1 Samuel 12 - Nobonob Baibel

Samuel nug uɗat nuhig uukkunu, Israel danab ah amelagppa nai maditte

¹ Amu dimppa Samuel nug Israel danab ah oh amelagppa aum. “Ag da aɗi hekkulnu appig amu, da nai ahilag doye hein, da king laa ag gumadkkunu nug abenppa mei daatte.

² Da nug king abenabppa mei daatte amunu, gemu nug ag gumattatta, ulum madakkunu daatte. Da kaino mei, ikkil uɗug umimi beum. Da bekkalad ag okkai mena, ag oolagppa daan oitteb. Da nid bau dayeye, da digmein, ulum mattaiyi uɗie, gemu batak.

³ Amu gemu da ag noolagppa dayeye, ag amelagppa imu attem. Da ahilagnu eheɗ laa hemi dayeb amu, ag geha Yawe noobppa, king Yawe nug goɗen gokkaɗakppa tituanom, nug noobppa ele, ag geha appeg doyei! Da danab laanu makau, o donki yabbia aomite? O iitta, da hambuppuak kobolppa danab laanu keeke aomite? O iitta, da ag gumadmi, amuppa da ɠagattag dahilppa danab laa hei nauhomte? O iitta, epeɗiakppa da danab laa eppegppanu lokkumakppa eheɗ haknu ehanittak aomite? Da keeke amubia laa hemi dayeb amu, ag appeg doyen, da bappaidkkul,” awa aum.

⁴ Samuel nug anam a, danab ah ag appig. “Iitta! Na hambuppuak kobolppa ihinig keeke laa ii aome; na gumaknu ɠagattag nahip, na amuppa he, ig laa ii nauhmut. Na ihinig keeke yab kobol biappa laa ii aome,” aon appig.

⁵ Ag anam aeg, Samuel nug aum. “Yawe, king Nug goɗen gokkaɗakppa tituanom ele amu, aa gemu ahilag nai dahilnu, da ahilagppa eheɗ laa ii hemi, aa gemu nai amu aakku dooya malapiɗ,” awa aum. Nug anam a, danab ah ag appig. “Genab, Yawe Nug aakku doya malom. ⌊Ig nai ihinig baolignignu elele iitta,⌋” aon appig.

⁶ Ag anam aeg, Samuel nug nai tuɗitta aum. “Yawe, Nug Moses, Aron ele tituanatowa, Nug ag gemu daatteb, ag mamelkad aɗi omalatte, ag Isipnu ahan, ippa uɗippig.

⁷ Amunu ag gemu ippa hippaidna daappeg, da Yawe, Nug ag, amu ag mamelkad aɗi ele ehanadkkunu kobol genab tutukku okkai ele hattom, da amunu ag daulagppa eɗua dokkunu appi dooglag.

⁸ Am inam. Ag mamelkad aɗi, Jakop, nug baekkudppa ele ag ahan, Isip ukkaeg, haen ukke, dimppa Isip danab ag eheɗ hattegeg, Israel ag amunu Yawe amegppa gaaeg, Nug ehanatta, Moses, Aron ele maate, aa ag Isip uun, wan imuppa daaglagnu anuqya omalatteh, ag uɗin, wan imuppa daappig.

⁹ Amge ag Yawe, ahilag Kayak, ag Nug daulag atie, Yawe Nug he, Hasor dilag ban daup ikki Sisera, nuhikkud daup ele, amu Pilistia dilag daup, amu Moap dilag king, nuhikkud daup ele, ag oh haen anen anen uɗin, Israel ele ban henana, ag Israel eɗadppig.

¹⁰ Kekeɗ ag Israel anam eɗatteg, Israel ag Yawe amegppa, ‘Ig na dim metat, ig kayak hambuppuak Bal, Astoret ele iɗu iɗu waalagppa daata, oɗelag dim lamidmut. Ig amu hemut amunu, ig hipunin hemut. Amge na ehanigna, kekeɗ ihinig eppelagppanu awigppe, ig naib waatppa daat, na oɗen dim lamidkkunig. Ig nahip kobolib hekkunig,’ aon appig.

¹¹ Ag anam heeg, Yawe Nug ahilag unuqittak doya, Nug Gideon, Bedan, Jepta, amu da ele meikke uɗimut. Nug meikke uɗit heut, ag Israel, ag kekeɗ ahilkad eppelagppa ii daappig. Iitta. Ag baɗak iittappa daappig.

¹² Yawe anam he ukke, dimppa ag Israel, ag Amon dilag king Nahas, nug ag ele ban hekkulagnu uɗieye anidna, ag Yawe, ahilag Kayak, Nug ahilag king daakkunu uun, ag da amelppa appig. ‘⌊Yawe ii gumigma.⌋ Iitta! Ig na king laa ig gumigkkunu megakkutnu oonig daatte,’ aon appig.

¹³ Ag king gumadkkunu ippu tituanppig amunu, king ag tituanppig am iikku daatte. Ag nug king daakkunu Yawe oɗ mettaeg, Nug iikku mattom.

¹⁴ Nug iikku daatte amunu ag, amu ahilag king ele, ag oh Yawe, ahilag Kayak, ag oh nuhignu ag ebehilag oh bodoetta le meeb, ag Nug waappa daan Nug oɗe dim lamidkkulag dayeb, ag nuhig nai doon dim lamidkkulag dayeb, ag nuhig ɗo tabappeg ii nekku, ag genab Nug dim lamidkkulag dayeb amu, ag enaib daaglag.

¹⁵ Amge ag Yawenu nai doon ii dim lamidkkulag dayeb, ag nuhig haknunab anak tabappeg nekku dayeb amu, Nug ag mamelkad aɗi dilagppa heum bia, Nug ag eheɗ hadakku.

¹⁶ Anam daatte amunu, ag dayeg! Ag daanna, ag keeke okkai laa Yawe heeb anidkkulag.

¹⁷ Gemu am wit meu awak haen, gu nakok laa ii nak haen, amge da Yawe Nug heeb, hakkaɗ qeebeb, gu ele nekkunu unuqidkkul. Da anam unuqidppi, Nug anam heeb, keeke amu anam beeb, ag aakku inam dooglag: ‘Ig Kayak Nug ihinig king daakkunu uut, danab nug ihinig king daakkunu amut amu, amuppa ig eheɗ hemut.’ Ag anam dooglag.” Samuel nug anam aum.

¹⁸ Samuel nug anam awowa, nug unuqitte, Yawe he, hakkaɗ qak, gu ele neum. Ne amu, danab ah oh ag ebehilag oh Yawenu bodoetta le meum. Ag Yawenu anam doon, Samuelnu ele anam dooppig.

¹⁹ Danab ah ag anam doon, ag Samuel amegppa appig. “Danab naɗi, ig hipunin kuɗum hetata daamut, amge amu aakkuib iitta. Iitta! Ig gemu tuɗidta, hipunin laa ele hemut. Ig Yawe Nug ihinig king daakkunu uut, na king laa tituanppe, ig gumigkkunu oɗ mettamut amunu, Yawe heeb, ig mauhmatanu amu na Yawe, nahip Kayak, na Nug ihinignu unuqitte!” aon appig.

²⁰ Ag anam appig amge Samuel nug aum. “Ag aib baɗappig! Genab, ag eheɗ amu oh heppig, amge ag tuɗidna, Yawe aib dimedappig. Iitta. Ag meulag ohppa Nug waappa daan, Nug oɗe dim lamitteg!

²¹ Ag Yawe dim lamidnana, ag kayak hambuppuak aib dim lamidppig! Kayak hambuppuak amu, ag am keeke genab iitta amunu, ag ehanadkkulagnu, o laa eppelagppanu diiadkkulagnu am elele iitta.

²² Ag Yawe aib dimedappig. Iitta. Ag Nug dim lamidkkulag. Aɗinu? Yawe Nug amunu ena doya, Nug ag danab ah nuhikkud daaglagnu tituanattom amunu, Nug onignu dabmak anuqak awa, Nug ag, ag am nuhikkud danab ah amu, Nug ag uuatta, di-ii-mattama.

²³ Amge dahilnu amu, Yawe da unuqittakppa ag ehanadkkulnu uɗat meɗom amunu, da uɗat amu uuen, nuhigppa hipunin hepanu amu, da Nug ahilagnu unuqidkkulnu iinab uupa. Iitta. Da amu heinne, da ag ib ena, ib tutukku ele tuɗitten ippunadkkul.

²⁴ Amge ag dabmenan, ag ebehilag oh Yawenu bodoetta le meeb, ag oo metta ii uuak kobol dim lamidna meulag ohppa Nug waappa daan, Nug oɗe dim lamitteg! Ag keeke okkai okkai, Nug ahilagnu heum ele amu, ag keeke amu ele dabmenan oiyeg!

²⁵ ⌊Ag anam hekkulag am ena,⌋ amge ag nau hak tuɗidna hekkulag dayeb amu, Yawe Nug ag, ahilag king ele amu, Nug heeb, ag oh padal mekkulag.” Samuel nug anam aum.