am keeke hamu,” doopiɗ.

¹³ Eli bekoɗ, a mana mettak danab amu, aa Yawenu anam doopiɗ amunu, aa inam hedapiɗ. Danab nug doɗ mana, Yawe medakkunu uɗia, nug mana mettak uɗat oh ha malowa, nug teppu laa dayom ele amu nug, nug baekkudppa ele ag amu lakkulagnu battieye, Eli bekoɗ aa heeh, maɗi nid ahilah laa nug huɗup aeg ewam ele aɗa ukka,

¹⁴ nug huɗup amu biliken ooppa ye no, aɗi teppu yom ele amu, nid amu nug teppu amu awa ukka, Eli bekoɗ mate aopiɗ. Nid aɗit amu aa danab doɗ main, Kayak mettaglagnu Silo goppig ele amu, aa Israel danab amu oh dilagppa anam hedapiɗ.

¹⁵ Hopni, Pinias ele aa haen oh anam hedapiɗ, amge deɗ laala aa kobol laa ele hepiɗ. Kobol amuam inam. Danab laa nug doɗ mana, Yawe medakkunu uɗia, nug amu hekkunu dayeye, mana mettak danab nug doɗ amunu ittag mana, Yawe ii mettom, haen amuppa Hopni, Pinias ele aa heeh, maɗi nid ahilah nug ukka, mana mettak mameg amegppa inam aum. “Mana mettak danab nug doɗ teppu battiak ele lakkunu oo ii daatte, nug teppu aab aɗuppa manak lakkunu oo hette amunu, na teppu maha laa geha iikku da meɗe! Nug teppu battiak ele awaknu uutte. Nug amu iinab aoma. Iitta! Nug teppu bau aakkuib aokkunab.” Maɗi nid nug anam attom.

¹⁶ Maɗi nid nug anam a, mana mettak mameg nug, “Na teppu bau aokkutnu am nai iitta, amge tatam laa ittag mana, Kayak metteb, dimppa na teppu aɗi aokkut amu, na aokkut,” ab amu, maɗi nid nug eɗua, inam akku. “Iitta! Geha iikkunab na teppu amu da meɗe! Na ii meɗakkut dayeb, da wagai mein aokkul,” awa akku. Nid aɗit amu, ahilah maɗi nid ele, ag anam hedappig.

¹⁷ Aa anam heyaya daadpiɗ, amge Yawe Nug kobol amunu ena ii doyom. Iitta. Nuhig neekkakppa amuam hipunin okkainab. Aɗinu? Doɗ ittag Yawenu amu, nid aɗit amu aa mana mettak amunu, aa keeke hamu bia doopiɗ.

Samuel nug Silo appa, Eli ele daapiɗ

¹⁸ Amu nid danab Samuel, nug Silo appa Yawe noobppa lamen enanag-epod linenppa hak tagakka, Yawenu ɗo maɗoɗ uɗat heum.

¹⁹ Nug Yawenu uɗat amu heehe, maɗ oh nug anig nug lamen elab laa, elab nuhig okkainu elele heum. Nug amu he, maɗ oh nug gamu nug ele aa doɗ manoya, Yawe mettaglahnu Silo tepiɗ, amu haen amuppa nug lamen amu awa ukka, Samuel mettom.

²⁰ Aa goya teya daaeheh amu, Eli nug itittak ena matom. Nug itittak ena amu nai imuppa matata, nug inam Elkana amegppa aum. “Ah nahip imu nug Yawe unuqitte, Nug he, nug nid menua, nug eɗua, nid amu Yawe mettom. Nug anam heum amunu, Yawe Nug heeb, aa nid laala ele, nid amunu aben aoglagnu menuglahnu ool daatte,” awa aum. Nug anam a amu, aa eɗuya, appalah diigppa gopiɗ.

²¹ Eli nug anam mattie ukke, Yawe Nug Hananu dabmaama ehanittom amunu, nug nid laala, nid danab ewam, amu nid ah aɗit ele menuattom. Nug nid amu menuatta dayeye, nid danab Samuel nug Yawe noobppa ena meum.

Eli, amu nug bekoɗ ele dilag nai

²² Aria, Eli nug kaino ma malom; nug am danab kainonab. Nug anam dayeye, danab ag nug bekoɗ aa Israel danab oh dilagppa kobol eheɗ hepiɗnu mattiegeg doyeye, aria ah ag mettid haknu peh lag danab ah appa qagmetteb ele, ah ag peh lag amu odppa laa dabmattanna, ehanadkkulagnu daappig amu, Eli bekoɗ aa ah amu ele niiegeg, ag amunu ele mattiegeg, Eli doyom.

²³ Eli nug nai amu doya, nug aa amelahppa aum. “Aa kobol nau heeheh, danab ah ag amunu mattiegeg doottem amu, aɗinu aa anam hettep? Aa kobol nau hettep.

²⁴ O da bekkalaɗ, aa hettep am nau. Aa nau am aib hepiɗ. Genab, nai ag aeg doomi, Yawenu danab ah oh ele dootteb amu, nai amuam ena iitta.

²⁵ O nid aɗit, danab laa nug layagppa hipunin heeb amu, Kayak Nug aa oolahppa gamag danab daakkunu elele, amge danab laa nug Yawe, nuhigppa hipunin heeb amu, aun nug aa oolahppa gamag danab daakku?” awa aum. Eli nug nug bekoɗ amelahppa anam aum, amge aa mamelahnu nai ii dabmedapiɗ. Aɗinu? Yawe Nug heeb, aa beɗulah nauhkkulahnu dabmeum.

²⁶ Eli bekoɗ aa anam hepiɗ, amge nid danab Samuel nug ena maama, Yawe noobppa, amu danab noolagppa ele nug ena oiya, am tuɗitta he, enaib dooppig.

Kayaknu danab laa nug Eli, nug buɗubnu ele, nug ahilagnu nai uug ele mattiom

²⁷ Aria, deɗ laa Kayaknu danab laa nug Eli toppa ta, nug Eli amegppa Kayaknu nai mattia, inam aum. “Yawe Nug inam atte. ‘Haen na alanad aɗi ag Paro waappa, Isip wanppa daaegeg, da miagib ahilagppa tule bemi.

²⁸ Haen amuppa da na alan anukkanu onig Aron, Israel dilag huu okkai ohppanu, da nug mana mettak danab daakkunu, nug dahil qaɗabppa dahil uɗat hekkunu, nug kalu danab ile muttuɗig enanag bette manakkunu, nug lamen enanag-epod tagakka, da noolppa oikkunu tituanmi. Amu aakkuib iitta. Da Aron buɗub oh ag mana mettak danab daaglagnu ain, da ag doɗ oh, Israel danab ah ag aab aɗunu ofa henana, manan da meɗaglagnu aon uɗitteb ele amu, da doɗ amu ohppanu teppu maha, ag Aron buɗub daatteb ele, da ag lakkulagnu maha amu mattami.

²⁹ Da amu mattami amunu, aɗinu na, amu na begapaɗ ele ag amunu elele iitta dabmenana, ag ofa iɗu iɗu, danab ah da meɗaglagnu ami ele amu, ag amunu, “Keeke hamunab,” doona, ag amunu maha ena laa ele aoglagnu hetteb? Eli na, amu na begapaɗ ele ag doɗ oh Israel danab ah ag manan, da meɗaglagnu aon uɗitteb ele amu, ag doɗ amu ohnu teppu maha enanag laa, ag amu aoglagnu ii ami ele amu, ag teppu maha amu ele aon lanana, ag titiɗna malappig. Amuppa, Eli na, na begapaɗ dilahnu binalah okkai doona, dahilnu am binal okkai iitta doottem. Aɗinu na anam hettem?’

³⁰ Amge na anam hettem amunu, Yawe, Israel dilag Kayak, Nug inam atte. ‘Anukka da ag Aron buɗub laa, ag na mamen anukka tiigppan uɗiak, ag haen oh da noolppa dahil ɗo maɗoɗ uɗat hekkulagnu nai qakken ami, amge gemu da nai imu attem. Ag amubia iinab hemana. Aɗinu? Aun aɗi ag da binal tutukku metteb amu, da ag binalag madakkul, amge aun aɗi ag dahilnu keeke hamu bia dootteb amu, da heppi, ag honopnab nokkulag.

³¹ Doye! Geha da heppi, na baenadppanu, amu na buɗunppanu ele laa nug kaino ma ii mauhma. Iitta. Ag kaino ii meppig oinna mauhkkulag amunu, ag oolagppanu kaino laa ii daama.

³² Amunu, na da daattemppa amu, na amuppa uug nau anidkkut. Da heppi, Israel danab ah ag ena oiglag, amge na buɗunppan danab laa, nug kaino ma iinab oimna.

³³ Amu na buɗunppan danab aun laa da uuppi, nug mana mettak danab daakku amu, nug uug huanaknab, oo doyak okkainab ele doyaya oiyebeb, ameg leb ele nekku. Amu na buɗunppan danab laa nug kaino mewowa ii mauhma; nug paha mauhkku.

³⁴ Am kobol amu oh genab bekkulag amu, amunu at am inam. Na begapaɗ aɗit, Hopni, Pinias ele, aa oh deɗ laippuppa mauhkkulah.

³⁵ Aa mauhkkulah, amge da heppi, danab laa, nug mana mettak uɗatnu oo metta ii uuak kobol dim lamitta, nug nuhig mana mettak uɗat da ool hette bia tutukku elele hekku amu, nug dahil mana mettak danab daakku. Nug dayebeb, da heppi, nug, nug buɗub ele ag mana mettak danab daaglagnu ɠagattag tuqa ii awak bia aɗaglag. Nug, nug buɗub ele ag king da eppelppa goɗen gokkaɗakppa tituanak aoglag ele, ag ag noolagppa dahil ɗo maɗoɗ uɗat hanhan hekkulag.

³⁶ Keeke amu oh beeb, aun aɗi ag na buɗunadppa daaglag amu, ag oolagppanu laa nug uɗia, mana mettak danab da heppi daakku ele amu, ag anen anen nug noobppa dup nona, nug ag silwa toea laippu, amu bret gaɗa laa ele madakkunu oo doyakppa oɗ mettaglag. Oɗ mettan, ag anen anen akkulag, “Na hena, da mana mettak uɗat laa meɗappe heinne, da amuppa ee aolomnu, oɗ medattem.” Na buɗun ag anam akkulag.’ ” Kayak Nug nuhig danab oɗeppa Eli amegppa anam aum.