1 Korint 3 - Nobonob Baibel

Kayaknu maɗi nid

¹ O lailad, da ag amelagppa nai mehuqmi amu, da danab Kayak Ouɗi oɗe dim lamidtteb dooglagnu nai mehuqttem bia ii mehuqmi. Iitta. Da nai mehuqmi amu da nai, danab dabmak alag ele dooglagnu mehuqttem, nai amubia ag amelagppa mehuqmi. Ag ahilag Kristusnu dayakppa amu, ag yuɗ daaegeg nai mehuqmi.

² Nid yuɗ ag ee ɠagattag ii latteb, ag huh latteb, amubia haen amuppa da ag nai unuqag mattalom, ag aoglagnu elele iitta daalob amunu, da nai unuqag ii mattimi. Iitta. Da nai gai-iitta aakkuib mattimi. Ag gemu ele nai unuqag aoglagnu elele ii daatteb.

³ Aɗinu? Ag dabmak alagppa daatteb. Kristen kobol amu ag beɗulagppa ii beum. Ag lailkad dilagnu, ihinigppa anam daalon dabmak aɗan daatteb, ag nug mehqak henan daatteb ele amunu, ig ag kobol alagppa, Kristen kobol iittappa daatteb anidkkunignu elele. Kobol amuam dabmak alagnu, wanppan danab dilag kobol.

⁴ Am danab laa nug, “Da am Polnu,” a, danab laa nug, “Da am Apolosnu,” atte. Ag kobol amu ii uuppig amunu, ag wanppan danab daatteb.

⁵ Ag tutukku dabmak aon antteg! Apolos nug am aun? Am da Pol am aun? I am maɗi nidib; Naɗi Nug i uɗat ihinih piɗe piɗe metom. Nug uɗat amu mete, i uɗat amu heuɗuɗ, ag Kristusnu oolagppa genab dooppig.

⁶ Da ee aeg eppai, Apolos nug le mettom, amge Kayak Nug he, ee amu beum.

⁷ Anam amunu, ee eppak danab nug am onig iitta. Ee le mettak danab nug ele onig iitta. Kayak Nug nukka he, ee bette. Nug he, ee bette amunu, Nugib am onig ele.

⁸ Aria ee eppak danab, le mettak danab ele, aa oh diig laippunu uɗat hettep, amge maɗi ahilah am anen anen. Kayak Nug maɗi ahilah antta, melemel amuppa nob ena matakku.

⁹ I am kadoi meɗa, Kayaknu maɗi nid daattep; ag am Kayaknu dad bia daatteb. Laa ele amu, ag am Kayak laug daatteb.

¹⁰ ⌊Lag hak danab nug lag hekkunu dayeb amu, nug tatam lag ukku hette. Lag ukku amu danab ag lag amu qaɗeppa heppeg, ena daakku. Lag ukku am lag diig. Tamaniak diig am tamaniak ukku⌋ Aria Kayak ehaniɗe, lag hak danab nug lag ukku ena tutukkuib aɗatte, amubia da tamaniak tutukku enaib daakkunu, nuhig ukku daakkunu, ag amelagppa Jesusnu nai mehuqmi. Gemu laala ag danab laa uɗin lag ukku qaɗeppa lag hetteb, amubia da nai mattimi, nai amuppa ag uɗat tuɗidna hetteb. Amge laala, ag anam hetteb ele amu, ag dabmenan heig! Ag mauhnoak aib heppig.

¹¹ Aɗinu? Tamaniak ukku laa ii daatte. Da Jesus Kristusnu nai mattimi aakkuib am tamaniaknu ukku daatte, amu danab laa nug ukku laa heeb bekkunu elele iitta.

¹² Amu danab ag lag ukku qaɗeppa lag hetteb ele amu, ag keeke laalappa, aab eokkunu elele iitta; gol, o iitta silwa, o iitta men ena amuppa lag hekkulagtai. O amu iitta ag keeke laalappa, aab eokkunu elele; ad, o iitta gikkiɗah, o iitta wit keeke gumu amuppa hekkulagtai. Amubia danab ag nai dahil aon tuɗidna uɗat hetteb.

¹³ Aria, danab ag lag, keeke piɗe piɗeppa heppig ele amu, aab lag amu eweb, ahilag uɗat am miag atikku. Laala ag keeke aab eokkunu elele iittappa uɗat heppig amu, ahilag uɗat am ii iitta mema. Amge laa ag keeke aab eokkunu eleleppa uɗat heppig amu, ahilag uɗat am iitta mekku. Amubia ele danab ag dahil nai aon, uɗat tuɗidna hetteb ele, ahilag uɗat am elele o elele iitta am miag atikku. Aab nug heeb, lagnu uɗat am miag atikku, amubia Kayak Nug heeb, danabnu uɗat am miag atikku.

¹⁴ Laa nug uɗat heum ele amu, uɗat amu ena dayeb, danab amu nug nob ena aokku.

¹⁵ Amge laa nug nuhig uɗat, lag ewa mala iitta mette amubia iitta mekku dayeb amu, nug am nob ena ii aoma. Nug am padal ii mema, amge nug am danab aab aɗuppa nauhkkunu miagnab dayaya, oola ukka, nauhak ii aotte, amubia padal ii mema.

¹⁶ Ag am Kayaknu mettid lag, Kayak Ouɗi Nug ag oolagppa daatte amu, ag amu iite dootteb?

¹⁷ Danab laa nug Kayaknu mettid lag heeb nauhkku amu, Kayak Nug ele danab amu heeb nauhkku. Aɗinu? Kayaknu mettid lag am nuhignu tituanak daatte, amu ag aakku Kayaknu mettid lag daatteb.

¹⁸ Amge laa nug nugakka buppuidmanu dabmaɗ! Ag oolagppanu danab laa nug wannu haen imuppanu doyak dabmak ena okkai awom amunu nug, “Da am doyak dabmak ena ele danab,” dabmette dayeb, nug genab doyak dabmak ena ele danab ba daakkunu, nug wannu haen imuppan doyak dabmak ena ele oh qeeb naɗ!

¹⁹ Aɗinu? Wanppanu doyak dabmak ena ele, amuam Kayak noobppa dabmak tutukku iitta. Kayak naippa, nai laa daatte amubia. Nai amuam inam. “Danab wan imuppan dabmak doyak ena ele laala ag doyak dabmak ena ele amuppa ag keeke laa hekkulagnu lokkumakppa dabmenana maittak eheɗ aotteb amu, Kayak Nug he, ag nuhig pelemppa tetteb.”

²⁰ Amu Kayak nai aben laappa amunu ele inam daatte. “Naɗi Nug danab wanppan doyak dabmak ena ele, Nug amu dilag doyak dabmak ena ele am keeke hamunab dootte.”

²¹ Nai amu aakku daatte amunu, danab laa nug danab binalag aib meum. Genab, keeke oh am ag ahilagnu daatte.

²² Pol, Apolos, Sipas, onig laa Pita, aria wan imu, bau dayak, mauhak, keeke gemu daatteb, keeke dimppa bekkulag ele amu, keeke amu oh am ahilag,

²³ amge ag am Kristusnu, amu Kristus Nug am Kayaknu aakku daatte.