1 Pita 3 - Nobonob Baibel

Ewau dilag nai

^1-2 Amubia ah ag danab ele amu, ag gamulkad waalagppa daanna, kobol enaib heig! Ag anam hekkulagnu diig am inam. Danab ahilkad oolagppanu laala ag Kayak nai ii dim lamidtteb dayeb amu, danab amu ag waalkad ag Kayak pehettak binag mena daanna, kobol oppiak ele dim lamidna oitteb anidna, anttak amuppa, ah dilag nai mattiak iittappa, ag oolag eɗueb, oolagppa genab dooglagtai.

³ Amu ah ag iɗulag tuqak ele daaglagnu, ag beɗulag dimittimnuib keeke aib dabmeppig. Amuam ikkilag uɗug kobol kobolnab ele bala mettak, beɗulagppa bala golppa hak mettak, amu lamen ena ena maknu ele.

⁴ Iitta. Ag oolag unuqagppa bala mettaglag am ena. Bala mettak amuam nauhkkunu elele iitta. Bala amuam oo bodoettak kobol, amu dagom kobol ele. Kobol amu Kayak noobppa amu enanag.

⁵ Anukka ah ag Kayak Nug aɗi hekkunu aum amu, Nug genab hekku oolagppa genab doon oppiaawak daadttappig amu, ag ib amuppa heeg, ag iɗulag tuqak daadttappig. Ag Sarah heum bia ag gamulkad waalagppa daappig.

⁶ Sarah nug Abraham oɗe doya, nuhignu, “Naɗi dahil,” awa attom. Amu ag gemu daatteb ele, ag kobol ena baɗak iitta ele hetteb dayeb, ag nug aɗekkud daatteb.

⁷ Amubia ele ah gamulkad ag waalkad ele daanna, kobol ena ahilagppa heig! Ah ag gamulkad ele oh Kayaknu ehanittak okkai hamu mettak amu aona, bauklel daaglag amunu, ah gamulkad ag ahilkad ah dilagnu, “Dahil kadoi, nakok gai-iitta bia,” doyadnana, ahilagnu ena elele doyeg! Ag amu oh hekkulagnu diig am, geha keeke laa unuqittak ahilag heeb ii nauhma.

Kobol ena haaha, uug mawaknu kobol

⁸ Aria, nai imunu gogppa tekkulnu amu, ag oh oolag laippu ele, dabmak laippu ele dayeg! Amu ag oo doyak doonna, eamag aa nug oo mauhak doottep ele amu, amubia ag laa Kayaknu oolagppa genab dootteb ele, ag oh nug oo mauhak doyeg! Ag oo bodoetta le mak kobol henana, ag akka anen anen ag onilag qeppeg neeb oiyeg!

⁹ Amu na layap nug nahip-ppa laa eheɗ heeb amu, na aib nob mena nuhigppa eheɗ heme. O iitta nug nai eheɗ laa nahipnu ab amu, na aib nob mena nai eheɗ nuhignu ame. Iitta. Na Kayak Nug itittak ena medakkunu unuqitte! Aɗinu? Ag itittak ena aoglagnu Kayak Nug ag anam hekkulagnu onilagppa eum.

¹⁰ Amuam Kayak naippa, nai daatte amubia. Nai amuam inam. “Aun laa nug bau daakkunu oo daatte; ao, aun laa nug haen elab dayaya, nug dayak ena dayaya, maɗoɗppan gamag ahak dookkunu oo daatte ele, nug aɗi atte amu, nug amunu pehettak dabmaama, nai eheɗ aib mattiom! Ao, nai hambuppuak laa aibnab aib mattiom!

¹¹ Nug eheɗ hak dimetta, kobol ena haɗ! Ao, nug laa ele maɗoɗ ele daaglagnu wagai maɗ!

¹² Aɗinu? Naɗi Nug laa ag kobol genab tutukku hetteb ele, Nug ag dabmatta atognoadtte. Ao, Nug ahilag unuqittak doya, ag ehanadtte. Amge laa ag kobol eheɗ hetteb ele, Nug ahilag hak amunu eheɗ doyaya oo ii madatte.”

¹³ Aria, na kobol enaib heppe amu, danab laa nug na eheɗ laa ii heidma bia,

¹⁴ amge na genab tutukku hak kobolib henana, diig amunu guittak aokkut dayeb amu, na aakku itittak ena aon daattem. Laa ag keekenu baɗatteb amu, ⌊ag Jesusnu oolagppa genab dootteb,⌋ ag amunu aib baɗappig; ag oolag aib ottaiom.

¹⁵ Iitta. Ag oolagppa Kristus Nugib am ahilag Naɗi daatte doyeg! Keeke ena ag aoglagnu dabmak aɗan oitteb ele amu, laala ag amunu diignu oɗ madappeg, ag nai nob mekkulagnu bappaidna daaglag,

¹⁶ amge na oo bodoettak kobol, na laanu ena elele doyak kobol ele dim lamidna, anam he! Danab laa ag na Kristusnu daanna, hak ena hettem anidna, ag baeg qak nai nahipnu maditteb amu, ag amunu uɗalag nekkunu na beɗunppa aab iitta eleppa henan oikkut.

¹⁷ Amu Kayak Nug ig kobol ena hettemnu uug maognignu dabmaknab aotte dayeb am ena, amge ig kobol nau hettemnu uug maottem daakku dayeb amu, amuam kobol ena iitta.

¹⁸ Kristus Nug hipunin uhuqa mettaknu haen laippu aakku mauhom. Nug baula ii mauhma. Nug beɗuppa aab laa iitta, amge Nug ig danab, ig beɗunigppa aab ele, Nug ig omaikka, Kayak toppa wakkunu Nug mauhom. Ag heeg, Nug beɗu mauhom, amge Kayak Ouɗi Nug he, Nug eɗua hibaitta, bauklel daatte.

¹⁹ Amu Kayak Ouɗi nuhigppa Nug ukka, ouɗi maniguittakppa daappig amu, Nug ag amelagppa nai mehuqom.

²⁰ Ouɗi amu ag am danab anukka Noanu haenppa Kayak oɗe dim ii lamitteg, Kayak Nug pahanab ahilag nob nau madakkunu ii dabmeum. Iitta. Nug oo bodoettak dayeye, Noa nug uub itom. Uub amuppa amu danab ah eblaih ewam ele ag akka ooppa nona daanna, ag danab ah nau ele ouqena, ag ele padal memananu ag leppa ehanittak aoppig.

²¹ Aria, ag gemu daatteb amu, ag am Noa aɗi, ag aɗi keeke ippunigtteb bia daatteb. Ag ele leppa ehanittak aotteb. Amuam layattak, amge layattak am beɗunigppanu dubuttid ihaknu keeke iitta. Iitta. Layattakppa ⌊ag oolag eɗueb,⌋ ahilkad ooppan oiyak ippunittaknu ulum am ag oolagppa eheɗ laa ii daatte ippunatte, ag amuppa Kayak oɗe genab dim lamidkkulagnu Nug amegppa ahilag nai ɠagattag qettan maditteb. Amunu diig am Jesus Kristus, Nug mauhakppanu eɗua hibaittom.

²² Jesus Nug eɗua hibaitta, Nug hab aabppa teum. Nug Kayak eppeg naɗiap-ppa daatte. Engel oh, laa ag gumaknu ehah ele oh, aria ɠagattag digdig oh ele, ag oh Nug waappaib daatteb.