1 Samuel 1 - Nobonob Baibel

Elkana, nug baekkudppa ele Silo goppig

¹ Aria, anukkanab, danab laa, onig Elkana, nug dayom. Elkana nug am Israel dilag huu okkai onig Epraim, nug amunu ted, amu nuhig aab ikki am Sup. Amu Elkana nug Epraim wanppa, qauko qauko daattebppa, nug aben amuppa aab laa onig Rama, appa dayom. Elkana mameg am Jeroham. Jeroham mameg am Elihu. Elihu mameg am Tohu. Aria, Tohu mameg am Sup.

² Elkana nug ah aɗit diiatom. Ah laa onig Hana, amu ah laa onig Penina. Amu Penina nug nid menuattom, amge Hana nug ah mattoi, nug nid laa ii menuom.

³ Aria, Elkana nug maɗ anen anen oh haen laippu nug Yawe Nukka Ɠagattag Oh Ele noobppa dup noa binag mekkunu, nug ele doɗ mana, Nug medakkunu, nug Ramanu aha, Silo ukkom. Silo appa amu mettid haknu peh lag dayeye, Eli bekoɗ Hopni, Pinias ele aa Yawenu mana mettak danab daapiɗ.

⁴ Am Elkana nug haen oh anam heum amunu, maɗ anen anen nug anam haaha, doɗ mana, Kayak medakkunu maɗ anen anenppa deɗ amu uɗie, nug deɗ amuppa nug nuhig teppu maha ⌊mana mettak danab eppegppanu awa, nug teppu amu⌋ awa ukka tuqe, maha kuɗum ne, nug paniom. Nug wau Penina, nuhikkud nid ele maha laippu anen anen madattom,

⁵ amge Elkana nug Hana maha aɗit medattom. Nug amu heumnu diig am aɗit. Laa am, nug Hananu oo huan mauhom. Laa am, Yawe he, Hana nug nid aokkunu elele iitta daye, nug oo uugnab daamanu heum.

⁶ Yawe Nug he, Hana nug nid aokkunu elele iitta amunu, Elkana wau laa Penina, nug Hana awa awa qedatta, nug Hana nid aokkunu elele iittanu uug nau dookkunu, nug amunu ge iitta mattieye, Hana nug genab oo uug ele dayom.

⁷ Kobol amu maɗ kuɗumppa beum. Ge! Maɗ anen anen, Elkana, Hana aɗi ele ag Yawenu mettid haknu peh lakka tena, Penina, nug Hana awa awa qedatta, nug nid aokkunu elele iittanu ge iitta mattieye, Hana nug genab oo uug ele daye, nug gaya, ee ele ii laum.

⁸ Hana nug anam heehe, nug gamu Elkana nug amegppa inam madittom. “Hana, diig aɗinu na gaattem? Diig aɗinu na ee ii lattem? Diig aɗinu na oot uug ele daattem? Na nid danab 10 menuadppe ehanidlob amu, da ehanittak amu eɗittak iite eɗidttem?” awa aum.

Hana unuqittette, Eli antta, amegppa mattiom

⁹ Kobol amu oh am hanhan bettom, amge haen laa ag oh gona, Silo daanna, ag ee, le ele lana malaeg, Eli, nug am mana mettak danab dayom amu, nug Yawenu mettid haknu peh lag od ukku guguittak dayaknu balalppa dayeye, Hana nug unuqidkkunu aha,

¹⁰ nug ooppa uug naunab daye, nug ninig ele gayaya, Yawe unuqittom.

¹¹ Hana nug unuqittatta, nug Yawe amegppa genabnab hekkunu nai anan qakka, inam aum. “O Yawe Nakka Ɠagattag Oh Ele, na nahip maɗi ah, da, na dahilnu dabmenana, da uug nau ele doottem amu, na amu ele dabmenana, na dahilnu daut ii atikku dayeb, na nid danab meɗappe amu, O Yawe, da nid amu, nug haen oh nahip daakkunu, da na medappi, danab laa nug nid amu ikki uɗug iinab otaɗma,” awa aum.

^12-13 Hana nug tuɗidib anam ooppaib Yawe unuqitta heehe, Eli nug Hana otti nai mattiom bia heum, amge oqotti laa ii beum antta, nug, “Ah amu nug spak ma hette,” dabmaama,

¹⁴ nug aum. “Na spak mekkutnu tuɗidna hettem; am haen gane laa ele ukkeb, na kobol amu uukkut? Na wain lanaknu uuna, dabmak tutukku ele aon oiye!” awa aum.

¹⁵ Eli nug anam a amu, Hana nug nob ma aum. “O naɗi dahil, amuam genab iitta. Da le ɠagattag laa ii lami; da uug naunab doottem, amunu da Yawe unuqitte aute aottem.

¹⁶ Da oolppa uug naunab, ninig ele doottem, amunu na dahilnu, da am nahip maɗi ah amu, na dahilnu ‘Ah nau,’ aib dabmeme,” awa aum.

¹⁷ Hana nug anam a, Eli doya, nug nob ma aum. “Na ahan, na oot maɗoɗ ele ukke! Amu Kayak, Israel dilag Kayak, Nug na aɗi keeke Nug unuqidme amu, Nug amu na medakkunu ool daatte,” awa aum.

¹⁸ Eli nug Hana amegppa anam a amu, Hana nug enanag doya, amegppa aum. “O naɗi dahil, na dahilnu ena doome amu, da amunu enanag doottem,” awa aum. Hana nug anam awowa, nug aha ukka, ee laa laum; nug baula oo uug ele ii dayom, nug iɗu ii tiguguɗom.

Samuel do, anig nug nug Kayak uɗat hekkunu Kayak mettom

^19-20 Aria, Hana nug anam daye, wagkkaɗe buttuanab ag ahan, Yawe noobppa dup nona binag mewona, ag eɗun, Rama goppig. Rama am ag appalag diig aakku. Ag gona daanna, Elkana nug Hana ele oieheh, Yawe Nug Hananu dabmaama he, Hana nug oo ele dayom. Nug oo ele daye ukke, nuhig haen uɗie, nug nid danab menuom. Nug menua, nug “Da Yawe nid imunu oɗ mettami,” awa aum amunu, nug onig Samuel ataɗom.

²¹ Keeke amu oh anam be, haen ukke, Elkana nug maɗ laappa eɗua, doɗ mana, Yawe medakkunu, nug keeke laa genabnab Yawe medakkunu nai ana qakkom amu, nug amu oh hekkunu baegppan ele Silo goppig,

²² amge Hana nug ii ukkom. Aɗinu? Elkana nug gokkunu heehe, Hana nug amegppa aum. “Da nid imu huh aɗittoya, da nug awe ukken, Yawe gumitten wain, Nug medappi, nug haen oh appa daakku,” awa aum.

²³ Hana nug Elkana amegppa anam a, Elkana nug aum. “Na aɗi hekkutnu ena anidttem amu, na anam he! Na inam daanna, na nid imu huh aɗittona, dimppa na gokkut am ena, amge Yawe nug heeb, na hekkutnu ame amu, na hekkutnu elele daakkutnu ool daatte,” awa aum. Nug anam a, Hana nug aabppa dayeye ukke, haenppa amu nug nid huh aɗittom.

²⁴ Aria, Hana nug huh aɗitta mala, nug Samuel omale, gamu ele Silo gopiɗ. Samuel nug nid okkai iitta, nug nid nakok, amge aa omalya goya, aa makau dawai, maɗ ewam ele, 10 kilogram plaua, amu wain doɗ gaɗappa inak, amu ele oh aoya gopiɗ. Aa omalya, Yawenu mettid haknu peh lag Silo aabppa dayom, appa gopiɗ.

²⁵ Aa goya teya, aa makau amu baag otaɗoya, maiya, Yawe mettoya, aa nid nakok amu omalya, Eli toppa goya daaeheh,

²⁶ ⌊Eli nug Hana ii doyom amunu,⌋ Hana nug amegppa aum. “O naɗi dahil, anukka ah laa nug uɗia, na heqon laihppa dayaya, Yawe unuqittom ele amu, ah amu am da iikkuib. Am ah laa iitta. Na genab bau daattem, genab amubia amu da am ah amu iikkuib.

²⁷ Haen amuppa amu, da nid imunu Yawe unuqidmi, amu Nug nid imu da meɗom

²⁸ amunu, da nug Yawe medattem. Amu nuhig wan imuppanu bau dayak haen amu, haen amu oh nug Yawenu uɗat aakkuib hekku,” awa aum. Hana nug anam a amu, ag Yawe noobppa dup nona Nug binag meppig.