1 Samuel 19 - Nobonob Baibel

Saul nug laala amelagppa ag Dawit qeppeg mauhkkunu aum, amge Jonatan nug Dawit ehanittom

¹ Am danab ah oh ag Dawitnu enanagnab dooppig amunu, Saul nug Jonatan amegppa, nuhikkud ehanittak amelagppa ele ag Dawit qeppeg mauhkkunu aum. Nug amelagppa aum, amge Jonatan nug Dawitnu enanagnab doyom,

² amunu nug ukka, Dawit antta, inam amegppa aum. “Na dabme! Da mamel Saul nug na mauhkkutnu aum amunu, butti buttua na dabmena autna awe! Na lokkumak aben ena aab okkai dimittim dad okkaippa anidna, na appa gona daye!

³ Na appa lokkumna daappe, am da butti geha da mama omalppi, dad na lokkumna daakkut ele, i amuppa gokkunih. Ii goɗa hippaidɗa, anam daaɗɗa, ii nahipnu mattignih. Ii mattiɗɗa, mama nug aɗi ab doyen amu, dimppa da na amenppa akkul,” awa aum.

⁴ Jonatan nug anam aum amunu, deɗ amu uue, wagɗe, deɗ amuppa nug mameg omala, dad okkai Dawit lokkuma dayomppa ukka, mameg amegppa Dawit nug uɗat ena heum, nug amunu amegppa anana, nug inam aum. “Dawit nug keeke eheɗ laa nahip-ppa ii heum. Iitta! Nug keeke heum amu, na ehanidkkunuib heum amunu, na, king, na nuhignu eheɗ laa hekkutnu amu, da ool ii daatte.

⁵ Haen Dawit nug Goliat, Pilistia ted, nug ele ban heya, nug daakku, o nug mauhkku, nug amunu ii dabmeum. Iitta. Yawe ehanitte, nug ban ha, Pilistia amu qe mauhe, nug Israel aɗi oh ehanatte, ag ban naɗi amu eɗidppig. Dawit nug amu he, na nug anidna, na nuhignu gaman ahom. Nug am eheɗ laa ii heum amunu, na nug qeppe mauhkku amu, na nuhigppa hipunin hekkut. Am aɗinu na diig ena iittappa anam hekkut?” Jonatan nug Saul amegppa anam aum.

⁶ Jonatan nug mameg amegppa anam a amu, Saul nug nuhig nai Kayak onigppa ɠagattag qetta, nug inam aum. “Genabnab genab, Yawe Nug bauklel daatte amu, genab amu bia da heppi, ag Dawit ii qeppeg mauhma,” awa aum.

⁷ Saul nug anam awowa, aria nug Jonatan uuitta ukkom. Nug ukke dimppa, Jonatan nug Dawit onigppa e, Dawit uɗie, amu Jonatan nug aɗi nai Saul nug aum amu, nug Dawit amegppa aum. Nug Dawit amegppa ana malowa, aria nug Dawit omala, Saul toppa ukke, nug daattom bia Saul toppa dayom.

⁸ Amu haen laa dimppa Pilistia ag uɗieg, Israel ele ban heegeg, amu Dawit nug nuhig ban danab ele ukkaeg, Pilistia ele ban heppig. Ag ban amu ɠagattagnab heeg, Pilistia ag ban amuppanu oolna goppig.

Saul nug Dawit qekkunu heum, amge Mikal nug Dawit ehanittom

⁹ Dawit nug Pilistia eɗattom dimppa, deɗ laa ouɗi nau Yawe noobppanu ukka, Saul uug nau mette, Saul ban gudkkud nuhig aɗa laugppa dayeye, Dawit nug ehanidkkunu harp qeum.

¹⁰ Dawit nug harp qeeqe, Saul nug ban gudkkud aɗom amu, nug Dawit yeeb mauhkkunu eum. Saul nug inam dabmeum. “Ban aeg amu ukka, Dawit ya, atula aeg laih ta, lagnu gilil ya, Dawit gililppa qataqeeb aiha daakku.” Saul nug anam dabmeum, amge nug ban eum amu, Dawit nug laippun dekkaɗa, oola ukkom.

¹¹ Dawit nug oola, lakka ukke, tuqan amuppa Saul nug danab laala ag gona, Dawit meidna daanna, deɗ amu uueb, wagɗeb ag Dawit qeppeg mauhkkunu maatte goppig. Maatte gona daaegeg, amu Mikal nug Dawit amegppa aum. “Na dabme! Na gemu ii oolna gokkut amu, butti ag na nidappeg mauhkkut,” awa aum.

¹² Mikal nug Dawit amegppa awowa, nug muɗi awa, nug muɗi amuppa Dawit ehanitta, gililppa ulah ibuppa me, wanppa no, Dawit amu aɗeɗe noa, oola ukkom.

¹³ Dawit nug oole, dimppa Mikal nug keeke laa adppa danab dottog bia hoippig, anttak nuhig am danab bia, nug amu awa, niiak balalppa me niieye, nug lamen laa awa, ad hoyak amu laittowa, amu meeme uɗig laala diia, ikki uɗug bia igippa me, anttak nuhig am danab niitte bia niiom.

¹⁴ Mikal nug anam he niieye, buttua Saul nug danab laala maatte, Dawit aoglagnu uɗippig ele amu, ag uɗieg, Mikal nug amelagppa aum. “Dawit nug oɗe,” awa aum.

¹⁵ Mikal nug anam amelagppa a, ag eɗun, Saul toppa goppig, amge nug ag amelagppa eɗun gona, akka amelagppa Dawit anidkkulagnu he ukkaegeg, nug tuɗitta aum. “Ag gona, Dawit nug abenppa niieb anidna, amu niiebeb, qaɗaqaɗ ele maon uɗippeg, geha da nug qeppi mauhkku,” awa aum.

¹⁶ Saul nug danab anam amelagppa a, danab ag eɗun gona, Dawit laug ooppa nona, keeke danab bia meeme uɗig igippa mak ele abenppa niie anidppig.

¹⁷ Am Saulnu danab ag anam anttona, ag eɗun gona, keeke anidppig amu, ag keeke amunu Saul aeg doyowa, nug Mikal amegppa aum. “Aɗinu na da anam buppuiɗme? Aɗinu na dahil kekeɗ ehanitte, nug da eppelppanu oola ukkom?” Ge Mikal nug aum. “Iitta! Dawit nug da amelppa, ‘Na da ehaniɗppe, oole gokkul am ena, amge na anam ii hekkut amu, da na nidappi mauhkkut.’ Dawit nug da amelppa anam aum,” awa aum.

¹⁸ Aria, haen amu ag anam heeg, Dawit nug Saul eppegppanu oola, Samuel gumitta, Rama ukkom. Nug ukka ta, nug keeke oh Saul nuhigppa heum amu, nug Samuel amegppa mattie, aria dimppa aa Naiot goya, oh daapiɗ.

¹⁹ Aa goya Naiot daaeheh, dimppa danab laa ag Saul amegppa, “Dawit nug Rama guguittak, Naiot appa daatte,” aon appig.

²⁰ Laa Saul amegppa anam aeg, nug danab laala maatte, Dawit aɗaglagnu goppig, amge haen ag gona, Naiot tena, ag propet huu laa ag propet nai mattiegeg anadppig. Samuel nug ahilag ikki, nug hibaitta dayeye, Kayak Ouɗi Nug Saulnu huu daappig, amu Nug ahilagppa uɗia he, ag digmena, propet nai madippig.

²¹ Ag anam heeg, laa aeg, Saul doyom amu, nug danab ameg laa maatte goppig, amge ag ele anamib gona, propet nai mehuqppig. Ag anam heeg, Saul nug danab ameg laa maatte goppig, amge ag ele gona, anamib heppig.

²² Saulnu huu amu oh ag anamib heeg, amu Saul nug ele aha, Rama ukkom. Nug Seku ukka, le moɗ okkai laa appa daatteppa amu, nug appa ta, nug oɗ mattom. “Samuel, Dawit ele, aa adeppa daattep?” awa oɗmak heum. Nug anam oɗ matte, ag nug amegppa appig. “Aa Rama guguittak, Naiot daattep,” appig.

²³ Ag Saul amegppa anam aeg amu, nug Naiot, Rama guguittak ukkom. Nug ukkom, amge haen nug ibppa ugekke, Kayak Ouɗi Nug nuhigppa ele uɗia, nug digma, propet nai mattiom. Nug anam propet nai mattiaya ukka, Naiot teum.

²⁴ Saul nug anam haaha ukka, Naiot ta, nug lamen elab amu uɗa awa, nug lamen elab, lamen amu iitta ele dayom. Nug ele Samuel amegppa propet nai mehuqom. Nug anam ha, dimppa nug lamen elab ele uɗak, lamen laa aakkuib beɗu hautak dayeye, deɗ amuppa nug amun, tuqan ele wanppa niiom. Nug anam niieye, danab ah ag diig amunu, “Saul nug ele propet ele qagmeppigte?” aon adappig.