1 Korint 7 - Nobonob Baibel

Ewau dilag nai

¹ Gemu da nai imuppa ag ad uɗug meeg, dahilppa doum amu, da iikku nob mettem. Danab laa nug ewau matulak ii awak daakku dayeb, amuam nai iitta.

² Amge gappai kobol iɗu iɗu daatte amunu, danab oh anen anen ag ah diiglag, amu ah ag ele ag anen anen ahilag danab diiglag am ena.

³ Amu danab beɗu amu nuhig ahnu keeke, am danab nug beɗu hagakka ii aoma. Anamib, ah nug beɗu am danabnu keeke, ah nug ele beɗu hagakka ii aoma.

⁴ Amu diig amu, ah nug nukka nug beɗu ii gumatte. Iitta. Nuhig danab ele oh gumattep. Anamib, danab nug nukka nug beɗu ii gumatte. Iitta. Ah nuhig ele oh gumattep.

⁵ Ag ewau matulak aoppig ele amu, ewau laa ooppa laa nug aib laa guhuɗitta, wagai ma nug beɗu hagakka awom. Amge aa Kayak unuqidkkulahnu heya, oolah laippu meya, haen tutu tituankkulah dayeb, haen amuppa aa nug ii aomya, amuam elele. Amge haen tutu amu maleb, aya aa ahilah oiyak pehettak atognoak kobol dim lamidkkulahnu elele iitta daamyanu, amuppa Satan aa gappai kobol hekkulahnu eeɗatmanu, aa eɗui, nug aoglah.

⁶ Da ɗo mein, “Ag nug aweg!” ii attem. Iitta! Ag anam hekkulagnu oolag dayeb amu, ag hekkulagnu elele aakkuib attem.

⁷ Am danab oh ag da bia daaglagnu ool daatte. Amge danab oh ag anam daaglagnu elele iitta. Aɗinu? Kayak Nug nuhig oo mettakppa, nuhig keeke ena ena ahilag daakkunu hamu mettakppa amu, ag aɗi hekkulagnu anen anen mattom; Nug laa keeke ena ena laa hamu metta, laa amu, nug keeke ena ena laa nug hamu mettom.

⁸ Aria, nai imuam danab ah ewau matulak ii aoppig, amu ah qab ele dilag. Da ahilagnu inam attem. Ag da daattem anam daappeg amu nai iitta.

⁹ Amge ag akka ag ahilag oiyak pehettak atognoak kobol dim lamidkkulagnu elele iitta daatteb dayeb, ag ewau matulak aweg! Aɗinu? Ag ewau matulak aoglag dayeb amuam nau iitta; ag ewau matulak ii aona, gappai hekkulagnu eeɗak nau dooglag dayeb, amuam nau.

¹⁰ Am danab ah ag ewau matulppig ele, da amu dilag ɗo am iikku madattem, amge dahil ɗo iitta. Am Naɗi Jesusnu ɗo. Ɗo amu inam daatte. Ah nug nuhig danab ii uuidma.

¹¹ Amge nug danab uuidkku dayeb, nug hamu dayaɗ! Hamu daakkunu elele ii dayeb amu, nug eɗua ukkeb, danab nuhig ele oolah laippu meya dayeɗ! Danab nug ewau aib okkula, ah nuhig uuittom.

¹² Aria, ɗo imuam da dakka attem, Naɗi Jesus ii aum. Ɗo amuam inam. Ig lainig laa nug Kristusnu ooppa genab dootte dayeb, nug ah nuhig ele aa ewau daattep amu, ah nug Kristusnu ooppa genab ii dootte, amge ah nug aa ewau matulak daaglahnu oo daatte dayeb amu, ig lainig nug ewau matulak ahilah aib otaɗom.

¹³ Aria, ah laa nug Kristusnu ooppa genab dootte dayeb, danab nuhig nug Kristusnu ooppa genab ii dootte ele, amge danab nug aa ewau matulak daaglahnu oo daatte amu, ah nug ewau matulak ahilah aib otaɗom.

¹⁴ Amu ag doyeg! Danab nug Naɗinu ooppa genab ii dootte, amge ah nuhig nug ooppa genab dootte, gamu nug ahppa Kayaknu tituanak daatte. Aria, amubia ah nug ooppa genab ii dootte, amge nug gamu nug ooppa genab dootte, wau nug danabppa Kayaknu tituanak daatte. Anam iitta amu, haen aa nid menuadkkulah, ag am Kayak ele ouqa dayaknu elele iitta, amge anam iitta. Nid amu ag Kayaknu tituanak daatteb.

¹⁵ Aria, danab nug ooppa genab ii dootte ele, nug ah nuhig uuidkkunu oo dayeb, ah nug danab amu aɗeb ewau daaglahnu aib wagai meum. Aria, danab nug ele anamib hekku. Laa nug Kristusnu ooppa genab dootte, nuhig ewau am ooppa genab ii dootte amu, Kayak nug laa, nug ooppa genab dootte ele, nug ewau daaglahnu wagai mekkunu ii aum. Iitta! Kayak Nug ag oolag maɗoɗ ele daaglagnu onilagppa eum.

¹⁶ Ah na geha na danab nahip ehanidppe, nug oo eɗueb Kristen daakkute o iitta amu, na ii doottem. Aria danab na, geha na ah nahip ehanidppe, nug oo eɗueb Kristen daakkute o iitta amu na ele amu ii doottem.

Kayak Nug danab eɗua aweb nug attem oikku

¹⁷ Anam amge, danab anen anen ag dayak atten, Naɗi Nug ag amuppa daan oiglagnu maatta, anamppa daaglagnu onilagppa eum amu, ag anam daan oiyeg! Da Kristen tamaniak ohppa ɗo amu laippu aakkuib madattem.

¹⁸ Danab laa nug gaɗa otaɗom ele, dimppa Kayak Nug onigppa e nug oo eɗue, aria nug amu lokkumitta beɗu eɗua aib babaittom. Am danab laa nug gaɗa ii otaɗom ele, dimppa Kayak Nug onigppa e nug oo eɗue, aria nug aib gaɗa otaɗom.

¹⁹ Gaɗa otaɗak amu keeke hamu; gaɗa ii otaɗak amu ele keeke hamu, amge Kayaknu haknunab anak dim lamidkkunignu am keeke okkai.

²⁰ Danab anen anen Kayak Nug ag onilagppa eum amu, haen amuppa ag dayak atten ⌊Kayak maattom,⌋ ag amuppa daappig amu, ag amuppa dayeg!

^21-22 Amu danab nug begbeg maɗi nid uɗat haaha dayeye, Naɗi nug onigppa eum amu, gemu Naɗi noobppa nug am begbeg maɗi nid iitta. Anamib, danab laa nug begbeg maɗi nid iitta dayeye, Naɗi nug onigppa e amu, gemu nug am Kristusnu begbeg maɗi nid daatte amunu, na begbeg maɗi nid uɗat heehe, Naɗi na oninppa eum dayeb amu, aria na begbeg maɗi nid daame, na amunu ootppa uug aib doome, amge na maɗi nid uɗat amu eɗun ii hemananu ib ena nahip dayeb amu, na keeke laa hekkutnu ukke!

²³ Am Kayak Nug Jesus mauhom amuppa Nug ag daden maattakppa hipuninnu qagaiettakppanu eɗua uhuqattom amunu, ag laa aunnu begbeg maɗi nid daaglagnu aib heppig.

²⁴ O lailad, danab laa nug dayak attem Kayak ⌊nug metta⌋ onigppa eum ele, nug anam dayeye, Kayak nug onigppa e oo eɗuom amu, nug amu anamib tuɗitta dayaɗ!

Danab ah ewau matulak ii aoppig ele dilag nai

²⁵ Aria, oɗmak ahilag laanu amu, danab ah ag ewau matulak ii aoppig ele, ahilagnu amu Naɗi Nug ɗo laa da akkulnu ii ippuniɗom. Da dahil dabmak madittem, amge Naɗi Nug dahilnu oo gai-iitta doya oo meɗa ehaniɗa, Nug da tituaniɗom amunu, nai da attem imu ag amunu oolagppa genab dooglagnu am elele.

²⁶ Am dahil dabmakppa gemu haen imuppa uug okkai betteb amunu, gemu ag danab o ah iitta ele daatteb, da ag anamib daaglagnu ena doottem.

²⁷ Na ah aome dayeb, na ewau matulak otaɗkkutnu aib dabmeme. Am na laa na ah ii aome dayeb, hamu daattem amu, na aib ah aokkutnu heme.

²⁸ Amge na ah aokkut am nai iitta; am hipunin iitta. Aria, ah makkun nug danab aokku dayeb, ewau matulak amu ele am hipunin iitta. Amge danab ah ag ewau matulak aotteb amu, wanppan uug okkai iɗu iɗu daatteb amu, da uug amu ahilagppa ii bemanu ool daatte.

²⁹ Amunu O lailad da nai imu attem. Haen tutu meum amunu, haen gamag imuppa amu ag inam dooglagnu attem. Danab ag ah diippig ele, ag am ahilag dabmakppa, “Ig ah ele, amge ig ah iitta bia daagnig,” dabmenan daaglag am ena.

³⁰ Aria, danab ag gaatteb amu, ag ii gaatteb, hamu daatteb, anam bia daaglag am ena. Danab ag gamalag ahatte amu, ag gamalag ii ahatte, hamu daatteb, anam bia daaglag am ena. Danab ag keeke daden mena aɗatteb amu, ag keeke laa ii aɗatteb, “Ig keeke iitta, hamu daattem,” bia doonna daaglag am ena.

³¹ Danab ag wannu keekeppa uɗat hetteb amu, ag am, “Ig wanppan keeke imu ɠagattag ii aɗattem. Ig keeke laa ii aɗat, hamu daattem,” amubia dabmenan daaglag am ena. Ig doottem, geha wan imuam baolieb, gemu daatte amubia ii daama.

³² Da ag keeke kuɗumnu uug ii doon oiglagnu ool daatte. Danab ah ii awom ele nug am Naɗinu keeke dabmaama, Naɗi Nug aɗi keekenu oo hette amu, nug amu hekkunu hette.

³³ Amge danab nug ah awom ele, nug amu wannu keeke dabmaama, nug wau aɗi keekenu oo hette amu, nug amu hekkunu hette.

³⁴ Aria, amuppa nug nuhig dabmak am laippu ii daatte, oppatak aɗit daatte. Ah danab iitta, am ah makkun o ah qab, nug Naɗinu keeke dabmaama, nug nug beɗuppa, nug ouɗippa ele nug Naɗiib dim lamidkkunu hette. Amge ah nug danab awom ele amu, nug wannu keeke dabmaama, nug gamu aɗi keekenu oo hette amu, nug amu hekkunu hette.

³⁵ Am da nai imu attem amu, ag ehanatteb ena daaglagnu attem. Nai imu da ag otaɗatte ii mattimi. Iitta! Ag Naɗi noobppa tutukku elele ena daaglagnu ool daatte amunu ami. Ag anam heppeg, geha keeke laa nug ahilag dabmak Naɗinu daatte amu ii eeɗma.

³⁶ Amge danab laa nug ah makkun laa ele aa nug tituanyaib oiyya, aa ewau matulak ii aoya, ah amu nug nakok kaino mekkunu heebeb, danab amu nug, “Da ah amu nuhigppa ena ii hettem,” doyaya, aa ewau matulak aoglahnu oo huana dayeb amu, aa ewau matulak aweɗ! Danab nug anam hekku amu, nug amuppa hipunin ii hema. Aa ewau matulak aoglah am ena.

³⁷ Amge danab laa nug amunu ii dabmaama, oo amuppa ɠagattag daatte, keeke laa nug ii duttuntte, nug nuhig dabmaknab awak dim lamidkkunu, nug amu aɗa oitte amu, nuhig ah makkun tituanak daatte amu ii aotte, ah nug anam hamu daatte, amu nug ele am ena hette.

³⁸ Amu danab ah makkun ele aa nug tituanoya, dimppa ewau matulak aottep amu, danab amu nug kobol ena hette. Amge danab ah makkun ele aa nug tituanoya, dimppa aa ewau matulak ii aottep amu, danab amu nug am enanag hette.

³⁹ Amu danab ah ewau matulpiɗ amu, ah nug danab amu bau dayeye, aa ouqak laippu daaglahnu aakkuib dabmekku. Amge nug gamu mauhkku amu, nug danab laa aokkunu am ib oo nak iitta. Nug danab laa aokkunu oo daatte, nug danab amu aokkunu elele. Am nai iitta, amge nug danab laa nug ele Jesusnu ooppa genab dootte aakkuib aokku.

⁴⁰ Amge da dahil dabmak am inam. Nug danab laa awak uua, hamu daakku amu, nug gamag ahak aokku; amu gamag ahak amuam nug danab aolo, gamag ahalo, am gamag ahak amu eɗidkku. Amuam dahil dabmak, amge Kayak Ouɗi Nug ele anam maidtte bia doottem.