1 Korint 8 - Nobonob Baibel

Doɗ main kayak hambuppuak medappig teppulkad lanaknu nai

¹ Aria, dimittimnu danab, ag Jesusnu oolagppa genab ii dootteb ele, ag doɗ main kayak hambuppuak dottolkad madatteb amu, ig Kristen ig teppu amu lakkunigtai, o iittatai, imu am amunu nai. Ig doottem, ig oh am keeke amunu doyak ele, amge doyak ⌊nukka dayeye, oo mauhak ulum ii medatte dayeb,⌋ doyak am heeb, danab nug doyak ele dada danab bette. Amge layagnu oo mauhak kobol am danab oo ɠagattag qedatte.

² Am danab laa nug nukka keeke laanu, “Da amu doyen malami,” atte amu, danab amu nug am doyak elele ii awom, hamu atte.

³ Amge danab nug Kayaknu oo mauhtte ele, Kayak Nug danab amu epeɗia, nuhignu tituanom.

⁴ Aria, doɗ teppu main kayak hambuppuak dottolkad madatteb, lanak amunu da inam attem. Ig doottem, kayak hambuppuak amuam keeke genab iitta; danabnu dabmak aakkuib. Amunu ag dottolkad hetteb am keeke laa genab ii ippunigtte. Kayak laippu aakkuib daatte.

⁵ Laa ag kayak habppa, wanppa ele daatteb atteb. Ge, ag ahilag mattiakppa ag kayak kuɗum, naɗi kuɗum daatteb atteb.

⁶ Amge ihinignu, Kayak laippuib daatte, Nug am ig Mamenig, Nug am keeke ohnu diig daatte amunu, ig am nuhignuib bau daattem. Naɗi ele am laippuib daatte, Nug am Jesus Kristus. Kayak Nug nuhigppa keeke oh hattom, amu ig nuhigppa bauklel aottem.

⁷ Keeke amu anam daatte, amge danab laala ag doyak amu ii aoppig. Ag am anukka kayak hambuppuak dottolkad binalag hanhan madappig, amuppa ag gemu doɗ teppu amu lanaknu amu, ag, “Ig kayak hambuppuak binag mematanu, ig doɗ teppu imu, ag main kayak hambuppuak dottog medappig ele amu, ig ii lamata,” aon atteb. Laa anam dabmetteb, ag oolagppan oiyak ippunittaknu ulum am gai-iitta, aɗi am ena, aɗi am nau elelenab ii ippunadtte amunu, ag lalob amu, ag, “Ig eheɗ hettem,” doolob.

⁸ Amge ee nug ig omaikkeb, Kayak toppa ii gomata. Ig ee laa ii lakkunig dayeb amu, ig anen anen, “Da ee amu ii lattem amunu, da Kayak noobppa elele iitta daattem,” ii amata. O ig ee laa lakkunig dayeb amu, ig anen anen, “Da ee amu lattem amunu, da Kayak noobppa enanag daattem,” amu ele akkunignu elele iitta.

⁹ Amge keeke ag akka ahilag dabmakppa ag amu hekkulagnu elele dootteb amu, amuppa ag laala Kayaknu kobol oh ii dooppig ele amu, ag ag eeɗadppeg, hipunin ibppa gomananu ag dabmeig!

¹⁰ Aɗinu? Na aun na doɗ teppu laa, danab ag teppu amu main kayak hambuppuak dottolkad madappig ele, na Kayak Nug na teppu amu lakkutnu am nau ii dootte, na doyak amu aon malame amu, na gona, kayak hambuppuaknu mettid lakka daana, ee amu lakkut dayeb, geha danab laa, nuhig ooppan oiyak ippunittaknu ulum am gai-iitta ele, nug na anidkku dayeb, doɗ teppu main, kayak hambuppuak dottolkad madappig ele, nug amu lakkunu dabmak awa lakku.

¹¹ Na anam hekkut amu doyak nahip am danab laa, nug Kristusnu ooppa genab dootte amge ɠagattag iitta, Kristus nug danab amu eɗua aokkunu mauhom ele amu, nahip doyak he, ib eheɗppa gotte.

¹² Antteg! Haen ag Kristen laala, ag oolagppan oiyak ippunittaknu ulum am gai-iitta, ag ahilagppa hipunin amu hena, ahilag ooppan oiyak ippunittaknu ulum heeg nauhtte amu, ag haen amuppa Kristus nuhigppa ele hipunin hetteb.

¹³ Anam amunu da doɗ teppu ag main, kayak hambuppuak medappig ele, da amu lappi, kobol amunu da layal nug hipunin hekku dayeb amu, aria da doɗ teppu amu baula ii lapa. Da hanhan amu dimetten oippi ukkeb, wan haen iitta mekku. Aɗinu? Da heppi, layal nug hipunin hemanu dabmettem.