1 Pita 4 - Nobonob Baibel

Kobol nau uua, Kayak dim lamittaknu nai

¹ Aria, Kristus Nug danab beɗu awom, beɗu amuppa guittak naɗi awom amunu, ag ele Nug heum bia dabmak ɠagattag aweg! Aɗinu? Danab nug guittak beɗuppa awom amu, nug aakku hipunin tuɗitta hekkunu oo ii daatte.

² Amunu amu dimppa, haen danab amu nug bau dayaya wanppa oitte amu, nug kobol nau baula ii dim lamidtte, danab laa hetteb bia. Iitta! Nug Kayaknu dabmaknab dim lamidtte.

³ Danab ag Kayak bekkod iitta, ag kobol nau digdig hetteb. Aria, ag gemu nai imu aotteb amu, ag ele anukka kobol anamib hedappig, amge gemu ag ii hetteb. Laa ele amu, ag baula aib heppig! Kobol amuam inam. Hipaɗu ahak kobol, oo hak nau kobol, le ɠagattag lawowa kaaka qak kobol, goɗak qiɗ nau ele hak kobol, le ɠagattag lana mauhnoak oiyak kobol, kayak hambuppuak binag mak kobol ele; Kayak Nug kobol amunu ooppa uuaknab dootte.

⁴ Gemu ag aakku kobol nau amu baula ii hetteb amunu, danab Kayak baekkudppa iitta, ag ag ele kobol nau amu gemu ii hetteb, ag amu anidna ottaina, ahilagnu nai eheɗ atteb.

⁵ Amge dimppa ag akka Kayak amegppa ag kobol hetteb amunu miag atinna akkulag. Nug am epeɗiak danab anuqak, amu Nug danab bau daatteb, amu mauhppig ele oh kobol anen anen heppig amuppa epeɗiadkkunu babaittom daatte.

⁶ Danab laa mauhppig amu, tatam ag danab oh bia beɗulkadnu epeɗiak aon mauhkkulag, amge geha ag ouɗilkad Kayak ⌊oo niitte bia⌋ nuhig Ouɗippa ag bauklel daaglagnu, laa ag Nai Ena ag amelagppa mattieg dooppig.

⁷ Aria, keeke oh iitta mekkulagnu haen aakku guguittak daatte amunu, ag unuqittak hekkulagnu elele daaglagnu, ag dabmen autna aona, ag nukka nug nuhig oiyak pehettak atognoak kobol ele dim lamidna dayeg!

⁸ Ag lailkad dilag huana oolag mauhkkunu dabmak ahilagppa anuqak dayaɗ! Aɗinu? Layagnu oo mauhak kobol nug kobol eheɗ kuɗum tone iitta mette.

⁹ Ag lailkad dilagnu nug ehanittak kobol naittuɗ mak iitta ele dim lamidna heig!

¹⁰ Amu ag oh anen anen Kayaknu ɗo hamu mettak laa aoppig amunu, ag amuppa Kayak Nug ehanittak okkai hamu megakka, uɗat hekkunignu oo daatte bia lailkad ehanatteg!

¹¹ Ao, danab ag ahilag uɗat oh anidna, Jesus Kristus onigppa ag Kayak binag mekkulagnu amu, danab laa nug Kayak nai mehuqtte ele dayeb, nug Kayak nai tutukku mehuqaɗ! Amu danab laa nug layag ehanidtte ele dayeb, nug ɠagattag Kayak medatte ele amuppa uɗat haɗ! Binag amahlak oppiaawak ele, ɠagattag oh ele hanhan alet ele Jesus Kristus, nuhigppa dayaɗ! Genab.

Kristus ele ouqa, uug mawaknu nai

¹² O lailad, uug doyak kobol aab ewak bia ahilagppa betteb amu, amuppa ag aib ottaina, “Kobol laanab iikku betteb,” aon appig.

¹³ Iitta. Dimppa Kristus binag amahlak oppiaawak ele miag atiak bekku, haen amuppa ag maɗoɗppan gamag ahak naɗi dooglagnu, ag uug mawak haenppa ag uug anamppa ag Kristus uug mawom bia ag uug maotteb doonna, maɗoɗppan gamag ahak doyeg!

¹⁴ Amu ag Kristus onig ɠagattag aɗatteb amunu, danab laa ag ahilagnu nai eheɗ akkulag amu, ag itittak ena aoppig daatteb. Aɗinu? Kayak Ouɗi, Nug binag amahlak oppiaawak ele, Nug ag ele daatteb.

¹⁵ Ag Kristen daatteb amunu, ag oolagppanu laa nug duug wak danab, o iitta yabhok danab, o iitta kobol nau digdignu hak danab, o iitta laa nug laa dilag dabmak, maittak keeke ele hamu baolikkunu hak danab aib dayom. Ag kobol amu laa hekkulag amu, ag guittak aoglag amunu, ag guittak amu aomnanu ag kobol laa amubia aib heppig. Ag diig amunu guittak aib aoppig.

¹⁶ Amge danab nug Kayak baegppa dayaya, amuppa nug guittak aotte dayeb amu, nug uɗa aib neum. Iitta. Nug onig Kayak baegppan danab daatte amunu, nug Kayak binag maɗ!

¹⁷ Kayak Nug danab ah epeɗiadkkunu haen digma miagnab daatte, amu Kayak nuhikkud danab tatam epeɗiadkku. Anam amu, Nug anam ihinigppa epeɗiak digmekku dayeb amu, danab ag Kayaknu Nai Ena tappaeg nette ele, ahilagppa amu attemnab daakku? Ag uug naunab aoglag.

¹⁸ ⌊Kayak nai atte, amubia.⌋ “Amu genab tutukku hak danab eɗua diiaknu uɗat am uug ele dayeb amu, Kayaknu nuhig haknu ele uuak danab, hipunin danab ele, attemnab ahilagppa bekku?”

¹⁹ Amunu danab ag Kayaknu dabmaknabppa guittak aotteb, ag akka ag beɗulag oh Kayak, ig heikkom, oo metta ii uuak kobol dim lamidtte ele amu, ag Nug eppegppa mena, tuɗidna kobol ena heig!