1 Samuel 15 - Nobonob Baibel

Saul nug Kayak nai tappe neum

¹ Amu Samuel nug Saul amegppa aum. “Yawe he, da na Israel, ag am Yawenu danab ah amu, da na ahilag king daakkutnu goɗen gokkaɗakppa tituanidmi amunu, na Yawenu nai doye!

² Yawe Nukka Ɠagattag Oh Ele, Nug inam atte. ‘Israel danab ah, ag Isip uun uɗiglagnu uɗiegeg, Amalek danab ag eheɗ hadappig amunu, da Amalek heppignu bu madakkul.

³ Da amu hekkul amunu, na heppe, na Israel danab ele ag ahan, banelag gona, Amalek ele ban hena, ag Amalek oh, amu ahilkad keeke ohnab ele heppeg, ag dahilnuib, dahil pelemppa dayeg! Ag keeke laippu laa aibnab uuppeg dayom. Ag Amalek danab, ah, nid naunau, nid yuɗ ele, amu ahilkad makau, sipsip, kamel amu donki ele, ag amu ohnab aqappeg mauheg!’ ” awa aum.

⁴ Samuel nug Kayak oɗe awa, Saul amegppa anam a, Saul he, Israel danab ag aab laa onig Telaim, appa Saul toppa qagmeppig. Danab amunu 200,000 am Israel dilag huu okkai laalanu, Juda danab am 10,000.

⁵ Ag appa qagmeeg, Saul ag ele oh ahan, Amalek dilag aab okkaippa gona, aab amu guguittak amu, Saul he, nuhikkud danab laa ag appa le ippu qaɗaiettomppa lokkumna daappig.

⁶ Amu Ken buɗub ag Amalek guguittak daappig amunu, Saul nug ag dooglagnu nai imu ahilagppa me ukkom. “Israel danab ag Isip uun uɗiegeg amu, ag Ken danab, ag alalkad aɗi ag Israel, ahilagnu oo mauhaknab dooppig amunu, da dahilad daup ele ig Amalek aqadtata, ig ag ele aqadmata, ag ahan, laih ukkeg!” awa aum. Saul nug nai anam me ukke, Ken buɗub ag nai amu doon, ag ahan, laih goppig.

⁷ Amu Saul, nuhikkud daup ele ag anam daaeg ukke, Saul a, ag oh ahan, banelag gona, ag Amalek danab aab onig Hawila, amu aab laa onig Sur, ag aab aɗit amu gamalahppa, aben amu ohppa Amalek danab aqadppig. Sur am Isip wannu tom guguittak dayom.

⁸ Ag anam hena, Saul nug Amalek dilag king Agag aɗa, maniguitte, bau dayeye, Israel ag qep elabppa heeg, Amalek danab ah aɗi laa oh ag Yawenuib nuhig pelemppa daappig.

⁹ Saul, nuhikkud daup ele ag anam heppig, amge ag Agag qeeg ii mauhom; aria ag sipsip enanag, makau enanag, makau gaiɗ, balat ele enanag, amu sipsip gaiɗ, balat enanag ele, keeke laa oh ena dayom amu, ag amu ele heppeg, Yawenuib nuhig pelemppa daaglagnu uun, ag heeg, Yawenuib, pelemppa ii daappig. Ag doɗ ohnab, keeke laa ohnab ele heppeg, Yawenuib nuhig pelemppa daaglagnu uun, ag doɗ, o keeke nau, o doɗ, o keeke gai-iitta aakkuib, ag heeg, Yawenuib nuhig pelemppa daappig.

Kayak Nug Saul dimettom

¹⁰ Saul anam he, Yawe Nug nuhig nai imu Samuel mettom.

¹¹ “Saul nug da dimeɗa, dahil nai tappe neum amunu, da hei, nug Israel dilag king daatte amu, da amunu oolppa uugnab doottem,” awa aum. Yawe Nug Samuel amegppa anam a doya, Samuel nug oo uug ele daya, nug tuqan amu oh Yawe unuqittom.

¹² Samuel nug tuqan amu oh anam ha, buttua nug aha, Saul mattia anidkkunu ukkom, amge laa nug nug amegppa aum. “Iitta. Saul nug Karmel ukkom. Ukka, appa amu nug men okkai laa, danab ah ag amu anidna, Saul dabmena, binag mekkulagnu qappe dayeye, nug eɗua Gilgal ukkom,” awa aum.

¹³ Amu Samuel nug nai amu doya, nug Saul dim lamitta ukka te, Saul nug Samuel amegppa aum. “Yawe Nug na itidkkunu ool daatte. Da Yawenu nai aakku dim lamitten, Nug da aɗi hekkulnu aum amu, da aakku hemi,” awa aum.

¹⁴ Saul nug anam a, Samuel nug aum. “Anam daatte dayeb amu, aɗinu da sipsipnu gayak doottem? Aɗinu da makau gaaegeg doottem?” awa aum.

¹⁵ Samuel nug Saul anam oɗ mette, Saul nug aum. “Dahilad daup ag Amalek danab eppegppan aonna, ag aon uɗippig. Ag sipsip, makau enanag ele aqaeg ii mauhppig. Iitta. Ag amu hekkulagnu uun, ag doɗ amu Yawe, nahip Kayak, ag doɗ amu main, Nug mettaglagnu aon uɗippig, amge keeke laa oh amu, ig heut, am Yawenuib nuhig pelemppa daatteb,” awa aum.

¹⁶ Saul a amu, Samuel nug aum. “Uuppe! Da Yawe Nug tuqan da amelppa aɗi aum amu, da nai amu appi dookkut,” awa aum. Nug anam a amu Saul nug aum. “Na appe doyei!” awa aum.

¹⁷ Saul a, Samuel nug aum. “Anukka na nakka na nahipnu amu, na am danab okkai iitta doome, amge na Israel dilag okkai beme. Ao, Yawe Nug na Israel dilag king daakkutnu goɗen gokkaɗakppa tituanittom.

¹⁸ Yawe Nug anam he, na king daattem, amu Nug na amenppa na keeke laa hekkutnu anana, Nug aum. ‘Na gona, Amalek danab, ag am nau hak danab amu, na gona heppe, ag dahilnuib, dahil pelemppa dayeg! Na ag ele ban heppeg ukkeb, ag iitta meig!’ Yawe Nug na anam hekkutnu aum

¹⁹ amunu, aɗinu na nuhig nai ii dim lamidme? Aɗinu na Amalek dilag keeke, Yawe Nug ag keeke amu ohnab heppeg, nuhignuib, nuhig pelemppa daaglagnu aum amu, aɗinu na keeke amu aokkutnu na eppen pahanab bahin aome? Amuppa amu, na Yawenu neekkakppa eheɗ heme,” awa aum.

²⁰ Samuel nug anam a amu, Saul nug aum. “Iitta! Da Yawe oɗe dim lamidmi. Da Yawe Nug da aɗi hekkulnu aum amu, da ukken hemi. Da Amalek danab ah aɗi, amu ahilkad keeke oh ele hei, am Yawenuib nuhig pelemppa daatteb, amu da ahilag king, Agag, da nug awe uɗimi.

²¹ Daup dahilad ag sipsip enanag, amu makau enanag ele Amaleknu aoppig, doɗ amu ag Yawe, nuhignuib, nuhig pelemppa daappig amu, ag doɗ amu aon, Gilgal ippa mana, Yawe, nahip Kayak, ag ippa manadna, Nug mettaglagnu aon uɗippig,” awa aum.

²² Saul nug anam aum, amge Samuel nug eɗua amegppa aum. “Yawe Nug manaknu ofa, amu mana mettak laala elenu oo hette, amge Nug danab ag Nug oɗe dim lamidkkulagnu amu, Nug amunu oo huanaknab hette. Yawe oɗe dim lamittaknu, am mana mettak eɗidtte. Ao, Yawenu nai doon dim lamittaknu, am sipsip dawai ittag mana, Kayak mettaknu eɗidtte.

²³ Aɗinu? Kayaknu nai tappe naknu am hipunin nau; eman hak bia. Beɗuppa tak kobol am ele hipunin nau; kayak hambuppuak dottolkad danab ag laulkadppa maatteg daatteb noolkadppa dup noa binag mak bia. Na Yawenu nai dim lamidkkutnu uume amunu, Nug king dayaknu ehah na eppenppa, na buɗunad eppelagppa ele daakkunu uutte,” awa aum.

²⁴ Samuel anam a, amu Saul nug aum. “Genab, da hipunin hemi. Aɗinu? Da Yawenu haknunab anak, amu na oɗen ele dim ii lamidmi. Da dahilad daup baɗadmi amunu, da ahilag nai dim lamidmi,

²⁵ amge na dahil hipunin uhuqna meɗappe, da Yawe noobppa dup noin binag mekkulnu amu, da na ele, i oh eɗuɗ, Kayak binag maknu abenppa gokkunihnu ɠagattag unuqidttem,” awa aum.

²⁶ Saul nug anam a, Samuel nug aum. “Da na ele ii gomaɗa. Na Yawenu nai dim lamidkkutnu uume amunu, Yawe Nug king dayaknu ehah na eppenppa, na buɗunad eppelagppa ele daakkunu uutte,” awa aum.

²⁷ Samuel nug anam mattiowa, nug eɗua gokkunu eɗuewe, Saul nug Samuel ii gomanu Samuelnu lamen elab aɗe pattiɗom.

²⁸ Lamen pattiɗe amu, Samuel nug Saul amegppa aum. “Na he, lamel pattiɗom, amubia Yawe Nug gemu Israel dilag king dayaknu ehah nahip-ppanu pattiɗa awom. Nug pattiɗa awa, nug danab laa, danab amu nug na eɗidtte amu, Nug danab amu uɗat amu hekkunu medakku.

²⁹ Yawe, Nug am Israel dilag Kayak, Nug binag amahlak oppiaawak ele amu, Nug ham-ii-bubutte. Nug dabmak nuhig ele ii eɗutte. Nug am danab iitta amunu, Nug ig danab, ig keeke hekkunignu atata, dabmak eɗut, keeke laa hettem amu, Nug amubia iinab hette,” awa aum.

³⁰ Samuel anam a, Saul nug aum. “Da hipunin hemi, amge dahilad danab ah Israel, amu dilag ikki danab, amu Israel laa oh ele, ag dahilnu eheɗ doomnanu, na ag noolagppa dahil nai imu dim lamidnana, amuppa na binal mekkutnu oɗ medattem. Dahil nai am inam. Da Kayak noobppa dup noin binag mekkulnu amu, na da ele oh eɗuɗ, Yawe, nahip Kayak, Nug binag mak abenppa goɗu!” awa aum.

³¹ Saul nug anam a, Samuel nug eɗue, nug ele goya, Saul nug Yawe noobppa dup noa binag meum.

³² Saul nug Yawe binag me, Samuel nug aum. “Ag Amalek dilag king aon, dahilppa uɗieg!” awa aum. Nug anam a, ag aon uɗiegeg, Agag nug uug ii doya uɗiaya, nug inam dabmeum. “Saul he, da ii mauhmi; gemu ele ag heppeg, da ii mauhpa.” Nug anam dabmeum.

³³ Agag nug anam dabmeum, amge Samuel nug aum. “Na qep elabppa hee, nid anilkad kuɗum ag nid iitta daappig, amubia na anin nug ah oolagppa nid iitta daakku,” awa aum. Nug anam awowa, nug Gilgal appa, Yawe noobppa Agag makkuɗe mauhom.

³⁴ Aria, amu dimppa Samuel nug aha, Rama ukke, Saul nug nug laugppa, Gibea appa ukkom.

³⁵ Amu Samuel nug Rama ukka daye ukke mauhom. Nug appa dayaya, haen amu oh nug baula Saul ii anttom, amge nug Saulnu oo uug dayeye, nuhignu gayom. Yawe amu, Nug Saul Israel dilag king daakkunu meum amu, Nug amunu oo uug dayom.