1 Korint 15 - Nobonob Baibel

Kristus Nug mauhowa eɗua hibaittom

¹ O lailad, da ahilag dabmak Nai Enanu maɗedakkulnu hettem. Da tatam digmakppa Nai Ena amu mehuqi, ag Nai Ena amu doon aɗan, oolagppa genab doon, amuppa ɠagattag daatteb.

² Ag da Nai Ena ag amelagppa mehuqmi ele ɠagattag aɗatteb dayeb amu, Kayak Nug nai amuppa ag eɗua diitte. Ag ɠagattag ii aɗatteb dayeb amu, ag hamu oolagppa genab dooppig.

³ Da ippunittak aomi amu da nai amu ag amelagppa mehuqi dooppig. Nai amu inam. Kayak naippa nai daatte amubia Kristus Nug ig oh ihinig hipunin uhuqa megakkunu mauhom.

⁴ Ag Nug men oɗeppa boumeg, amu deɗ ewamppa Kayak naippa nai daatte bia, Kayak he, Nug eɗua hibaittom.

⁵ Amu Nug Pita gumitta ukke antte, dimppa Nug nuhikkud ippunittak awak danab laa gumatta ukke anidppig.

⁶ Amu dimppa nug nuhikkud dim lamittak danab 500 laa ele gumatta ukke anidppig. Gemu amu ag oolagppan kuɗum bau daatteb, amge laippu laippu mauhppig.

⁷ Aria, amu dimppa Nug Jems gumitta ukke antte, amu dimppa Nug totol danab nuhikkud oh gumatta ukke, ag ele Nug anidppig.

⁸ Aria, da am nid yuɗ anig dimnab menuom bia daaiyi, Kristus da gumiɗa uɗie anidmi.

⁹ Amu da totol danab oolagppanu amu da onig iitta bia daattem. Laa ele amu laa ag dahilnu, “Nug totol danab,” aon ii alob bia. Aɗinu? Da Kayaknu Kristen tamaniak amu heppi, iitta mekkulagnu eheɗ hadattami,

¹⁰ Amge Kayak Nug da ehanittak okkai hamu meɗe, da gemu attem daattem amu ehanittak nuhig amuppa da aakku daattem. Nug da ehanittak okkai hamu meɗe amu, da ii kakidmi. Iitta. Da uɗat ɠagattag hei uɗie, gemu ele hettem. Totol danab laa ag da uɗat ɠagattag hettem bia ɠagattag ii hetteb, amge da dakka ii hettem. Iitta! Kayak Nug da ehanittak okkai hamu meɗe, da amuppa amu hettem.

¹¹ Amge daibte uɗat okkai hemi, o iitta totol danab laa agte uɗat okkai heppig, amuam keeke okkai iitta. Keeke laippuib anuqak daatte, amuam ig oh Kayaknu nai amuib mehuqttem, amu nai amu aakkuib ag Korint danab ag oolagppa genab dooppig.

Danab mauhppig eɗua hibaittaknu nai

¹² Amge haen oh ig Kristus Nug mauhe, Kayak Nug he, Nug eɗua hibaittom, nai amu ig mehuqttem amunu, attemun ag oolagppanu laala ag nai inam aon maditteb? “Danab mauhom, nug eɗua ii hippaidma,” aon atteb.

¹³ Am danab mauhom, nug eɗua ii hippaidlo, nai amu genab daalo amu, ig inam ele doolom; Kayak Nug he, Kristus Nug eɗua ii hibaittom, amge anam iitta.

¹⁴ Kristus Nug eɗua ii hibaittom am genab daalo amu, aria nai ig mehuqttem am hamu, kaya naiib daalo. Ag oolagppa genab dootteb ele amu, keeke amu ele am meu iitta, keeke hamu daalo.

¹⁵ Eɗua hibaittak nai am nai genab iitta daatte daalo, aria ig hambuppuak danab daatta, Kayak nai amu mehuqttem. Aɗinu? Ig Kayak he, Kristus eɗua hibaittom, ig nai amu miag atiak mehuqttem. Amge Kayaknu ɠagattagppa mauhak danab ag eɗun ii hippaidmana, nai amuam genab daalo, aria Kristus ele Kayaknu ɠagattagppa eɗua ii hippaidlo.

¹⁶ Ao, danab mauhppig ele ag Kayaknu ɠagattagppa eɗun ii hippaidlob amu, aria ig inam ele doolom. Kristus ele Nug Kayaknu ɠagattagppa eɗua ii hibaittom.

¹⁷ Amu Kristus Nug Kayaknu ɠagattagppa eɗua ii hippaidlo amu, ooppa genab doyak ahilag am hamu; am ag ii ehanadma. Nug ag hipunin ahilag ii uhuqa mattom daalob.

¹⁸ Anam daalo amu, danab ag Kristusnu daan mauhppig ele amu, ag ele padal meppig.

¹⁹ Ig Kristusnu oonigppa genab doota, ig Nug ehanigkkunu dabmak aɗat oittem ele amu, ig wan imuppaib nuhig ehanittak aognignu daattem daalo, amu ihinignu gadonnab.

²⁰ Amge anam iitta. Kristus Nug mauhe, Kayak Nug genabnab he, Nug eɗua hibaittom. Nug datta ee tatam oɗue digmen aotteb, amubia Nug danab mauhak amu, Nug ag oolagppanu Nug tatam anuqa eɗua hibaittom.

²¹ Ig danab ig mauhttem, amunu diig am danab laa nug he, kobol amu beum. Amubia danab eɗua hibaittaknu kobolnu amu, danab laa Nug he, kobol amu beum.

²² Amu inam. Adam hipunin heum amunu, danab oh mauhtteb. Anamib aakku Kristusnu uɗat okkaippa amu, danab oh ag bauklel aoglag.

²³ Anam, amge amu oh anen anen, ahilag haenppa awaknu daatteb. Tatam Kristus Nug eɗua hibaittom, aria dimppa, haen Kristus Nug eɗua uɗikku, laa ag nuhigppa daatteb ele, ag geha eɗun hippaidkkulag.

²⁴ Aria, amu dimppa Kristus Nug gabman uɗat, ikki dayak uɗat, amu ɠagattag digdig ele amu oh heeb, iitta meppeg, Nug ɗo maɗoɗ amu Kayak, ig Mamenig, Nug eppegppa meeb dayeb, haen aakku gogppa tekku.

²⁵ Amunu diig am, Kristus Nug keeke ohnu gumak danab dayebeb ukkeb, Kayak heeb, Kristus Nug nuhikkud kekeɗ oh tabatteb, ag nug baeg waappa wakkulagoitte.

²⁶ Nug kekeɗ laala oh amu eɗatteb, Nug waappa daappeg amu, Nug geha kekeɗ dimnab, amuam mauhak, Nug kekeɗ amu ebehi okkula heeb, iitta mekku.

²⁷ Amu bekkunu diig am, Kayak naippa, nai laa amunu inam daatte: “Kayak Nug Nug keeke oh gumadkkunu eppegppa meum.” Kayak nai amuam Kayak Nug keeke oh Kristus waappa meum ippunigtte, amge Kayak Nug nukka keeke amu ooppa ii daatte am ele miag atiak daatte. Nug keeke laa oh Kristus waappa meum.

²⁸ Aria dimppa, keeke oh Kristus waappa daappeg amu Nug, Nug am Kayak Bekka, Nug nukka Nugib ha, Nug Nug Mameg Kayak, Nug keeke oh Nug Bekka waappa meum amu, Nug Nug waappa daakku. Amuppa Kayak Nug keeke oh gumak ikki anuqak daakku.

²⁹ Danab mauhakppanu eɗun ii hippaidlob amu, aɗinu danab laala ag danab mauhppig amu oulag layattak aotteb? Ag aɗi dabmenana, anam hetteb?

³⁰ Aria, danab mauhppig ag eɗun ii hippaidlob amu, ig ele hanhan danab laala ag ig eheɗ heigkkulagnu hetteb amu, aɗinu ig uug amu maottem?

³¹ O lailad, deɗ deɗ ohppa da mauhak ib oɗeppa oittem. Nai laa imu, ig oh ihinig Naɗi Jesus Kristusnu daattem amunu, da ahilagnu maɗoɗppan gamag ahak doottem, nai amuam genab, amubia da deɗ deɗ ohppa mauhak ib oɗeppa oittem am ele genab.

³² Danab mauhppig ele, ag eɗun ii hippaidlob amu, haen da Epesus daaiyi laala da Jesusnu nai mehuqttem diig amunu iuppeg mauhkkulnu heppig amu, uug amu mawak am diig iittanab. Danab mauhppig ele, ag eɗun ii hippaidmana, nai amu genab daalo amu ig, “Haen elab iitta ig mauhkkunig amunu, ig ee le ele aot latu!” dabmeta doolom.

³³ Hambuppualadmananude dabmeig! Danab nau ag anam maditteb ele amu, ig ag ele oignig amu, geha ag ihinig dabmak heppeg kabolieb, ag oitteb bia oignig.

³⁴ Ag dabmak tutukku aona, ag hipunin tuɗidna aib heppig! Ag oolagppan laala ag Kayak ii dootteb. Da nai madittem imu, ag amunu uɗalag nelo am ena.

Beɗu eɗua ahakku am beɗu diig laa

³⁵ Aria, danab laa nug inam ana oɗ mekku. “Danab mauhppig, ag attemu eɗun hippaidkkulag. Ag eɗun hippaidkkulag amu, ag geha beɗulag attemu aoglag?” awa akku.

³⁶ Na dabmak tutukku iittate? Imu na doottem. Na wit aeg keeke ebattem, aeg nug ii nauhkku amu, nug geha bau ii daama.

³⁷ Haen na keeke ebattem amu, na keeke dimppa bette, gumu, uɗug ele, keeke amu ii ebattem. Iitta. Na aegib ebattem; wit aegtai o ee laa aegtai.

³⁸ Amge Kayak, Nug dabmak nuhig dim lamitta, Nug gumu, uɗug ele medatte. Nug ee iɗu digdig ohnu amu anen anen gumulkad uɗulkad ele anam madatte.

³⁹ Ig beɗunig oh am iɗu laippu iitta. Danab nug beɗu iɗu laa amu doɗ ag beɗulag iɗu piɗe laa. Amu ai ag beɗulag iɗu laa, am kakai ag beɗulag iɗu diig laa.

⁴⁰ Laa ag hab attan daatteb amu ag beɗulag laa, wanppa daatteb ele amu ag am beɗulag laa, hab attannu keeke amu ag binag amahlak oppiaawak laa, wanppan keeke ag binag amahlak oppiaawak laa.

⁴¹ Aam nug binag amahlak oppiaawak laa, kalam nug binag amahlak oppiaawak laa, amu hoɗoppai ag binag amahlak oppiaawak laa. Am hoɗoppai ag ele binag amahlak oppiaawak iɗu piɗe piɗe.

⁴² Anam amunu, danab mauhppig eɗun hippaidkkulag amu, kobol anamib aakku; ⌊beɗu dayom bia ii daama⌋. Beɗu ig boumttem am nauhtte; beɗu Kayak heeb eɗua hippaidkku amu, amuam ii nauhma.

⁴³ Beɗu ig boumttem amu, nug keeke binag ele iitta; beɗu Kayak he eɗua hippaidtte am binag amahlak oppiaawak ele. Beɗu ig boumttem, nug am ɠagattag iitta. Beɗu Kayak he eɗua hippaidtte amu, nug am ɠagattag.

⁴⁴ Beɗu ig boumttem, nug amu wanppanu. Beɗu Kayak he eɗua hippaidtte amu, amuam hab aabppanu. Am wanppan beɗu genab daatte dayeb amu, hab aabppanu beɗu ele aakku genab daatte.

⁴⁵ Kayak naippa, nai amunu inam daatte. “Danab Kayak digmakppa heum, onig Adam amu, Kayak he, nug am bau dayom.” Amge dimppanu Adam, Nug am Ouɗi laa, bauklel megatte.

⁴⁶ Laa hab aabppanu beɗu am tatam ii uɗiom. Iitta. Laa wanppanu beɗu anuqom, laa hab aabppanu am dim uɗiom.

⁴⁷ Adam tatamnu amu, Kayak Nug wan awa danab amu heum. Adam dimnu amu hab aabppanu uɗiom.

⁴⁸ Danab ag wanppanu danab daatteb amu, ag oh am danab digmak heum ele nug bia daatteb. Danab ag hab aabppanu danab amu, ag am laa hab aabppanu neum bia daatteb.

⁴⁹ Amu ig gemu danab wanppan beɗu ele, ig amubia daattem, anamib geha ig hab aabppanu danab, ig Nug bia daagnig.

⁵⁰ O lailad, da ag amelagppa attem. Wanppan beɗu nug Kayaknu ɗo maɗoɗppa daakkunu elele iitta. Keeke beɗatte ele, amuam wanppan beɗu, amu keeke ii beɗatte ele, amuam Kayaknu ɗo maɗoɗ, amuppa daakkunu elele iitta.

^51-52 Antteg! Da nai tonak daatte ag amelagppa iikku otule, miag madittem. Ig Kristen oh amu ii mauhmata. Iitta! Kristen aun aun ag gogtak haenppa trampet gayebeb, bau daanna, ag ii mauhmana. Ag am ii mauhmana, amge ig oh, mauhak am ii mauhak ele, haen amuppa Kayak heeb, ig baolignig. Yo, ig pahanab, paha paha amuhpapaɗ qak bia, Kayak heeb, ig baolignig. Trampet amu gayebeb, Kayak Nug heeb, danab mauhppig ele amu ag beɗulag laa, beɗulag amu ii nauhma, beɗulag amu ele eɗun hippaidkkulag. Amu ig laa, ig haen amuppa bau daagnig ele amu, Kayak heeb, ig ele baolignig.

⁵³ Amu inam. Ig beɗunig beɗatte ele imu amu baolia, laa awa, amu ena hanhan daakku. Ig beɗunig mauhtte ele imu amu baolia, laa awa, bau hanhan daakku.

⁵⁴ Amunu haen ig beɗunig beɗatte imu amu geha baolia, laa awa, ena hanhan daakkunu beeb, amu haen ig beɗunig imu mauhtte amu geha baolia, bau hanhan daakkunu beeb amu, haen amuppa amu Kayak naippa, nai laa daatte amu meu genab bekku. Nai amuam inam. “Kayak Nug he, mauhak iitta meum; Kayak Nug mauhak eɗittom.

⁵⁵ Mauhak, na laa eɗattaknu nahip ɠagattag adeppa daatte? Mauhak, na laa aqappe mauhkkulagnu nahip ban aeg amu adeppa daatte?”

⁵⁶ Mauhaknu ban aeg am hipunin, amu hipuninnu ɠagattag amu ɗo.

⁵⁷ Amge ig Kayak amegppa, “Ena heme,” aot akkunig! Ihinig Naɗi Jesus Kristus, nuhig ɠagattagppa, Kayak Nug ɠagattag amu mekke, ig ban eɗidttem.

⁵⁸ Anam amunu O lailad, ag ɠagattag dayeg! Bittumttum amu aib goppig! Ag hanhan Naɗinu uɗat yagbak ele heig! Aɗinu? Ag dootteb, ag Naɗinu uɗat hetteb, amu geha hamu ii qettoɗma.