1 Korint 16 - Nobonob Baibel

Kayaknu danab ah dilag kolekta

¹ Gemu da ag men doɗo qagmena, Kayaknu danab ah oppiaawak ele mattaglagnu hetteb, da amunu akkulnu hettem. Da tatam Galesia Kristen tamaniak ib ippuanatti hetteb, amubia ag ele heig!

² Mettid ohppa ag oh anen anen Mettid deɗppa ag men doɗo mettid ukkomppa aoppig amu dabmettanna, ag laih otin laulagppa meppeg dayebeb, geha dimppa da gumatte goppi, ag men doɗo mattaglagnu mattiaknute henana, hik ii aqama.

³ Aria, da dimppa ahilagppa goppi amu, ag akka danab laala ag men doɗo amu aon, Jerusalem gokkulagnu otiadppeg amu, da Jerusalem danab ag danab ag otiadppig ele, ag ag doyadkkulagnu da ag pas madappi, ag amu ele aon gokkulag.

⁴ Aria, da ele gokkulnu am ena bia anidkkul dayeb amu, da ag omaladppi, oh gokkunig.

Bagqak nai

⁵ Da tatam Makedonia oppaten gokkulnu dabmettem amunu, da anam oppaten ukkoya, geha da ahilagppa ana tekkul.

⁶ Am geha da ag ele haen nakok tutuib ana daagnigtai, o iitta da ag ele daapput ukkeb, oug haen iitta meeb, dimppa da aab laappa gokkulnu hebippi, ag da omaiɗna gona, ibppa uuiɗkkulagtai.

⁷ Da gemu Makedonia oppaten ukkena, ahilagppa teppi, haen tutunab aakkuib nug iɗu anidkkunignu ool ii daatte. Iitta. Naɗi Nug elele ab amu, da ag ele haen nakok elab daagnignu dabmak aɗe daattem.

⁸ Amge da Epesus daabppi ukkeb, Pentikos deɗ dokku.

⁹ Aɗinu? Kayak Nug dahil ib amu matu ma babaittom daatte am da uɗat naɗi, danab ah kuɗum ehanadppi, Kristen daaglagnu hettem. Amge kekeɗ ele kuɗum daatteb.

¹⁰ Timotinu amu, nug Naɗinu uɗat da hettem amubia hette ele amunu, nug ahilagppa ta dayebeb, ag tutukku dabmeppeg, nug geha oo maɗoɗ ele ag oolagppa dayaɗ!

¹¹ Laa nug nuhignu keeke hamu bia dabmaama aib dimettom! Nug da gumiɗa uɗikkunu ag heppeg, nug ooppa maɗoɗ doyaya, aha uɗiaɗ! Da nug, lailad laa ele oh uɗiglagnu dabmen daattem.

¹² Aria, ig lainig Apolos, nuhignu amu da iikku attem. Haen kuɗum da nug amegppa, nug geha ukkebeb, lailad laala ele oh gona, ag anadkkulagnu ɠagattag ami, amge nug gemu gokkunu am uua autanab awom. Dimppa nug ib elele antta, aria nug geha gokku.

¹³ Ag Korint danab ag ib apiɗidna eheɗ gomananu amu, ag dabmettan autna aona, ag ahilag ooppa genab doyakppa ɠagattag daan, ag ooppa ɠagattag dayak ele daanna, ɠagattag ele dayeg!

¹⁴ Ag keeke oh henana, ag oo mauhak doonna ag heig!

¹⁵ O lailad, ag Stepanas amu nug baekkudppanu ele, ag am prowins Akaia oolagppanu ag tatam Kristen bena, ag akka Kayaknu danab ah oppiaawak ele ehanadkkulagnu oolag daye, uɗat amu aoppig hetteb amu ag dootteb. Amu O lailad, da ag inam hekkulagnu ahilkad dabmak maɗedattem.

¹⁶ Ag danab anam amu dabmattanna, ag oɗelag dim lamidna, amu danab laala ag danab amu ele uɗat hetteb amu, ag ahilagnu ele anam heig!

¹⁷ Haen Stepanas, Portunatus, Akaikus ele ag gumiɗna uɗieg amu, da gamal ahom. Aɗinu? Ag Korint am ippa ii uɗitteb, amge ewam imu ag uɗieg, ag ele oh uɗilob bia doomi.

¹⁸ Ag da oo maɗoɗ meɗappig. Tatam danab ewam amu ag Korint appa ag ele daanna, ag ag oo maɗoɗ madappig, amubia ag da oo maɗoɗ meɗappig amunu, ag danab anam amu onilag humeg!

Gamanattak nai

¹⁹ Kristen tamaniak Asia prowinsppa daatteb, ag ag Korint daatteb humadtteb. Akwila, Prisila amu Kristen tamaniak aa laulahppa qagmetteb ele, ag ele ag Naɗi onigppa ag humadtteb.

²⁰ Kristen lainkad, ippa daatteb amu, ag oh ele ag humadtteb. Ag Korint appa, ag Kristen kobol oppiaawak eleppa, ag nug humittak heig!

²¹ Da Pol, da dakka da eppelppa humattak nai uɗug imuppa iikku yaattem.

²² Am danab laa nug Naɗinu oo ii mauhtte dayeb, nug eheɗ laa awaknu anak waappa dayaɗ! Naɗi, na uɗie!

²³ Naɗi Jesusnu ehanittak okkai hamu megatte ele amu ahilagppa dayaɗ!

²⁴ Ag Kristus Jesusnu daatteb amu, dahil oo mauhak ahilagppa dayaɗ! Genab.