1 Samuel 14 - Nobonob Baibel

¹ Ag anam daaegeg, deɗ laa Saul bekka Jonatan nug aha, ehanittak nid bau nuhig, nid amu nug Jonatannu guppiɗ, ban, lat, keeke mawom ele amu, nug nid amu amegppa aum. “Ahappe, i qauko ikki oppoɗu noak laih umuppa, Pilistia daattebppa goɗu!” awa aum. Nug nid amu amegppa anam aum, amge nug mameg amegppa amunu ii aum.

² Amu haen amuppa Saul nug aab onig Gibea, aab amu daugppa, ee aeg mumuɗaknu abenppa, appa dayom. Aben amuppa am ad laa onig pomigranet daye, Saul nug ad amu waappa dayom. Danab, ebqak ahilag am 600 keeke, ag nug ele aben amuppa daappig.

³ Aria, danab Saul ele daappig amu, ag oolagppan laa am Ahaiya, nug am mana mettak danab, nug lamen enanag-epod takkom. Ahaiya mameg am Ikabod awag Ahitup. Aa mamelah am Eli bekka Pinias. Eli am Yawenu mana mettak danab, Silo dayom. Danab 600 Saul ele daappig amu, ag oolagppan laa, nug Jonatan ukkom ii doyom.

⁴ Amu ib qauko ikki oppoɗu noakppa gotte, Jonatan nug ib amu dim lamitta ukka, Pilistia daappigppa gokkunu dabmeum ele amu, aben laappa ib amu heqo laih laih oh bai daapiɗ; bai laih dayom am onig Boses, laih am Sene.

⁵ Bai laa heqo laih, yawalti uɗitteppanu dayom, amu aab onig Mikmas atu amuppa dayom. Bai laa heqo laih, yau uɗitteppanu dayom, amu aab onig Geba atu amuppa dayom.

⁶ Amu Jonatan, nuhig bannu keeke mawaknu nid ele aa goya goya, Jonatan nug nid amu amegppa aum. “Ahappe, i tuɗidɗa, Pilistia danab, ag Kayak ii dim lamidtteb ele, i ag daattebppa goɗu! I anam gopuɗ, Yawe Nug ehanitkkutai. Aɗinu? Ban eɗittaknu am, Yawe Nug danab gane daattebnu ii dabmette. Iitta! Kuɗumtai daatteb, o iitta laippu laippu aakkuib daattebtai; amu oh Kayaknu neekkakppa am keeke hamu. Nug laa ehanidkkunu dabmette amu, nug ehanidtte, aakkuib,” awa aum.

⁷ Jonatan nug anam mattie, nuhig bannu keeke mawaknu nid nug amegppa aum. “Na aɗi dabmettem amu, na anamib he! Da meul ohppa na ehanidkkulnuib daattem,” awa aum.

⁸ Nug Jonatan amegppa anam a, Jonatan nug oɗeppa awa aum. “Anam dayeb amu, ahappe, i ib gamag imu mataɗɗa, goɗa hepuɗ, Pilistia ag anitkkulag.

⁹ I anam hepuɗ anitna, ag, ‘Aa ig amenig meya daapeɗ, ig aa daattep-ppa gokkunig,’ appeg amu, i aguppa daaɗa, amelag mekkunih. I ag daattebppa ii gomaɗa.

¹⁰ Amge ag, ‘Aa ig daattemppa uɗieɗ!’ akkulag dayeb amu, i ag daattebppa tekkunih. Aɗinu? Ag anam appeg amu, i aakku doognih, Yawe Nug Pilistia danab amu aakku i eppenihppa ma malom. Nai amuam i anam doognihnu at ihinih daakku,” awa aum.

¹¹ Jonatan nug anam a, aa heeh, Pilistia ag anatna, ag akka akka appig. “Antteg! Hibru danab ag wan oɗeppa akka akka lokkumppig eleppa, ag amuppanu aɗeɗe uɗitteb,” aon appig.

¹² Ag akka akka anam anana, ag Jonatan, amu nuhig bannu keeke mawaknu nid ele onilahppa eppig. “Aa ihinigppa uɗipeɗ, ig doyak tutukku matagnig!” aon appig. Ag anam aeg, Jonatan nug nuhig bannu keeke mawaknu nid amegppa aum. “Yawe Nug Pilistia danab amu Israel eppelagppa meum amunu, na da dim lamiɗpe teɗu!” awa aum.

¹³ Nug anam a, Jonatan nug Pilistia daappigppa tekkunu eppeg, baeg eleppa aben bai eleleppa te, nid bau nug gukkuitta dim lamitta teum. Aa anam teya, Jonatan nug digma, Pilistia dilag daup laala aqeeqe, Jonatannu bannu keeke mawaknu nid nug ele dim lamitta aqom.

¹⁴ Amu tatam digma aqak amuppa amu, Jonatan, nuhig bannu keeke mawaknu nid ele amu, aa danab 20 keeke aqeh mauhppig. Aa aqak uɗat hepiɗnu aben amu, am wan nakokib.

Israel danab ag ahan, Pilistia dilag daup lamadppig

¹⁵ Jonatan, nuhig bannu keeke mawaknu nid ele aa anam heeh, Pilistia dilag daup laa oh, laa ag haen tutu dayaknu aab kalak ahilagppa daaegeg, laa ag haen tutu dayaknu aab kalak dimittim daappig ele amu, ag amu doyeg, wan uɗale, Kayak he, ag eheɗ baɗan,

¹⁶ ag oolegeg, Saulnu daup ag kekeɗ maadkkulagnu, Benyamin wanppa aab onig Gibea, aab amu guguittak daappig, ag Pilistia dilag daup oolegeg anadna,

¹⁷ ag Saul amegppa amunu aeg, Saul nug, daup laa nug guguittak daappig amelagppa aum. “Ag dahilad daup ebaqadna, aun nug ii daatte antteg!” awa aum. Nug anam a, haen ag anam hena amu, ag Jonatan, nuhig bannu keeke mawaknu nid ele, aa ii daapiɗ anidppig.

¹⁸ Amu haen amuppa Kayaknu Tituanak Nainu Kunup Gibea appa, Israel dilag ban danab daappigppa dayom amunu, Saul nug Ahaiya, nug am mana mettak danab, nug nug amegppa aum. “Na Kayaknu Tituanak Nainu Kunup aon uɗie!” awa aum.

¹⁹ Saul nug mana mettak danab Ahaiya amegppa anam mattieye, oqotti Pilistia dilag haen tutu dayaknu aab kalakppa okkainab ahom amunu, Saul nug Ahaiya amegppa aum. “Uuppe, ig ban hekkunignu gokkunig amunu, Tituanak Nainu Kunup aon aib uɗime!” awa aum.

²⁰ Anam ukke, Saul he, nuhikkud daup oh ag qagmeeg, Saul ag ele oh ban hekkulagnu goppig. Ag gona, Pilistia ag kaaka aqe, ag akka akka qep elabppa nug qena aqaegeg anidppig.

²¹ Amu Pilistia ag anam heegeg, Israel danab laala ag Pilistia ag ban hekkulagnu uɗieg, ag ele uɗin, Pilistia dilag haen tutu dayaknu aab kalakppa daappig ele amu, Israel danab amu ag ahan, Israel dilag daup, Saul, Jonatan ele daappig amu, ag ag ehanadkkulagnu Israel gukkuadna goppig.

²² Israel amu ag anam heeg, haen Israel laa ag matatun gona, Epraim wanppa qauko qauko daattebppa akka akka lokkumppig ele amu, ag Pilistia oolppig doon, ag ele ahan, Israel dilag daup ehanadna, Pilistia eheɗ lamadppig.

²³ Amunu deɗ amuppa Yawe Nug Israel ehanatta, Pilistia eppelagppanu diiom, amu Israel ag Pilistia lamadna gona, aab onig Betawen eɗidna goppig.

Jonatan nug uppuh leppu nakok laum

²⁴ Amu Saul nug deɗ amuppa Kayak onig awa, nuhig nai ɠagattag qetta, inam aum. “Israel daup laa nug deɗ imuppa, aam ii noobob, da dahilad kekeɗ nob nau elele ii madappi, ee nakok laa lakku dayeb amu, nug eheɗ laa awaknu anak waappa dayaɗ!” awa aum. Saul nug anam aum, Israel ag oolagppan laa nug ee nakok laa ii laum amunu, ag uug nau daan oippig.

^25-26 Ag deɗ amuppa anam hamu daappig, amge deɗ amu ii malakppa Israel daup oh ag atu laa, atu amuppa ad kuɗum daatteb amu, ag atu amuppa tena, appa uppuh leppu huanak ele anidppig. Atu amuppa uppuh leppu ambak dayom, amge danab ag Saulnu nai Kayak onigppa ɠagattag qak, ag ee ii lamananu aum doon, lanaknu baɗappig amunu, danab laa nug uppuh leppu amu nakok laa iinab laum.

²⁷ Saul nug Kayak onig awa, daup ag ee laa ii lamananu nai ɠagattag qetta aum, amge Jonatan nug mamegnu nai amu ii doyom amunu, nug uppuh leppu dayom abenppa ta, nug nuhig dudqak hokkat ikki duttune, uppuh leppun teɗ ooppa no, uppuh leppu nakok laa awa laum amunu, nug beɗu eɗua, ɠagattag qeum.

²⁸ Jonatan nug uppuh leppu amu lana male, daup laa nug amegppa aum. “Na mamen nug Kayak onig awa, ig nuhikkud daup, ig gemu ee laa lamatanu nai ɠagattag qetta inam aum. ‘Danab laa nug ee laa lakku dayeb amu, nug eheɗ laa awaknu anak waappa dayaɗ!’ awa aum. Nug anam aum amunu, ig daup nuhikkud, ig gai-iitta oittem,” awa aum.

²⁹ Nug anam a, Jonatan nug aum. “Da mamel nug he, Israel oh ag uug dootteb. Imu antte! Da uppuh leppu imu nakok lami amunu, da beɗul paha eɗua ɠagattag qeum.

³⁰ Da mamel nug nai amu ii alo amu, danab ag Pilistia dilag ee keeke aoppig amu, ag amu lalob am ena. Ag anam helob amu, ig gemu danab huanak aqadmut amu, ig amu eɗittak, huanaknab aqadlom,” awa aum.

³¹ Deɗ amuppa amu Israel ag digmena, aab onig Mikmas appa ag Pilistia aqadna gona, aab onig Aiyalon batak aqadppig. Ag anam hena, ag beɗulag gai-iitta meum.

³² Ag beɗulag gai-iitta me, enug eheɗ ele aqom amunu, ⌊deɗ amu male, ag Saulnu nai ɠagattag, nuhig haen am aakku iitta me,⌋ Israel daup ag dabmak pehettak iitta eleppa sipsip, makau okkai, makau nakok ele kekeɗ dilagppa diippig amu, ag amu diin aqana, mauhnoak wanppa tuqan, teppu tiig ele lappig.

³³ Ag anam heegeg, laa ag Saul amegppa appig. “Antte! Danab ag teppu umu tiig ele latteb amunu, amuppa ag Yawenu ɗo tippalna, hipunin hetteb,” aon appig. Ag anam aeg, Saul nug nai amu doya, nug aum. “Ag genab Kayak nai dim lamidkkulagnu aakku uuppig!” awa aum. Nug anam anana amu, nug nai tuɗitta aum. “Ag paha men okkai laa duttunppeg, itoɗia teebeb, duttunppeg itoɗia neebeb uɗiaɗ!” awa aum.

³⁴ Nug anam a, ag heeg, nug aum. “Ag danab oolagppa oinna, inam appeg doyeg! ‘Danab anen anen ag makau, o sipsip aon uɗin, ippa baalag otaɗadna tuqana laig! Ag teppu tiig ele lana, Yawenu ɗo tippalna, hipunin aib heppig!’ ” awa aum. Saul nug anam a, danab oh ag doɗ ahilkad tuqan amuppa akkan gona, appa baalag otaɗadppig.

³⁵ Ag anam heeg, Saul nug Yawenu qaɗab qeum. Nug deɗ laa anam ii heum. Iitta! Imuam digmak haen nug amu heum.

³⁶ Ag anam heeg ukke, Saul nug aum. “Ig ahat banelag gota, tuqanppa ig Pilistia danab aqadtata, ahilag keeke aopput ukkeb, wagkkaɗkku. Ig aqapput, laa ii daama,” awa aum. Nug anam a, daup ag, “Na aɗi dabmettem amu, na anam hekkut, aakkuib,” aon appig. Ag anam appig, amge mana mettak danab nug aum. “Tatam ig Kayak amunu oɗ mettagnig,” awa aum.

³⁷ Nug anam aum amunu, Saul nug Kayak oɗ mettom. “Ig banelag nota, Pilistia aqagnigte? Ig nota hepput amu, na ag ig eppenigppa mekkutte?” Saul nug anam oɗ mettom, amge Kayak Nug nai laa haen amuppa nug oɗeppa ii awa, amegppa keeke laa ii aum.

³⁸ Kayak Nug nai laa ii aum amunu, Saul nug aum. “Ag ban daup ikki danab daatteb amu, ag oh uɗieg! Ig hettoɗitta, aun nug gemu aɗi hipunin heum amu, ig anidtu!

³⁹ Yawe, Nug Israel danab ah, ahilag kekeɗ eppelagppan eɗua diitte amu, Nug genab bau daatte, genab amubia aun nug hipunin heum amu, nug mauhkku. Genab, da bekkal Jonatan nug hipunin amu heum dayeb amu, nug mauhkkuoitte,” awa aum. Nug anam aum, amge danab laa nug nai nakok laa ii mattiom.

⁴⁰ Ag anam heppig amu, Saul nug nuhikkud daup amelagppa aum. “Ag laih appa daappeg, da bekkal Jonatan, da ele, i iguppa daagnih,” awa aum. Nug a, laa ag appig. “Na aɗi hekkutnu dabmettem amu, na anam hekkut, aakkuib,” ag appig.

⁴¹ Ag anam aeg, Saul nug Yawe, Israel dilag Kayak, nug Nug unuqitta aum. “Laa hipunin heum amunu, na gemu oɗmak dahilnu nob laa ii meɗame doottem, amu na aun hipunin heum ippuniɗkkutnu ool daatte,” awa aum. Saul nug anam unuqitta awowa he, ag om ena yaaeg, Jonatan, o Saul ippunattom. Daup laa am iitta.

⁴² Anam be amu, Saul nug aum. “Om ena yaak da, da bekkal Jonatan ele, ihinihnu heppeg, ig anidtu!” awa aum. Nug anam a, ag om ena yaaeg, Jonatan ippunattom.

⁴³ Anam be amu, Saul nug Jonatan amegppa aum. “Na aɗi heme amu, na appe doyei!” awa aum. Nug anam a, Jonatan oɗeppa awa aum. “Da uppuh leppu nakokib dudqak hokkat dahil igippa ye, awen lami. Da amu hemi amunu, da gemu da amunu mauhkkulnu daattem amunu, da mauhkkul,” awa aum.

⁴⁴ Nug a, Saul nug aum. “Jonatan, da genab heppi mauhkkut. Da anam ii hekkul dayeb amu, Kayak Nug bu okkainab meɗakkunu ool daatte!” awa aum.

⁴⁵ Saul nug anam aum, amge daup laa ag appig. “Jonatan nug he, ig Israel, ig Pilistia lamadmut amunu, nug mauhkkute? Iittanab iitta! Kayak Nug Jonatan eppegppa gemu he, ig Israel ig ehanittak okkainab aomut amunu, Yawe Nug genab bau daatte, genab amubia laa nug keeke eheɗ laa Jonatan nuhigppa iinab ii hema,” aon appig. Daup ag anam appig amunu, kobol amuppa ag hena, Jonatan mauhak eppegppanu eɗun aoeg, Jonatan ii mauhom.

⁴⁶ Aria, amu dimugppa amu, Saul nug Pilistia lamadkkunu uue, Pilistia ag gona, ag wanelagppa daappig.

⁴⁷ Amu Saul nug Israel dilag king ba daye, nug nuhikkud daup ele ag Israel dilag kekeɗ oh ele ban heppig; kekeɗ ag ele ban heppig, amuam Moap danab, Amon danab, Edom danab, king laala ag Soba wanppa daappig, ahilkad daup ele, amu Pilistia danab ele. Saul, nuhikkud daup ele ag ban amu hena, kekeɗ eɗadppig.

⁴⁸ Laa ele amu, Amalek danab ag banelag uɗin, Israel eheɗ hattana, ahilkad keeke aon goppig ele amu, Saul, nuhikkud daup ele banppa wagainab mena, ag Amalek eɗadppig amunu, Israel ag baula Amalek waappa ii daappig.

Saul baekkudppa ele onilkad

⁴⁹ Saul bekkod am Jonatan, Iswi, Malkisua ele. Nug aɗeg tatamnu am onig Merap, amu nug dimugppan am onig Mikal.

⁵⁰ Nug wau am Ahinoam, nug am Ahimas aɗeg. Danab onig Apner nug am Saulnu ban daup ikki anuqak. Apner mameg am onig Ner. Ner nug am Saul mameg nakok.

⁵¹ Saul mameg Kis, amu Apner mameg Ner, aa oh am danab onig Abiel bekoɗ.

⁵² Amu haen Saul nug king dayeye, nug nuhikkud daup ele ag hanhan Pilistia ele ban eheɗ heppig amunu, haen adekkuppa Saul nug Israel danab laa, nug am danab ebehi ele, o nug am danab nug ooppa ɠagattag doyak ele amu, Saul nug danab amubia antta, nug danab amu nuhig daup daakkunu tituanom.