1 Korint 6 - Nobonob Baibel

Kristen danab nug layag hettoɗiakppa ii mema

¹ Aria, ag oolagppa laa nug layagnu nai ele doyaya, Kristen tamaniak bappaidkkulagnu dab-ii-mette. Iitta. Nug danab Kayak ii dootteb ele, danab amu noolagppa hettoɗiakppa mette. Nug anam hette, amge kobol amunu nug uɗa iite nette?

² Kayaknu danab ah oppiaawak ele ag wanppan danab ah epeɗiadkkulag amu, ag iite dootteb? Genab, ag Korint ag geha wanppan danab epeɗiadkkulag amunu, keeke okkai iitta ele, ag amu babaittaknu elele iittate? Ag am attemtai?

³ Ig Kristen, ig geha engel epeɗiadkkunig, ag amu iite dootteb? Ig anam hekkunignu daattem amunu, ig wan imuppan nai epeɗignignu elelenab iite daattem?

⁴ Anam amunu, ag wan imuppan keekenu nai am, aɗinu ag danab Kristen tamaniakppanu iitta gumadna gona, epeɗiak uɗat imu madatteb?

⁵ Da nai imu attem amu, ag uɗalag neeb kobol tutukku hekkulagnu attem. Ag oolagppa danab laa, nug danab aɗit dilah nai epeɗikkunu doyak dabmak ena ele laa iittate?

⁶ Ag akka ag epeɗiak amu helob, amge iitta ag lailkad dilagppa nug yaak naippa hetteb amu, ag hettoɗiadkkulagnu ag danab Kristusnu oolagppa genab ii dootteb ele, ag ag noolagppa hettoɗiadtteb.

⁷ Amu ag lailkad ele nug hettoɗina, hettoɗiakppa maadtteb ele amu, amuppa ag nena qetteb. Ag oolagppanu laa nug layagppa eheɗ heeb, nug layag nug hettoɗiakppa ii mekku am ena. Nug nukka uug amu mawa oikku am ena. Hettoɗiakppa mak am ena iitta. O ag oolagppanu laa nug layagnu keeke yab aweb amu, layag nug hettoɗiakppa ii mekku am ena. Nug nukka uug amu mawa oikku am ena. Hettoɗiakppa mak am ena iitta.

⁸ Amge ag anam ii hetteb. Ag akka akka Kristen lailkad dilagppa keeke yab aotteb. Ag akka akka Kristen lailkad dilagppa eheɗ hetteb. Ag anam henana, ag danab nau hetteb bia helob am ele ena iitta, amge ag naunab hetteb. Ag lailkad dilag, amuam Kristen laala, ahilagppa kobol nau amu hetteb.

⁹ Ag imu iite dootteb? Danab ag nau hetteb ele amu, ag Kayaknu ɗo maɗoɗ ooppa ii daamna. Na nakka nahipnu aib hambuppume. Aun aɗi ag gappai hetteb, o aun aɗi ag kayak hambuppuak binalag metteb, o aun aɗi ag ewau pakkua gappai hak danab daatteb, o aun aɗi ag danab danabib, o ah ahib gappai aɗatteb,

¹⁰ o aun aɗi ag yabhak kobol hetteb, o aun aɗi ag baubau awaknu hik qak kobol dim lamidtteb, o aun aɗi ag le ɠagattag laeg, kaaka aqatte, o aun aɗi ag baeg qak nai maditteb, o aun aun aɗi ag nai ittag ele mattinna yabhoi hak danab daatteb amu, danab ah amu ag oh Kayaknu ɗo maɗoɗ ooppa ii daamna.

¹¹ Anukka ag oolagppa laala amubia oittappig, amge Kayak Nug he, hipunin ahilag iitta meum. Nug he, ag oppiaawak daatteb. Kayak Nug he, ag genab tutukku hak danab ah daatteb. Ihinig Kayak Nug amu oh Naɗi Jesus Kristus onigppa, amu nuhig Ouɗippa ele heum.

Kayak binag maknu kobol

¹² Da keeke oh hekkulnu ib daatte, amge keeke oh da ii ehaniɗtte. Ge, keeke oh da hekkulnu ib daatte, amge da keeke laan begbeg maɗi nid ii daapa.

¹³ Ee nug ig oonignu daatte, ig oonig nug ee aokkun daatte, amge aa oh am gemunuib. Kayak heeb, aa oh iitta mekkulah. Aria, ee nug ig oonignu daatte, ig oonig ee aokkunu daatte, amge ig beɗunig amu, ig amuppa gappai hekkunignu ii daatte. Iitta. Ig beɗunig am Naɗinu keeke, amu Naɗi Nug ig beɗunig atognotte.

¹⁴ Amu Kayak Nug nuhig ɠagattag amuppa he, Naɗi eɗua hibaittom. Am geha ihinigppa ele Nug anamib hekku; ig ele anam eɗut ahagnig.

¹⁵ Ag beɗulag anen anen, am Kristus beɗu laih naunau kuɗum daatteb, ag amu iite dootteb? Aria, ig beɗunig anen anen am Kristus beɗu laih naunau kuɗum daatteb amunu, da Kristus beɗu laih nakok laa awen, ib baag ah ele laippu ouaqatkkul am enatai? Anam iittanab! Da anam ii hepa!

¹⁶ Ag imu iite dootteb? Danab nug ib baag ah ele aa beɗulah laippu ouqettep amu, aa beɗulah ⌊amge amuppa aakkuib⌋ laippu daattep. Aɗinu? Kayak naippa, nai inam daatte. “Aɗit amu aa ouqak laippu daaglah.”

¹⁷ Ewau aa ouqak laippu daattep, amge danab nug Naɗi ele matulak daattep, nug aakku Naɗi ele ouqak laippu daattep.

¹⁸ Ag gappai kobol uun qe-eɗidna oolna ukkeg! Aɗinu? Ag “Hipunin aɗitai danab hette, amuam beɗu dimittimnu keeke,” atteb, amge iitta! Laa gappai hette ele amu, hipunin amuam nug beɗu uug medatte.

¹⁹ Ag anen anen ag beɗulkad am Kayak Ouɗinu mettid lag ag iite dootteb? Kayak Nug nuhig Ouɗi ag mattom, ag oolkadppa daatte. Ag amu, ag akka ahilagnu iitta. Ag am Kayaknu daatteb.

²⁰ Aɗinu? Kayak Nug ag hipuninnu qagaiettakppanu eɗua uhuqadkkunu daden maattom amunu, ag Kayak binag mekkulagnu, ag beɗulkadppa ele Kayak binag meig!