1 Korint 4 - Nobonob Baibel

Kristusnu totol danab dilag nai

¹ Aria ag ihinignu inam dabmekkulag am ena. “Ag am Kristusnu maɗi nid, Kayaknu nai unuqag daatte amu, ag appeg doognignu daatteb. Ag amunu uɗat gumak danab daatteb.”

² Aria, uɗat gumak danab nug nuhig okkai noobppa ena daakkunu, nug nuhig danab okkai uɗat aɗi aɗi hekkunu atte, nug uɗat amu hekkunu oo metta ii uuak kobolppa hekkuoitte.

³ Danab laala ag da epeɗilkkulag dayeb, da amunu aɗi atteb amu, da amunu dabmak okkai ii aottem. Genab, da dakka da ele epeɗilkkul dayeb, amunu aɗi dabmak aottem amu, da amunu am genabnab dab-ii-mettem.

⁴ Da Naɗi noobppa da dahil ooppan oiyak ippunittaknu ulumppa da eheɗ hemi ii doottem, amge amu Naɗi noobppa da genabnab da beɗulppa aab iitta ii ippunigtte. Laa Nug da epeɗiltte am Naɗi, Nugib.

⁵ Epeɗiak uɗat amu ig gemu ii gumattem amunu, haen gamag imuppa ig anam ii hemata. Ag Naɗi uɗikkunu haen ameg meig! Nug uɗia, keeke oh gatatuppa lokkumak daatteb amu heeb, amahlakppa miag atippeg, aria Nug ele heeb, danab ag diig aɗinu keeke laala heppig amu, danab oh dilag dabmak amu miag bekku. Haen amuppa geha Kayak Nug ig danab oh laib laib ihinig haknu nob tutukku megakku.

Korint ag akka binalag meppig

⁶ O lailad, da ag ehanadppi, ag da Apolos ele, ag i anitna, kobol ihinihppa ag antte oo maittak laa anidna, nai laanu meu anidkkulagnu da nai mattimi. Nai laa ag amunu meu anidkkulagnu am inam. “Yaak niitte aakkuib ag dabmenan oiyeg!” Ag nai amunu diig dooglag dayeb, ag danab laa onig ii humana, laa onig tabappeg ii nema.

⁷ Aun na danab okkai meittom? Keeke aɗi laa na Kayak nuhigppanu ii aome? Kayak Nug na keeke oh mettom amunu, aɗinu na binan mena, keeke amu diig daattem bia doottem?

⁸ Ag Kayak nai elelenab aoppig daatteb bia dootteb, amge amuam genab iitta. Ag keeke laanu daɗek ii daatteb bia dootteb, amge amuam genab iitta. Ehanittak ihinig iittappa ag king bena daatteb dootteb, amge amuam genab iitta. Ag genab king daalob amu, ig ag ele oh king daalom amunu, da ag king daaglagnu ool daatte.

⁹ Deɗ laala da inam dabmettem. Kayak Nug ig totol danab nuhikkud otikkom, ig uɗat amuppa oittem ele amu, Nug he, ig laa oh dimulagppanab, ig danab banppa aɗualadna aqappeg mauhkkulagnu otiadppig, amubia daattem. Genab, ig wan atu ohppa danab oh noolagppa, amu engel noolagppa ele, ag ig eheɗ anigkkulagnu daattem deɗ laala da anam doottem.

¹⁰ Ig totol danab ig wan imuppan danab dilag neekkakppa, ig Kristus dim lamidttem amunu, ig am danab dabmak tutukku iitta ele, amge ag Korint danab ag ahilag dabmakppa, ag am Kristusnu daatteb, amuppa ag am danab doyak dabmak ena ele. Ig am danab ɠagattag iitta, ag am danab ɠagattag ele. Ig am binanig iitta, ag am binalag ele.

¹¹ Yo, ig totol ig uɗat imu wan imuppa heutut, digma uɗie, gemu ele enug iqe, baanig qaɗaiedatte, beɗunig hautaknu lamen ele ena iitta daattem. Laa ag eppelag bitakkan beɗunig eheɗ oigtteb. Ig dayaknu aben ele iitta.

¹² Keeke aognignu amu iikku eppenigppa uɗat naɗi hettem. Laa ag ig eheɗ laa awaknu anak waappa daagnignu nai mattieg, ig nai enappa ahilag nai nob meta itittak ena madattem. Ag ig eheɗ heikkegeg, ig amu maot oittem.

¹³ Ag ihinignu baeg qak nai aeg, ig nai bodoettakppa ag amelagppa attem. Ig am wan ohppanu kinipan daatte, amubia daattem. Ao, ig danab oh dilag kinipan, amubia daattem. Ig anamib daaut uɗie, gemu ele daattem.

¹⁴ Da heppi, ag uɗalag nekkunu ii yaattem. Iitta! Ag nid naunau dahiladnab bia, ag eheɗ gomananu amu, da ag ib ippunadkkulnu hettem.

¹⁵ Ag Kristusnu daanna, ag ippunittak danab kuɗumnab ag ehanadkkulagnu diiglagtai. Ag diiglag dayeb am diiglag, amge amuam heeb, keeke laa ii baolima. Keeke ii baolikku, amuam da Jesusnu Nai Ena mehuqi, ag oolagppa genab dooppig amunu, daib ag mamelag daattem; ag mamelkad kuɗum iitta.

¹⁶ Da ag mamelag daattem amunu, ag oiyak dahil anidtteb ele amu, ag kobol amuppa oiglagnu dabmak ahilkad maɗedattem.

¹⁷ Diig amunu da Timoti meppi, ahilagppa gokkunu hettem. Nug dahil nid danab, da nuhignu ool huana mauhtte. Nug Naɗinu oo metta ii uuak kobol dim lamidtte. Nug da Kristus Jesusnu daattem, nuhig kobol dim lamidttem ele amu, nug kobol amu ippunadkku. Da kobol anamib Kristen tamaniak aben ohppa ippunadttem.

¹⁸ Da Timoti meppi ahilagppa gokku, amge dimppa da ele gumatte gokkul. Da tatam ii gomi, dimppa gokkul amunu ag oolagppa laala, “Nug eɗua ig gumikka ii uɗima,” anana, beɗuppa tak kobol hetteb.

¹⁹ Laa ag anam hetteb, amge Naɗi Nug oo dayeb amu, da ag gumatte gokkul. Ukkena amu da beɗuppa tak danab amu dilag nai doyena, ɠagattag ahilag ele am genab daatte o iitta, amu ele da anidkkul.

²⁰ Aɗinu? Kayaknu ɗo maɗoɗ amu naippaib ii bette. Iitta. Kayak ebehippa bette.

²¹ Aria ag attemtai? Ag kobol ahilag ii bappaidppeg, da bu aɗe ahilagppa gokkulnu oolag daattete? O iitta ag eɗun ena heppeg, da oo mauhak kobol, kobol bodoettak eleppa gumatten gokkulnu oolag daattetai?