1 Korint 2 - Nobonob Baibel

Pol, Kristus ad emaitakppa mauhomnu mehuqom

¹ O lailad, da anukka haen laa ahilagppa ukke, Kayak nai mehuqi dooppig, amge da nai laala enanag eleppa ag eeɗadkkulnu o iitta doyak dabmak ena ele okkainab, danab kuɗum ii dootteb eleppa, ii mehuqmi.

² Iitta! Da dabmak awen, ɠagattag qein, haen da ag oolagppa dayeye, dakka dakka da oolppa ami. “Keeke laa ohnu ele da ii dabmepa. Da Jesus Kristusnuib, amu Nug ad emaitakppa mauhom, amunu ele aakkuib dabmein madikkul,” awe ami.

³ Anukka da ukkai, ag ele daamut, haen amuppa da oolppa elele ii doyen, da uɗat pehettak ii heppi, meu elele ii bemanu ool baɗa auta awom.

⁴ Da nai mattimi, da Nai Ena ele ag amelagppa mehuqmi, amge da wanppan doyak dabmak ena ele, dahil ɠagattagppa da ag amelagppa ii mehuqmi. Iitta. Da Kayak Ouɗi ahilagppa uɗat heeb anidkkulagnu, ib amuppa da nai mehuqen ippuanatti, Nug anam heum.

Kayak Ouɗi Nug doyak dabmak ena elenu diig

⁵ Da anam hemi, amunu diig am, ib laappa ag danabnu doyak dabmak ena ele aona, ag oolagppa genab dooglag dayeb, amuam ena iitta, keeke hamu. Amge ag Kayaknu ɠagattag anidna, oolagppa genab dooglag dayeb, amuam meu ele, iitta ii mema amunu da anam hemi.

⁶ Imuam genab, ig danab Kayak kobolnu kalulag mettak ele, ig ag amelagppa nai doyak dabmak ena ele mehuqttem. Amge nai doyak dabmak ena ele amu, amuam wannu haen imuppan danab dilag doyak dabmak ena ele iitta. Amu wan imunu ikki, ahilag ele iitta. Ag am iitta mekkulag.

⁷ Amu nai ig mehuqttem ele, nai amuam Kayaknu doyak dabmak ena ele, nuhig dabmakppa daye, danab dilag neekkakppa miag atiak ii daya, lokkumak dayom ⌊uɗie, gemu batak⌋. Amu Kayak Nug wan ii beum haenppa, Nug nuhig doyak dabmak ena ele amuppa ig binag amahlak oppiaawak ele aognignu maittak awom daatte.

⁸ Wannu haen imuppan ikki danab oolagppanu laa nug doyak dabmak ena ele amunu diig pehettak ii doyom. Iitta. Ag doolob amu, ag Naɗi, Nug binag amahlak oppiaawak ele, ag Nug emaitakppa ii atullob.

⁹ Kayak naippa, nai inam daatte. “Kayak Nug keeke ena ena, danab ag nuhignu oolag mauhtte ele madakkunu babaittom amu, keeke amuam danab laa nug amegppa ii anttom, daugppa ele ii doyom, dabmakppa ele ii beum. Keeke enanagnab.”

¹⁰ Keeke amuam lokkumak dayom, amge Kayak Nug he, nuhig Ouɗi ig ippunikkom. Kayak Ouɗi Nug keeke oh mattia anidtte. Ge, Nug Kayaknu dabmak oh lokkumak daatte, Nug amu ele anidtte.

¹¹ Am danab laa nug danab laanu dabmak ii dootte. Iitta! Danab amu, nug ouɗi, nug danab amu ooppa daatte, nugib dootte. Amubia, danab laa Kayaknu dabmak ii dootte, Kayak Ouɗi Nug nukka, Nugib dootte.

¹² Ig keeke ena ena Kayak mekkom daatte ele, ig amunu diig pehettak doognignu Kayak Nug wan imuppan ouɗi ii mekkom. Iitta. Nug keeke ena ena oo qak iitta mekkom daatte amu, ig amunu diig pehettak doognignu Nug nuhig Ouɗi ig mekkom.

¹³ Amunu ig nai imu mehuqttem ele, ig wan danab laanu doyak dabmak ena ele aot ii mehuqttem. Iitta! Kayak Ouɗi Nug ig ippunikke, ig nai imu mehuqttem. Kayak Ouɗi Nug ippunikke, ig danab Kayak Ouɗi ele ag amelagppa Kayaknu dabmak amu mehuqttem.

¹⁴ Amge danab nug Kayak Ouɗi ii awom ele, nug Kayak Ouɗinu dabmak ii aotte. Aɗinu? Nug dabmak amunu, “Dabmak tutukku iitta,” anam dabmette. Dabmak amunu amu, Kayak Ouɗi Nug danab ehanidkku dayeb, nug dabmak amunu oo maidkku amunu, danab ag Kayak Ouɗi iitta ele, ag am dooglagnu elele iitta.

¹⁵ Am danab nug Kayak Ouɗi ele, nug keeke oh anen anen, laa am ena laa am nau ele amu, nug amu oh epeɗiadkkunu elele, amge danab ag Kayak Ouɗi iitta, ag danab amu epeɗidkkulagnu elele iitta.

¹⁶ Kayak naippa, nai laa amunu inam daatte. “Aun laa nug Naɗi ulum nai medakkunu elele daakkunu nug Naɗinu dabmak oh anttom? Laa iitta!” Amge Kristusnu dabmak ihinigppa daatte ⌊amunu, laa nug Kayak Ouɗi iitta ele, nug epeɗigkkunu elele iitta⌋.