1 Pita 2 - Nobonob Baibel

¹ Amunu ag kobol nau oh dim lamidkkulagnu uueg! Ag nai hambuppuak, kobol hambuppuak ele uuna, ag laa dilagnu aib amelag qeeb oolag elele ii dayom; baeg qak nai atten ele aib madippig.

^2-3 Amu ag danab laa nug ee enanag laa lana enanag dootte, amubia ag Naɗinu enanag doona, ag Nug bekkod daatteb amunu, ag ena mekkulagnu, nid yuɗ ag huh aoglagnu oolag okkainab daatte amubia, ag Kayak nai, ag amu dooglagnu oolag dayaɗ!

Naɗi Nug men ena bau ele

⁴ Naɗi Jesus Nug am men laa bauklel daatte bia daatte. Nug men anuqak bia anam daatte; danab ah ag Nug uuppig, amge Kayak Nug nukka tituana, nuhignu am enanag dootte. Nug anam daatte, amu ag nuhigppa uɗiegeg,

⁵ Nug he, ag ele men bau daatte bia beegeg, Kayak Nug nuhig tamaniak, lag bia, ahilagppa hette. Amuppa ag mana mettak danab oppiaawak ele daanna, ag keeke Kayak oo niitte ele, Jesus Kristus onigppa mana mettak bia Kayak keeke amu mettaglag.

⁶ Amu Kayak naippa, nai laa Jesusnu am inam daatte. “Da geha Sion appa men epeɗiak, men enanag laa, ukku ɠagattag daakkunu ebakkul. Amu laa nug nuhignu ooppa genab dookku amu, nug uɗa nak iinab aoma. Iitta.”

⁷ Ag nuhignu oolagppa genab dootteb amu, ag nuhigppa ehanittak okkai aotteb, amge danab ah ag oolagppa genab ii dootteb amu, ahilagppa Nug inam beum daatte. “Men laa, lag hak danab ag men amu uuppig, amge lag mameg nug men amu awa me, lagnu men anuqak daatte.”

⁸ Aria Kayak nai amunu laa am, “Men amuam men laa danab ippulagppa dayeye, danab ag men amuppa baelag qena, nena qetteb bia daatte. Ao, am men laa he, danab ag nena qetteb bia daatte.” Aɗinu ag baelag qetteb? Ag Nai Ena oolagppa genab ii dootteb. Ag oolagppa genab ii dootteb amunu, ag nena qekkulagnuib daatteb.

⁹ Amge ag Kristen danab ah amu, ag gatatuppa daaegeg, Kayak Nug diia amahlak enappa maattom, ag Nug ahilagppa ena heum, ag amu miag atiglagnu Nug ag tituanatte daanna, ag am mana mettak danab, king ele daatteb, ag am danab ah Kayaknu ɗo maɗoɗppa daatteb, ag danab ah nuhikkudnab ele daatteb.

¹⁰ Anukka amu, ag Kayaknu danab ah ii daappig, amge gemu ag nuhignab danab ah daatteb. Anukka ag ⌊Jesusnu oolagppa genab ii doon,⌋ ag Kayaknu oo gai-iitta doya oo metta ehanittak kobol waappa ii daan, ⌊ag hipuninnu nob nau aoglagnu daappig,⌋ amge gemu amu, ⌊ag Jesusnu oolagppa genab doon,⌋ ag Kayaknu oo gai-iitta doya oo metta ehanittak kobol waappa daan, ⌊ag nob nau amu aoglagnu ii daatteb⌋.

Kayaknu maɗi nid dayaknu nai

¹¹ O lailad, ag laihnu danab, aab diig danab iitta wan imuppa daatteb amunu, da ag beɗulagnu kobol nau, kobol amuam ag hanhan ig Kayak amegppa danab ena daamtanu wagai metteb ele amu, ag kobol amu ii hemananu dabmak maɗettak nai iikku madattem.

¹² Amu ag danab laa Kayak baekkudppa ii daatteb ele amu, ag ag oolagppa daanna, kobol ena tutukkuib heig! Ag anam hebeppeg, danab amu ag ahilagnu nai nau akkulagtai, ge ag ahilag kobol ena amu anidna, haen Naɗi Nug ig danab ig ehanigkkunu uɗikku amu, ag ele Nug binag mekkulag.

¹³ Ag Naɗi Jesusnu dabmak anuqak aona, ag gabman eppeg laih laih oh, Kayak maattom daatteb waalagppa dayeg! Amuam king, nug am okkainab, laa oh eɗattak daatte,

¹⁴ aria ikki danab, king nug maatte, ag eheɗ hak danab nob nau mattana, danab ag kobol ena hetteb ele binalag mekkulagnu daatteb.

¹⁵ Kayak Nug ag danab dabmak tutukku iitta dilag nai, maittak iitta ele, ag nai amu kobol ena ahilagppa qeppeg nekkunu oo daatte.

¹⁶ Amu ag danab uhuqak ena aon daatteb amunu, ag danab uhuqak aoppig bia oiyeg! Amge amuppa ag kobol nau lokkumna aib heppig. Ag Kayaknu kobol ena dim lamidnana, nuhig maɗi nid dayeg!

¹⁷ Amu ag danab oh dilagnu, kobol eleleppa ena elele doyeg! Ag lailkad Naɗinu oolagppa genab dootteb ele, amu dilagnu oolag mauhaɗ! Ag Kayaknu ebehilkad oh bodoetta le maɗ! Ag king binag meig!

Begbeg maɗi nid ag Jesus oiyom, amu dim lamidna uug maoglag

¹⁸ Aria, begbeg maɗi nid ag gumak danab ahilkad waalagppa daanna, ag ahilagnu ena elele doon autna aweg! Gumak danab ena dilagppaib iitta; gumak danab nau, ahilagnu eheɗ hetteb, amu dilagppa ele.

¹⁹ Ag anam daanna, Kayaknu dabmenana oippeg, gumak danab nau ag guittak diig iittappa madappeg, Kayak Nug ag begbeg maɗi nid ag haen amuppa gumak danab amu, ag ahilagnu ena elele doyaya dayak kobol dim lamidna hetteb antta, Nug amunu oo ena daakku.

²⁰ Amge ag begbeg maɗi nid ag kobol eheɗ laa heppeg, ahilkad gumak danab ag guittak madappeg, ag begbeg maɗi nid ag ahan wagai ii mekkulag amu, ag amunu attemun ag nob ena aoglagnu dabmekkulag? Amge ag begbeg maɗi nid ag kobol ena laa heppeg, ahilkad gumak danab ag amunu ahan guittak madappeg amu, ag begbeg maɗi nid ag bodoettak daanna, eɗun wagai ii meppeg, Kayak Nug kobol amunu oo enaib daakku.

²¹ Amu Kayak Nug ag kobol amu dim lamidkkulagnu onilagppa eum. Aɗinu? Kristus Nug guittak naɗi ag ehanadkkunu awom. Nug heumppa amu, Nug antte oo maittaknu kobol, ag kobol nuhig amu dim lamidkkulagnu ag ippunatta mattom.

²² Nug hipunin laa ii heum, oɗeppa nai hambuppuak ele ii dayom.

²³ Danab ag nuhignu nai eheɗ appig, amge Nug nai eheɗ ahilagnu nob ii meum. Nug guittak awom, amge nuhig guittak amunu Nug ag nob nau aoglagnu ii aum. Jesus Nug amu ii heum, me Nug Kayak, epeɗiakppa keeke oh eleleppaib epeɗidtte amu, Nug nukka Nug beɗu oh Nug eppegppa meum.

²⁴ Ig hipuninnu begbeg maɗi nid daamtanu, ig Kayak dim lamidta genab tutukku hak danab daagnignu, Jesus Nug ihinig hipunin oh ad emaitakppa mawom. Genab, Jesus nug guittak awe, ig amuppa elele daattem.

²⁵ Anukka ag am sipsip hetteb, amubia ag ib ettan goppig, amge gemu ag eɗun ahilag gumak danab, sipsip gumak danab bia daatte, ahilag okkai, Nug ag atognoadtte ele amu, ag Nug gumidna uɗippig.