1 Korint 9 - Nobonob Baibel

Totol ag keeke tamaniakppanu aoglagnu elele

¹ Da heppi danab laa eheɗppa gomanu dabmettem amunu, ag da ɗo waappa dayeye hettem bia doottebte? Anam iitta, da ɗonu maɗi nid ii daattem. Da am totol danab. Da am ihinig Naɗi Jesus Kristus anidmi. Da Naɗinu uɗat laa hei, ag da uɗat hemippa ag iite Kristen beppig daatteb.

² Am danab laala ag dahilnu, “Nug am totol danab iitta,” doottebtai o iittatai, da ii doottem, amge ag Korint daatteb ele, ag am anam dooglagnu elele iitta. Aɗinu? Da nai mattiyi, ag Jesusnu oolagppa genab dooppig amunu, da genab totol danab daattem doyaknu, ag amunu am epponak keeke bia daatteb.

³ Am laa ele, danab laala ag da epeɗilna daatteb amu, da eɗue amelagppa inam attem.

⁴ ⌊Da Barnabas ele⌋ i ⌊tamaniak eppelagppa⌋ ee le ele lakkunihnu elele iittate?

⁵ Amu da Kristen ah laa aoppi, uɗat hekkulnu oh oignihnu, totol danab laa, Naɗi laikkud laa oh, am Pita ele ag hetteb bia elele iittate?

⁶ Amu da Barnabas ele i iya ee le ele keeke aognihnu men doɗonu uɗat hekkunihte?

⁷ Am danab laa nug ban danab daatte amu, nug amuppa nuhig ee iite aotte? O danab laa nug grepnu dad ebatte amu, nug grep meu iite latte? O danab laa nug meeme gumadtte amu, nug uɗat amu haaha, meeme huh amu iite latte?

⁸ Am da danab dilag dabmak amuibte dim lamitten, da nai imu attem? Ɗoppa amu nai amunu laa iite daatte?

⁹ Yo, Moses nug ɗo naippa nai laa amunu yom am inam. “Na makau okkai ebehi ele ee aeg, dappunkkeg ele piɗe piɗe daaglagnu uɗat haaha, ee laabob, na aib lanak uukkunu oɗe hautna qakkame,” awa aum. Am Kayak Nug doɗ makau dilagibte dabma aum?

¹⁰ Anam iitta! Nai amu ihinignu ele atte. Ao, Moses nug Kayak oɗe awa yom, amuam ihinignu aum. Aɗinu? Danab nug ee eppaknu wan oppat-tte amu, nug ee meu oɗueb, meu maha aokkunu dabmaama uɗat hekku amuam tutukku. Amu meu awak danab ele anamib.

¹¹ Aria, ig Ouɗinu keeke ag oolagppa eppamut amunu, beɗunig ehanittaknu keeke ag ig mekkaglagnu am ena iittate?

¹² Danab laala ag ahilagppa dim goppig. Ag gona, nai mehuqegeg, ag keeke madatteb amunu, ig ahilagppa keeke aognignu elelenab daattem. Amge keeke ig aolomnu elele amu ig ii aomut. Aɗinu? Ig keeke amu aolom amu, Kristusnu Nai Ena ag aon oolagppa genab dooglagnu ib am oo nekkunigtai amunu, uug laala oh amu ig aakku maottem.

¹³ Ag imu iite dootteb? Danab ag Kayaknu mettid lakka uɗat hetteb ele, ag ahilag ee Kayaknu mettid lakkanu aotteb. Amu danab ag doɗ mana Kayak mettaknu uɗatnab hetteb ele, ag qaɗabppanu ee aotteb.

¹⁴ Anam daatte bia Naɗi Nug ɗo imu ele meum. Danab ag Nai Ena mehuqtteb ele, danab amu ag danab ah Nai Ena dootteb ele, ag ahilagppanu enulag keeke, beɗulag ehanidkkunu, aoglag.

¹⁵ Ɗo anam daatte, amge da ɗo amuppa da keeke laa ii aomi. Amu da nai imu yaattem amu, da amuppa keeke aokkulnu ii hettem. Iittanab! Keeke da ehaniɗkkunu, keeke amu da dakka eppelppa hein aottem, amuppa da maɗoɗppan gamag ahak doottem, amu danab laa nug heeb, gamag ahak amu iitta melo am ena iittanab iitta. Am naunab. Da mauhlom am nau anam iitta. Da dahil gamag ahak doottem imu, danab laa nug gamag ahak dahil imu diig, amu dahilppanu aɗila aokkunu am ena iittanab.

¹⁶ Da Nai Ena mehuqttem ele amu, amuppa da dakka binal mekkulnu elele iitta. Aɗinu? Kayak Nug a, da hettem. Da ii mehuqlom amu, dahilnu gadonnab gadon.

¹⁷ Am da dakka dahil dabmakppanu ahe, uɗat imu heinnelob amu, da uɗatnu nob aolom. Amge da uɗat imu hettem ele, da dakka ain ii hettem. Iitta. Kayak Nug uɗat imu hekkulnu meɗom amunu,

¹⁸ da nob aɗi aokkul? Dahil nob ena amu inam. Da Nai Ena mehuqttem, uɗat amuppa da keeke da aokkulnu elele daattem amu, da ii awewe, da Nai Ena hamu nob laa iittappa mehuqe, danab madattem.

¹⁹ Da danab laa nug he, maɗi nid nuhig ii daattem. Iitta! Amge da danab kuɗum eeɗadppi, ag Jesus dim lamidkkulagnu hettem amunu, da dakka danab oh dilag begbeg maɗi nid daakkulnu ool he daattem.

²⁰ Amu da Juda danab diiadppi, ag Kristusnu oolagppa genab dooglagnu da oiyeye ukke, Juda danab gumatte ukke amu, da Juda danab bia bein, ag daatteb bia daami. Amu danab ah ag ɗo waappa daatteb amu, da ag diiadppi, ag Kristusnu oolagppa genab dooglagnu da ɗo waappa ii daami, amge ag amelagppa da aniɗppig amu, da ɗo dim lamitte daattem bia daami.

²¹ Aria da ukke, danab ⌊Juda dilag⌋ ɗo iitta ele, da ag diiadppi, ag Kristusnu oolagppa genab dooglagnu da ag gumatte ukke amu, ag amelagppa aniɗkkulagnu da danab ⌊Juda dilag⌋ ɗo iitta ele bia daami. Amge da Kayaknu ɗo amu ii qe-eɗidmi. Iitta. Da Kristusnu ɗo amu dim lamidmi.

²² Amu da danab ɠagattag iitta oolagppa dayeye amu, da danab ɠagattag iitta bia daami. Da danab ɠagattag iitta amu diiadppig, ag Kristusnu oolagppa genab dooglagnu anam hemi. Da am danab oh ag ahilag kobol atten attenppa oitteb amu, da ag diilag amu awe, da ag oolagppan laa ehanatti padal ii memananu uɗat kuɗum heinne daattem.

²³ Am Nai Ena aha okkai mekkunu, da nai amuppan itittak ena aokkulnu ele, da uɗat anam anam hettem.

²⁴ Danab ag qaiqaɗ gona, nug eɗid eɗid hetteb ele, ag oh qaiqaɗ gotteb, amge danab laippuib nug nob ena aotte, ag iite dootteb? Aria, ag ele qaiqaɗ gonana, laih laih aib neegppig. Iitta! Ag nob ena aoglagnu aakkuib dabmenana qaietteg!

²⁵ Amu danab oh ag qiɗ laala ele hekkulagnu daatteb amu, ag wan imuppan keeke o kobol laala, ag qiɗ ena hekkulagnu ib oo nette ele amu, ag amu oh qeeg nette. Danab amu ag wannu bala, keeke nauhtte ele aoglagnu hena, qiɗ amu hetteb, amge ig nob ena, nauhaknu elele iitta, amu aognignu hettem.

²⁶ Amunu da dakka qaiqaɗ gottem amu, da ugekke, eɗue laih laih neekkekke ii gottem. Iitta. Da amel amu tutukku neekki ukke, nob ena aokkulnu daatte amu andette gottem. Da danab laa nug eppeg bitakka, laa makkuɗkkunu he, eppeg nug etta, laih laih ukke, ulahib otte, amubia da ii hettem. Iitta. Da uɗat dahil tutukku hettem.

²⁷ Genab, da Nai Ena danab laaib dooglagnu mehuqen, dimppa da hipunin hein nein qepanu, da dakka da beɗul qei ne, dabmak da ool unuqagppa daatte aakkuib da beɗul dim lamidtte.