1 Korint 5 - Nobonob Baibel

Korint tamaniak oolagppa gappai kobol nau dayom

¹ Aria, laa ag nai laa aeg doomi amu, ag Korint ag oolagppa gappai kobol nau daatte mattieg doomi. Gappai kobol ag hetteb ele am naunab nau! Genab, iitta aɗi danab ag gappai kobol nau amubia ii hetteb. Kobol amuam danab laa nug mameg wau ele gappai aɗattep.

² Kobol amu beum daatte amunu ag, “Ig am binanig ele,” akkulagnu genab elele iitta, amge ag anam atteb. Ag uɗa nak doolob am ena. Danab nug kobol amu heum ele amu, ag nug Kristen tamaniak ooppa daamanu geɗidppeg dimittim golo am ena.

³ Genab da gemu ag ele oh ouqak ii daattem, amge da ag dabmadette, da ag ele oh ouqak daattem bia doottem. Da anam doyeye, da danab nug kobol heum amu, da nug aakku epeɗidmi. Da appa dayeye epeɗidlom bia epeɗien, ag inam hekkulagnu attem.

⁴ Ag ihinig Naɗi Jesus onigppa qagmebeppeg, dahil dabmak, amu ihinig Naɗi Jesusnu ɠagattag ele ag ele oh daappeg,

⁵ aria danab amu nug beɗu nauhkkunu, amge nug ouɗi Naɗi Jesusnu deɗppa Padal ii maknu ehanittak aokkunu, ag danab amu aon, Satan eppegppa meig!

⁶ Ag akka ag binalag metteb am ena iitta. Yis nakokib uɗat he, plaua oh titiɗtte, ag amu iite dootteb? Aria, kobol nau am yis bia daatteb.

⁷ Ag yis amu buɗippeg ukkaɗ! Ag anam heppeg iitta meeb, ag bret yis iitta, ag daaglagnu daatteb bia, ag anam bia dayeg! Aɗinu? Kristus Nug Pasowa Hobulnu sipsip nag ihinig, Nug nuhig mauhakppa aakku ihinig hipuninnu nob nau awa malom.

⁸ Amunu ig Pasowanu Hobulppa bret yis alag eleppa aib lamut. Yis amuam oo aeg bak kobol, am hipunin laa oh hak kobol ele. Ig Pasowanu Hobulppa bret yis iitta ele latu! Bret amuam kobol tutukku, kobol doyak diig genabibppanu ele ippunigtte.

⁹ Aria, da ad uɗug tatam ahilagnu yaami, amuppa da nai inam yaami. “Ag gappai danab ele aib tamanippig.”

¹⁰ Da anam yaami, amge da ag wan imuppan gappai danab oh, o baubau awaknu hik qak danab oh, o nai ittag ele mattiaya yabhoi hak danab oh, o kayak hambuppuak binag mak danab oh ele uuadkkulagnu ii ami. Ag anam helob amu, ag wan imu uuglagnu daalob.

¹¹ Amge da nai aakku yaami, amu diig am inam. Danab laa nug ag ele Kristen tamaniak ooppa laippu laa daattenu atte, amge nug gappai kobol hette, o nug baubau awaknu hik qak kobol dim lamidtte, o nug kayak hambuppuak binag mette, o nug laanu baeg qak nai atte, o nug le ɠagattag la kaaka qette, o nug nai ittag ele mattiaya yabhoi hak danab daatte amu, ag Kristen danab ag danab anambia ele aib tamanippig; ag nug ele ouqak aibnab daappig.

^12-13 Danab Kristen tamaniak dimittim daatteb ele amu, da ag epeɗiadkkulnu ii daattem. Am dahil uɗat iitta. Kayak Nugib ag aɗi heppig amunu epeɗiadkku, amge danab ahilag tamaniak ooppa daatteb ele amu, epeɗiattak uɗat amuam genab ahilag uɗat daatte amunu, ag danab ag oolagppa kobol nau hette ele amu, ag nug geɗidppeg dimittim dayaɗ!